Date
सोम, कार्तिक ३०, २०८३
Mon, November 16, 2026
Home Blog Page 520

पटेर्वा सुगौलीकाे अगामी बर्षकाे बजेट सर्वसम्मतिले पारित

0

वीरगंज । पर्साकाे पटेर्वा सुगौली गाउँपालिकाको आगामी आर्थिक वर्ष २०८०/०८१ काे बजेट सर्वसम्मतिले पारित भएकाे छ ।

शनिबार सम्पन्न ११ओैं गाँउसभाकाे बैठकमा गाँउपालिकाकी उपाध्यक्ष ममता महताेले आगामी आर्थिक वर्षका लागि प्रस्तुत गरेकाे ३९ करोड २५ लाख ३०० रुपैयाको बजेट सर्वसम्मतिले पारित गरिएको हाे ।

गाउँपालिकाले आगामी आर्थिक वर्षका लागि ल्याएकाे नीति तथा कार्यक्रमसहितको बजेटमा पालिका अध्यक्ष छात्रवृत्ति कार्यक्रम,पालिका प्रमुख युवा स्वरोजगार कार्यक्रम, पालिका उपाध्यक्ष सुत्केरी महिला कोशेली कार्यक्रम, रंगपुर बजार ब्यवस्थापन तथा निर्माण, मनिहर्वामा बसपार्क निर्माण, थारु संग्रहालय निर्माण, कृषि च्याम्बर निर्माण, मन्टेश्वरी कक्षा संचालन तथा ब्यवस्थापन, कृषि प्राविधिक शिक्षालय निर्माण लगायतका कार्यक्रमहरु समावेश गरिएको वडा नं. २ का वडाध्यक्ष विजय गैरेले जानकारी दिए ।

गाँउपालिका अध्यक्ष दिनेश चाैधरीकाे अध्यक्षतामा भएकाे गाँउसभाकाे बैठकमा प्रमुख प्रशासकिय अधिकृत संदेश कुमार यादव, पाँच वटै वडाका वडाअध्यक्ष , गाँउ कार्यपालिका सदस्य, गाउँपालिकाका कर्मचारी लगायतकाे पनि सहभागीता थियाे ।

बर्दीमा टिकटक बनाउने २०८ प्रहरी कारबाहीमा

0

काठमाडौं । नेपाल प्रहरीको पोसाक लगाएर टिकटक भिडियो बनाउने २०८ जना प्रहरी कर्मचारी कारबाहीमा परेका छन् ।

प्रहरी प्रधान कार्यालयले २०७७ सालदेखि चालु आर्थिक वर्षको असार २२ गतेसम्म बर्दी लगाएर भिडिओ बनाउने र सामाजिक सञ्जालमा राख्ने २०८ कर्मचारीलाई कारबाही गरेको हो ।

डिआइजी एवम् प्रहरी प्रवक्ता कुबेर कडायतका अनुसार २०७७/७८ मा ८२ जना, २०७८÷७९ मा ३० जना र २०७९/८० मा ९६ जना प्रहरी कारबाहीमा परेका हुन् ।

२०७७ असोज २२ गते प्रहरी प्रधान कार्यालयले अनुमति नलिई भिडिओ, चलचित्र, टेलिचलचित्र, टिकटक भिडिओ बनाएको पाइएमा कारवाही गर्ने चेतावनी दिएको थियो ।

तर, तीन वर्षसम्म पनि सामाजिक सञ्जालमा प्रहरी पोसाकको दुरूपयोग नरोकिएपछि हेडक्वार्टरले कारबाही थालेको हो ।

श्रीराम अस्पतालकाे कार्यक्रममा ३५ जनाद्वारा रक्तदान

0

वीरगंज । श्रीराम अस्पताल वीरगंजकाे आयोजनामा शनिबार रक्तदान कार्यक्रम सम्पन्न भएकाे छ ।

आमा सुरक्षा कार्यक्रम स‌चालन भएकाे एक वर्ष पुगेको उपलक्ष्यमा आयोजित कार्यक्रममा ३५ जनाले रक्तदान गरेकाे अस्पतालका संचालिका डा.दिप्ती यादबले जानकारी दिइन ।

कार्यक्रममा डा.सुनिल यादव, डा. मनिष खन्ना, अनिल पटेल, राधा श्रेष्ठ, एन्जिला पटेल लगाएत ३५ जनाले रक्तदान गरेको उनले जानकारी दिइन ।

अस्पतालले आमा सुरक्षा कार्यक्रम सुरु गरेसँगेै १ वर्षमा सयौं गर्भवती आमाहरुलाई सुरक्षित प्रसूती सेवा प्रदान गरिएको अस्पतालकी संचालिका डा.प्रिती यादबले वताइन ।

कार्यक्रमको अवसर पारेर विभिन्न व्यक्तित्वहरुलाई अस्पतालले सम्मान समेत गरेको छ । अस्पतालले समाजसेवी प्रकाश थारू, वीरगंज युवा समाजका संस्थापक कमल चौगाईं, संचारकर्मी आबिद हुसेन, राजु खण्डेलवाल, हेमा थापा, साैरभ राज पाण्डे र राजन श्रीवास्तवलाई सम्मान गरेकाे हाे ।

जगरनाथपुर गाउँपालिकाद्वारा कृषकलाई राेटाभेटर

0

वीरगंज । पर्साकाे जगरनाथपुर गाउँपालिकाले कृषकलाई राेटाभेटर र माेटर पम्प वितरण गरेकाे छ ।

जगरनाथपुर गाउँपालिकाद्वारा संचालित धान उत्पादन प्रवर्धन कार्यक्रम अन्तर्गत कृषकहरुलाई कृषि सामग्री वितरण गरिएकाे प्रमुख प्रशासकिय अधिकृत कृष्णनन्दन रायले जानकारी दिए ।

गाउँ कार्यपालिकाकाे कार्यालयमा बिहिबार एक कार्यक्रमकाे बिच गाउँपालिका अध्यक्ष श्रीकान्त प्रसाद यादवले धान उत्पादन प्रवर्धन कार्यक्रम अन्तर्गत छनाैटमा परेका कृषकहरुलाई राेटाभेटर र माेटर वितरण गरेका थिए ।

कृषी सहजताकाे लागि ५० प्रतिशतकाे अनुदानमा राेटाभेटर र माेटर वितरण गरिएकाे गाउँपालिका अध्यक्ष यादवले वताए । उनले राेटाभेटर र माेटर वितरणले कृषकलाई खेती गर्न सहज हुनुकाे साथै कृषि उत्पादन बढने विश्वास व्यक्त गरे । 

गाउँपालिकाकाे कृषि शाखाबाट वडा न १ देखि ६ सम्मका १० कृषकहरुलाई रोटाभेटर र ७१ कृषकलाई कृषी मोटर पम्प वितरण गरिएकाे प्रमुख प्रशासकिय अधिकृत रायले वताए ।

पाेखरियामा मलकाे कालाेबजारी भइरहेकाे गुनासाेपछि मुल्य निर्धारण

0

पोखरिया । पर्साको पोखरिया नगरपालिकामा अनुदानकाे रसायनिक मलकाे कालाेबजारी भइरहेकाे गुनासाे बढेपछि नगरपालिकाले मुल्य निर्धारण गरेकाे छ ।

अनुदानकाे यूरिया मल प्रति बोरा रू १५ सय र डीएपी प्रति बाेरा रु २८ सयदेखि ३ हजार सम्म बिक्री वितरण भई रहेको थियाे । साे बारे नगरपालिका सम्म गुनासाे पुगेपछि नगरपालिकाकाे मल खाद ब्यवस्थापन समितिको बिहिबार बसेको बैठकले मुल्य निर्धारण गरेकाे हाे ।

नगरपालिकाकी उप मेयर रुबी ठाकुरले एक सूचना जारी गर्दै मलको मुल्य निर्धारण गरिएकाे जनाएकी हुन् ।

साे सूचना अनुसार यूरिया मल प्रति बोरा रू ९०० सय र डीएपी प्रति बोरा रू २३ सय ५० पचास सम्म बिक्री गर्न पाइने छन् । साे भन्दा भन्दा बढ़ीमा बिक्री बितरण गरेको पाइएमा कानून बामोजिम कड़ा कारवाही हुने उप मेयर ठाकुरद्वारा हस्ताक्षरित सूचनामा उल्लेख गरिएकाे छ ।

वाइफाई नेपाल अब वीरगंजमा : सस्तो र भरपर्दो रहेकाे दाबी

0

वीरगंज । इन्टरनेट सेवा प्रदायक कम्पनी वाइफाई नेपालले सङ्घीय राजधानी काठमाडौँ बाहिरपनि आफ्नो सेवा विस्तार गरेको छ । नेपालकै सस्तो इन्टरनेट प्याकेजका उपलब्ध गराउने उद्देश्यका साथ सुरुवात भएको कम्पनीले बिहीबारदेखि वीरगंजमा पनि आफ्नो सेवा सुरु गरेको हो ।

वीरगंजकाे पुजन होटलमा कम्पनीले पत्रकार सम्मेलनको आयोजना गरि आफ्नो सेवा सुविधाको बारे जानकारी दिएको छ । नेपलामा सबैलाई इन्टरनेटको आवश्यता परी रहेको परिपेक्षमा खासगरी गरिब बिपन्न,विधार्थी एवं मजदुर बर्गलाई लक्षित गरी कम्पनीले वीरगंजमा पनि सेवा विस्तार गरेको जनाएको छ ।

यसअघि कम्पनीले काठमाडौँ सहित देशका अन्य १२ प्रमुख सहरहरूमा आफ्नो सेवा विस्तार गरिसकेको छ । अब वीरगंजका प्रयोगकर्ताले वाइफाई नेपालको ५० र ८० एमबीपीएस गतिको इन्टरनेट प्याकेज मुल्य अभिबृद्धि कर बाहेक क्रमश ५ हजार ५ सय र ७ हजार ५ सयमा खरिद गर्न सक्नेछन् ।

बिहीबार एक कार्यक्रमका बिच वाइफाई नेपालले आदर्शनगरमा आफ्नो सम्पर्क कार्यालयको पनि उद्घाटन गरेको छ । कार्यालयको प्रमुख अतिथि एवम् ग्रिन सिटी सामुदायिक सेवा केन्द्र तथा ग्रिन सिटी सामुदायिक प्रहरी सेवा केन्द्र आदर्शनगरका अध्यक्ष जयप्रकाश खेतानलगायतले रिबन काटेर कार्यालयकाे उद्घाटन गरेका थिए ।

पत्रकार सम्मेलनमा नेपालकै सस्तो इन्टरनेट उपलब्ध गराउने वाइफाई नेपालले आफ्नो शाखा विस्तार गरेको भन्दै सेवाग्राहीहरुलाई निधर्कका साथ लाभ उठाउन कम्पनीका वीरगंज शाखा प्रमुख सुबोध ठाकुरले बताए ।

नयाँ ग्राहकले दिलदार अफर अन्तर्गत एक बर्षकाे लागि ५० एमबीपीएसको प्याकेज खरिद गर्दा इन्टरनेट शुल्क रु ४ हजार र राउटर शुल्क एक हजार ५ सय गरी ५ हजार ५ सय रुपैयाँ तिर्नुपर्ने हुन्छ ।

यसैगरी दिलदार अफर अन्तर्गत नै एक बर्ष कै लागि ८० एमबीपीएसको प्याकेज खरिद गर्दा इन्टरनेट शुल्क ६ हजार र राउटर शुल्क एक हजार ५ सय गरी जम्मा ७ हजार ५ सय रुपैयाँ भुक्तानी गर्नुपर्ने हुन्छ । यसका अतिरिक्त कम्पनीले ग्राहकसँग अन्य कुनै पनि शुल्क नलिने पत्रकार सम्मेलनमा प्रमुख कार्यकारी अधिकृत सत्रुधन पञ्जियारले बताए ।

पहिलो चरणमा वीरगंजकाे सहरी क्षेत्रमा सेवा विस्तार गरेको कम्पनीले क्रमश: परवानीपुर, पोखरिया, ड्राइपोर्ट र जिल्लाका अन्य ग्रामीण भेगमा समेत सेवा विस्तार गर्ने योजना बनाइरहेको पञ्जियारलेले जानकारी दिए ।

कम्पनीले सस्तो इन्टरनेट उपलब्ध गराउँने भएपनि सेवामा कुनै सम्झौता नगर्ने पत्रकार सम्मेलनमा पञ्जियारले बताए । सेवाग्राहीलाई कुनै किसिमको समस्या परे त्यसको छिटो छरितो समाधन गर्ने समेत पत्रकार सम्मलेन कम्पनीका सुजित पाैडेलले बताए ।

घरायसी ग्राहकहरूको इन्टरनेट सम्बन्धी आवश्यकताहरू र त्यसले हने थुप्रै फाइदाहरु लाई ध्यानमा राख्दै वाई-फाई नेपालले आफ्ना अफर तथा इन्टरनेटका प्याकेजहरु बजारमा ल्याएको उनले वताए ।

आचरणविपरीत काम गर्ने मधेशका २ सय ७३ प्रहरी कारबाहीमा

0

वीरगंज । आचरण विपरीत काम गरेको २ सयभन्दा बढी प्रहरी कर्मचारी कारवाहीमा परेका छन् ।

आर्थिक वर्ष ०७९/८० को साउनदेखि जेठ मसान्तसम्म ११ महिनामा राम्रो कार्य गर्ने प्रहरीलाई पुरस्कृत गरिएको छ भने, आचरणविपरीत कार्यमा लागेका प्रहरीलाई प्रहरी ऐन नियमावली अनुसार कारबाही भएको छ ।

आठ जिल्लाबाट उत्कृष्ट कार्य गरेका ७९१ जना प्रहरीलाई विविध विधाले पुरस्कृत गरिएको छ भने आचरणविपरीत गर्ने २७३ जना प्रहरीलाई कारबाही गरिएको मधेश प्रदेश प्रहरी कार्यालय जनकपुरका प्रमुख एवम् प्रहरी नायब महानिरीक्षक जनक भट्टराईले बताए ।

पुरस्कृत हुनेहरुमा ६ जना प्रहरी वरिष्ठ उपरीक्षक, १३ प्रहरी उपरीक्षक, २७ जना प्रहरी नायब उपरीक्षक, ५९ जना प्रहरी निरीक्षक, ४५/४५ जना प्रहरी वरिष्ठ नायब निरीक्षक र प्रहरी नायब निरीक्षक छन् ।

यसैगरी, प्रहरी सहायक निरीक्षक १११ जना, प्रहरी वरिष्ठ हवल्दार ५७, प्रहरी हवल्दार ११३, प्रहरी सहायक हवल्दार १६१, प्रहरी जवान १३४, एक प्रशिक्षार्थी प्रहरी जवान र १९ जना प्रहरी कार्यालय सहायकलाई पुरस्कृत गरिएको उनले जानकारी दिए ।

यस्तै, प्रहरी आचरणविपरीत कार्य गर्ने २ सय ७३ जना प्रहरीलाई प्रहरी ऐन नियमावली अनुसार कारबाही भएको मधेश प्रदेश प्रहरी कार्यालय जनकपुरका प्रहरी प्रवक्ता प्रहरी उपरीक्षक महेन्द्रकुमार श्रेष्ठले बताए ।

उनका अनुसार प्रहरी जवानदेखि प्रहरी निरीक्षकसम्म कारबाहीमा परेका छन् ।

छ जना प्रहरी निरीक्षक, ४ जना प्रहरी वरिष्ठ नायब निरीक्षक, ९ जना प्रहरी नायब निरीक्षक, १७ जना प्रहरी सहायक निरीक्षक, १२ जना प्रहरी वरिष्ठ हवल्दार, ५५ जना प्रहरी हवल्दार, ५२ जना प्रहरी सहायक हवल्दार, १०३ जना प्रहरी जवान, प्रशिक्षार्थी प्रहरी जवान र छ जना प्रहरी कार्यालय सहयोगी कारवाहीमा परेका छन् ।

आठै जिल्लाबाट १२८ जनालाई नसिहत, ४० जना निलम्बन, २५ जनाको ग्रेड घटुवा, २२ जनाको ग्रेड रोक्का, १४ जनाको पदोन्नति रोक्का, १३ जनालाई सेवाबाट हटाइएको, १० जनालाई सचेत गराइएको, ८ जनालाई सेवा अन्त्य गराइएको छ ।

यसैगरी, ७ जनालाई सुरु स्केलमा घटुवा, ४ जना स्वतः निलम्बन र १–१ जनालाई सेवाबाट बर्खास्त गरिनुका साथै चाल–चलनमा प्रतिकूल राय नभएकोलाई कारवाही गरिएको सूचना अधिकारी श्रेष्ठले बताए ।

सशस्त्र प्रहरीद्वारा लागु औषध चरेशसहित दुई जना पक्राउ

0

वीरगंज । सशस्त्र प्रहरी बल नेपालले लागु औषध चरेशसहित दुई जनालाई नियन्त्रणमा लिएकाे छ ।

प्रस्तावित सीमा सुरक्षा गुल्म वीरगंजबाट खटिएको चेकप्वाईन्ट डिउटी टोलीले पर्साकाे पटेर्वा सुगौली गाउँपालिका.-५ निवासी ३५ बर्षिय सत्यनारायण माझी र साेही ठाउँ निवासी ४० बर्षिय प्रलाद माझीलाई नियन्त्रमा लिएकाे सशस्त्र प्रहरी बल नेपाल नं. १३ गण, पर्साका सूचना अधिकारी सशस्त्र प्रहरी उपरिक्षक संताेष बस्नेतले जानकारी दिए ।

विशेष सुचनाको आधारमा बुधबार विहान ०८:४५ बजेको समयमा वीरगंज महानगरपालिकाकाे वडा नं. १६ भन्सार मेनगेट स्थित खटिएको चेकप्वाईन्ट डिउटी टोलीले नेपालबाट भारततर्फ लैजादै गरेको १५.३१० के.जी. अवैध लागु औषध चरेशसहित दुबै जनालाई पक्राउ गरेकाे उनले वताए ।

उनका अनुसार दुबै जना सवार बि.आर. २२ एम ४२०६ नम्बरको भारतिय मोटरसाइकललाई चेकजाँच गर्ने क्रममा मोटरसाइकलको ट्याङ्कीमा लुकाई छुपाई नेपालबाट भारततर्फ लैजादै गरेको अवैध लागु औषध चरेश जस्तो देखिने पदार्थ फेला परेको हाे ।

उक्त चरेश र मोटरसाइकलसहित दुबै जनालाई नियन्त्रणमा लिई आवश्यक कारबाहीको लागि प्रहरी चौकी ईनर्वा पर्सामा बुझाईएको सुचना अधिकारी बस्नेतले वताए ।

एनवाइईएफ वीरगंज च्याप्टर बिल्डिङ अवार्डबाट सम्मानित

0

वीरगंज । नेपाली युवा उद्यमी मञ्च (एनवाइईएफ) वीरगंजका च्याप्टरले बिल्डिङ इन्टरप्रेन्युरियल इकोसिस्टम २०२२ अवार्ड प्राप्त गरेको छ । 

देशभर रहेका १२ वटा च्याप्टरहरूमध्ये उद्यमशीलता विकासका लागि सबैभन्दा धेरै काम गर्दै वीरगंजमा नव उद्यमीहरूका लागि सकारात्मक वातावरण सृजना गरेकोमा एनवाइईएफ वीरगंज च्याप्टर बिल्डिङ इन्टरप्रेन्युरियल इकोसिस्टम अवार्डबाट सम्मानित भएको हो ।  

काठमाडौँमा सम्पन्न मञ्च १९ औँ वार्षिक साधारण सभा तथा अधिवेशनमा एनवाइईएफ वीरगंजकाे तर्फबाट उक्त अवार्ड निवर्तमान अध्यक्ष राकेश साहले ग्रहण गरेका थिए ।  

अवार्ड ग्रहण गर्दै साहले सम्मानबाट च्याप्टरलाई थप ऊर्जाका साथ काम गर्ने हौसला प्राप्त भएको बताए । वीरगंजमा मात्र नभई पर्सा जिल्लामै उद्यमशीलता विकास र नवीन सोचका साथ व्यवसाय गर्ने सोच राखेका युवाहरूलाई आफूहरूले गर्ने सहयोगलाई निरन्तरता दिने उनले बताए ।

अधिवेशनबाट सहारा जोशीको नेतृत्वमा नयाँ कार्यसमिति चयन गरिएको छ ।

राउण्ड टेबल र रोटरी क्लबद्वारा स्कूललाई शौचालय हस्तान्तरण

0

वीरगंज । राउण्ड टेबल नेपाल र रोटरी क्लबले संयुक्त रूपमा हेटौँडास्थित एक स्कूलमा निर्माण गरेको शौचालय हस्तान्तरण गरेको छ ।

मकवानपुर जिल्लाको हेटौँडा उपमहानगरपालिका – ४ कर्रास्थित आनन्द मार्ग विशेष शैक्षिक संस्थामा राउण्ड टेबल नेपाल र रोटरी क्लब डिस्ट्रिक्ट ३२९२ ले संयुक्त रूपमा निर्माण गरेको सेप्टिक ट्याङ्कीसहितको तिन वटा शौचालय र तिन वटा हात धुने बेसन हस्तान्तरण गरेको हो ।

मङ्गलवार स्कूल प्राङ्गणमा आयोजित कार्यक्रमका बिच दुवै संस्थाका पदाधिकारीहरूले स्कूलका प्रमुख कोपिला श्रेष्ठलाई शौचालय हस्तान्तरण गरेका थिए ।

कूल पाँच लाख रुपैयाँको लागतमा निर्मित शौचालय र हात धुने बेसनको आधा रकम राउण्ड टेबल नेपाल एरिया – १ का परियोजना संयोजक रोहित अग्रवालको पहलमा काठमाडौँ जिल राउण्ड टेबल – २२ ले उपलब्ध गराएको छ भने आधा रकम रोटरी क्लबले दिएको छ ।

शौचालय निर्माणसँगै स्कूलमा आउने विद्यार्थी, शिक्षक र अभिभावकलाई समेत सुविधा मिल्ने दुवै संस्थाका पदाधिकारीहरूको विश्वास छ । शिक्षा क्षेत्रमा सुधारका निमित्त काम गर्दै आइरहेको राउण्ड टेबल नेपाल र रोटरी क्लबले यसअघि पनि विभिन्न शैक्षिक संस्थाहरूमा भवन निर्माण, छात्रवृत्ति वितरणदेखि शैक्षिक र आवश्यक पूर्वाधारका सामग्री समेत वितरण गर्दै आइरहेका छन् ।

हस्तान्तरण कार्यक्रममा राउण्ड टेबल नेपाल एरिया – ३ का परियोजना संयोजक दीपल खन्ना, वीरगंज फ्रेन्ड्स राउण्ड टेबल – ८ का उपाध्यक्ष आकाश सर्राफ, कोषाध्यक्ष दीपक अग्रवाल, सचिव सुदीप खेतान, हेटौँडा राउण्ड टेबल नेपाल – ३० का उपाध्यक्ष विकास जलान, सदस्य दीपक अग्रवाल, रोटरी क्लबका पूर्व डिस्ट्रिक्ट गभर्नर सञ्जय गिरी, सन्तोष रिजाल, डिस्ट्रिक्ट अफिसर अमीत गिरी, विष्णु कार्की, रोटरी क्लब नारायणी मिड टाउनका दीपेश श्रेष्ठ, रोटरी क्लब हेटौँडाका अध्यक्ष स्वागत राज प्याकुरेल, कोषाध्यक्ष रबी रेग्मी, रोटरी क्लब मकवानपुरका अध्यक्ष अञ्जनी पाराजुलीलगायतको उपस्थिति रहेको थियो ।