नेपालगंज । पश्चिम नेपालको प्रमुख सरकारी स्वास्थ्य संस्था भेरी अस्पताल यतिबेला औषधि अभाव, आर्थिक अनियमितता, स्टोर आगलागी तथा प्रशासनिक सेटिङका आरोपका कारण विवादमा तानिएको छ । अस्पतालका तत्कालीन मेडिकल सुपरिटेन्डेन्ट निराजन सुबेदी, तत्कालीन फार्मेसी इन्चार्ज तथा हालका स्टोर इन्चार्ज उदयवीर शाही र वर्तमान मेडिकल सुपरिटेन्डेन्ट नवीन धर्नालमाथि विभिन्न प्रश्न उठिरहेका छन् ।
अस्पताल स्रोतका अनुसार पूर्व मेसु सुबेदीको कार्यकालमा औषधि खरिद, स्टोर व्यवस्थापन तथा सप्लाइ प्रक्रियामा “सेटिङ समूह” सक्रिय रहेको आरोप लाग्दै आएको थियो । अहिले सोही समूहलाई जोगाउन तथा पुराना फाइल र अनियमितता दबाउन स्वास्थ्य मन्त्रालयको उच्च तहसम्म पहुँच प्रयोग भइरहेको चर्चा अस्पतालभित्र चुलिएको बताइएको छ ।
स्रोतका अनुसार बिरामीले चिकित्सकको पुर्जी लिएर फार्मेसी पुग्दा १० मध्ये १–२ वटा मात्रै औषधि पाउने अवस्था रहेको छ । विशेषगरी विष सेवन गरी इमर्जेन्सीमा आउने बिरामीका लागि आवश्यक ‘प्रलिडोक्जिम’ (Pralidoxime) जस्ता अत्यावश्यक औषधि लामो समयदेखि अभाव रहेको दाबी गरिएको छ ।
यता, कमिसनका लागि एउटै कम्पोजिसनका विभिन्न ब्रान्डका औषधि अत्यधिक मात्रामा खरिद गरिएको तथा करोडौँ मूल्य बराबरका औषधि गोदाममै म्याद गुज्रिएको आरोप पनि लागेको छ । स्रोतका अनुसार Veltico Injection, Dabirom 110, Atenol 25, Bactolac लगायतका औषधि ठूलो परिमाणमा एक्सपायरी भएका छन् भने थप लाखौँ मूल्यका औषधि म्याद सकिने अवस्थामा पुगेका छन् ।
भेरी अस्पतालको औषधि स्टोरमा भएको आगलागी घटनामाथि समेत गम्भीर प्रश्न उठाइएको छ । आगलागीपछि ठूलो परिमाणमा औषधि “रिटर्न” गरिएको, स्टक मिलानका नाममा हिसाब मिलाइएको तथा केही प्रमाण नष्ट गरिएको आशंका कर्मचारीहरूले व्यक्त गरेका छन् । उक्त घटनाबारे अख्तियारसँग पत्राचार भएको चर्चा भए पनि आधिकारिक जानकारी सार्वजनिक गरिएको छैन ।
यसैबीच सार्वजनिक भएका भनिएका ह्वाट्सएप संवादहरूमा कम मूल्यका सामानलाई उच्च मूल्यमा खरिद देखाउने, खरिदलाई टुक्र्याएर कोटेशनमार्फत प्रक्रिया मिलाउने तथा सीमित समूहको प्रभावमा निर्णय गरिने विषय उल्लेख गरिएको दाबी गरिएको छ ।
उदयवीर शाहीको जीवनशैलीमाथि समेत प्रश्न उठाइएको छ । स्रोतका अनुसार छोटो समयमै उनले करोडौँको घरजग्गा जोडेको तथा महँगो BYD विद्युतीय गाडी प्रयोग गरिरहेको चर्चा भइरहेको छ । साथै सरकारी जिम्मेवारीमै रहँदा अनुमति प्रक्रियाबिनै भारतको दिल्लीमा पीएचडी अध्ययन गरिरहेको विषयले थप विवाद सिर्जना गरेको बताइएको छ ।
यता वर्तमान मेसु नवीन धर्नाल आएपछि अस्पतालभित्र “पुराना विषय बाहिर नलानु” र “भ्रष्टाचारका कुरा मिडियामा नबोल्नु” भन्ने प्रकारको ब्रिफिङ भइरहेको चर्चा समेत कर्मचारीहरूले गरेका छन् । यद्यपि, यी आरोपबारे अस्पताल प्रशासनले औपचारिक प्रतिक्रिया दिएको छैन ।
स्थानीय नागरिक तथा सेवाग्राहीहरूले भने सरकारी अस्पतालभित्रको यस्तो अवस्थाले गरिब बिरामी प्रत्यक्ष मारमा परेको बताएका छन् । उनीहरूले स्वास्थ्य तथा जनसंख्या मन्त्रालय, अख्तियार दुरुपयोग अनुसन्धान आयोग तथा सम्बन्धित निकायले औषधि खरिद, स्टोर आगलागी, एक्सपायरी औषधि, प्रशासनिक सेटिङ तथा सम्पत्ति वृद्धिसम्बन्धी विषयमा निष्पक्ष छानबिन गरी सत्यतथ्य सार्वजनिक गर्नुपर्ने माग गरेका छन् ।
