वीरगंज । देशको राजधानी काठमाडौँसहित विभिन्न सहरमा जेनजी पुस्ताले सामाजिक सञ्जाल बन्द, भ्रष्टाचार र बेथितिविरुद्ध गरेको आन्दोलनको क्रममा प्रहरी दमन र हत्याको विरोधमा वीरगंजमा पनि आन्दोलन चर्किएको छ ।

सोमबार साँझ वीरगंजकाे घण्टाघरमा जम्मा भएका युवाहरूले प्रधानमन्त्री केपी शर्मा ओली र गृहमन्त्री रमेश लेखकको पुत्ला दहन गर्दै प्रदर्शन गरेका थिए । बिहान शान्तिपूर्ण रूपमा साङ्केतिक विरोध प्रदर्शन गरेका उनीहरूले साँझ पुनः आन्दोलनलाई तीव्र बनाएका हुन् ।

प्रदर्शनका क्रममा युवाहरूले घण्टाघर, माइस्थान चोक, घडिअर्वालगायतका स्थानमा टायर बालेर विरोध जनाए । प्रदर्शनकारीले प्रहरी बिटमा आगजनी गरेपछि प्रहरीले अश्रुग्याँस प्रहार गरेकाे थियाे ।

स्थिति तनावपूर्ण बनेपछि जिल्ला प्रशासन कार्यालय पर्साले साेमबार राति ९ बजेदेखि मंगलबार बिहान ९ बजेसम्म कर्फ्यु आदेश जारी गरेको छ । प्रशासनले पूर्वमा बाइपास रोड, पश्चिममा सिर्सिया पुल, उत्तरमा गण्डक चोक र दक्षिणमा शङ्कराचार्य द्वारसम्मको क्षेत्रलाई चार किल्ला तोकेर कर्फ्यु लागू गरेको हो।

आइतबारको प्रदर्शनका क्रममा मृत्यु हुनेको संख्या १९ पुगेको गृह मन्त्रालयले पुष्टि गरेको छ । मन्त्रालयका सहसचिव एवम प्रवक्ता आन्द काफ्लेका अनुसार प्रहरीले दिएको जानकारी अनुसार १९ जनाको मृत्यु भएको पुष्टि भएको हो ।

प्रवक्ता काफ्लेले भने, ‘मन्त्रालयलाई प्रहरीले जानकारी गराए अनुसार अहिलेसम्म १९ जनाको मृत्यु भएको छ भने ३०० जना भन्दा बढी घाइते भएका छन् ।’

त्यसैगरी, स्वास्थ्य मन्त्रालयका अनुसार देशभरका १३ वटा अस्पतालमा ३४७ जना घाइतेको उपचार जारी भइरहेको छ ।

काठमाडौं । जेनजी आन्दोलनको क्रममा प्रहरीले चलाएको गोली लागेर घाइते भएका एक प्रदर्शनकारीको मृत्यु भएको छ। काठमाडाैंकाे नयाँबानेश्वरस्थित सिभिल अस्पतालमा उपचारको क्रममा उनको निधन भएको अस्पतालले जनाएको छ।

सिभिल अस्पतालका निर्देशक मोहन रेग्मीका अनुसार घटनामा ७०–८० जना घाइते भएका छन् र उनीहरूको उपचार भइरहेको छ। मृतकको परिचय भने अहिलेसम्म सार्वजनिक गरिएको छैन।

घटनाबारे थप विवरण आउन बाँकी छ । साे क्षेत्रमा अहिले कर्फ्यु आदेश जारी भएकाे छ । जिल्ला प्रशासन कार्यालय काठमाडाैंले माइतीघर, बानेश्वर, तीनकुने र शंखमुल आसपासमा राति १० बजेसम्मका लागि कर्फ्यु जारी गरेकाे हाे ।

कर्फ्यु आदेश भएसँगै नयाँ बानेश्वर क्षेत्रमा सेना परिचालन भएको छ । संसद् घेराउ गर्नका लागि जेन जी प्रदर्शनकारी पुगेपछि र ढुंगामुढा गरिएपछि काठमाडौं जिल्ला प्रशासनले उक्त क्षेत्रमा कर्फ्यु आदेश जारी गरेको थियो ।