वीरगञ्ज । सांसदको शिक्षा, स्वास्थ्य तथा सूचना प्रविधि समितिबाट पारित भई प्रतिनिधि सभामा दर्ता भएको विद्यालय शिक्षा विधेयकको विरोधमा संयुक्त विद्यार्थी संगठनले प्रधानमन्त्री र शिक्षामन्त्रीलाई ध्यानाकर्षण गराउँदै ज्ञापनपत्र बुझाएका छन्।
संयुक्त विद्यार्थी संगठनले सोमबार पर्सा जिल्ला प्रशासन कार्यालयमार्फत प्रधानमन्त्री र शिक्षामन्त्रीलाई सम्बोधन गरिएको ज्ञापनपत्र बुझाएको हो। विद्यार्थी संगठनहरूले विधेयकमा विद्यार्थी हितविपरीतका प्रावधान राखिएको भन्दै आपत्ति जनाएका छन्।
ज्ञापनपत्र बुझाउने क्रममा अनेरास्ववियुका केन्द्रीय सदस्य आशिफ अहमद, अनेरास्ववियु जिल्ला अध्यक्ष सुजित मण्डल, नेविसंघ जिल्ला सभापति रमेश यादव, समाजवादी विद्यार्थी युनियन इकाई अध्यक्ष हरि किशोर यादव, जसपा नेपालका सागिर अली र दिलखुर देवान लगायतका विद्यार्थी नेताहरूको उपस्थिति रहेको थियो।
