वीरगंज । वीरगंज महानगरपालिका–१० अशोक वाटिकास्थित माउन्ट मकालु सेकेन्डरी स्कुलको आयोजनामा एक दिने निःशुल्क आँखा जाँच शिविर सम्पन्न भएको छ।
शिविर वीरगंज कम्युनिटी आई सेन्टर तथा तिलगंगा आँखा अस्पतालको प्राविधिक सहयोगमा सञ्चालन गरिएको विद्यालयले जनाएको छ । कार्यक्रममा अनुभवी अप्टोमेट्रिस्ट प्रभात चाैरसियाले विद्यार्थी, अभिभावक तथा स्थानीय बासिन्दाहरूको आँखा परीक्षण गरेका थिए ।
शिविरमा श्रीती चौधरी र ओमप्रकाश चौधरीले सहजीकरण तथा आवश्यक सहयोग प्रदान गरेका थिए । शिविर अन्तर्गत सेवाग्राहीहरूलाई निःशुल्क पूर्ण आँखा परीक्षण सेवा उपलब्ध गराइएको थियो भने चस्मा खरिदमा २५ प्रतिशत छुटको व्यवस्था गरिएको आयोजकले जनाएको छ ।
यसका साथै मोतियाबिन्दु सम्बन्धी समस्या भएका बिरामीहरूका लागि निःशुल्क शल्यक्रिया सेवा उपलब्ध गराइने जानकारी पनि दिइएको छ।
विद्यालयका प्रधानाध्यापक राहुल श्रीवास्तवका अनुसार कार्यक्रमको मुख्य उद्देश्य विद्यालय समुदायमा आँखा स्वास्थ्यसम्बन्धी सचेतना अभिवृद्धि गर्नुका साथै प्रारम्भिक अवस्थामै आँखा सम्बन्धी समस्याको पहिचान गर्नु रहेको हो ।
विद्यालय प्रशासनले आगामी दिनहरूमा पनि यस्ता सामाजिक उत्तरदायित्वमूलक कार्यक्रमलाई निरन्तरता दिने प्रतिबद्धता व्यक्त गरेको छ ।
