Date
सोम, कार्तिक ३०, २०८३
Mon, November 16, 2026
Home Blog Page 515

पशुपति मन्दिरकाे गहना महानगरका मेयरलाई हस्तान्तरण

0

वीरगंज । वीरगंजकाे चिनी कारखाना परिसरमा रहेको पशुपतिनाथ मन्दिरको शिवलिङ्गको गहना बिहीबार चिनी कारखाना व्यवस्थापनले महानगर प्रमुख राजेशमान सिंहलाई हस्तान्तरण गरेको छ ।

पशुपति मन्दिरको सौन्दर्यकरण गरि श्रद्धालु भक्तजन आउजाउ गर्ने वातावरण बनाएसँगै महानगर प्रमुख सिंहले शिवलिङ्गको गहनाको सम्बन्धमा खोजी गरेका थिए ।

जस अनुरुप तत्कालिन चिनी कारखाना व्यवस्थापनसँग गहना रहेको जानकारी आएपछि त्यसको व्यवस्थापनलाई मन्दिरको गहना उपलब्ध गराउन आग्रह गरिएकाे थियो । त्यसपछि बिहिबार एक कार्यक्रमका बीच कारखाना व्यवस्थापनले महानगर प्रमुख सिंहलाई २०५९ सालमा मन्दिरबाट निकालेर राखेको शिवलिङ्गको गहना उपलब्ध गराएको हो ।

चाँदीको मुकुट, चाँदीको कमरबन्द, चाँदीको शंख, चाँदीको पिर्का, चाँदीको खराउ १/१ थान यस्तै चाँदीको बेलपत्र भएको माला ४ थान, मुकुटसँगै लगाउने चाँदीको छाता ५ थान, सुनको पट्टी भएको ४ थान रुद्राक्षको माला चिनी कारखाना व्यवस्थापनले महानगर प्रमुख सिंहलाई हस्तान्तरण गरेको हो ।

चिनी कारखाना व्यवस्थापनबाट प्राप्त गरेको गहना श्रावणी मेलाकै अवसरमा आउँदो सोमबार शिवलिङ्गमा पुनस्थापित गर्ने मेयर सिंहले बताए ।

रौतहटमा रु ५० हजारमै ३ वर्षे प्राविधिक शिक्षा

0

वीरगंज । रौतहटमा अबदेखी बिद्यार्थीहरु रु ५० हजारमै ३ वर्षे प्राविधिक शिक्षा अध्ययन गर्न पाउने भएका छन । रौतहटको देवाही गोनाही नगरपालिका वडा नं. ११ स्थित रहेको जय किसान बहु-प्राविधिक शिक्षालय धरहरीले रु ५० हजारमा प्राविधिक शिक्षा अध्ययन गराउन थालेकाे हाे ।

विगत ८ बर्षदेखी अध्य्यन अध्यापन गराउँदै शिक्षालयले अहिलेसम्म लिदै आएको प्रति विद्यार्थी रु ९८ हजार शुल्क लिदै आएकाे थियाे । यस बर्षदेखि घटाएर ३ बर्षे काेर्षकाे रु ५० हजार मात्र शुल्क निर्धारण गरेको छ ।

शिक्षालयले अब रु ५० हजार मै ३ वर्षे ओभरसियर,आइटी र कृषि क्षेत्रमा अध्ययन अध्यापन गराउने छ । रौतहटका प्रमुख जिल्ला अधिकारी धर्मेन्द्र कुमार मिश्रको अध्यक्षतामा बिहिबार बसेको बैठकले यस्तो निर्णय गरेको प्रावधिक शिक्षालयका शिक्षालय प्रमुख ई. धनोज कुमार यादवले जानकारी दिए ।

यो निर्णयसँगै स्थानीयदेखी बाहिर जिल्लाका अध्य्यन गर्न खोज्ने निम्न आयस्रोत भएका बिद्यार्थीहरु पनि लाभान्वित हुने छन् । जहाँ शिक्षालयले आधुनिक प्रविधी अनुअसार पठन पाठन गराउदैं आएको छ ।

शिक्षालयमा सुबिधा सम्पन्न पुस्तकालय, कम्प्युटर ल्याब, बिज्ञान प्रयोगशालाको व्यवस्था समेत रहेकाे छ ।  यसका साथै शिक्षालयमा डिजिटल प्रविधीबाट अध्यापन गराउने व्यबस्था समेत गरिएको शिक्षालयले जनाएकाे छ ।

बिद्यार्थीलाई आबश्यक पुस्तक लगायत शैक्षिक सामाग्रीहरु शिक्षालयले नै उपलब्ध गराउने छ । दक्ष र अनुभवी शिक्षकबाट अध्यापन गराउँदै आएकाे शिक्षालयमा बिद्यार्थीको लागि सुबिधा सम्पन्न खेल मैदानको व्यवस्था समते रहेकाे छ ।

मुक्त हरवाचरवा, हलिया र कमैयाका सवालमा अन्तरसंवाद

0

काठमाडौं । राष्ट्रिय दलित नेटवर्क, नेपालको आयोजनामा मुक्त हरवाचरवा, हलिया र कमैयाको न्यायिक पुनरस्थापनाका लागि सरकारलाई सचेतीकरण गर्ने उद्देश्यले बहुपक्षीय सरोकारवालाहरु बिच काठमाण्डौमा अन्तर संवाद कार्यक्रम सम्पन्न भएको छ ।

कार्यक्रमको सुभारम्भ मै अध्यक्षता ग्रहण गर्दै राष्ट्रिय दलित नेटवर्क, नेपालका केन्द्रीय अध्यक्ष एवं मुक्त हरवाचरवा, हलिया, कमैया र कमलरी बस्तुस्थिती अध्यययन समितिका सदस्य गणेश बिश्वकर्माले अवधारणागत मन्तब्य राख्दै मुक्त हरवाचरवा, हलिया र कमैयाको न्यायिक पुनरस्थापनाका लागि नेपाल सरकारले अध्ययन समितिको प्रतिवेदनका सिफारिश अक्षरस कार्यान्वयन गरिनुपर्ने कुरामा जोड दिए ।

उनले नेपालको संविधानले सुनिश्चित गरेका मौलिक हकहरूको प्रभावकारी कार्यान्वयन गर्नु राजनीतिक परिवर्तनको अनुभुति गराउनु र समाजमा सम्मानित जीवन जिउन पाउने वातावरणको सुनिश्चितता गर्नु नेपाल सरकारको संवैधानिक दायित्व भएकोले मुक्त हरवाचरवा, हलिया र कमैयाको न्यायिक पुनरसथापनाका लागि तिनै तहका सरकार संबेदनशिल हुनुपर्ने जिकीर गरे ।

सोही कार्यक्रमका अर्का अतिथी संबिधान सभा सदस्य र नेकपा (माओवादी केन्द्र) का नेता हरी श्रीपाईलीले अध्ययन प्रतिवेदनमा आधारित भूमि ब्यवस्था मन्त्रालयले हालै तयार गरेको मुक्त कमैया, कम्लहरी हलिया र हरवा चरवाको पुनरस्थापना सम्वन्धी कार्यविधिलाई मन्त्रीपरिषदले अविलम्व पारित गरेर कार्यान्वयन नगरेसम्म मुक्त हरवाचरवा, हलिया र कमैयाको न्यायिक पुनरस्थापना गर्न नसकिने बताए ।

उनले संघीय सरकारले स्थानीय तहलाई जिम्मेवारी प्रदान गर्दै मुक्त हरवा चरवाको लगत संकलन र परिचय पत्र बितरण यसै आर्थिक बर्षमा प्रारम्भ गरेर पुनरस्थापना कार्य अगाडी बढाउनुपर्ने कुरामा जोड दिए ।

कार्यक्रमका बक्ताहरु राष्ट्रिय भूमि आयोगका सदस्य गोवर्धन कोली, श्रम, रोजगार तथा सामाजिक सुरक्षा मन्त्रालयका उपसचिव प्रकाश अधिकारी, भूमि ब्यवस्था, सहकारी तथा गरिबी निवारण मन्त्रालयका उपसचिव चन्द्र सिवाकोटीले कमैया, कम्लहरी हलिया र हरवा चरवाको पुनरस्थापनाका लागि आफुहरु प्रतिबद्ध रहेको कुरा बताए ।

 

सो अवसरमा नेपाल ट्रेड यूनियन काँग्रेसका केन्द्रीय उपाध्यक्ष राजेश पालिखे, जिफण्टका केन्द्रीय उपाध्यक्ष कमल गौतम, दलित गैरसरकारी संस्था महासंघका अध्यक्ष जेबी बिश्वकर्मा, समावेशी फाउण्डेसनका उपाध्यक्ष एवं अधिवक्ता चक्रमान बिश्वकर्मा, राष्ट्रिय मुक्त हलिया समाज महासंघ नेपालका अध्यक्ष ईश्वर सुनार, राष्ट्रिय हरवाचरवा अधिकार मञ्चका सचिव मोहमद कासिम मिया, द फ्रिडम फण्डका कार्यक्रम ब्यवस्थापक जियम श्रेष्ठ, अन्तराष्ट्रिय भुमि अधिकार मञ्च नेपालका कार्यक्रम ब्यवस्थापक प्रेम नेपाली, अन्तराष्ट्रिय भूमि सञ्जालका धर्मराज जोशी, पूरक एशियाका कार्यक्रम ब्यवस्थापक नितु पोखरेल, एक्सनएड नेपालका सुजात श्रमनेरा लगायतले मनतब्य ब्यक्त गरे ।

राष्ट्रिय दलित नेटवर्क, नेपालका केन्द्रीय अध्यक्ष गणेश बहादुर बिश्वकर्माको अध्यक्षतामा सम्पन्न कार्यक्रममा महासचिव मोहन ओडले सहभागीहरुलाई स्वागत गरेका थिए भने कार्यक्रमको सञ्चालन कार्यकारी निर्देशक हुकुम बहादुर सार्कीले गरेका थिए ।

श्रीमतीकाे हत्या गर्ने श्रीमान पक्राउ

0

वीरगंज । बारा प्रहरीले श्रीमतीकाे हत्या गर्ने श्रीमानलाई पक्राउ गरेकाे छ । भारत विहार राज्यको जिल्ला पुर्वी चम्परण थाना ढाका ग्राम पचपकडी वडा न.१४ रुपौलीया टोल निवासी ३१ बर्षिय मोहमद अमानुल्लाह मियाँलाई प्रहरीले नियन्त्रणमा लिएकाे हाे ।

बारा सिम्रौनगढ नगरपालिका वडा नं.६ बजार टोलमा निवासी जहिर मियाँको बिवाहित छोरी श्रीमती आसमिन खातुनको बुधबार बिहान ३ बजेको समयमा घाँटी रेटी हत्या भएको थियाे ।

साे सुचनाको आधारमा ईलाका प्रहरी कार्यालय सिम्रौनगगढ बाराबाट प्रहरी निरीक्षकको कमाण्डमा खटि गएको प्रहरी टोलीले घटनास्थलमा पुगी अनुसन्धान गर्दा पक्राउ परेका मियाँले ससुराली घरमा आएको मौका छोपी आफ्नै श्रीमतीलाई घरायसि बिवादमा मासु काट्ने धारिलो दाउले हत्या गरेकाे खुलेकाे जिल्ला प्रहरी कार्यालय बाराले जनाएकाे छ ।

निजको श्रीमती सुती रहेको अवस्थामा घाँटीको अगाडीको भागमा तथा शरिरिको बिभिन्न भागमा प्रहार गरी हत्या गरेको देखिएकोमा हत्या पश्चात निज घटनास्थलबाट भाग्दै गरेको अवस्थामा स्थानीय मानिसहरुको सहयोगमा मियाँलाई प्रहरीले नियन्त्रणमा लिएकाे जिल्ला प्रहरी कार्यालय बाराका प्रवक्ता प्रहरी निरिक्षक जय कृष्ण प्रसाद कुर्मीले जानकारी दिए ।

मृतक २२ वर्षिय खातुनको २ छोरा, १ छोरी रहेका छन् र उनी माईती घरमा बस्दै आएकोमा पहिला पनि पटक पटक आक्रमण गर्ने गरेको देखिएको प्रहरीले जनाएकाे छ ।

अभियुक्त मियाँ उपर कर्तव्य ज्यान मुद्दा दर्ता गरी थप अनुसन्धान कार्य भईरहेको बारा प्रहरीले जनाएकाे छ । 

बारामा चोरीकाे १२ वटा मोटरसाइकलसहित ७ जना पक्राउ

0

वीरगंज । बारा प्रहरीले चोरीका १२ वटा मोटरसाइकलसहित ७ जनालाई  नियन्त्रणमा लिएको छ । जिल्लाको विभिन्न स्थानबाट चोरी भएको १२ मोटरसाइकलसहित सात जनाको गिरोहलाई नियन्त्रणमा लिइएको जिल्ला प्रहरी कार्यालय बाराले जनाएकाे छ ।

प्रकाउ पर्नेमा बारा जितपुरसिमरा उपमहानगरपालिका वडा नम्बर १६ का १९ वर्षीय विर्धोज वाईवा, सोही ठाउँका १९ वर्षीय सुदर्शन बोम्जन, कलैया उपमहानगरपालिका वडा नम्बर २० बस्ने २० वर्षीय दीपेन्द्र कुमार महतो, सोही ठाउँका १९ वर्षीय राधेश्याम महताे, सोही ठाउँका २१ वर्षीय सतेन्द्र कुमार गुप्ता, महागढीमाई नगरपालिका वडा नम्बर ९ का २० वर्षीय राजीनन्द महतो र रौतहट जिल्ला चन्द्रनिगाहपुर नगरपालिका वडा नम्बर २ का २६ वर्षीय पञ्चालाल बलोन रहेका छन् ।

प्रहरीले चोरी भएका बा २६ प ७७५३, ज ११ प ८४९५, ना ५१ प २७९०, ना ५२ प ७१३२, बिआर ०५ एफ ०६०३, बीआर ०५ ए ९०६२, ना ४१ प ८४६८, बा ९० प ५००८, मधेश प्रदेश ०३ ०२६ प ९९५६, बा ६४ प ४६८४ र दुईवटा अन टेस्ट नयाँ मोटरसाइकल नियन्त्रणमा लिएको जिल्ला प्रहरी कार्यालय बाराका प्रवक्ता प्रहरी निरिक्षक जय कृष्ण प्रसाद कुर्मीले जानकारी दिए ।

मोटरसाइकल चोरी भएको निवेदनको आधारमा खोजतलास गर्दै जाने क्रममा खटिएको प्रहरी टोलीले चेकजाँच गर्ने क्रममा विभिन्न समयमा मोटरसाइकल र मानिस बरामद गरेकाे उनले वताए । 

पक्राउ परेकाहरूलाई चोरी तथा डाँकासम्बन्धी मुद्दामा बारा जिल्ला अदालतबाट म्याद थप गरी थप अनुसन्धान कार्य भइरहेको बारा प्रहरीले जनाएको छ ।

बिग्रेकाे माइस्थान मन्दिर परिसर मर्मत गर्न मेयर सिंहकाे निर्देशन

0

वीरगंज । वीरगंजकाे माइस्थान मन्दिर परिसरको सौन्दर्यकरण विगारेको खानेपानी संस्थानले तत्काल मर्मत गरिदिने भएको छ ।

महानगरका मेयर राजेशमान सिंह बिहीबार बिहान आफैँ मन्दिर परिसरको अवलोकन गर्दै विग्रिएका संरचना तत्काल मर्मत गरिदिन खानेपानी संस्थानलाई निर्देशन दिएका हुन् ।

खानेपानी संस्थानले पानीको पाइप विस्तार गर्ने क्रममा मन्दिर परिसरमा सौन्दर्यकरणका लागि लगाएको पेभर्स निकालेर जथाभावी राखिदिएको थियो ।

मन्दिर सौन्दर्यकरणका लागि आफूहरु लागि परेको भन्दै मेयर सिंहले खानेपानी संस्थानले महानगरसँग समन्वय नै नगरी खनिदिँदा सौन्दर्यकरण विग्रिएको बताए । संस्थानले पाइप लाइन विस्तारको काम गर्दा महानगरसँग समन्वय गरेर मात्रै गर्न पनि उनले निर्देशन दिए ।

पानीको हाहाकार भएका बेला हतारमा काम गर्दा कमजोरी भएको स्वीकार्दै संस्थानका प्रमुख निरण श्रेष्ठले मर्मतको काम तत्काल गरिदिने प्रतिबद्धता जनाए ।

पाेखरियामा सेवा प्रदायक कार्यालय स्थापनाका लागि पहल गर्छु : मन्त्री रिजाल

0

पाेखरिया । संघिय सरकारकाे उद्याेग, वाणिज्य तथा आपूर्ति मन्त्री रमेश रिजाले पाेखरियामा सेवा प्रदायक कार्यालय संचालनकाे लागि पहल गर्ने वताएका छन् ।

पोखरिया नगरपालिकाले बिहिबार आयाेजना गरेकाे अभिनन्दन कार्यक्रमलाई सम्बाेधन गर्दै उनले पाेखरियामा मालपाेत, जिल्ला प्रशासन, नापी लगायतका सेवा प्रदयाक कार्यालयहरु संचालनमा ल्याउन पहल र प्रयास गर्ने वताए ।

उनले भने “जिल्लाकाे सदरमुकाम वीरगंजमा रहेका यी सबै कार्यालयहरुमा काम गराउन जाँदा खर्च बढी लाग्ने गरेकाे छ । वीरगंज रहेका कार्यालय भ्रष्टचार र घुसखाेरी पनि त्यति कै छ । पाेखरियामा सेवा प्रदायक कार्यालयका शाखाहरु संचालनमा आए भ्रष्टाचार र घुसखाेरी पनि बन्द हुन्छ ।”

पाेखरिया नगर कार्यपालिकाकाे सभा हलमा भएकाे कार्यक्रममा नगर प्रमुख प्रधुमन चाैहानले फुल माला र अविरकाे टिका लगाएर मन्त्री रिजालकाे स्वागत तथा सम्मान समेत गरेका थिए ।

नगर प्रमुख चौहानको अध्यक्षतामा भएकाे कार्यक्रममा जगरनाथपुर गाउँपालिकाका अध्यक्ष श्रीकान्त प्रसाद यादव, नगरपालिकाका प्रमुख प्रशासकीय अधिकृत देवेन्द्र सापकोटा, वडाध्यक्ष प्रमोद गिरी, केदार महतो चाई, रामप्रवेश महतो चाई, लक्ष्मण साह कानू, महेन्द्र महतो चाई, सियानन्द प्रसाद चौहान, प्रमानंद प्रसाद पटेल, नौसाद आलम, नेपाली कांग्रेस पर्साका सह सचिव नवीन सिंह लगायतकाे सहभागिता रहेको थियाे ।

कार्यक्रमकाे संचालन नगरपालिकाका प्रशासन शाखा प्रमुख अजय श्रीवास्तवले गरेका थिए ।

सशस्त्र प्रहरीद्वारा प्रसाैनीबाट २६ भैंसी नियन्त्रणमा

0

वीरगंज । भारतबाट अवैध रुपमा भित्र्याउँदै गरेको पशु चौपाया सशस्त्र प्रहरीले नियन्त्रणमा लिएको छ । सशस्त्र प्रहरी बल प्रसाैनी भाठाबाट खटिएकाे प्रहरी गस्ती टाेलीले बिहिबार विहान २६ वटा भैंसी नियन्त्रणमा लिएकाे हाे ।

भारतबाट अवैध रुपमा नेपाल भित्र्याइएकाे पशु चाैपाया विन्दवासिनी गाउँपालिकाकाे वडा नं. ५ स्थित प्रसाैनी पुलबाट नियन्त्रणमा लिइएकाे सशस्त्र प्रहरी बल बिओपी प्रसाैनीका प्रहरी निरिक्षक प्रकाश थापाले जानकारी दिए ।

प्रहरी निरिक्षक थापाकाे नेतृत्वमा रहेकाे प्रहरी गस्ती टाेलीलाई देख्नै वितिक्कै तस्करहरु भैंसी छाेडी फरार भएकाे उनले वताए । 

बरामद गरिएको राँगा भैंसीको बजार मूल्य ५ लाख रहेको अनुमान सशस्त्र प्रहरीले गरेको छ । नियन्त्रणमा लिइएका भैंसीलाई भन्सारमा बुझाउने तयारी भइरहेको सशस्त्र प्रहरी बल नेपाल १३ नम्बर गण हेडक्वार्टरका गणपति सशस्त्र प्रहरी उपरीक्षक सुमन थपलियाले वताए ।

राजनीतिकर्मी कुटिएकाे भन्दै बारामा जारी आन्दाेलन स्थगित

0

बारा । राजनीतिककर्मी कुटिएकाे भन्दै बाराकाे कलैयामा एक हप्तादेखि जारि आन्दाेलन स्थगित भएकाे छ । बुधबार भएकाे द्वपक्षिय छलफलमा सहमति भएपछि आन्दाेलन स्थगित भएकाे हाे ।

जिल्ला प्रहरी कार्यालय, बाराको परिसर भित्र प्रहरीद्वारा नेपाली काँग्रेस बाराका सचिव भैयाराम यादव र ने.क.पा. एस बाराका उप-सचिव ध्रुव प्रसाद यादवसँग सवारी दुर्घटनाकाे बिषयलाई लिएर छलफलको क्रममा दुर्ब्यवहार गर्ने प्रहरी नायब उपरिक्षक पुरुषोत्तम प्रसाद पाण्डे र प्रहरी निरिक्षक रुपेश साहसंग माफी माग्न लगाउने सहमति भएकाे छ ।

सहमती अनुसार प्रहरी नायब उपरिक्षक पाण्डे र प्रहरी निरिक्षक साहले कांग्रेसका सचिव भैयाराम र ने.क.पा. एसका उपसचिव ध्रुबसँग माफी माग्ने छन् ।

यसैगरी घटनामा संलग्न भएका प्रहरी नायब उपरिक्षक पाण्डे र प्रहरी निरिक्षक साहलाई दुई वर्ष सम्म गणमा राख्ने गरी सरुवा व्यवस्थापन एक हप्ता भित्र गरि सक्ने भएकाे निर्णय प्रहरी कार्यालयमा लेखी पठाउने पनि सहमति भएकाे छ ।

त्यसैगरी उक्त घटनामा घाइते भएका सचिव भैयाराम र  उपसचिव ध्रुवकाे उपचारमा भएको खर्च सरकारले व्यहोर्ने गरी गृह मन्त्रालयसंग माग गर्न लेखी पठाउने निर्णय भएकाे जनाइएकाे छ ।

बाराका प्रमुख जिल्ला अधिकारी नवराज सापकाेटाकाे कार्यकक्षमा भएकाे चार बुन्दै सहमतिकाे अन्तिम बुन्दामा बिहिबारदेखि आन्दोलनका सम्पूर्ण कार्यक्रम बन्द गर्ने निर्णय भएकाे समेत उल्लेख गरिएकाे छ ।

आन्दाेलनरत पक्षले साेही घटनाकाे बिराेधमा बुधबार कलैया बन्द समेत गरेका थिए । प्रहरी नायब उपरिक्षक पाण्डे र प्रहरी निरिक्षक साहलाई निलम्बन गर्नु पर्ने माग राख्दै आन्दाेलरत पक्ष एक हप्तादेखि चरणबद्ध आन्दाेलनमा थियाे ।  

दुइपक्षिय बैठककाे निर्णय

सडक अतिक्रमण गरेर नगवामा बनाइएकाे संरचना हटाइयाे

0

वीरगंज । वीरगंज महानगरपालिकाको वडा नम्वर १६ नगवाको नयाँ बस्तीमा सडक अतिक्रमण गरि निर्माण गरिएको संरचना बुधबार महानगरले डोजर लगाएर हटाएको छ ।

स्थानीय रमुना सहनी मलाहले सार्वजनिक सडक अतिक्रमण गरि निर्माण गरेको पर्खाल महानगरले डोजर लगाएर हटाएको हो । आफूले निर्माण गरेको संरचना नहटाउन माग गर्दै अदालत पुगेका सहनीलाई अदालतले उनको विपक्षमा आदेश दिएसँगै अतिक्रमण गरेर निर्माण गरेको संरचना हटाइएको महानगरले जनाएकाे छ ।

सडकको जग्गा मिचेर बनाएको संरचना हटाइएसँगै सडक फराकिलो भएको महानगरको भौतिक संरचना अतिक्रमण नियन्त्रण समितिका संयोजक समेत रहेका वडा नम्वर ५ का वडाध्यक्ष प्रदीप चौरसियाले बताए ।

महानगर प्रमुख राजेशमान सिंहको निर्देशनमा ३२ वटै वडामा सार्वजनिक ऐलानी जग्गा खोजी तथा अतिक्रमण गरि निर्माण गरिएको संरचना हटाउने काम तिब्र रुपमा अघि बढेको छ । सोही अनुसार बुधबार नगवाको नयाँ गाउँमा सडक अतिक्रण गरेर निर्माण गरिएको संरचना हटाइएको हो ।

अतिक्रमण हटाउन महानगरको भौतिक संरचना अतिक्रमण नियन्त्रण समितिका संयोजक समेत रहेका वडाध्यक्ष चौरसिया, सचिवालय सल्लाहकार हरि पोखरेल, जनसम्पर्क सल्लाहकार नवराज फुयाँल, नगर प्रहरी प्रमुख हरि भुषाल लगायतको उपस्थिती रहेकाे थियो ।