Date
सोम, कार्तिक ३०, २०८३
Mon, November 16, 2026
Home Blog Page 486

पकहाँ मैनपुरमा शुभकामना आदानप्रदान

0

वीरगंज । पर्साकाे पकहाँ मैनपुर गाउँपालिकामा शुक्रबार बडा दशैं, शुभ दिपावली एवम् छठ पर्वकाे शुभकामना आदानप्रदान कार्यक्रम सम्पन्न भएकाे छ ।

गाउँपालिकाकाे आयाेजनामा भएकाे कार्यक्रममा सहभागीहरुले शुभकामना आदानप्रदान गरेका थिए ।

गाउँपालिकाकी उपाध्यक्ष सरफुन नेशाकाे अध्यक्षतामा भएकाे कार्यक्रममा वडाध्यक्ष संजय चाैहान, बलिराम चाैरसिया, नेपाली कांग्रेसका नेता नसुरलाह मियाँ, लक्ष्मण कुर्मी, राेकेश कुशवाहा, स्वास्थ्यकर्मी रामनाथ महताे लगायत जनप्रतिनिधि र कर्मचारीहरुकाे सहभागिता रहेकाे थियाे ।

गाउँपालिकाकाे कार्यालय पकहाँ मैनपुरमा भएकाे कार्यक्रमकाे सहजिकरण अनिल साहले गरेका थिए ।

मन्त्री सिंहद्वारा रक्तदान

0
वीरगंज । युवाको काम कुनै पनि अवस्थामा युवा जस्तै हुनुपर्छ भन्ने यर्थातलाई मधेशका श्रम तथा यातायात मन्त्री चन्दन कुमार सिंहले चरित्रार्थ गरिदिएका छन् ।
 
विजयादशमीको षष्ठी तिथिमा मन्त्री र नेताहरु प्राय जसो कार्यक्रताहरुको शुभकामना आदानप्रदान कार्यक्रममा व्यस्त रहने अहिलेको परिवेशमा मन्त्री सिंहले पृथक काम गरेर देखाएका छन् ।
 
प्रसुती पिडा सहित जनकपुरधामको प्रादेशिक अस्पतालमा विहिवार भर्ना भएकी सर्लाही बसबरिया गाँउपालिका वडा नं. ६ मण्टोला निवासी २१ वर्षिय महिलाई चिकित्सकले ब्लडमा होमोग्लोभिनको मात्रा एकदम न्युन रहेको भन्दै प्रसुतीका लागि ब्लड एकदम आवश्यक रहेको बताएपछि उनीहरु आत्तिए ।
 
प्रसुती पिडामा रहेकी महिलाकाे ब्लड ओ नेगेटिभ रहेछ । दलित समुदायका श्रीमान ब्लडका लागि हारगुहार गर्न थाले । एककान दुई कान हुदै खवर जनमत पार्टीका युवा नेता विरेन्द्र यादवलाई जानकारी भयो । उनले मन्त्री सिंहबाट उनको पनि ब्लड ग्रुप सोहि नै रहेको थाहापछि खवर गरे, मन्त्री सिंह अस्पतालमै गएर षष्ठी तिथिका दिन रक्तदान जिवनदानको काम गरेका छन् ।
 
देवीको पुजा आराधना भइरहँदा विजयादशमीमै ति महिलाले अन्तत : शुक्रवार छोरी पाएकी छिन् । दम्पतीले जनमत पार्टीका महासचिव समेत रहेका युवा नेता मन्त्री सिंहलाई धन्यवाद दिए । युवा नेता यादवका अनुसार मन्त्री सिंहलाई फोन गरेपछि उनले समस्या थाहा पाउने वितिकै तुरन्त रक्तदान गर्न राजी भए र अस्पताल परिषरमै रहेको नेपाल रेडक्रसमै गएर साँझ ६ बने रक्तदान गरेका थिए ।
 
यादवले भने, ‘प्रदेशसभामा सिंहले रक्तदान गर्दा उनको ओ नेगेटिभ रहेको मलाई थाहा थियो मैले तुरन्त फोन गरे मन्त्री जीले म जलेश्वरमा छु आउदै छु भन्नुभयो र आउनुपनि भयो ।’

वीरगंजमा डान्डिया उत्सव सम्पन्न

0

वीरगंज । प्रकश डान्स एण्ड फिटनेश स्टुडियोकाे आयाेजनामा शुक्रमबार वीरगंजमा डान्डिया उत्सव सम्पन्न भएकाे छ । दशैंकाे अवसरमा वीरगंज नगर सभा गृहमा आयोजित डान्डिया उत्सव सम्पन्न भएकाे हाे ।

प्रकश डान्स एण्ड फिटनेश स्टुडियोका संजाक प्रकाश कर्णकाे अध्यक्षतामा भएकाे कार्यक्रमकाे उद्घाट वीरगंज महानगरपालिकाकाे वडा नं. १० का वडाध्यक्ष सुशिल साह कानुले गरेका थिए ।

कार्यक्रममा समाजवादी प्रेस संगठन पर्साका अध्यक्ष मनाेज पटेल, उपाध्यक्ष शम्भु कुमार सुमन, काेषाध्यक्ष हरिशंकर शर्मा, सदस्य संताेष साह, दिपु बर्णवाल, लिटल बडी इन्टरनेशन प्रि स्कुलका प्रधानाध्यापक बिजय कुमार बाल, माटिन मुक्तान, कमल चाैलागाई, युवराज केशरी, निखिल सर्राफ लगायतकाे उपस्थिती रहेकाे थियाे भने कार्यक्रमकाे संचालन शिवम् साहले गरका थिए ।

एकै दिन चार वटा मोटरसाइकल चोरी गर्ने गाेसाई पक्राउ

0

वीरगंज । पर्सा प्रहरीले एक जना मोटरसाइकल चोरलाई नियन्त्रणमा लिएको छ । वडा प्रहरी कार्यालय बिर्ताबाट खटिएकाे प्रहरी टोलीले बिहीबार वीरगंजकाे विभिन्न स्थानबाट मोटरसाइकल चोरी गरेको आरोपमा एक जनालाई नियन्त्रणमा लिएको हो ।

पक्राउ पर्नेमा रौतहटको कटहरिया नगरपालिका – ८ घर भई हाल वीरगंज महानगरपालिका – १६  बस्ने अजय गोसाईं रहेका छन् । चार वटा चाेरीकाे मोटरसाइकल सहित गाेसाईलाई पक्राउ गरिएकाे जिल्ला प्रहरी कार्यालय पर्साका प्रवक्ता प्रहरी नायब उपरिक्षक (डिएसपी) कुमार बिक्रम थापाले वताए ।

वीरगंजमा लागेको रात्रि बजार घुम्न आएकाहरूको मोटरसाइकल गोसाईंको समूहले चोरी गरेको उनले बताए । उनका अनुसार समूहले मोटरसाइकल चोरी गरेर नारायणी अस्पतालको पार्किङमा लुकाएर राखेको थियो ।

प्रहरीले चोरी भएको प्रदेश – ०२ – ०२३ – ०२२ प ९२७२, ना. २६ प ५८५३, ना ६४ ३८०६ र ना. ५४ प ४७२४ नम्बरको मोटरसाइकल समेत बरामद गरेको छ ।

गोसाईंलाई नियन्त्रणमा लिएर अनुसन्धान अगाडि बढाइएको र उनको समूहका अन्य सदस्यहरूको खोजी कार्य भइरहेको प्रहरीले जनाएकाे छ ।

सशस्त्र प्रहरीको दोहोरो चरित्र : दिनमा कडाई, रातमा तस्करी

0

वीरगंज । सशस्त्र प्रहरीले वीरगंज भन्सार नाकाबाट सानो तिनो घरायसी सामानलाई रोकेर तस्करीको लाइन खोलेको पाइएको छ । रक्सौल बजारबाट घरायसी सामान किनेर ल्याउने सर्वसाधारणहरुले वीरगंज भन्सार नाकामा सशस्त्र प्रहरीको तनाव खेप्नु परेको छ भने तस्करहरुले सशस्त्र प्रहरीको आशिर्वादमा तस्करी सामान ओसारपसार गर्न छुट पाएका छन् ।

सशस्त्र प्रहरीले वीरगंजको इनर्वा, अलौं, सिर्सिया, भेलाही, प्रसौनीभाठ्ठा, अमरपट्टि, सिक्टा भिस्वा, जानकीटाेला लगायतकाे नाकाबाट तस्करीको लाइन खुलाएको बताइएको छ । देखाउनको लागि दिनको समयमा वीरगंज भन्सार मुख्य गेटमा सिसिटिभी जडान गरि सशस्त्र प्रहरीले अर्को नाकाबाट कपडा, काजु, हार्डवेयर लगायतका सामानको तस्करीको लाइन खोलेको वताइन्छ ।

अहिले वीरगंजको इनर्वा बाँसघारी, बलिरामपुर, अलौं, सिर्सिया, भेलाही, प्रसौनीभाठ्ठा, अमरपट्टि, सिक्टा भिस्वा लगायतको नाकाबाट व्यापक कपडा, काजु, हार्डवेयर, इलेक्ट्रोनिक सामान तथा भैसीको तस्करी भइरहेको छ । विगतमा वीरगंजको इनर्वा नाकाबाट तस्करी गर्ने कुख्यात कपडाको तस्कर अहिले वीरगंज लगायत ग्रामीण नाकाबाट तस्करी कार्यलाई तिब्रता दिएका हुन् ।

वीरगंज स्थित सशस्त्र प्रहरीको १३ नं. गणका सशस्त्र प्रहरी उपरीक्षक किसन कर्मचार्यको आशिर्वादले रातिको समयमा अहिरवा टोला, बलिरामपुर, इनर्वा, नगवा हुँदै वीरगंजको मुख्य बजारसम्म तस्करीको सामान पुग्ने गरेको छ भने दिनमा व्यापक कडाईकाे नौटंकी गरिँदैछ ।

देखाउनको लागि भन्सार कार्यालयमा दिनमा कडाई गरेर रातिको १० बजेपछि तस्करीको लाइन खोलिएको हो । पोकामा सामान ल्याउने महिलाहरुको सामान खोसेर सशस्त्र प्रहरीले ठूलै तस्करी नियन्त्रण गरि रहेको देखाउन खोजेतापनि रातिको समयमा सशस्त्र प्रहरीकै मिलोमतोमा व्यापक तस्करी भइरहेको छ ।

वीरगंज भन्सारमा सशस्त्र प्रहरीले लछार पछार जस्ता कार्य गर्नुले घरायसी सामान किनेर ल्याउने सर्वसाधारणहरुले पनि सास्ती खेप्नु परेको छ । इनर्वा गाउँका महिलाहरुले पनि सानोतिनो सामान ल्याउँदा सशस्त्र प्रहरीहरुले लछार पछार गरि सामान खोस्ने गरेका छन् । सानोतिनो सामान ल्याई आफ्नो दैनिकी जीवन चलाइँरहेका गरिब, असहाय, एकल महिलाहरु प्रभावित बनेका छन् ।

अहिले दिनहुँ वीरगंज भन्सार कार्यालय अगाडि महिलाहरुको समूह जम्मा हुने, सशस्त्र प्रहरीसँग विवाद गर्ने जस्ता कार्यहरु गरि रहेको देख्न सकिन्छ । सशस्त्र प्रहरीको यो रवैयाबाट नेपाल भारत सीमा क्षेत्रका नेपाली महिलाहरु काम गर्न नपाएर दैनिकी जीवन चलाउन समेत समस्या भएको दुःखेसो पोखी रहेका छन् । दुईचार वटा लुगा ल्याएर दुई तीनसय रुपैया कमाएर बालबच्चा पाल्ने एकल महिलाहरु दिनहुँ भन्सार कार्यालय अगाडि रोएर बस्नुपर्ने अवस्था सृजना भएको छ ।

पत्रकार साहमाथि हातपात

0

वीरगंज । रेडियो नेपालका सप्तरी संवाददाता तथा माइ सञ्चार डट कमका सञ्चालक डाक्नेश्वरी नगरपालिका-८ घर भई राजविराज नगरपालिका-५ बस्ने ३६ वर्षीय संजिब विक्रम साहमाथि बुधबार हातपात भएकाे छ ।

डाक्नेश्वरी नगरपालिका-५ का ४० वर्षीय अमरेन्द्र यादव र वडा नम्बर ६ का ३८ वर्षीय अनिल यादवले आफुमाथि हातपात र अभद्र व्यवहार गरेको साहले आराेप लगाएका छन् ।

माछा पोखरीका विषयमा नगरपालिकामा भइरहेको विरोध प्रदर्शनको समाचार संकलनमा पुगेका बेला जनमत पार्टीका कार्यकर्ता यादवद्वयले नियोजित रुपमै हातपात गरेको साहले वताए । प्रदर्शनकारीहरूले पत्रकार साहको अनटेस्ट ४६२४ नम्बरको मोटरसाइकलको ऐनाको सिसा समेत फुटाएको उनले वताए ।

नेपाल पत्रकार महासंघ सप्तरी शाखाका सदस्य समेत रहेका साहमाथि भएको आक्रमणको महासंघ सप्तरी शाखाले भत्सर्ना गरेको छ । प्रेस स्वतन्त्रताप्रति प्रतिबद्ध रहेको बताउने राजनीतिक दलकै कार्यकर्ताबाट पत्रकार असुरक्षित हुनु दुःखद भएको महासंघले जनाएको छ ।

‘रिपोर्टिङ गर्न गएका पत्रकारमाथि हातपात गरिएको घट्नाको हामी घोर भत्सर्ना गर्दछौं । यो घटनाले प्रेस स्वतन्त्रताको खिल्ली उडाएको हाम्रो ठहर छ’ महासंघले कात्तिक १ गते जारी गरेको विज्ञप्तिमा भनिएको छ–‘पत्रकार साहमाथि हातपात गर्ने दुबैलाई कानुन बमोजिम कारबाही गर्न सम्बन्धित निकायसँग माग गर्दछौं । कारबाही नगरिए हामी आन्दोलनमा उत्रने जानकारी गराउँदछौं ।’

पोखरी ठेक्काको सम्बन्धमा नगरपालिका विरुद्ध राति अबेलासम्म ढुंगामुढा प्रहार गर्दै प्रदर्शन भइरहेकोले पत्रकार साहलाई सुरक्षाका लागि नगरपालिका कार्यालयभित्र सुरक्षासाथ राखिएको प्रहरीले जनाएको छ ।

अवस्था तनावपूर्ण बनेकोले सशस्त्र प्रहरी र नेपाल प्रहरी परिचालित भएको इलाका प्रहरी कार्यालय कल्याणपुरका इन्स्पेक्टर शुभेश अधिकारीले बताए ।

अर्काकाे नाममा कम्पनी दर्ता गराएर ढेड अर्ब राजश्व चुहावट

0
वीरगंज महानगरपालिकाकाे वडा नं. ३१ बेलवा टाेल र पिडित युवाहरु । तस्बिर : कालिका टाईम्स

वीरगंज । वीरगंज महानगरपालिका वडा नं. ३१ बेलवाका दुई दर्जन भन्दा बढि गरिब, विपन्न परिवारका युवाहरु अहिले राजस्व चुहावट मुद्दाको चपेटामा परेका छन् । विगत ९ वर्ष अघि जागिरको प्रलोभनमा परि काठमाडौं स्थित कम्पनी रजिष्टार कार्यालय एवं राजस्व कार्यालयमा पुगी आफै सही छाप लगाएर फर्केका युवाहरु अहिले राजस्व चुहावट मुद्दाको चपेटामा परेका हुन् ।

उनीहरुले कुन कागजातमा सही छाप लगाए ? केही जानकारी छैन । सही छाप लगाए वापत ५ हजार रुपैया बुझेको मात्रै जानकारी छ । तर उनीहरुकाे नामले दर्ता भएकाे कम्पनीले डेढ अरब राजश्व चुहावट गरेकाे आराेप छ । करिब २ दर्जनभन्दा बढि अशिक्षित, गरिब, विपन्न दलित, मुसहर समुदायका युवाहरु ५ हजार रुपैयाँको प्रलोभनमा परेर जथाभावी सही छाप लगाएको परिणाम अहिले राजस्व चुहावटको मुद्दामा परेका हुन् ।

उच्च अदालत पाटनले ति युवाहरुलाई राजस्व चुहावट गरेको आरोपमा २० लाखदेखि डेढ करोडसम्म रुपैयासम्म जरिवानाको फैसला गरेको छ । २४ जना प्रतिवादीहरुलाई राजस्व छलिको कसुरमा करिब डेढ अर्ब जरिवानाको फैसला गरेको छ ।

काठमाडौं जिल्ला अदालतमा उठाइएको राजस्व चुहावटको मुद्दा त्यहाँ टुँगो नलागेपछि उच्च अदालत पाटनमा पुगेको राजस्व चुहावट सम्बन्धि मुद्दामा छुट्टाछुट्टै फैसला सुनाएको छ । जिल्ला अदालत काठमााडैंले २४ जनालाई प्रतिवादी बनाई राजस्व चुहावटको मुद्दा चलाएको छ, र त्यहाँबाट मुद्दाको टुँगो नलागेपछि उच्च अदालत पाटनले प्रत्येक युवाहरुको छुट्टाछुट्टै फैसला सुनाएको छ ।

राजस्व चुहावट मुद्दाको चपेटामा पर्नेहरुमा बेलवाका अबुलेश अन्सारी, सद्दाम हुसेन, रिजवान अन्सारी, मनिर अन्सारी, रुस्तम अन्सारी, रुस्तम देवान, शोयब अन्सारी, ओहाव मियाँ अन्सारी, नविकरिम अन्सारी, जविउल्लाह देवान, लालु अन्सारी, आजाद अन्सारी, समसुल अन्सारी, सद्दाम हुसेन अन्सारी, कलिम अन्सारी, चन्दन माझी, रामचन्द्र झाझी, भरत माझी र रामअवतार माझी छन् ।

यसैगरि यही मुद्दामा बारा जिल्ला रामपुर टोल वडा नं. ६ निवासी नरेन्द्र कुमार महतो, वीरगंज महानगरपालिका वडा नं. १३ का चन्दन प्रसाद साह कानु, पर्सा जिल्ला सिर्सिया खलवा वडा नं. ७ निवासी सुनिल साह तुरहा, बारा जिल्ला साविक उमजन गाविस वडा नं. ६ हाल करैयामाई गाउँपालिका वडा नं. ७ निवासी गोपाल प्रसाद यादव, सोही ठाउँ निवासी सोनालाल यादव, वीरगंज महानगरपालिका – १७ निवासी हरिनारायण साह तुरहा पनि मुछिएका छन् ।

नाम उल्लेख गरिएका सबै युवाहरु रोगजारको खोजीमा भौतारिने, जहाँ ज्यालादारीमा काम पाए त्यही काम गर्ने, दिनभरि कमाउने साँझ परिवारको एकछाक टार्ने परिवारका सदस्यहरु छन् । यिनीहरुलाई बेलवाकै जलिल मियाँको छोरा तेजामुल अन्सारीले जागिर लगाईदिने प्रलोभनमा पारी काठमाडौंमा जयकिशोर साँहसँग चिनजान गराई यिनीहरुको नाममा कम्पनी दर्ता गराई अर्बोको राजस्व छलेको सुईको पनि छैन ।

जयकिशोर साह सिरहा जिल्ला राजपुर वडा नं. ५ स्थायी ठेगाना भई हाल महालक्ष्मी नगरपालिका वडा नं. १, इमाडोल ललितपुर बसोबास गरि निजी फर्महरुको लेखापरीक्षणको काम गर्ने व्यक्ति हुन् ।

जयकिशोर साहले ति युवाहरुलाई ५/१० हजार रुपैयाँ दिई कम्पनी रजिष्टारको कार्यालयमा लगि विभिन्न नामको कम्पनी दर्ता गराएर अर्बौको राजस्व छलेको जिल्ला अदालत एवं उच्च अदालतको मिसिलमा उल्लेख गरिएको छ ।

अदालतले फैसला सुनाएपछि स्थायी घर भएका जिल्ला अदालतबाट गाउँमा पत्र आएपछि मात्रै ति युवाहरुलाई आफ्नो नाममा कम्पनी दर्ता भई करोडौंको राजस्व छलि भएको पत्ता लाग्यो । अहिले आरोपित सबैंको परिवारमा बज्रपात भएको छ । ९ वर्ष अघि ५ हजार रुपैयाँको लागि कागजात नै नपढि सही छाप लगाएको नतिजा सुनेपछि रुखको हाँगाबाट खसेझै गाउँ नै चिन्तामा परेको छ ।

दैनिक ३ देखि ५ सय रुपैया कमाउने परिवारले लाखौं करोडौं राजस्व छलिको जरिवाना कसरी तिर्ने भन्ने चिन्ताले सताएको छ । बस्ने घर छैन, खाने ठेगान छैन, दिनमा काम गरिएन भने साँझ भोकै सुत्नुपर्छ, बालबच्चाहरुलाई लगाउनको लागि लुगा छैन, सुत्नको लागि खाँट छैन, घरको अगाडिबाट कुकुर प्रवेश गर्छ, पछाडिबाट निस्किन्छन्, यस्ता परिवारका सदस्यमाथि करोडौं राजस्व छलि आरोपमा मुद्दा चलेको छ ।

यस घटनाका पीडितहरुको एउटै भनाई छ, आफूलाई केही जानकारी छैन । भोकै बस्नुभन्दा दुई पैसा कमाएर परिवारलाई पाल्नु उनीहरुको सोचलाई पनि गलत भन्न सकिँदैन । तर त्यस्ता व्यक्तिलाई गुमराहमा पारि अपराध गर्ने ति अपराधीहरुलाई सम्बन्धित निकायले कठालो समातेर ल्याउन सक्नुपर्छ ।

खानमा धौ धौ परेका बखत परिवारलाई पालन पोषण गर्नका लागि जागिरको प्रलोभन देखाई काठमाडौं लगिएका बेलवा निवासी अबुलेश अन्सारी आफूले नगरेको गल्तीको सजाय भोगि रहेका छन् । उनीमाथि राजस्व चुहावटको मुद्दा चलि रहेको छ भने उच्च अदालत पाटनले राजस्व चुहावट गरेको अभियोगमा २० लाख ५९ हजार ७७८ रुपैया जरिवानाको फैसला गरेको छ ।

६ वर्ष अगाडि काठमाडौं गएको बखत गाउँकै तेजामुलसँग सापटी पैसा माग्दा तेजामुल र परमेश्वर आफ्नो नागरिकता लिएर केही कागजातमा सही छाप गराएको पिडित अबुलेश अंसारीले बताए । उनले एकदिन कम्पनी रजिष्टारको कार्यालयमा, दोश्रो दिन आन्तरिक राजस्व कार्याल तथा तेश्रो दिन बैंकमा लगेर सही छाप गराएको बताए ।

शंका लागेपछि ३ महिना पश्चात बुझ्न जाँदा त्यहाँ आफ्नो नाममा कम्पनी दर्ता रहेको पाएपछि त्यही बेलादेखि यस घटनालाई उजागर गर्न चाहेको तर असफल रहेको उनको भनाई छ । यस घटनामा आफ्नो गाउँको २७ जना युवाहरु फसेको उनको भनाई छ ।

सोही ठाउँका भरत माझी पनि आफूले नगरेको गल्तीको सजाय भोगि रहेका छन् । उनीमाथि राजस्व चुहावटको आरोपमा उच्च अदालत पाटनले जरिवानाको फैसला सुनाएको छ । उनले पनि विगत ५ वर्ष अगाडि अपरिचित व्यक्तिको प्रलोभनमा परि काठमाडौंमा गई केही कागजातहरुमा सही छाप लगाएर ३ हजार रुपैया लिएर फर्केको दिन स्मरण गरे । यसरी फसिन्छ भन्ने आफूलाई अनुमान समेत नरहेको भन्दै माझीले आफ्नो गरिब, मजबुरी तथा बेरोजगारीको फाइदा लिई आफूले गर्दै नगरेको काममा फसाइएको बताए ।

रामचन्द्र माझीले पनि सोही कुरालाई दोहर्‍याए । ५ हजार रुपैयाको प्रलोभन देखाई काठमाडौं लगि केही कागजातहरु सही छाप गराएर पठाएको बताए । कारोना महामारीको बखत एक रुपैया कमाउन धौ धौ परि रहेको अवस्थामा २ दिनको लागि ५ हजार रुपैया दिने प्रलोभन देखाई नागरिकता लिएको र केही कागजातहरुमा सही छाप गराई पठाएको बताए । कुन कार्यालयमा र के कागजातमा सही छाप गराए आफूलाई केही जानकारी नभएको बताए ।

सोही ठाउँ निवासी चन्दन माझीले एकदुई दिनमा चिनजान भएको वीरगंजका एक व्यक्तिले काठमाडौं लगि २ दिन राखी घुमाउने बहानामा केही कागजातहरुमा सही छाप लगाएको बताए । आफूलाई थाहा नभएको कार्यालयमा लगि १८ पटक, अर्को कार्यालयमा २० पटक, अर्को कार्यालयमा ३२ पटक, पुनः अर्को ठाउँमा ३२ पटक सही छाप गराएर ५ हजार रुपैयाँ दिएर वेपत्ता भएको र त्यस पश्चात आफूले गाडी समातेर वीरगंज फर्केको स्मरण गराए । आफूलाई केही जानकारी नभएको र दुई छाक भोक टार्नको लागि कागजात नै नबुझी हस्ताक्षर गरेकोले यस्तो अवस्था सृजना भएको बताए ।

यो उदाहारण मात्रै हुन्, एकै गाउँका यस्ता तीन दर्जन भन्दा बढि युवाहरु राजस्व छलि मुद्दाको चपेटामा परेका छन् । यसरी बेरोजगार, अशिक्षित, गरिबी तथा असहाय युवाहरुलाई प्रयोग गरि दर्जनौं नक्कली फर्म दर्ता गरी अर्बौको राजस्व छलि गर्ने गरेको घटनाहरु बाहिरिन थालेको छ । यस्ता कामहरु विगत ९ वर्षअघि देखि नै शुरु भएपनि हाल आएर करोडौं राजस्व छलि भएपछि मुद्दा दर्ता, फैसला भएपछि मात्रै सार्वजनिक हुन थालेको छ ।

बस्ने घर छैन, खाने ठेगान छैन, दिनमा काम गरिएन भने साँझ भोकै सुत्नुपर्छ, बालबच्चाहरुको जीउमा कपडा छैन, सुत्नको लागि खाँट छैन, एकदिन काम नगरे खाना पाउँछ कि पाउँदैन ग्यारेन्टी छैन तर यस्ता परिवारका सदस्यमाथि अर्बौै राजस्व छलिको आरोपमा मुद्दा चल्दैछ ।

उनको नाममा अर्बोको कारोबार भएको छ । अदालतले कागजमा कारोबार भएको देखेर फैसला सुनाई कसुरदार प्रमाणित गरेको छ, जरिवाना पनि ठोक्यो तर तिर्ने कसले ? जसको नाममा त्यत्रो कारोबार भएको छ, यसलाई त सुईको पनि छैन । गर्नेले अर्बो राजस्व छलेर गरिबको टाउकोमा थुपार्यो । कागजमा उ अब्बल छ, तर जागिरको प्रलोभनमा परेकोहरुको जीवन नै दाउमा छ ।

प्रमुख प्रशासकिय अधिकृत मेहताकाे स्वागत र राैनियारकाे बिदाई

0

परवानीपुर । बाराको परवानीपुर गाउँपालिकाको प्रमुख प्रशासकिय अधिकृतमा प्राण मेहता हाजिर भएका छन् । थारु आयाेगबाट परवानीपुरमा सरुवमा भएका अधिकृत मेहता बुधबार हाजिर भएका हुन् ।

गाउँपालिका कार्यालय परवानीपुरमा हाजिर हुन पुगेका अधिकृत मेहतालाई एक कार्यक्रमकाे बिच स्वागत गरिएकाे थियाे । साेही कार्यक्रममा गाउँपालिकाका प्रमुख प्रशासकिय अधिकृत मुन्ना राैनियारकाे बिदाई समेत गरिएकाे थियाे ।

गाउँपालिका अध्यक्ष रामक्षत्रि प्रसाद कुर्मी र उपप्रमुख सुगान्धि देवीले फुल माला, गम्छा र अबिरकाे टिका लगाई अधिकृत रौनियारको बिदाई सँगै अधिकृत मेहताको स्वागत गरेका थिए ।

करिब डेढ बर्ष परवानीपुरमा कार्यकाल पुरा गरेका अधिकृत राैनियारकाे मधेश प्रदेशकाे मुख्यमन्त्रीकाे कार्यालयमा सरुवा भएकाे छ ।  पालिकाका नयाँ प्रमुख प्रशासकिय अधिकृतको प्राण मेहताले यस अघि पर्साकाे जिराभवानी र बाराकाे फेटा गाउँपालिकामा समेत काम गरिसकेका छन् ।

स्वागत तगा बिदाई कार्यक्रममा उमेश गुप्ता, सबै वडाध्यक्षहरु र गाउँपालिकाका कर्मचारीहरुकाे उपस्थिती रहेकाे थियाे ।

प्रथम वीरगंज गोल्ड कप फुटबल प्रतियाेगिता कार्त्तिक १८ देखि

0

वीरगंज ।  भेट्रान सिटी क्लब वीरगंजकाे आयोजनामा कार्त्तिक १८ गतेदेखि ‘प्रथम वीरगंज गोल्ड कप २०८०’ हुन लागेकाे छ । वीरगंजमा मधेस प्रदेशकै सबै भन्दा बढी नगद राशि पुरस्कारको अन्तर्राष्ट्रिय फुटबल प्रतियोगिता आयोजना गर्न लागिएकाे आयाेजकले जनाएकाे छ ।

प्रतियोगिता बारे जानकारी दिन बुधवार आयोजित पत्रकार सम्मेलनमा क्लबका अध्यक्ष सबिन बस्नेतले कात्तिक १८ देखि कार्त्तिक २५ गतेसम्म चल्ने प्रतियोगितामा नेपाल र भारतका गरी ८ टिमले भाग लिने जानकारी गराए ।

उनका अनुसार, प्रतिगोयतामा त्रिभुवन आर्मी क्लब, नेपाल पुलिस क्लब, सङ्कटा क्लब, चर्च ब्वाइज युनाइटेड, झापा एफसी, आयोजक वीरगंज भेट्रान सिटी क्लब तथा भारत कोलकत्ताको क्लाईभ हाउस डमडम र दिल्लीको नर्थ जोन फुटबल टिमले भाग लिने भएका हुन् ।

प्रतियोगिताको उपाधि उपविजेताले नगद ११ लाख ११ हजार १ सय ११ रुपैयाँ र उपविजेताले नगद ५ लाख ५५ हजार ५ सय ५५ रुपैयाँ पुरस्कार पाउने छन् ।

वीरगंजमा विगत पाँच वर्षपछि अन्तर्राष्ट्रिय स्तरको फुटबल प्रतियोगिता आयोजना गर्न लागिएको पत्रकार सम्मेलनमा आयोजक क्लबका महासचिव पङ्कज श्रेष्ठले बताए । उनले वीरगंजकाे खेलकुद प्रवर्द्धनमा सङ्घ र प्रदेश दुवै सरकारले उपेक्षा गरिरहेको परिप्रेक्ष्यमा वीरगंजले पनि अन्तर्राष्ट्रिय स्तरको प्रतियोगिता गर्न सक्छ भन्ने सन्देश दिन यो प्रतियोगिता आयोजना गर्न लागिएको बताए ।

वीरगंजकाे आदर्शनगर रङ्गशालामा हुने प्रतियोगितामा दर्शकका लागि प्रवेश शुल्क एक सय रुपैयाँ राखिएको क्लबका वरिष्ठ उपाध्यक्ष रोशन श्रेष्ठले बताए । सेमिफाइनलदेखिको खेलमा भने प्रवेश शुल्क दुई सय रुपैयाँ राखिएको जानकारी उनले गराए ।

प्रतियोगिता आयोजनास्थल आदर्शनगर रङ्गशालाको दर्शक क्षमता १० हजार रहेकामा प्रतियोगिताकै लागि भनेर ३ हजार दर्शक बस्न सक्ने क्षमताको अस्थायी प्याराफिटपनि निर्माण गरिएको जानकारी श्रेष्ठले दिए । फाइनल खेलको अघिल्लो दिन कार्तिक २४ गते नेपाल र भारतको महिला फुटबल टिमबिच मैत्रीपूर्ण खेल पनि हुने जानकारी उनले गराए ।

प्रतियोगिताको कूल खर्च लागत ८० लाख रुपैयाँ रहेकोमा मुख्य सहयोगी वीरगञ्ज महानगरपालिकाले २५ लाख रुपैयाँ दिएको क्लबका अध्यक्ष बस्नेतले बताए । आर्थिक सहयोगका लागि अन्य प्रयोजकहरूसँग पनि छलफल चलिरहेको उनले बताए ।

एम्बुलेन्समा गाँजा तस्करी गर्ने भारतीय चालक पक्राउ

0

वीरगंज । जिल्ला प्रहरी कार्यालय बाराले लागुऔषध गाँजासहित एम्बुलेन्स चालकलाई नियन्त्रणमा लिएको छ । प्रहरीले महागढीमाई नगरपालिकाको गंजभवानीपुरबाट २ किलो ५०० ग्राम गाँजासहित भारतीय एम्बुलेन्स र चालकलाई नियन्त्रणमा लिएको हो ।

भारतीय नागरिक ३२ वर्षीय एम्बुलेन्सका चालक रामविश्वास पासवान र बीआर ०५ पिबि ५५२३ नं को भारतीय एम्बुलेन्स प्रहरीले नियन्त्रणमा लिएको जिल्ला प्रहरी कार्यालय बाराका प्रहरी उपरीक्षक (एसपी) सुरेश प्रसाद काफ्लेले बताए ।

सवारी चेक जाँचकाे क्रममा बिरामी बोक्न प्रयोग हुने एम्बुलेन्समा साढे २ किलो गाँजा भेटिएपछि प्रहरीले एम्बुलेन्स र चालकलाई नियन्त्रणमा लिएको उनले जानकारी दिए । बरामद गाँजा, एम्बुलेन्स र चालकलाई प्रहरीले पत्रकार सम्मेलनको आयोजना गरि सार्वजनिक गरेको हो ।