हेटाैडामा लागूऔषध गाँजासहित छिपहरमाईका मियाँ पक्राउ
स्वंयसेवक शिक्षक भर्ना गर्दै वीरगंज महानगर
वीरगंज । वीरगंज महानगरपालिकाले सामुदायिक विद्यालयको शैक्षिक सुधारका लागि स्वंयसेवक शिक्षक भर्ना गर्ने भएको छ ।
विद्यालयमा शिक्षक अभाव हुँदा विद्यार्थीको पठन पाठन प्रभावित भएको भन्दै महानगरले सोमबार स्वंयसेवक शिक्षक भर्नाका लागि आवेदन आह्वान गरेको हो ।
विभिन्न विषयमा आधारभूत तह (६–८) का लागि १०६ जना स्वंयसेवक शिक्षक माग गरेको महानगरले माध्यमिक तहका लागि ७४ जना शिक्षक माग गरेको छ । आधारभूत तहमा नेपाली विषयको लागि २९ जना, अंग्रेजी १५, गणित १८, विज्ञान २६, सामाजिक १० र कम्प्युटर विषयका लागि ८ जना स्वंयसेवक शिक्षक माग गरिएको छ ।
यस्तै माद्यमिक तहका लागि नेपाली विषयको १४ जना, अंग्रेजी १०, गणित १३, विज्ञान १२, सामाजिक १०, स्वास्थ्य जनसंख्या तथा वातावरण २, अर्थशास्त्र ४, लेखा २, गणित-विज्ञान ५ र कम्प्युटर २ जना शिक्षक माग गरिएको छ ।
शैक्षिक योग्यता पुगेका १८ वर्ष उमेर पुरा भई ४० वर्ष ननाघेका जो कोही नेपाली नागरिकले ७ दिन भित्र आवेदन दिन सक्ने सूचनामा उल्लेख छ । वीरगंज महानगरका लागि झण्डै ३ सय जना शिक्षक अभाव रहेको छ ।

मन्त्री रिजाल र चिनियाँ राजदूतबीच भेट
वीरगंज । उद्योग, वाणिज्य तथा आपूर्ति मन्त्री रमेश रिजालसँग चिनियाँ राजदूत चेन सङ्ले भेटवार्ता गरेका छन् । उद्योग मन्त्रालयमा भएको भेटवार्तामा द्विपक्षीय सम्बन्ध, विकास सहायता, सीमा नाका खुलाउने लगायतका विषयमा कुराकानी भएको थियो ।
भेटमा मन्त्री रिजालले नेपाल र चीनबीचको द्विपक्षीय सम्बन्धलाई अझ सुदृढ हुँदै जानेमा आफु विश्वस्त रहेको बताए । चीन विरुद्द नेपाली भूमी प्रयोग हुन नदिने नेपाल नीति रहेको भन्दै मन्त्री रिजालले नेपालको सार्वभौमसत्ता, भौगोलिक अखण्डता, स्थिरता तथा राष्ट्रिय स्वाधिनताको सम्मानका लागि चीन अडिग रहेको प्रति सम्मान समेत व्यक्त गरे ।
नेपालको विकासका लागि चीनको सहयोग र सहकार्यप्रति मन्त्री रिजालले चीनलाई धन्यवाद समेत दिए ।
चीन नेपालको दोस्रो ठूलो व्यापार साझेदार मुलुक रहेको बताउँदै मन्त्री रिजालले नेपालको कूल वैदेशिक व्यापारको चौध प्रतिशत व्यापार चीनसँग हुने गरेको स्पष्ट पारे । चीनसँगको व्यापारमा नेपालले ठूलो व्यापार घाटा व्यहोरी रहेको स्मरण गराउँदै मन्त्री रिजालले उक्त व्यापार घाटालाई कम गर्नका निमित्त राजदूत चेन सङ् को कार्यकालमा दुई देशबीच सहकार्य हुनेमा बिश्वास व्यक्त गरे ।
मन्त्री रिजालले पारवाहन ढुवानी सम्झौताको कार्यन्वयनका लागि स्थापित संयुक्त परामर्श संयन्त्रको बैठक समेत बस्न नसकेको जनाउँदै मन्त्री रिजालले काठमाडौं र बेइजिङबीच स्थापित उक्त संयन्त्रहरूको बैठक यथाशीघ्र बसी द्विपक्षीय तथा पारवहन व्यापार प्रवर्द्धन तथा सहजीकरण गर्न आग्रह गरे ।
तातोपानी, रसुवा तथा हिल्सा नाका पुनः खुलेर पूर्ण रूपमा सञ्चालनमा आएकोमा खुसी व्यक्त गर्दै मन्त्री रिजालले थप नाका पनि चाँडै सञ्चालनमा ल्याउन पहल गरिदिन आग्रह गरे । मन्त्री रिजालले नेचुङ–लिजी, किमाथाङ्का, ओलाङचुङ्गोला लगायतका सिमा नाका समेत खोल्नेतर्फ चिनियाँ राजदूत सङ् को ध्यानाकर्षण गराए ।
नेपालको विकासका लागि चीनको सहयोग र सहकार्य प्रति आभार व्यक्त गर्दै मन्त्री रिजालले आगामी दिनमा चीनले अझ बढी विकास सहायता र प्रत्यक्ष बैदेशिक लगानी उपलब्ध गराउने कुरामा आफु विश्वस्त रहेको बताए ।
भेटमा चिनियाँ राजदूत सङ्ले नेपालले सधैँ एक चीन नीतिको समर्थन गर्दै आएकोमा धन्यवाद दिए । द्विपक्षीय सम्बन्ध थप सुदृढ हुंदै जानेमा आफू पनि विश्वस्त रहेको बताउँदै राजदूत सङ्ले विकास सहायता र प्रत्यक्ष बैदेशिक लगानी उपलब्ध गराउने कुरामा चीन सकारात्मक रहेको बताए ।
विद्यालय अनुगमन : सोमबार पनि १३ शिक्षकसँग स्पष्टिकरण माग
वीरगंज । नयाँ शैक्षिक सत्र सुरु भएसँगै वीरगंज महानगरपालिकाले सामुदायिक विद्यालयको पठन पाठन चुस्त पार्न अनुगमनलाई पनि तिब्रता दिएको छ । विद्यालयमा शिक्षक अनुपस्थित हुँदा विद्यार्थीहरुको पठन पाठन प्रभावित हुने भएकाले कडाई गर्न महानगरले अनुगमनलाई तिब्रता दिएको हो ।
आइतबार अनुगमनका क्रममा अनुपस्थित देखिएका एउटै विद्यालयका २४ जना शिक्षकलाई कारबाही गरेको महानगरले सोमबार छुट्टाछुट्टै विद्यालयका १३ जना शिक्षकलाई कारबाही गरेको छ । सोमबार बिहान गएको अनुगमन टोलीले वीरगंजकाे माइस्थान विद्यापिठ मा.वि.मा ८ जना शिक्षक अनुपस्थित रहेको भेटेको छ ।
यस्तै अनुगमन टोलीले वडा नम्वर १७ अलौंमा रहेको श्री द्वारदेवी मा.वि.मा पनि ५ जना शिक्षक अनुपस्थित रहेको भेटेको छ ।
विद्यालय समयमा अनुपस्थित भएका शिक्षकलाई २४ घण्टा भित्र स्पष्टिकरण बुझाउन पत्र काटिएको महानगरका शिक्षा महाशाखा प्रमुख अरबिन्दलाल कर्णले बताए ।
द्वारदेवी मा.वि.मा अहिले पनि विद्यार्थीसँग विभिन्न शीर्षकमा पैसा लिने गरेको पनि अनुगमन टोलीले फेला पारेको छ । टोलीले विद्यालयमा अध्ययनरत कक्षा ११ र १२ का विद्यार्थीसँग विभिन्न शीर्षकमा पैसा उठाउन राखिएको रसिदको ३ वटा ठेली नै नियन्त्रणमा लिएको छ ।
महानगरले विद्यार्थीसँग कुनै पनि बहानामा कुनै पनि शीर्षकमा पैसा नलिन सार्वजनिक आह्वान नै गरेको छ । तर द्वारदेवी मा.वि.ले विद्यार्थीसँग पैसा असुलेको भेटिएकाले त्यसका प्रधानाध्यापकलाई पनि कारबाही गरिने शिक्षा महाशाखा प्रमुख कर्णले बताए ।
टोलीले आजै पावरहाउस क्षेत्रमा रहेको सिद्धार्थ मा.वि.को समेत अनुगमन गरेको थियाे ।
स्थानीय तहको सरुवाकाे विराेधमा पर्साका शिक्षकहरु आन्दाेलित
वीरगंज । वीरगंज महानगरसहित पर्साका शिक्षकहरु आन्दाेलित भएका छन् । शिक्षक महासंघ पर्साकाे आवहानमा जिल्लाका शिक्षकहरु आन्दाेलित भएका हुन् । पूर्व घाेषित आन्दाेलनकाे कार्यक्रम अन्तर्गत आइतबार पहिलाे दिन जिल्लाका सम्पूर्ण विद्यालयमा कार्यरत प्र.अ., शिक्षक, बालविकास शिक्षक तथा विद्यालय कर्मचारीहरुले हातमा कालोपट्टी बाँधी काम गरेका छन् ।
शिक्षकहरुले सोमबार वीरगंज महानगरपालिकाकाे कार्यालय अगाडि धर्ना बस्ने, मंगलबार पुनः वीरगंज महानगरपालिका कै कार्यालय अगाडि धर्ना बस्ने आन्दाेलनकाे कार्यक्रम रहेकाे छ । शान्तिपूर्ण धर्ना गर्दा पनि हाम्रो माँग सम्बोधन भएन भने मंगलबार कै धर्ना स्थलबाटै कडा भन्दा कडा आन्दोलनका कार्यक्रमहरु तय गरिने शिक्षक महासंघ पर्साका अध्यक्ष तिर्थराज यादवले वताए ।
जिल्लाका स्थानीय तहहरुबाट विगत केही महिनादेखि विद्यालयमा कार्यरत प्रधानाध्यापक, शिक्षक, बालविकास शिक्षक तथा विद्यालय कर्मचारीहरु समेतलाई विभिन्न पूर्वाग्रह, दुराग्रह, राजनैतिक आस्था, भेदभाव तथा व्यक्तिगत कुण्ठाको आधारमा थिचोमिचो गर्ने, अनावश्यक रुपमा मानसिक यातना दिने, सरुवाको नाममा आतंक मचाउने, आफ्नो आसेपासेलाई मनोमानीरुपमा पद बाँड्ने, स्वेच्छाचारी रुपमा बढुवा घटुवा गर्ने, विभिन्न रुपमा मानमर्यादा मर्दन गर्ने जस्ता घोर आपतिजनक कार्य गरिदै आएकोमा बाध्य भएकाे आन्दाेलित हुनु परेकाे उनले वताए ।
प्रचलित संघिय शिक्षा ऐन र नियमावली तथा स्थानीय ऐन नियमावलीको वरखिलाफ कुनै पनि शिक्षक वा विद्यालय कर्मचारीको सरुवा नगर्न, सरुवाको लागि नभई अर्थात कोही व्यक्ति विशेषको इच्छा, आकांक्षा, स्वार्थ अथवा राजनैतिक आवश्यक्ता पूर्तिको लागि दवावको भरमा सरुवा गर्ने कार्य नगर्न, शिक्षकलाई सम्मानित पेशाकर्मीको रुपमा राखी राख्नको लागि शिक्षकको मार्यादालाई उच्च बनाउन आवश्यक कार्यक्रम ल्याउन लगायतकाे हाम्राे माग रहेकाे अध्यक्ष यादवले जानकारी दिए ।
नेकपा (एस) पर्साद्वारा सिडियाे मार्फत प्रधानमन्त्रीलाई ज्ञापन
वीरगंज । नेकपा (एकिकृत समाजवादी) पार्टी पर्साले नक्कली भुटानी शरणार्थी प्रकरणका दोषीहरुलाई कारवाहीको माग गर्दै पर्साको प्रमुख जिल्ला अधिकारी मार्फत प्रधानमन्त्री पुष्पकमल दहाल प्रचण्डलाई ज्ञापन पत्र बुझाएको छ । पार्टी पर्साका अध्यक्ष बालगोपाल थापाकाे नेतृत्वमा जिल्ला प्रशास कार्यालयमा पुगेको नेकपा (एस) पार्टी पर्साका नेताहरुको टोलीले पर्साको प्रमुख जिल्ला अधिकारी हिरालाल रेग्मी मार्फत प्रधानमन्त्री प्रचण्डलाई ज्ञापन पत्र बुझाएकाे हाे ।
जिल्ला प्रशासन कार्यालयमा पुगेका पार्टीका नेताहरुसँग आफ्नो कार्यकक्षमा ज्ञापन पत्र बुझ्दै पर्साका प्रमुख जिल्ला अधिकारी रेग्मीले ज्ञापन पत्रलाई छिटै प्रधानमन्त्री कार्यालयमा पठाउने बताए । सो क्रममा प्रजिअ रेग्मीले दोषीहरुलाई सरकारले कारवाही गर्नेमा आफु बिश्वस्त रहेको समेत बताए ।
ज्ञापन पत्रमा नेपाली नागरिकहरुलाई नक्कली भुटानी शरणार्थी बनाइ अमेरिका पठाउन गरिएको मानव बेचविखन र भ्रष्टाचारको ग्राण्ड डिजाइनको विरुद्धमा नेपाल कम्युनिष्ट पार्टी (एकीकृत समाजवादी) खुला रूपमा सडकमा उत्रेको कुरा जानकारी गराइएको छ भने सोमा संलग्न सबै अपराधीहरुलाई गिरप्तार गरी हदैसम्मको कानूनी काबाही गर्न माग गरिएको छ ।
त्यसैगरी जघन्य अपराधमा संलग्न भएका सबैलाई कावाही गर्न र तिनीहरुलाई कुनै पनि बहानामा दोषमुक्त नबनाउन वा मुद्दालाई कमजोर तथा निरप्रभावी नगर्न माग गरिएको छ ।
नक्कली भुटानी शरणार्थी काण्डका भ्रष्टाचारीहरुलाई कानुनी कार्वाहीको दायरामा ल्याउन आजसम्म सरकारले राखेको अडान र सकृयताले आमनागरिकको बीचमा सकारात्म सन्देश प्रवाह गरेको तथा निराश जनता केही मात्रामा आशावादी बनेको समेत ज्ञापन पत्रमा उल्लेख गरिएको छ । साथै ज्ञापन पत्र मार्फत सरकारलाई धन्यवाद समेत भनिएको छ ।
देशका कतिपय उच्च पदस्थ नेता, उपप्रधानमन्त्री, मन्त्री, सांसद तथा मन्त्रालयका सचिवहरुले नै देशका नागरिकहरुलाई अर्को देशको नक्कली नागरिक बनाई बिक्री गर्नु मानव बेचविखनको कार्य राष्ट्रघाती तथा देशद्रोही कार्य भएको र यस कार्यबाट राष्ट्रको भविष्यमा क्षति भएको ज्ञापन पत्रमा भनिएको छ ।
ज्ञापन पत्रको अन्यमा दोषीलाई कारवाही गर्न सरकार समक्ष जोडदार माग गरिएको छ तथा भ्रष्टाचारमा संलग्नहरु जतिसुकै शक्तिशाली भए पनि कारवाहीमा पर्ने देखिएमा मात्रै निराश जनतामा नयाँ आशा र विश्वास पलाउने उल्लेख गरिएको छ ।
पर्टीको केन्द्रिय कमिटीको निर्णय अनुसार ज्ञापन पत्र बुझाउन नेकपा एस पर्साका जिल्ला अध्यक्ष थापा सहित, पार्टीका लेखा समिति सदस्य किशोरी कुशवाहा, पार्टीका पर्सा उपाध्यक्ष गंगा खड्का, सचिव बिक्रम चौरसिया, वीरगंज महानगर अध्यक्ष मनोज चौधरी, सचिव बृजलाल पासवान, पटवारी बैठा, बृज यादव, सुवेदार यादव, मनोज शर्मा, अमरदेव पासवान, सुशिल हजरा, प्रमोद यादव, मनोज पटेल, अनिल पटेल, राजकुमार यादव लगायतका नेताहरु जिल्ला प्रशासन कार्यालय पर्सा पुगेका थिए ।
नीति तथा कार्यक्रममा वीरगंज चिनी कारखानालाई छुटाइएकाेप्रति सांसद यादवकाे आपत्ति
वीरगंज । वीरगंज चिनी कारखाना सञ्चालन गर्ने विषय नीति तथा कार्यक्रममा छुटाइएकोप्रति पर्सा क्षेत्र नम्बर १ का प्रतिनीधि सभा सदस्य प्रदीप यादवले आपत्ती जनाएका छन् । आइतबारकाे प्रतिनीधि सभा बैठकमा विशेष समयमा बोल्दै सांसद यादवले सरकारले बन्द रहेका उद्योग सञ्चालन गर्ने विषय समावेश गरेपनि वीरगंज चिनी कारखानालाई छुटाएको भन्दै आपत्ती जनाए ।
मधेश प्रदेशका कृषकहरुको आशाको केन्द्र वीरगंज चिनी कारखाना सञ्चालनमा आए यहाँका जनताले रोजगारी पाउनुका साथै कृषकको उखुले बजार पाउने दावी गरे । आगामी आर्थिक वर्ष २०८०/८१ को नीति तथा कार्यक्रममा समग्रमा सन्तोषजक भएपनि कार्यन्वयनमा यादवले आशंका व्यक्त गरेका छन् ।
पूर्व मन्त्रीसमेत रहेका यादले भने, ‘नीति तथा कार्यक्रम समग्रमा राम्रै छ । केही विगतकै कार्यक्रमले पनि निरन्तरता पाएका छन् भने केही थपिएका छन् । तर कार्यन्वयन हुन गाह्रो छ । यसअघिकै कार्यक्रम पनि कार्यन्वयन हुन सकेका छैनन् । यदि नीति तथा कार्यक्रम कार्यन्वयन हुन सक्यो भने देश कायापलट हुन कुनै समय लाग्दैन ।’
देशमा मन्दीले विकराल रुप लिँदै गर्दा अर्थतन्त्र सबल र सुदृढ बन्दै गएको भन्ने मनगढन्ते कुरा सरकारले बोलिरहेको यादवको टिप्पणी छ । अविश्वसनीय नीति तथा कार्यक्रमले सरकारको अर्थतन्त्रलाई सबल बनाउन नसकिने उनको ठहर छ ।
नीति तथा कार्यक्रममा ढुंगा खानीको संरक्षण गर्ने कुरा उल्लेख गर्नुलाई सकारात्मक पक्षका रुपमा लिएपनि ढुंगाको निकासी गर्ने विषयमा भने उनले असन्तुष्टी पोखे । प्राकृतिक सम्पदा निकासी हुँदा भूमण्डलीय स्वरुप खलबलिनुका साथै ढुंगा निकासीले मधेशलाई मरुभूमि बनाउने योजनाको रुपमा ल्याएको यादवको बुझाई छ ।
निजगढ अन्तर्राष्ट्रिय विमानस्थल बनाउनु पर्नेमा जोड दिँदै पूर्वमन्त्री यादवले कनिका छरे जसरी बजेट नराखी निर्माणका लागि लाग्ने बजेटको सुनिश्चितता गर्न आग्रह गरेका छन् ।
त्यसअघि सांसद यादवले संघियता कसैको उपहार र बक्सिसका रुपमा नआएको दावी गर्दै हजारौँ मधेशी, दलित, जनजाती, महिला लगायतको आन्दोलनको देन भएको बताए । संघियतालाई बलियो बनाउनुपर्नेमा जोड दिँदै उनले मुख्यमन्त्रीलाई प्रमुख जिल्ला अधिकारी जत्तिकै पनि अधिकार नदिएको बताए ।
सामुदायिक विद्यालयमा मेयर सिंहको आकस्मिक अनुगमन
वीरगंज । वीरगंजकाे श्री नेपाल राष्ट्रिय विद्यापिठ माद्यमिक विद्यालय श्रीपुरमा कार्यरत २४ जना शिक्षक कारबाहीमा परेका छन् ।
विद्यालयका प्रधानाध्यापकसहित २४ जना आकस्मिक अनुगमनका क्रममा अनुपस्थित देखिएकाले कारबाही स्वरुप महानरपालिकाले स्पष्टिकरण सोधेको छ ।
महानगरपालिकाका प्रमुख राजेशमान सिंह आफैँ आइतबार बिहान आकस्मिक अनुगमनमा पुग्दा उक्त विद्यालयका प्रधानाध्यापक अनिल वर्णवालसहित २४ जना शिक्षकहरु अनुपस्थित भेटिएकाले उनीहरुसँग स्पष्टिकरण माग गरिएको शिक्षा महाशाखा प्रमुख अरबिन्द लाल कर्णले जानकारी दिए ।
विद्यालयमा भौतिक रुपमा भेटिएको भए पनि हाजिरी गरेको नपाइएकाले उनीसँग स्पष्टिकरण माग गरिएको उनले प्रष्ट पारे ।
महानगर प्रमुख सिंहले पठन पाठनमा कुनै प्रभाव नपर्ने गरी विद्यालयमा देखिएको शिक्षकको कमी यथाशक्य चाँडो पूरा गर्ने गरी आफूहरु लागेको बताए ।
यस्तै महानगर प्रमुख सिंहले आइतबार बिहान वडा नम्वर १४ पिपरामा रहेको नृसिंह माद्यमिक विद्यालय र वडा नम्वर ४ मा रहेको श्री त्रिजुद्ध महावीर प्रसाद रघुवीरराम उच्च माद्यमिक विद्यालयको समेत अनुगमन गरेका थिए ।
दुबै विद्यालयमा यो शैक्षिक सत्रदेखि पूर्ण रुपमा अंग्रेजी माध्यममा पठन पाठन सुरु गरिएको छ । विद्यार्थीको पठन पाठन प्रभावित हुन नदिन विद्यालयमा देखिएको शिक्षक अभाव तत्काल पूर्ति गर्ने काम अघि बढाइने पनि उनले वताए ।
यस्तै कक्षाकोठाको अभाव पनि देखिएकाले त्यसको समाधानमा पनि आफूहरु लागि परेको उनले बताए ।
अनुगमनमा महानगर प्रमुख सिंहसहित प्रमुख प्रशासकीय अधिकृत लक्ष्मी प्रसाद पौडेल, शिक्षा महाशाखा प्रमुख अरविन्दलाल कर्ण लगायत सहभागि थिए ।
औषधि तथा बिक्रि प्रतिनिधि संघकाे निर्वाचनमा गाेसाइ नेतृत्वकाे प्यानल विजयी
वीरगंज । नेपाल औषधि तथा बिक्रि प्रतिनिधि संघ वीरगंज इकाईकाे निर्वाचनमा राम गाेसाइ नेतृत्वकाे प्यानल विजयी भएकाे छ । वीरगंज १४ स्थित पिपरा धर्मशालामा शनिबार भएकाे निर्वाचनमा नेपाल औषधी तथा बिक्री प्रतिनिधि संघ वीरगंजकाे अध्यक्षमा गाेसाइ सहित उनकाे पुरै प्यानल विजयी भएकाे हाे ।
आइतबार विहान १ बजे सम्पन्न मतगणनाकाे नतिजा अनुसार गाेसाइ ११५ मत ल्याएर विजयी हुँदा उनकाे निकटतम् प्रतिस्पर्धी साैरभ वर्णवालले ९७ मत पाएका थिए ।
त्यसैगरी संघकाे वरिष्ठ उपाध्यक्षमा रमेश गिरि ११६ मत ल्याएर विजयी भएका हुन् । उनकाे निकटतम् प्रतिस्पर्धी रिकेश साहले ९८ मत पाएका थिए । उपाध्यक्षमा अमित कर्ण ११९ मत ल्याएर विजयी भएका हुन् । उनकाे निकटतम् प्रतिस्पर्धी देवेन्द्र लाल कर्णले ९७ मत पाएका थिए ।
त्यसैगरी सचिवमा मौसम राज भट्टराई १११ मत ल्याएर विजयी भएका हुन् । उनकाे निकटम् प्रतिस्पर्धी निखिल साहले १०४ मत पाएका थिए । सहसचिवमा दिपेन्द्र लाल साह ११५ मत र सागर गुप्ताले १०८ मत ल्याएर विजयी भएका हुन् । उनीहरुकाे प्रतिस्पर्धी सुजीत गुप्ताले ८९ मत र अजय पटेलले ९६ मत पाएका थिए ।
त्यसैगरी संघकाे कोषाध्यक्षमा सेखर पन्जियार १२२ मत ल्याएर विजयी भएका हुन् । उनकाे निकटतम् प्रतिस्पर्धी सूरज सर्राफले ९१ मत पाएका थिए । सह कोषाध्यक्षमा बिबेक चौधरी १११ मत ल्याएर विजयी भएका हुन् भने उनकाे प्रतिस्पर्धी बब्लू चौधरीले १०२ मत पाएका थिए ।
त्यसैगरी संघकाे सदस्यहरु दिपेन यादव ११९ मत, अजित कुसुवाहा ११८ मत, सुनिल मालि ११६, बिकास कुशवाहा ११४ मत र नितेश पटेल १०६ मत ल्याएर विजयी भएकाे निर्वाचन अधिकृत औषधी बिक्री प्रतिनिधि संघका केन्द्रिय अध्यक्ष श्याम मण्डलले जानकारी दिए ।
जगरनाथपुरकाे दुई विद्यालयमा प्ले स्टेशन जडान
वीरगंज । पर्साकाे जगरनाथपुर गाउँपालिकाले बालबालिकाहरुकाे लागि विद्यालय खेल्ने पूर्वधारकाे जडान गरेकाे छ । गाउँपालिकाले बालबिकास कक्षा बालबालिकाहरुकाे लागि दुई विद्यालयमा एफाेर प्ले स्टेशन जडान गरेकाे हाे ।
गाउँपालिका अन्तर्गतका श्री नेपाल राष्ट्रिय माध्यमिक विद्यालय मसीहानी र श्री नेपाल राष्ट्रिय माध्यमिक विद्यालय संठीमा प्ले स्टेशन जडान गरिएकाे प्रमुख प्रशासकिय अधिकृत कृष्णनन्दन रायले वताए । समता रणनितिक कार्यक्रम अन्तर्गत गाउँपालिकाका दुई विद्यालयका बालबिकास र प्राथमिक तहका बालबालिकाहरुकाे लागि प्ले स्टेशन जडान गरिएकाे उनले जानकारी दिए ।
गाउँपालिका अध्यक्ष श्रीकान्त प्रसाद यादवकाे निर्देशनमा विद्यालयहरुमा प्ले स्टेशन जडान गरिएकाे प्रमुख प्रशासकिय अधिकृत रायले वताए ।












