वीरगंज । नेपाल पत्रकार महासंघ पर्साको आयोजनामा पत्रकार आचारसंहिता सम्बन्धी एकदिने अनुशिक्षण कार्यक्रम सम्पन्न भएको छ । महासंघको सभाहलमा आयोजित कार्यक्रममा जिल्लाका विभिन्न संचारमाध्यमका नयाँ पत्रकारहरूको उल्लेखनीय सहभागिता रहेको थियो ।
नेपाल पत्रकार महासंघ पर्सा शाखाका अध्यक्ष ओमप्रकाश खनालको अध्यक्षतामा सम्पन्न कार्यक्रमको उद्घाटन महासंघका केन्द्रीय सचिव अशोक तिवारीले गरेका थिए । कार्यक्रममा बोल्दै सचिव तिवारीले पत्रकारहरूले पेशागत मर्यादा र आचारसंहिताको पालना गर्दै पत्रकारिता गर्नुपर्नेमा जोड दिए ।
उनले पत्रकारले आफ्नो आचरणप्रति सचेत नभए आलोचना हुने उल्लेख गर्दै सत्य, निष्पक्षता र जिम्मेवार पत्रकारितालाई प्राथमिकता दिन आग्रह गरे । साथै सरकारले गरेको आर्थिक नाकाबन्दीविरुद्ध नेपाल पत्रकार महासंघ आन्दोलनमा रहेको बताउँदै आन्दोलनका कार्यक्रमहरू सफल बनाउन सबै पत्रकारलाई सहभागी हुन आह्वान समेत गरे ।
कार्यक्रममा नेपाल पत्रकार महासंघ मधेश प्रदेशका अध्यक्ष श्याम बञ्जारा, पूर्व केन्द्रीय सचिव दिपेन्द्र चौहान, समाजवादी प्रेस संगठन नेपाल पर्साका अध्यक्ष शम्भु कुमार सुमन लगायतले मन्तव्य व्यक्त गरेका थिए । कार्यक्रमकाे संचालन पत्रकार महासंघ पर्साका सचिव विजय चाैहानले गरेका थिए ।
अनुशिक्षण कार्यक्रममा नेपाल पत्रकार महासंघका केन्द्रीय लेखा समिति संयोजक केसी लामिछानेले प्रशिक्षण दिएका थिए । उनले पत्रकार आचारसंहिताको व्यवहारिक पक्ष, समाचार सम्पादनमा अपनाउनुपर्ने सावधानी तथा पत्रकारिताका वर्तमान चुनौतीबारे सहजीकरण गरेका थिए ।
लामिछानेले पत्रकारितामा सत्यतथ्य, निष्पक्षता र सामाजिक उत्तरदायित्वलाई प्राथमिकता दिनुपर्नेमा जोड दिएका थिए । कार्यक्रममा जिम्मेवार समाचार सम्प्रेषण, सञ्चारमाध्यमको विश्वसनीयता तथा पत्रकारको पेशागत मर्यादासम्बन्धी विषयमा समेत प्रशिक्षण दिइएको थियो ।
