Date
मङ्ल, मंसिर १, २०८३
Tue, November 17, 2026
Home Blog Page 651

स्व. वि.पी.काे स्मृति दिवसकाे अवसरमा जगरनाथपुरमा वृक्षाराेपण

0

वीरगंज । नेपालको पहिलो निर्वाचित प्रधानमन्त्री एवम् नेपाली कांग्रेसका संस्थापक स्व. वि.पी. कोइरालाकाे ४० औं स्मृति दिवसकाे अवसरमा शनिबार जगरनाथपुर गाउँपालिकामा सरसफाई तथा बृक्षारोपण कार्यक्रम सम्पन्न भएको छ ।

नेपाली कांग्रेस जगरनाथपुर गाउँपालिकाकाे आयाेजनामा भएकाे कार्यक्रमकाे उद्घाटन वृक्षाराेपण गरेर नेपाली कांग्रेसका केन्द्रिय सदस्य रमेश रिजालले गरेका थिए ।

नेपाली कांग्रेस जगरनाथपुर गाउँपालिकाका सभापति बिहारी महतो नुनियाकाे सभापतित्वमा भएकाे कार्यक्रममा पर्सा जिल्ला सभापति जनार्दन सिंह क्षेत्री, प्रदेश सभा सदस्य शंकर चौधरी, पर्सा क्षेत्र नं. ३ का सभापति श्रीकिशुन चाैहान, क्षेत्र नं. ४ का सभापति एवम् जगरनाथपुर गाउँपालिका अध्यक्ष श्रीकान्त प्रसाद यादव, कांग्रेस पर्साका काेषाध्यक्ष प्रेम थापा, युवा नेता राकेश यादव, नेतृ किरण सरकार, पर्सा क्षेत्र नं. ४ का कोषाध्यक्ष बिनय द्विवेदी, प्रदेश सभा क्षेत्रिय सचिव इमरान मियाँ लगायतकाे उपस्थिती रहेकाे थियाे भने कार्यक्रमकाे संचालन क्षेत्रिय सचिव बलिष्टर अहमदले गरेका थिए । 

लागु औषधकाे कारमा तस्करी, वीरगंजका अनिल पक्राउ

0

वीरगंज । लागु औषध एम्पुल र नाईट्राभेटसहित एउटा कार प्रहरीले पक्राउ गरेकाे छ । प्रहरीले वीरगंज महानगरपालिकाकाे वडा नं. १६ रजतजयन्ती चोकबाट बिआर ०७ वाई ८२०१ नम्बरकाे कार र वीरगंज १० निवासी ३१ बर्षिय अनिल कुमारलाई पक्राउ गरेकाे हाे ।

विशेष सूचनाको आधारमा जिल्ला प्रहरी कार्यालय पर्साबाट प्रहरी निरिक्षक प्रज्वल थपलियाको कमाण्डमा खटिएको टोलीले शुक्रबार दिउसाे ४:४६ बजे लागु औषध एम्पुल तथा नाईट्राभेट बाेकेकाे कार र अनिललाई पक्राउ गरेकाे जिल्ला प्रहरी कार्यालय पर्साले जनाएकाे छ ।

रजतजयन्ती चोकस्थित सडकखण्डमा सुजुकी मारूती अल्टो कारलाई रोकी जाँच गर्दा  अनिल कुमारले उक्त कारको सिटमुनी फल्स बटम बनाई कागजले वेरी राखेको अवस्थामा लागु औषध फेनारगन ८८६ एम्पुल, डाइजेपाम ११५५ एम्पुल र नुरफिन ९७८ एम्पुल गरी जम्मा ३०१९ एम्पुल तथा नाईट्राभेट १७८५ ट्याब्लेट फेला परेको प्रहरीले जनाएकाे छ ।

उक्त लागु औषधसहित कार र अनिललाई नियन्त्रणमा लिई लागु औषध सम्बन्धी कसूरमा अनुसन्धान अगाडि बढाइएको जिल्ला प्रहरी कार्यालय पर्साका प्रवक्ता प्रहरी नायब उपरिक्षक प्रल्हाद कार्कीले जानकारी दिए ।

अनलाइन सफ्टवेयर तालिम सम्पन्न

0

वीरगंज । वीरगंज महानगरपालिकाले वडाबाट प्रदान गरीने सेवालाई डिजिटल बनाउनका लागि ५ दिने अनलाइन सफ्टवेयर तालिम शनिबार समापन गरेको छ । महानगरको १ देखि ३२ वार्डमा खटिने कम्प्युटर अपरेटरको लागि आयोजना गरिएको तालिमको समापन गरिएको हो ।

तालिमका सहभागिहरुलाई एकिकृत सम्पत्ती कर, राजश्व, घटना दर्ता दस्तुर र अन्य सिफारीस दस्तुरको शुल्क वडाबाटै डिजिटल रुपमा काट्न सिकाईएको छ । उक्त कार्यक्रमको वीरगंज महानगरपालिकाका प्रमुख राजेशमान सिंहले समापन गरेका हुन् ।

समापन कार्यक्रमलाई सम्बोधन गर्दै प्रमुख सिंहले जन सेवालाई प्रमुख स्थान दिएर काम गर्न निर्देशन दिए । विगतमा सय/दुई सयको राजश्व तिर्न त्यो भन्दा बढि पैसा र समय खर्चेर महानगरको कार्यालयमा धाउनुपर्ने समस्याको समाधानका लागि वडाबाटै सवै सेवा दिने उदेश्यले प्रविधिमैत्री वडा बनाउन लागिएकोले सोहि अनुसारको सेवा दिन निर्देशन दिए ।

तालिमका सहभागिहरुलाई प्रमुख सिंहले प्रमाणपत्र समेत वितरण गरेका थिए ।

राष्ट्रिय भूमि आयोग पर्साद्वारा जनप्रतिनिधीलाई अभिमुखीकरण

0

वीरगंज । पर्साको बहुदरमाई नगरपालिकामा अभिमुखीकरण कार्यक्रम सम्पन्न भएको छ । राष्ट्रिय भूमि आयोग पर्साले बहुदरमाई नगरपालिकाका नवनिर्वाचित जनप्रतिनिधीहरुको लागि अभिमुखीकरण कार्यक्रमको आयोजना गरेको हो ।

‘हाम्रो अभियान भूमिहीन दलित, भूमिहीन सुकुम्बासी र अव्यवस्थित बसोबासीको समस्याको समाधान हाम्रै पालामा’ भन्ने नारालाई साकार पार्न राष्ट्रिय भूमि आयोग पर्साले सक्रियता बढाएको छ । भूमिहिन, सुकुम्बासी, दलित एवम् अव्यवस्थित बसोबासीहरुको पहिचान कसरी गर्ने, कसलाई भूमि उपलब्ध गराउने, सूचना कसरी संकलन गर्ने लगायतका बारेमा राष्ट्रिय भूमि आयोग पर्साका अध्यक्ष तबरेज अहमद र आयोगका सदस्य सुरेन्द्र सिंहले प्रशिक्षण दिएका थिए ।

सोही अवसरमा भूमि सम्बन्धी कामको सहजताका लागि सेवा केन्द्र सहजीकरण समिति गठन गर्ने र नगरपालिकामा सेवा केन्द्रको स्थापना पनि निर्णय भएको आयोग पर्साका अध्यक्ष अहमदले बताए । उनका अनुसार बाँकी रहेको सूचना तथा तथ्यांक संकलनका लागि केन्द्रीय आयोगलाई सिफारिस गर्ने पनि निर्णय गरिएको छ ।

अभिमुखीकरण कार्यक्रममा बहुदरमाई नगरपालिकाका नगर प्रमुख सिंगासन सा तेली, उप प्रमुख सुष्मा कुशवाह, भूमि आयोग पर्साका सदस्य हेम कुमारी भट्टराई, वडाअध्यक्ष, कार्यपालिका सदस्य, कर्मचारी लगायतको उपस्थिती रहेको थियो ।

राष्ट्रिय भूमि आयोग पर्साले वीरगञ्ज महानगरपालिका, पर्सागढी र बहुदरमाई नगरपालिका र ठोरी गाउँपालिकामा सम्झौता गरेर गतिविधि अघि बढाएको छ । अन्य पालिकामा पनि दोस्रो चरणमा सम्झौता गरेर काम अघि बढाइने तयारी भइरहेको आयोगका अध्यक्ष अहमदले जानकारी दिए ।

पर्साका यादव जनप्रतिनिधिलाई सम्मान

0

वीरगंज । पर्साको स्थानीय तहमा निर्वाचित यादव जनप्रतिनिधिलाई शनिबार सम्मान गरिएको छ । यादव युवा समाज पर्साले एक कार्यक्रमका बिच यादव जनप्रतिनिधिलाई सम्मान गरेकाे हो ।

यादव पालिका प्रमुख, वडाध्यक्ष र सदस्यहरुलाई खादा र मायाको चिन्ह प्रदान गरि सम्मान गरिएको यादव युवा समाज पर्साका हरेन्द्र यादवले जानकारी दिए । उनका अनुसार पर्सामा निर्वाचित यादव जनप्रतिनिधिलाई हौसला प्रदान गर्न यो सम्मान गरिएको हाे ।

यादव समुदायबाट जिल्लाको सखुवा प्रसौनी गाउँपालिकाको प्रमुखमा यस्वन्त यादव र जगरनाथपुर गाउँपालिकाको प्रमुखमा श्रीकान्त यादव निर्वाचित भएका छन ।

यस्तै जिल्लाको अधिकांश पालिकाको वडाध्यक्ष र सदस्यमा यादव जनप्रतिनिधि निर्वाचित भएका छन ।

यादव युवा समाज पर्साका अध्यक्ष विनोद यादवको अध्यक्षतामा भएको कार्यक्रममा श्री श्री गोपाल सेवा समिति पर्साका अध्यक्ष बिरेन्द्र यादव, जसपाकी नेतृ मधुमाया यादव, जगरनाथपुर गाउँपालिकाका अध्यक्ष श्रीकान्त यादव, सखुवा प्रसौनी गाउँपालिकाका अध्यक्ष यसवन्त यादव, डाक्टर प्रीति यादव, डाक्टर अशोक यादव, तिवारी यादव लगायतकाले मन्तव्य राखेका थिए । कार्यक्रमको सहजीकरण डा. घनश्याम यादवले गरेका थिए ।

पर्यावरणलाई सन्तुलीत राखेर बिकास निर्माण गराैं : मन्त्री यादव

0

वीरगंज । वन तथा वातावरण मन्त्री प्रदीप यादवले चितवन राष्ट्रिय निकुञ्जको अवलोकन तथा अनुगमन गरेका छन् । निकुञ्जसँगै मन्त्री यादवले माडी क्षेत्रमा भइरहेका बिकास निर्माणका कामहरुको स्थलगत अवलोकन पनि गरेका हुन् ।

माडीमा निर्माणाधिन हुलाकी सडक निर्माणका क्रममा भइरहेका अवरोध एवम् विद्युत प्रसारण बिस्तारका लागि बन कार्यालय एवम् मन्त्रालयबाट भएका अवरोधहरु आफ्नै कार्यकालमा समाधान गरेर काम अघि बढाउने प्रतिबद्धता पनि मन्त्री यादवले व्यक्त गरेका छन् ।

पर्यावरणलाई सन्तुलीत राखेर बिकास निर्माणका काम गर्नुपर्नेमा मन्त्री यादवको जोड छ । हुलाकी सडक र बनको बिचमा पटकपटक उत्पन्न हुने विवादको स्थायी समाधानका लागि केही दिनभित्रै काठमाण्डौमा सर्वपक्षिय बैठक आह्वान गर्ने र पर्यावरणीय सन्तुलनलाई नबिगारी बिकास गर्ने बारे निस्कर्ष निकाल्ने मन्त्री यादवको भनाई छ ।

उनले भने, “बिकास आवश्यक छ तर बिकासको नाममा बिनाश पनि भइरहेको छ । तसर्थ हामीले बनजंगल र बन्य जन्तुलाई कुनै असर नपर्ने गरी बिकास गर्नुपर्छ ।”

मन्त्री यादवले चितवन राष्ट्रिय निकुञ्जको स्थलगत अवलोकन पश्चात निकुञ्जको कार्यालयमा गएर निकुञ्जले गरेका गतिविधि एवम् त्याहाँका समस्याका सम्बन्धमा छलफल गरेका थिए । चितवन राष्ट्रिय निकुञ्जका प्रमुख संरक्षक हरि बहादुर आचार्यले निकुञ्जको बारेमा मन्त्री यादवलाई जानकारी समेत गराएका थिए ।

निकुञ्जमा देखिएका समस्याको बारेमा अन्य सम्बन्धित निकाय र विभागहरुसँग छलफल गरेर समाधान गर्ने मन्त्री यादवले आश्वासन पनि दिएका थिए । बन्यजन्तु तथा काठ चोरीको घटनालाई कम गर्न प्रविधिको जडान गर्ने मन्त्री यादवको भनाई छ । साथै मन्त्री यादवले वनजंगल एवम् वन्यजन्तुको सुरक्षामा नेपाली सेनाले खेलेको भूमिकाको पनि सह्राना गरे ।

नेपालको सून्दरता नै वनजंगल तथा वातावरण भएको हुँदा यो प्राकृतिले दिएको सून्दरतालाई संरक्षण एवम् संवर्धन गर्ने सबैको दायित्व भएको उनले बताए । निकुञ्जलाई व्यवस्थित बनाउन तथा बन्यजन्तु एवम् बनजंगलको संरक्षणका लागि कार्यविधि परिवर्तन गर्नुपरेपनि गर्न सकिने मन्त्री यादवको भनाई छ ।

प्रधानमन्त्रीसँग झगडा गरेर भएपनि वनजंगल र वन्यजन्तुको संरक्षणका लागि बजेट ल्याउने प्रतिबद्धता जनाउँदै उनले ठोस योजना ल्याउन महानिर्देशकलाई निर्देशन पनि दिए ।

मन्त्री यादवले भरतपुरस्थित चितवन मेडिकल कलेजमा उपचाररत पर्साको पर्सागढी नगरपालिकाका कार्यपालिका सदस्य असलम आलमकी श्रीमतीसहित अन्य परिवारका सदस्यहरुको स्वास्थ्य अवस्थाको बारेमा पनि जानकारी लिएका हुन् । मेडिकल कलेजमै पुगेर मन्त्री यादवले उनीहरुलाई भेटी शीघ्र स्वास्थ्य लाभको कामना समेत गरेको मन्त्री यादवका उपस्वकिय सचिव निखिल वर्णवालले जानकारी दिए ।

यसअघि भरतपुर बिमानस्थलमा मन्त्री यादवलाई भरतपुर महानगरपालिकाकी प्रमुख रेणु दाहाल, जिल्ला प्रशासन कार्यालय चितवनका प्रमुख जिल्ला अधिकारी आसमान तामाङ् लगायतले स्वागत गरेका थिए ।

मन्त्री यादवसँगै बन तथा वातावरण मन्त्रालयका सचिव डा. प्रेम नारायण कँडेल, राष्ट्रिय निकुञ्ज तथा वन्यजन्तु संरक्षण विभागका महानिर्देशक डा. रामचन्द्र कँडेल, हुलाकी सडक निर्देशनालयका धर्मेन्द्र कुमार झा लगायतको प्रतिनिधीमण्डलले निकुञ्जसँगै माडी क्षेत्रको अवलोकन गरेका हुन् ।

तेलि कल्याण समाजको केन्द्रिय सचिवालय बैठक सम्पन्न

0

वीरगंज । तेलि कल्याण समाज नेपालको केन्द्रिय सचिवालय बैठक शनिबार वीरगंजमा सम्पन्न भएको छ । समाजका केन्द्रिय अध्यक्ष शैलेन्द्र साहको अध्यक्षतामा बसेको बैठकले तेलि कल्याण समाजको तेस्राे केन्द्रिय महाधिवेशन अगामी असोज ५ र ६ गते वीरगंजमा गर्ने निर्णय गरेको छ । 

यस अघि काठमाडाैंमा भएकाे समाजकाे दुईटा महाधिवेश यसपालि वीरगंजमा हुने भएकाे तेली कल्याण समाज पर्साका अध्यक्ष ध्रव साहले जानकारी दिए । 

वीरगंजस्थित मकालु हाेटलमा बसेकाे समाजकाे सचिवालय बैठकले वीरगंजमा हुने महाधिवेशन सफल बनाउन समाजका केन्द्रिय अध्यक्ष शैलेन्द्र साह कै संयाेजकत्वमा १५१ सदस्यीय महाधिवेशन मुल समिती समेत गठन गरेको पर्सा अध्यक्ष ध्रव साहले वताए ।

यसैगरी बैठकले महाधिवेशन तयारीको लागि केन्द्रिय उपाध्यक्ष विश्वनाथ साहको संयाेजकत्वमा ११ सदस्यीय अर्थ समिती गठन गर्नुकाे साथै निर्वाचन समिती र प्रचार प्रसार समिती समेत गठन गरेको छ ।

बैठकमा समाजका केन्द्रिय उपाध्यक्ष दुर्गा साह, सचीव सत्यनारायण साह, कोषाध्यक्ष अजय कुमार साह, प्रदेश सभा सदस्य राजेश्वर साह, पारस साह, समाजका बारा जिल्ला अध्यक्ष बजरंगी साह, रौतहट जिल्ला अध्यक्ष छोटेलाल साह, सिरहाकी निलम साह लगायतको उपस्थिती रहेको थियो ।

वीरगंजमा ७ दिने एडभान्स कुक तालिम सुरू

0

वीरगंज । होटल संघ नेपाल, होटल संघ मधेश प्रदेश नेपाल पर्यटन बोर्ड तथा यूएनडिपीको संयुक्त लगानीमा वीरगंजमा ७ दिने एडभान्स कुक तालिम सुरू भएको छ ।

वीरगंजस्थित होटल भिष्वामा होटल तथा रेस्टुरेन्टमा आबद्ध सेफ तथा कुकहरुका लागि आयोजना गरिएको तालिमको उदघाटन गर्दै वीरगंज महानगरपालिकाका मेयर रोजशमान सिंहले यस्ता खालका प्रशीक्षणले महानगर भित्र संचालनमा रहेका होटलले ग्राहकलाई दिने सेवामा सुधार ल्याउने विश्वास व्यक्त गर्नुभएको छ ।

वीरगंज सहर भारतको सिमानाकासंग जोडिएकोले यँहा भारतीय परिकारको स्वाद पाउने गरेपनि अब यो प्रशिक्षण पश्चात अब नेपाली खानाको स्वाद पाउनेमा आफू विश्वस्त रहेको बताउनुभयो ।

सेफ एसोसिएसन नेपालका अध्यक्ष श्याम लामाले बिरगंजमा अन्य परिकारसंगै नेपाली परिकार पनि उपलब्ध गराउन सक्यौ भने, ग्राहकहरु नेपाली परिकार खोज्दै बिरगंज बाहिर जानै नपर्ने बताउनुभयो उँहाले खाना पकाउनु एउटा विषेश कला हो भने त्यसलाई आकर्षक ढंगले प्रस्तुत गर्नु अर्काे महत्वपूर्ण कला भएको बताउनु भयो । तालिमले ग्राहकलाई गर्ने सत्कार संगै खानाको स्वाद र ग्राहकको सामु खानलाई कसरी पस्कने विषयमा ज्ञान प्राप्त हुने बनाउनुभयाे ।

होटल संघ नेपालका सहसचिव युवराज श्रेष्ठले पछिल्लो समय होटलका काम गर्न आउने कर्मचारीहरु ग्राहकको सेवा भन्दापनि सर्टिफिकेटको लागि मात्र आउने गरेकोमा चिन्ता ब्यक्त गर्नुभयो ।

नेपाल पर्यटन बोर्डका सुनिल शर्माले यसप्रकारको तालिम आयोजनाको मुख्य उदेश्य नेपाली युवाहरुलाई सक्षम बनाई, रोजगारको वातावरण सृजना गरि आत्मनिर्भर बनाउनु रहेको बताउनुभयो । उँहाले ५ तारे होटलले भौतिक रुपमा पूर्वाधार आकर्षक बनाएर मात्र हुदैन, होटलले प्रदान गर्ने सेवा, सुविधा र स्वादमा पनि ध्यान दिनुपर्छ भन्नुभयो ।

कार्यक्रममा वीरगंज महानगरपालिकाका मेयर राजेशमान सिंहलाई मायाको चिनो प्रदान गरिएको थियो भने होटल संघ मधेश प्रदेशमा आबद्ध भएका होटलहरुलाई प्रमाण पत्र वितरण गरिएको थियो । कार्यक्रममा करिब ५० जना भन्दा बढीको होटल तथा रेस्टुरेन्टहरुका कुकहरुको उपस्थिति रहेको थियो ।

होटल संघ नेपाल मधेश प्रदेशका अध्यक्ष विजय झुनझुनवालाको सभापतित्वमा संचालन भएको कार्यक्रममा सेफ लगायत वरिगंजका होटल तथा रेस्टुरेन्ट व्यवसायीको समेत उपस्थिति रहेको थियो ।

कार्यक्रमको सहजिकरण नाटा मधेश प्रदेशका सल्लाहकार मोहन प्रधानले गर्नुभएको थियो ।

राजश्व अनुसन्धान र वीउवा संघ बिच छलफल

0

वीरगंज । राजश्व अनुसन्धानमा देखा परेका नितीगत तथा व्यवहारिक समस्याबारे शुक्रवार वृहद छलफल सम्पन्न भएको छ ।

राजश्व अनुसन्धानका महानिर्देशक झलकराम अधिकारीले राजस्व चुहावट र नियन्त्रणमा विभाग कडाइका साथ लगेको बताए ।

वीरगञ्ज उद्योग वाणिज्य संघका अध्यक्ष डा.सुबोधकुमार गुप्ताले ब्यपारीलाई दुख दिने कार्य कहि कतैबाट नगर्न अनुरोध गर्दै व्यवहारिक समस्याको सामाधान गर्न आवश्यक रहेको बताए ।

छलफलमा राजश्व अनुसन्धानका उपन्यायाधिवक्ता अर्जुन काईराला, राजश्व अनुसन्धान कार्यालय पथलैयाका प्रमुख कृष्णप्रसाद पाण्डे, विभागका सूचना अधिकृत पवन बस्नेत, संघका वरिष्ठ उपाध्यक्ष अनिलकुमार अग्रवाल, उपाध्यक्ष माधव राजपाल, सचिव आशिष लाठ, सहसचिव सुशान्त चाचान र कार्यसमिति सदस्यको उपस्थिती रहेको थियो ।

नागरिकता विधेयक पारित भएपछी मन्त्री यादवद्वारा खुशी ब्यक्त

0

वीरगंज । लामो रस्साकस्सीका बिच अन्ततः नागरिकतासम्बन्धी विद्येयक प्रतिनिधिसभाबाट पारित भएको छ । वन तथा वातावरण मन्त्री प्रदीप यादवको अथक प्रयास र पहलमा शुक्रबार दिनभर उक्त विद्येयकमा छलफल भएको थियो ।

मन्त्री यादवले मन्त्री हुनुभन्दा अघि प्रधानमन्त्री शेर बहादुर देउवालाई भेटेरै उक्त विद्येयक पास गर्नुपर्ने माग गरेका थिए । त्यसपछि पनि मन्त्री यादवले फास्ट ट्रयाकबाट विद्येयक पास गर्ने विभिन्न सभा समारोहमा बताउँदै आएका थिए । सोही भनाईलाई सार्थकतामा बदल्न मन्त्री यादवले संसदको ध्यानाकर्षण गराएसँगै प्रतिनिधिसभाले नागरिकता ऐन २०६३ लाई संशोधन गर्न बनेको विधेयक बहुमतले पारित गरेको हो ।

नेपाली कांग्रेस, नेकपा माओवादी केन्द्र, एकीकृत समाजवादी, जनता समाजवादी पार्टीले समर्थन जनाएँसगै नागरिकता विधेयक पारित भएको हो । नेकपा एमाले, राष्ट्रिय जनमोर्चा, नेपाल मजदुर किसान पार्टीले भने नेपाली नागरिक पुरुषसँग विवाह गर्ने विदेशी महिलालाई तत्काल नागरिकता दिन नहुने भन्दै विधेयकको विपक्षमा रहेका थिए ।

नागरिकता विधेयकमाथि शुक्रबार प्रतिनिधिसभामा भएको छलफलमा ४५ जना सांसद सहभागी भएका थिए । जन्मका आधारमा नेपाली नागरिकता पाएकाहरुको सन्तान लामो समयदेखि नागरिकताविहीन अवस्थामा रहँदा उनीहरुले राज्यबाट पाउने सेवा तथा सुविधाबाट बञ्चित रहनुका साथै उच्च शिक्षा एवम् रोजगारीको अवसरसमेत पाउन सकिरहेका थिएनन् ।

फलस्वरुप मन्त्री यादव आफु मन्त्री बनेकै समयमा जसरी पनि पास गराउने मनसायमा थिए । सोही मनसायअनुसार उनले आफै मन्त्री भएकै समयमा विद्येयक पास गराएका हुन् ।
वैवाहिक अंगीकृतका विषयमा भने दलीय सहमति जुटाएर अघि बढाउन सक्ने मन्त्री यादवको भनाई छ ।

मन्त्री यादवले भने, “मैले पटकपटक सडकदेखि सदनसम्म उठाएको आवाज अन्ततः प्रतिनिधी सभाले सुनेको छ । यो आवाज लाखौ अनागरिकहरुको थियो । अब ति अनागरिक पनि नागरिक भएका छन् । नागरिकता नपाएकाहरुले अब होली दिवाली आएको आभाष गरेका छन् ।”

जन्मसिद्ध नागरिकका सन्तानलाई नागरिकता दिलाउनका लागि ल्याइएको विद्येयक पास गराएको भन्दै मन्त्री यादवले प्रधानमन्त्री शेरबहादुर देउवा, जनता समाजवादी पार्टी नेपालका अध्यक्ष उपेन्द्र यादवसहित सता गठबंधनका नेता, प्रतिनीधि सभा सदस्यहरू लगायतप्रति आभार पनि व्यक्त गरेका छन् ।