वीरगंज । गुठी संस्थानको ५२ बिगहा जग्गामा अवैध माटो उत्खनन र ठेक्काको दुरुपयोग गर्नेमाथी कडा भन्दा कडा कारवाही गर्ने गुठी संस्थान वीरगंजले जनाएको छ । आइतबार वीरगंज महानगरपालिकाले अनुमति वेगर माटो उत्खनन गर्ने स्काभेटरसहित ४ वटा टिपर नियन्त्रणमा लिएको थियो । अवैध उत्खनन गरेको जग्गा गुठी संस्थान को हो ।
गुठी संस्थान वीरगंजका प्रमुख चुडामणि घिमिरे र वीरगंज महानगरपालिका कार्यालयका पदाधिकारीहरुले अबैध उत्खनन भैरहेको जग्गाको सोमबार स्थलगत निरीक्षण गरेका छन् । वीरगंज महानगरपालिकाकाे वडा नम्बर २८ साविक बगही गाविस वडा न ९ दर्दवास्थित गुठीको सार्वजनिक जग्गामा करिब २ महिनाभन्दा अघिदेखि अवैध रुपमा उत्खनन गर्दै आएको स्थानीयले बताए ।
दर्दवास्थित नदिको छेउबाट निरन्तर रुपमा उत्खनन भइरहेको हुँदा यसले भविष्यमा पुरै गाउँनै जोखिममा परेकाे स्थानीय रामाज्ञा राउतले बताए ।
अर्को स्थानीय रामाधार प्रसाद पटेलले साविक एलानी पर्ती र गुठी को करीब ५२ बिगहा जग्गामा छठ घाट, श्मशान घाट, गौचन रहेको र अहिले गुठी संस्थानले सो जग्गा बाली लगाउन ठेक्कामा दिएकोमा आफू खुशी माटो कटान गरि प्रती टिपर १ हजारमा दैनिक २ सय टिपर माटो खनन करीव २ महिना देखि गरिरहेको बताउन्छ्न ।
गुठी संस्थान वीरगंजका कार्यालय प्रमुख चुडामणि घिमिरेले खेती गर्न ठेक्कामा लिएको जग्गाको दुरुपयोग भएको बताउँछन् । उनले करीब ५२ बिगहा जग्गा गुठीको रहेको जसमा माटो कटान गरि गाउँ नै डुवानमा हुने देखिन्छ त्यसैले कडा भन्दा कडा कारवाही गरिने बताए ।
नगर प्रहरी निरीक्षक हरिप्रसाद भुषालकाअनुसार ना ८ ख ४१२५, ना ७ ख ६५९७, ना ७ ख ६६०३ र ना ८ ख५४०३ नम्बरको टिपर र बा २ ख ६२३३ नम्बरको स्काभेटर महानगरले नियन्त्रणमा लिएर वीरगंजकाे आदर्शनगरस्थित बालमन्दिरको परिसरमा राखेको छ ।