Date
मङ्ल, मंसिर १, २०८३
Tue, November 17, 2026
Home Blog Page 583

मधेशका मुख्यमन्त्री यादवले भाेजपुरीमा लिए शपथ

0

वीरगंज । मधेश प्रदेशका नवनियुक्त मुख्यमन्त्री सरोज कुमार यादवले शपथ लिएका छन् । प्रदेश प्रमुख हरिशंकर मिश्रले उनलाई पद तथा गोपनीयताको शपथ खुवाएका हुन् ।

मुख्यमन्त्री यादवले मातृभाषा भोजपुरी भाषामा शपथ लिएका छन् । बाराकाे निर्वाचन क्षेत्र नं. १ काे (२) दाेस्राे पटक प्रदेश सभामा निर्वाचित यादव आफ्नाे दल जसपा, नेकपा एमाले, नेकपा माओवादी केन्द्र र जनमत पार्टीकाे समर्थनमा मुख्यमन्त्री भएका हुन् ।

यस अघिकाे कार्यकालमा उनी प्रदेश सभाका सभामुख थिए । 

शपथग्रहण समारोहमा जसपा अध्यक्ष उपेन्द्र यादव, जसपा संघीय संसदीय दलका नेता रामसहाय प्रसाद यादव, निवर्तमान मुख्यमन्त्री लालबाबु राउत लगायतकाे सहभागिता रहेकाे थियाे ।

प्रहरी श्रीमती संघद्वारा नि:शुल्क स्वास्थ्य शिविर र कम्बल वितरण

0

वीरगंज । बाराकाे महागढीमाई नगरपालिका वडा नं. ७ तेलकुवामा बिहिबार नि:शुल्क स्वास्थ्य शिविर तथा विपन्न परिवारहरुका लागि न्यानो कम्बल वितरण कार्यक्रम” सम्पन्न भएकाे छ । नेपाल प्रहरी श्रीमती संघको आयोजना र मधेश प्रदेश प्रहरी अस्पताल, रूपनी, सप्तरी र बिरगंज हेल्थ केयर, पर्साको प्रविधिक सहयोगमा शिविर तथा कम्बल वितरण कार्यक्रम सम्पन्न भएकाे हाे ।

शिविरमा मधेश प्रदेश प्रहरी अस्पताल रूपनी सप्तरीका प्राध्यापक प्रहरी उपरिक्षक डा. नविन कुमार चौधरी नेतृत्वकाे विशेषज्ञको टोली र बिरगंज हेल्थ केयर पर्साका डा. मनोज कुमार कुशवाहा समेतको १५ जना विशेषज्ञ चिकित्सकहरूको टोलीद्वारा ४३२ जना स्थानीय विपन्न वर्गलाई बाल रोग, जनरल फिजिसियन, स्त्री तथा प्रसुती रोग, हाडजोर्नी लगायत विभिन्न रोगहरूको उपचार गरिएकाे थियाे ।

शिविरमा स्थानी औषधि निर्माताबाट प्राप्त रू.१ लाख ४२ हजार ५ सय बराबरको औषधी तथा मधेश प्रदेश प्रहरी अस्पतालबाट प्राप्त औषधिहरू नि:शुल्क वितरण गरिएको जिल्ला प्रहरी कार्यालय बाराले जनाएकाे छ ।

साेही कार्यक्रममा महागढीमाई नगरपालिका वडा नं.२ र ७ का २२३ जना विपन्न परिवारलाई नेपाल प्रहरी श्रीमती संघकी अध्यक्ष कुसुम लता सिंह लगायत अन्य सदस्यहरुले २/२ थान गरी जम्मा ४४६ थान न्यानो कम्बल वितरण गरेका थिए ।

महागढीमाई नगरपालिकाका मेयर उपेन्द्र यादवकाे सभापतित्व र नेपाल प्रहरी श्रीमती संघकी अध्यक्ष कुसुमलता सिंहकाे प्रमुख आतिथ्यमा भएकाे कार्यक्रममा मधेश प्रदेश प्रहरी कार्यालय जनकपुर धनुषाका प्रमुख प्रहरी नायब महानिरिक्षक मसाऊँद आलम खाँ खाँ लगायतकाे विशेष उपस्थिती रहेकाे थियाे ।

कट्टी मठकाे जग्गामा विश्व विद्यालय बनाउन छलफल

0

वीरगंज । पर्साकाे पकहा मैनपुर गाउँपालिका वडा नं. २ सुर्जाहा कट्टीमा पर्ने राधाकृष्ण मठकाे जग्गामा मधेश विश्व विद्यालय बनाउन पहल सुरु भएकाे छ । साे जग्गामा विश्व विद्यालय बनाउनका लागि बिहिबार पकहा मैनपुर गाउँपालिकाका अध्यक्ष सुरेश मेहता र मधेश विश्व विद्यालयका उपकुलपति डा. दिपक शाक्य बिच छलफल समेत भएकाे छ । 

छलफलकाे क्रममा विश्व विद्यालयका उपकुलपति डा. शाक्यले राधाकृष्ण मठकाे जग्गाकाे स्थलगत अवलाेकन तथा निरिक्षण गरेर निर्णय लिने वताउनु भएकाे गाउँपालिका अध्यक्ष मेहताले जानकारी दिए । उनका अनुसार उपकुलपति डा. शाक्य गाउँतिर नै विश्व विद्यालयकाे शाखा खाेल्न सकरात्मक रहेका छन् ।

विश्व विद्यालयकाे लागि जग्गा खाेजि भइरहेकाे अवस्थामा सुर्जाहा कट्टी मठको जग्गा उपयुक्त रहेको गाउँपालिका अध्यक्ष मेहताकाे भनाई छ । यस अघि त्यहाँका युवाहरु भेला भएर मठकाे जग्गामा नै विश्व विद्यालय बनाउन माग समेत गरेका थिए । 

त्यसैगरी पर्सा जिल्लाकाे विकासकाे लागि जिल्लाकाे बिचमा पर्ने सुर्जाहास्थित कट्टी मठ कै जग्गामा विश्व विद्यालय बनाउनु पर्ने सामाजिक संजालमा मार्फत पनि माग भएकाे थियाे । गुठ्ठी संस्थान अन्तर्गतकाे कट्टी मठकाे जग्गा विश्व विद्यालयकाे लागि प्रयाप्त रहेकाेले दबाव बढेकाे हाे ।  

छलफलकाे क्रममा पनि उपकुलपति डा. शाक्यले जिल्लाकाे सदरमुकाम भन्दा केही टाढा नै विश्व विद्यालय बनाउँदा उपयुक्त हुने वताए । उनले आफुले पनि सदरमुकाम वीरगंजमा मुख्य कार्यालय रहने गरी त्यस भन्दा २० किलाे मिटर टाँढा नै शाखाहरु बनाउन साेच बनाएकाे वताए ।

डा. शाक्यले विश्व विद्यालयका भाैतिक संरचनाहरु बनाउनका लागी पर्सावासीले सहयोग गरे निमार्ण कार्यकाे लागि आर्थिक कारण काम नरुक्ने पनि बताए । पर्साकाे विकास जिल्लाबासीकाे साझा सवाल भएकोले पर्साका हरेक ब्यक्तिहरुकाे सहयोग, समन्वय र सहकार्यको जरुरी रहेको बताए ।

वीरगंजकाे पानीटंकीस्थित डा. शाक्यकाे निवासमा भएकाे छलफलमा गैर सरकारी संस्था महासंघ नेपाल पर्साका अध्यक्ष छठु साह, स्थानिय समाजसेवी अनिल साहकाे पनि उपस्थिती रहेकाे थियाे । 

अख्तियारकै आयुक्त भ्रष्टाचार मुद्दामा दाेषी ठहर, ३ वर्ष ३ महिना कैद

0

काठमाडौं । ७८ लाख रुपैयाँ घुस लेनदेनमा अख्तियार दुरुपयोग अनुसन्धान आयोगका पूर्व आयुक्त राजनारायण पाठक र नेपाल इन्जिनियरिङ कलेजका तत्कालिन अध्यक्ष लम्बोदर न्यौपानेलाई विशेष अदालतले दोषी ठहर गरेको छ ।

विशेष अदालतका अध्यक्ष श्रीकान्त पौडेल, सदस्यहरु यमुना भट्टराई र बलभद्र बास्तोलाको इजलासले पाठकलाई ३ वर्ष ३ महिना कैद र ३९ लाख जरिवाना तथा न्यौपानेलाई ३ वर्ष कैद र ३९ लाख रुपैयाँ जरिवानाको फैसला गरेको हो । पाठक सरकारी ओहोदामा रहेर भ्रष्ट्राचार गरेका कारण उनलाई थप ३ महिना कैद सजाय ठहर भएको विशेष अदालतका प्रवक्ता दीपेन्द्रनाथ योगीले जानकारी दिए ।

नेपाल इन्जिनियरिङ कलेजविरुद्ध अख्तियारमा परेको उजुरीमाथि छानबिन रोक्न न्यौपानेबाट पाठकले ७८ लाख रुपैयाँ घुस लिएको भन्दै अख्तियारले १२ चैत २०७५ मा पाठक र न्यौपाने दुबै विरुद्ध भ्रष्ट्राचार मुद्दा दायर गरेको थियो ।

पाठकले ७८ लाख रुपैयाँ घुस लिएको स्वीकार गरेको भिडियो प्रमाणका रुपमा अख्तियारले पेश गरेको थियो । तर विशेष अदालतले घुस लेनदेनमा नभई घुस लेनदेनको प्रयास मात्र भएको ठहर गरेको हो ।

‘आरोपितहरुबाट घुसबापतको रकम बरामद भएको थिएन, तर घुस खाने प्रपञ्चका लागि सारा काम सम्पन्न गरेको देखिएको ठहर भएको छ’ रायकिताब उधृत गर्दै स्रोतले भन्यो, ‘त्यही आधारमा घुस खाएको भनिएको ७८ लाख रुपैयाँको आधा अर्थात ३९ लाख रुपैयाँ जरिवाना हुने ठहर भएको हो ।’

भ्रष्ट्राचार निवारण ऐन २०५९ को दफा ३ को (ज) मा ५० लाखदेखि १ करोड रुपैयाँसम्म घुस लेनदेन गरेमा ६ देखि ८ वर्षसम्म कैद सजाय हुने व्यवस्था छ । ऐनकै दफा २१ अनुसार घुस लेनदेनको उद्योग गर्नेलाई तोकिएको सजायको आधा सजाय हुने व्यवस्था छ ।

बिहीबारको फैसलाबाट अख्तियारका पदाधिकारीहरु असन्तुष्ट छन् । घुस लेनदेनको आरोपमा दोषी ठहर हुनुपर्नेमा घुस खाने उद्योगमात्रै गरेको व्याख्या गरेर कम सजाय गरेको अख्तियारका एक पदाधिकारीले बताए । फैसलाको पूर्णपाठ आएपछि सर्वोच्च अदालतमा पुनरावेदनमा जाने उनको भनाइ छ ।

श्रीनिधि वचत तथा ऋण सहकारीकाे ११ औं साधारण सभा सम्पन्न

0

वीरगंज । श्रीनिधि वचत तथा ऋण सहकारी संस्था लि. वीरगंजकाे ११ औं वार्षिक साधारण सभा बिहिवार सम्पन्न भएकाे छ । वीरगंजस्थित होटल भिस्वामा भएकाे साधारण सभाको उद्घाटन राष्ट्रिय सहकारी बैंक लि.का अध्यक्ष के.बि. उप्रेतिले गरेका थिए ।

साधारण सभाकाे उद्घाटन समाराेहलाई सम्बाेधन गर्दै अध्यक्ष उप्रेतीले वित्तिय तरलता र विदेशी मुद्रा सञ्चितिमा कमी आएको भन्दै सहकारीले देशलाई ठूलै आर्थिक सहयोग गरिरहेको वताए । उनले बैंक तथा वित्तिय संस्थाहरुको व्याजदर धेरै नै बढेको र त्यसमा पछि पहुँच भएका व्यक्तिहरुलाई मात्रै ऋण पाउने गरेको अवस्थामा सहकारी संस्थाले सर्वसाधारणलाई फाइदा पुगेकाे वताए ।

साधारण सभाका प्रमुख अतिथि समेत रहेका अध्यक्ष उप्रेतिले सहकारीबाट सरल र सहज रुपमा सर्वसाधारण ऋण पाउने गरेको फाइदा पुगेकाे वताए ।

कार्यक्रममा संस्थाका कार्यकारी अधिकृत चन्देशवर प्रसाद चौरसियाले संस्थाको वार्षिक प्रतिवेदन प्रस्तुत गर्दै आ.व. २०७८/०७९ काे अन्त्य सम्म ९५ करोड २३ लाख ९३ हजार ८ सय १ रुपैया कुल काराेबार गरेकाे वताए । उनले संस्थाको शेयर पूंजी आ.व‍. को अन्त्यमा ४ करोड ४ लाख ४९ हजार एक सय र संस्थाकाे बचत (निक्षेप) संकलन आ.व. २०७८/०७९ को अन्त्य सम्ममा बचत रकम रु. ७९ करोड ८१ लाख ७४ हजार ४ सय ३७ रुपैया पुगेकाे वताए ।

यसैगरी आ.व. २०७८/०७९ को अन्त्य सम्ममा बृद्धि भई जागेडा तथा विभिन्न कोषहरु ४ कराेड एक लाख १२ हजार ३ सय ५१ रुपैया पुर्‍याउन संस्था सफल भएकाे अधिकृत चाैरसियाले जानकारी दिए । संस्थाकाे कर्जा तथा सापटि आ.व. २०७८/०७९ को अन्त्यमा रु. ६९ करोड १० लाख ५५ हजार ९ सय ७५ रुपैया कर्जा लगानीमा कायम रहेकाे जानकारी गराए ।

यसैगरी संस्थाकाे स्थिर सम्पतीको रुपमा संस्थाले आदर्शनगर स्थित भाजुरत्न चौक निर १५.५ धुर जग्गा संस्थाको नाममा खरिद गरेको र संस्थाको सम्पूर्ण कारोबार पछिको खुद नाफा २ करोड ७८ लाख ३२ हजार १ सय २४ रुपैया हुन गएको जनाइएकाे छ । 

प्रविधि तर्फ संस्थाले मिति २०७५ साल पौष १४ गते देखि प्रविधिमा आधारित मोबाइल बैंकिङ्ग संचालनमा ल्याएको छ । श्रीनिधि मोबाइल एप मार्फत हुँदै आएको कारोबारलाई थप विस्तार एवम सुविधा सहित mobile banking sms banking collector app bulk sms, लगायत डिजिटल भुक्तानी गर्ने QR CODE संचालनमा आइसकेको संस्थाले जनाएकाे छ ।

संस्थाका अध्यक्ष प्रेम चुडामणी बज्रचार्यकाे अध्यक्षतामा भएकाे कार्यक्रममा भूमि व्यवस्था कृषि तथा सहकारी मन्त्रालय सहकारी महाशाखा प्रमुख ओम नारायण झा, नेपाल सरकार स्वास्थ्य सेवा विभाग, आपूर्ति व्यवस्थापन महाशाखाका प्रमुख एवम् सहकारी संस्थाका बरिष्ठ सल्लाहकार डा. सुरेन्द्र प्रसाद चौरसिया, बचत तथा ऋण सहकारी संघ पर्साको अध्यक्ष राजेश पंडित, नेपाल रेडक्रस सोसाइटी पर्साको सभापति विरेन्द्र कडेल, सहकारी विकाश बोर्डका पूर्व संचालक सदस्य शम्भु गुप्ता, को-अपरेटिभ म्यानेजर्स कल्ब पर्साको संस्थापक अध्यक्ष र बचत तथा ऋण सहकारी संघ पसांका महासचिव जिस्णु बराल लगायतकाे सहभागिता रहेकाे थियाे ।

वीरगंजमा पनि मनाइयो पृथ्वी जयन्ती

0

वीरगंज । पृथ्वीनारायण शाहको ३०१ औं जयन्ती एवम् राष्ट्रिय एकता दिवस वीरगंजमा पनि मनाइएको छ । देश भक्त राज्य भक्तलले बुधबार वीरगंजकाे महाविरस्थानमा एक कार्यक्रमकाे आयाेजना गरी दिवस मनाएकाे हाे ।

देश भक्त राज्य भक्तका केन्द्रिय अध्यक्ष दिपेन्द्र प्रसाद राैनियारकाे अध्यक्षतामा भएकाे कार्यक्रममा उपाध्यक्ष राजकिशाेर चाैबे, जिल्ला अध्यक्ष शतीश श्रीवास्तव, शम्भु चाैरसिया, पशुपति बिक्रम साह, हिरा बहादुर चन्द, सतार अन्सारी, विरेन्द्र थापा, रामनारायण साह, साेमबिक्रम साह लगायतकाे सहभागिता रहेकाे थियाे । 

यसैगरी राष्ट्रिय सरोकार मञ्च नेपाल नारायणीले पनि वीरगञ्जको घण्टाघरमा पृथ्वीनारायण शाहको तस्बिरमा माल्यार्पण गरेर दिवस मनाएको छ । 

मञ्चका नारायणी संयोजक नन्दकिशोर गोयलको अध्यक्षतामा भएको माल्यार्पण कार्यक्रमलाई सम्बोधन गर्दै जिल्ला प्रशासन कार्यालय पर्साका प्रमुख जिल्ला अधिकारी उमेश कुमार ढकालले पृथ्वीनारायण शाहका दिब्योपदेशको पालना गर्नुपर्नेमा जोड दिए । उनका दुरदर्शी उपदेशहरु अहिले पनि उत्तिकै सान्दर्भीक रहेको बताउँदै ढकालले सत्य र निष्ठाको बाटो अबलम्ब गर्न आग्रह गरेका छन् । 

समाजसेवी पशुपति बिक्रम शाह, नागरिक संघर्ष समितीका उपाध्यक्ष हिराबहादुर चन्द, वीरगञ्ज उद्योग वाणिज्य संघका बरिष्ठ उपाध्यक्ष अनिल अग्रवाल, हिन्दु युवा संघ नेपालका अध्यक्ष राजेश सिंह, समाजसेवी उषा शाह लगायतले पृथ्वी जयन्तीका अवसरमा सरकारले सार्वजनिक विदा दिने गरेको निर्णयको स्वागत गर्दै शाहका योगदान र उपदेशका बारेमा चर्चा गरेका थिए । 

वीरगंजमा निसासिएर दुई जनाकाे मृत्यु

0

वीरगंज । पर्सामा कोईला बालेर सुतेका २ जना भारतीय नागरिकको निसासिएर मृत्यु भएको छ । वीरगंज महानगरपालिकाकाे वडा नम्बर २२ जगरनाथपुरस्थित त्रिपती ट्रेडिङ एण्ड सप्लार्यस कोइला डिपो रेखदेख गर्ने २ जना कर्मचारीको मृत्यु भएको पर्सा प्रहरीले जनाएको छ ।

मत्यु हुनेमा भारत बिहार राज्य मोतिहारी जिल्ला थाना रक्सौल कौवा ठेगर वडा नं. ७ बस्ने २९ वर्षीय पबित्र गिरी र भारत बस्ने सोही डिपोका म्यानेजर ३० वर्षीय मिथलेश यादव रहेका छन् । गएराति कोईला डिपोको एकतले पक्की भवनको कोठाभित्र झ्याल ढोका बन्दगरी राति सुतेका उनीहरु बिहान अबेरसम्म नउठेपछि प्रहरीको उपस्थितिमा ढोका फोडेर हेर्दा दुवै जना मृत अवस्थामा भेटिएको जिल्ला प्रहरी कार्यालय पर्साका प्रवक्ता प्रहरी नायब उपरिक्षक दिपक गिरीले जानकारी दिए ।

नारायणी अस्पतालबाट चिकित्सक सहितको टोली घटनास्टथल पुगेर घटनाको अनुसन्धान गर्ने क्रममा तगारीमा पत्थर कोइला वालेर झ्याल ढोका बन्द गरी सुतेको हुँदा उनीहरुको अक्सीजनको कमीका कारण निसास्सिएर मृत्यु भएको देखिएकाे प्रवक्ता गिरीले बताए ।

ओमशिवशक्ति साकोसको १४ औं वार्षिक साधारणसभा सम्पन्न

0

वीरगंज । श्री ओमशिवशक्ति वचत तथा ऋण सहकारी संस्था लिमिटेड वीरगंज पर्साको १४ औं वार्षिक साधारणसभा एक भव्य समारोहका बीच सम्पन्न भएको छ । वीरगंजको होटल भिस्वामा आयोजित साधारणसभाको उदघाटन गर्नु हुFदै अन्नपूर्ण भेजिटेबल ईन्ड (त्रिवेणी ग्रुप)का संचालक प्रभु दयाल कन्दोईले छोटो समयमै यस संस्थाले राम्रो प्रगति गरेको र आउने दिनमा पनि अझै प्रगति गरोस भनी शुभकामना मनतव्य व्यक्त गरेका थिए ।

सहकारीको मुल्य मान्यता र सिद्धान्त अनुसार संस्थाका सञ्चालक समिति र सम्पूर्ण शेयरधनीहरु एकजुट भई कडा मेहनतका साथ काम गरेकोले यो अवस्थामा पुगेको भन्दै प्रमुख अतिथि कन्दोईले संस्थालाई आफ्नो तर्फबाट हुन सक्ने सहयोगहरु गर्ने प्रगितबद्धा समेत जनाएका थिए ।

संस्थाका अध्यक्ष कलिस्टर साह कानुको सभापतित्वमा भएको कार्यक्रममा निवर्तमान नेपाल केन्द्रीय बार एसोसिएसनका उपाध्यक्ष रामचन्द्र सिंह राजपुत, बाराको महागढीमाई नगरपालिकाका प्रमुख प्रशासकीय अधिकृत महम्मद शेरे मुस्तुफा, मधेश प्रदेश सहकारी विभाग कार्यालय शाखा अधिकृत ओम नारायण झा, नेपाल बुद्धिजिवी परिषद् मधेश प्रदेशका अध्यक्ष एवं जय गणेश साकोसका बरिष्ठ सल्लाहकार शम्भु प्रसाद गुप्ता, समाजसेवी शिवशंकर पटेल, सिएमसी पर्साका अध्यक्ष एवं श्री निधि साकोसका प्रमुख कार्यकारी अधिकृत चन्देश्वर चौरसिया, राष्ट्रिय सहकारी बैंक लि. वीरगंजका प्रबन्धक संजय कुमार महतो, जिल्ला बचत तथा ऋण सहकारी संघ लिमिटेडका महासचिव जिष्णु बराल लगायतकाले संस्थाको उत्तरोत्तर प्रगति एवं सफलताको शुभकामना व्यक्त गरेका थिए ।

सो अवसरमा संस्थाका संचालक अध्यक्ष कलिष्टर साह कानुले यस आवमा संस्थाको शेयर पूँजी २ करोड ११ लाख ६२ हजार ८ सय, निक्षेप एकत्तीस करोड एकानब्बे लाख दुई हजार दुई सय १३ रुपैया छ पैसा, ऋण लगानी ३० करोड ६५ लाख ७६ हजार ८ सय ३० रुपैया, संस्थागत पूँजी ९२ लाख ३ हजार ५ सय ८५ रुपैया २१ पैसा, बाह्य ऋण ६ करोड ३० लाख ९६ हजार ४ सय ३६ रुपैया २२ पैसा र आयकर अघिको खुद बचत १४ लाख ३७ हजार ३ सय २९ रुपैया ४५ पैसा सफल भएको बताए । त्यसैगरी संस्थाका लेखा समिति संयोजक जिउत प्रसाद साहले लेखा समितिको प्रतिवेदन प्रस्तुत गरेका थिए ।

सो अवसरमा संस्थाले गरिब, असहाय जेहन्दार विद्यार्थी सन्ध्या कुमारी सोनार र सन्ध्या कुमारी रौनियारलाई कपि, पेन, व्याग तथा कक्षा १० सम्म छात्रवृति समेत दिईएको थियो । सोही अवसरमा विगत लामो समय देखि श्री ओमशिवशक्ति वचत तथा ऋण सहकारी संस्था लिमिटेडमा रही उत्कृष्ट कार्य गरेका बबिता कुमारी उदास र मनिषा गोलेलाई दोसल्ला र प्रमाणपत्र दिई सम्मान गरिएको थियो ।

सञ्चारकर्मी उज्जवल घिमिरेले सहजीकरण गर्नु भएको कार्यक्रममा नेकपा एमाले मधेश प्रदेश स्थायी कमिटि सदस्य एवं ईन्द्रेणी साकोसका अध्यक्ष उमेश गुप्ता, अन्नपूर्ण भेजिटेबल ईन्डका प्रबन्ध निर्देशक अजय कुमार अग्रवाल, जयलक्ष्मी साकोसका अध्यक्ष नग नारायण सिंह, शिवम साकोसका सचिव राजेन्द्र जैसवाल, कोहिनुस साकोसका व्यवस्थापक प्रदीप शर्मा, गृहलक्ष्मी साकोसका सह व्यवस्थापक उमेश साह, वीरगंज साकोसका दिल्ली विक्रम कार्की, स्वच्छ साकोसका व्यवस्थापक चन्द्रशेखर साह, नेफ्स्कुनका फिल्ड कार्यालय वीरगंजका ईन्चार्ज बृजेश गुप्ता, भगवति बचत तथा ऋण सहकारी संस्था लि.का अध्यक्ष राम निवास देहाती, जिल्ला बचत तथा ऋण सहकारी संघ लिमिटेडका व्यवस्थापक राम अनुप यादव लगायत सहकारीका शेयर सदस्यहरु एवं सञ्चारकर्मीहरुको उल्लेखनिय सहभागीता रहेको थियो ।

मधेश प्रदेशकाे मुख्यमन्त्रीमा जसपाका यादव नियुक्त

0

वीरगंज । मधेश प्रदेशको मुख्यमन्त्रीमा जनता समाजवादी पार्टी (जसपा) संसदीय दलका नेता सरोज कुमार यादव नियुक्त भएका छन् । प्रदेश प्रमुख हरिशंकर मिश्रले आज यादवलाई मुख्यमन्त्री नियुक्त गरेका हुन् ।

नेपालको संविधानको धारा १६८ को उपधारा (२) बमोजिम यादवलाई मधेश प्रदेशको मुख्यमन्त्री पदमा नियुक्त गरेकाे प्रदेश प्रमुख मिश्रले जनाएका छन् ।

त्यसअघि यादवले ६३ सांसदको समर्थन सहित प्रदेश प्रमुख समक्ष मुख्यमन्त्रीमा दाबी पेश गरेका थिए । उनी बाराको प्रदेश सभा निर्वाचन क्षेत्र नम्बर १ (२) बाट निर्वाचित प्रदेश सभा सदस्य हुन् । यादव यसअघि प्रदेश सभामुख रहेका थिए ।

ग्लोबल लेदर उद्योगले सिर्सिया नदीमा प्रदुषित पानी फाल्ने गरेकाे भेटियाे

0

वीरगंज । सिर्सिया नदी प्रदुषणमा जिम्मेवार रहेका उद्योगलाई कारबाहीको दायरामा ल्याउन वीरगंज महानगरपालिकाले सुरु गरेको उद्योगको अनुगमन जारी छ । मंगलबार नदी क्षेत्रमा रहेका तीन वटा उद्योगको स्थलगत अनुगमन गरिएको छ ।

वीरगंज महानगरपालिका वडा नम्वर २२ मा रहेको ग्लोबल लेदर प्रा.लि., वडा नम्वर ३२ को अन्नपूर्ण स्टिल उद्योग र सोही ठाउँको फर्चुन स्टिल इम्पेक्सको टोलीले अनुगमन गरेको हो । मंगलबार अनुगमन भएका तीन वटा उद्योगमध्ये ग्लोबल लेदर नदी प्रदुषण गराउन जिम्मेवार रहेको पाइएको छ ।

यो उद्योगले पानी प्रशोधन नै नगरी केमिकल युक्त दुर्गन्धित पानीसहितको फोहोर सोझै नदीमा मिसाउने गरेको भेटिएको छ ।
उद्योग स्थापना गर्दा नै पानी प्रशोधन केन्द्र निर्माण गर्नु पर्ने भए पनि उद्योगले अटेर गर्दै प्रशोधन केन्द्र नै नबनाई दुर्गन्धित पानी सोझै नदीमा मिसाइरहेको भेटिएको अनुगमनमा गएका वीरगंज महानगरका वातावरण निरीक्षक प्रदिप साहले जानकारी दिए ।

अनुगमन टोलीले उद्योगलाई तत्काल प्रशोधन केन्द्र बनाउन र फोहोर पानी नदीमा नफाल्न चेतावनी दिएको छ ।

यस्तै आजै अनुगमन भएका दुबै स्टिल उद्योगले भने फोहोर पानी नदीमा नफालेको भेटिएको पनि वातावरण निरीक्षक साह बताउँछन् । गएको कात्तिक २३ गते वीरगंज महानगरपालिकाका उपप्रमुख इम्तियाज आलमको संयोजकत्वमा स्थानीय प्रशासन, उद्योगी तथा सुरक्षाकर्मी सम्मिलित सिर्सिया नदी प्रदुषण नियन्त्रण समिति गठन भएर समितिले हरेक साताको मंगलबार नदी क्षेत्रमा रहेका उद्योगहरुको अनुगमन गर्दै आएको छ ।

वीरगंज महानगरपालिका र जितपुर सिमरा उपमहानगरपालिकाको आइतबार मात्रै बसेको संयुक्त बैठकले तीन साताको अनुगमनका क्रममा सिर्सिया नदी प्रदुषणमा जिम्मेवार रहेका तीन वटा उद्योगलाई कारबाहीस्वरुप स्पष्टिकरण सोध्ने निर्णय गरिसकेको छ ।

मरियम लेदर, मारुती पेपर र दुर्गा पल्प एण्ड पेपरलाई स्पष्टिकरण सोध्ने निर्णय गरेको थियो । वीरगंज महानगरपालिकाका मेयर राजेशमान सिंहले निर्वाचनका बेला जनतासमक्ष गरेको बाचा बमोजिम सिर्सिया नदी प्रदुषण नियन्त्रणका लागि समिति नै बनाएर अभियान चलाएका हुन् ।

मंगलबार अनुगमनमा वीरगंज महानगरपालिका वन तथा वातावरण महाशाखा प्रमुख देवेन्द्र चौधरी, वातावरण निरीक्षक प्रदिप साह, जिल्ला प्रहरी कार्यालयका प्रहरी निरीक्षक दावा तेन्जी शेर्पा, महानगर प्रहरी प्रमुख हरि भुषाल लगायतको उपस्थिति रहेको थियो ।