वीरगंज । नेपाली कम्युनिष्ट पार्टी (नेकपा) पर्सा निर्वाचन क्षेत्र नं. ४ का उम्मेदवार जयप्रकाश थारुले कम्युनिष्ट आन्दोलनबाटै राजनीतिक यात्रा सुरु गर्दै गाविस अध्यक्षदेखि संविधानसभा सदस्यसम्मको जिम्मेवारी सफलतापूर्वक निर्वाह गरेको उल्लेख गर्दै आफूलाई क्षेत्र नं. ४ का जनताले विकासप्रेमी नेताका रूपमा चिनेको दाबी गरेका छन् ।

प्रेस सेन्टर नेपाल र समाजवादी प्रेस संगठन पर्साको संयुक्त आयोजनामा सम्पन्न परिचयात्मक तथा अन्तरक्रिया कार्यक्रममा बोल्दै उम्मेदवार थारुले आफ्नो कार्यकालमा सुपौलीमा इलाका प्रशासन कार्यालय स्थापना गर्न पहल गरी नागरिकताका लागि सधैं सदरमुकाम धाउनुपर्ने बाध्यताको अन्त्य गरेको स्मरण गराए । साथै, विकास निर्माणका कामहरू विवादरहित रूपमा सम्पन्न गर्न सफल भएकै कारण मतदाताहरूको विश्वास आफूले पाएको उनको भनाइ थियो ।

उनले नेपाली कम्युनिष्ट पार्टी राष्ट्रिय तथा अन्तर्राष्ट्रिय राजनीतिमा स्थापित नेतृत्व भएको पार्टी रहेको उल्लेख गर्दै सो पार्टीको उम्मेदवारका रूपमा जनमत आफूप्रति आकर्षित हुँदै गएको दाबी गरे । प्रेस सेन्टर नेपाल र समाजवादी प्रेस संगठनले निर्वाह गरेको भूमिकाले आफ्नो मनोबल अझै बढाएको समेत उनले बताए ।

आफ्नो जित सुनिश्चित रहेको विश्वास व्यक्त गर्दै थारुले पर्साका चारै निर्वाचन क्षेत्रका उम्मेदवार, पार्टीपंक्ति तथा शुभेच्छुकहरूलाई अझ बढी मतान्तरले विजयी गराउन व्यापक र प्रभावकारी अभियानमा जुट्न आग्रह गरे ।

अन्तरक्रिया कार्यक्रममा नेकपाका केन्द्रीय सदस्यहरू रामचन्द्र साह, विजय महतो, बालगोपाल थापा, बाबुराम कौशिक, बृजलाल पासवान, नेता बलिराम साह, रामदरश कुशवाहा, प्रभाकर गुप्तालगायत प्रेस सेन्टर नेपाल र समाजवादी प्रेस संगठन नेपालसँग आबद्ध पत्रकारहरूको उल्लेखनीय उपस्थिति रहेको थियो ।

वीरगंज । नेपाली कम्युनिष्ट पार्टी (नेकपा) पर्सा निर्वाचन क्षेत्र नं. ३ का प्रतिनिधिसभा सदस्यका उम्मेदवार छोटेलाल यादवले आगामी फागुन २१ गते हुने निर्वाचनमा सही उम्मेदवारको पहिचान गर्न अत्यन्तै आवश्यक रहेको बताएका छन्।

प्रेस सेन्टर नेपाल र समाजवादी प्रेस संगठन पर्साको संयुक्त आयोजनामा सम्पन्न परिचयात्मक तथा अन्तरक्रिया कार्यक्रममा बोल्दै उम्मेदवार यादवले आफू अन्य उम्मेदवारहरूको तुलनामा योग्य, सक्षम र जनतासँग प्रत्यक्ष रूपमा जोडिएको उम्मेदवार भएको दाबी गरे।

यादवले आफू सधैं जनताको दुःख–सुखमा सहभागी हुँदै आएको उल्लेख गर्दै जनताले आफूलाई विश्वास गर्ने आधार रहेको बताए। उनले क्षेत्रबासी तथा सञ्चारमाध्यमले क्षेत्रका सबै उम्मेदवारहरूको विगत र यथार्थलाई जनतासमक्ष पुर्‍याउनुपर्ने आवश्यकता औंल्याए।

उनले अन्य उम्मेदवार विजयी भए भ्रष्टाचार बढ्ने दाबी गर्दै आफूलाई जनताले जिताए पर्सा–३ को समग्र विकास गरेर देखाउने प्रतिबद्धता जनाए। कांग्रेसका उम्मेदवार पटक–पटक सांसद र मन्त्री बने पनि क्षेत्रमा उल्लेखनीय विकास नगरेको आरोप लगाउँदै यादवले आफू निर्वाचित भए विकासका कामहरू गरेर देखाउने बताए।

यादवले आगामी निर्वाचनमा नेकपाको कुनै विकल्प नरहेको दाबी गर्दै पार्टीलाई विजयी गराउन सबैलाई आ–आफ्नो स्थानबाट सक्रिय भूमिका निर्वाह गर्न आग्रह गरे।

अन्तरक्रिया कार्यक्रममा नेकपाका केन्द्रीय सदस्यहरू रामचन्द्र साह, विजय महतो, बालगोपाल थापा, बाबुराम कौशिक, बृजलाल पासवान, नेता बलिराम साह, रामदरश कुशवाहा, प्रभाकर गुप्तालगायत प्रेस सेन्टर नेपाल र समाजवादी प्रेस संगठनसँग आबद्ध पत्रकारहरूको उल्लेखनीय उपस्थिति रहेको थियो।