वीरगंज । राष्ट्रिय स्वतन्त्र पार्टी (रास्वपा) पर्साले सामाजिक सञ्जाल बन्द गर्ने सरकारले गरेको निर्णय तत्काल फिर्ता लिन प्रधानमन्त्रीलाई ध्यानाकर्षण गराएको छ।
साेमबार पर्साका प्रमुख जिल्ला अधिकारी तोयनारायण सुवेदीमार्फत रास्वपा पर्साका सभापति हरि पन्तको नेतृत्वमा गएको टोलीले प्रधानमन्त्रीलाई सम्बोधन गरिएको ज्ञापनपत्र बुझाएको हो । ज्ञापनपत्र बुझ्दै प्रमुख जिल्ला अधिकारी सुवेदीले आजै प्रधानमन्त्री कार्यालयमा सो विषय जानकारी गराउने प्रतिबद्धता जनाए ।
सभापति पन्तले सामाजिक सञ्जाल बन्द गर्ने सरकारी निर्णयले आम नागरिकको मौलिक अधिकार कुण्ठित भएको बताएका छन् । उनका अनुसार, नियमन र व्यवस्थापनका विकल्प अवलम्बन नगरी निरंकुश ढंगले सामाजिक सञ्जाल बन्द गर्नु व्यवसायी, विद्यार्थीदेखि सम्पूर्ण नेपालीहरूको अधिकारमाथि प्रहार भएको छ ।
ज्ञापनपत्र बुझाउने टोलीमा रास्वपा पर्साका सचिव सुदिस प्रजापति, सहसचिव कृष्ण पास्वान, क्षेत्रीय सभापति राम आर्या, फैयाज मियाँ, नगरसभापति माधव बस्नेत, चन्दन गुप्ता लगायतको सहभागिता रहेको थियो।
