वीरगंज । सशस्त्र प्रहरी बल नेपालको “सीमाबासीसँग सशस्त्र प्रहरी कार्यक्रम” अन्तर्गत वीरगंज महानगरपालिका–२२ मनिहारी निवासी विपन्न एकल दलित महिला छिमी मलिलाई नवनिर्मित घर हस्तान्तरण गरिएको छ ।
स्वर्गीय चोकट मलिकी श्रीमती छिमी मलिको आर्थिक अवस्था कमजोर भई कष्टकर जीवनयापन गर्दै आएको अवस्थालाई मध्यनजर गर्दै सशस्त्र प्रहरी बल नेपाल नं. १३ गण हे.क्वा. पर्सा, सम्बन्धित वडाका जनप्रतिनिधि तथा सहयोगी व्यक्तिहरूको पहलमा घर निर्माण गरिएको हो ।
सशस्त्र प्रहरी बलको जनशक्ति परिचालन गरी निर्माण सम्पन्न गरिएको उक्त घर आइतबार एक कार्यक्रमबीच हस्तान्तरण गरिएको जनाइएको छ । वर्षौंदेखि असुरक्षित तथा अस्थायी टहरामा बस्दै आएकी मलिलाई सुरक्षित आवास उपलब्ध गराउने उद्देश्यले घर निर्माण गरिएको सशस्त्र प्रहरी बल नेपाल नं. १३ गण हे.क्वा. पर्साका सूचना अधिकारी प्रहरी नायव उपरीक्षक मोहन राज निरौलाले जानकारी दिए ।
सशस्त्र प्रहरी बलले सीमा सुरक्षासँगै सामाजिक उत्तरदायित्व अन्तर्गत विपन्न, असहाय तथा सीमान्तकृत समुदायको जीवनस्तर सुधारका लागि विभिन्न जनसेवामूलक कार्यक्रम सञ्चालन गर्दै आएको जनाएको छ ।
नवनिर्मित घर प्राप्त गरेपछि छिमी मलिले सुरक्षित आवासको सपना पूरा भएको भन्दै सशस्त्र प्रहरी बलप्रति आभार व्यक्त गरेकी छन् ।
