वीरगंज । वीरगंजस्थित ठाकुरराम बहुमुखी क्याम्पसमा स्नातकोत्तर तहको परीक्षा दिँदै गरेका एक परीक्षार्थीलाई प्रहरीले नक्कली परीक्षार्थीको आरोपमा परीक्षाहलबाटै नियन्त्रणमा लिएको छ।
पक्राउ परेका व्यक्ति नेपाली कांग्रेस पर्सा क्षेत्र नं. २ का सभापति मोहम्मद सहाबुदिनका छोरा मोहम्मद अफताब भएको स्रोतले जनाएको छ । प्रारम्भिक जानकारीअनुसार उनी आफ्नै बुवाको नाममा परीक्षा दिइरहेका बेला चेकजाँचका क्रममा पक्राउ परेका हुन् ।
जिल्ला प्रहरी कार्यालय पर्साका प्रमुख प्रहरी उपरीक्षक गौतम मिश्रले ठाकुर राम क्याम्पसबाट एक जनालाई नियन्त्रणमा लिएर वडा प्रहरी कार्यालय विर्तामा राखिएको वताए । उनले क्याम्पसले दिएकाे जानकारी अनुसार प्रहरीले नियन्त्रणमा लिएकाे वताउँदै घटनाबारे थप अनुसन्धान भइरहेको वताए ।
पर्साका प्रमुख जिल्ला अधिकारी तोय नारायण सुवेदीले पनि यस घटनाबारे प्रारम्भिक जानकारी पाएको बताउँदै क्याम्पस प्रशासनकै मुख्य जिम्मेवारीमा प्रश्न उठेकाे बताए । “अनुसन्धानको पूर्ण विवरण आएपछि मात्र कस्तो मुद्दा दर्ता गर्ने भन्ने विषयमा प्रस्ट हुनेछ,” उनले भने।
यस विषयमा क्याम्पस प्रशासनले आफ्नो प्रतिवेदन दिएपछि थप तथ्य प्रस्ट हुने जनाइएको छ ।
