काठमाडौँ । नेकपा (एमाले) तथा नेपाली कम्युनिष्ट पार्टी (नेकपा) परित्याग गरी विभिन्न जिल्लाका नेताहरू आम जनता पार्टी (आजपा) मा प्रवेश गरेका छन्। संघीय राजधानी काठमाडौँको कोटेश्वरस्थित पार्टी केन्द्रीय कार्यालयमा बुधबार आयोजित कार्यक्रममा पार्टी अध्यक्ष प्रभु साहले नवप्रवेशी नेताहरूलाई भव्य रूपमा स्वागत गरेका हुन्।

आजपामा प्रवेश गर्नेहरूमा नेकपाका वैकल्पिक केन्द्रीय सदस्य रामएकबाल यादव (सिरहा), रौतहटको गरुडा नगरपालिका वडा नं. ६ का निर्वाचित वडाध्यक्ष एवं एमाले नेता रामबाबु प्रसाद चौधरी, नेकपा गोरखा जिल्ला सचिवालय सदस्य राजन विक तथा जिल्ला सदस्यहरू सुरेश सुर्खेती र राम सुर्खेती रहेका छन्।

कार्यक्रममा अध्यक्ष साहले नवप्रवेशी नेताहरूलाई टीका र माला लगाएर पार्टीमा स्वागत गर्दै उनीहरूको क्षमता र योग्यताअनुसार पार्टीको जिम्मेवारी प्रदान गरिने बताउनुभयो। उहाँले आगामी फागुन २१ गते हुने निर्वाचनलाई केन्द्रमा राखेर पार्टी गतिविधिमा सक्रिय रूपमा लाग्न निर्देशन दिनुभयो।

नवप्रवेशी नेताहरूले आजपाको नीति, विचार र मुद्दा नेपाली जनता तथा मुलुकको हितमा रहेको भन्दै त्यसैबाट प्रभावित भएर पार्टीमा आबद्ध भएको विज्ञप्तीमार्फत जनाएका छन्। उनीहरूले पार्टीले दिने जिम्मेवारीलाई सशक्त रूपमा कार्यान्वयन गर्ने प्रतिबद्धता पनि व्यक्त गरेका छन्।

यसैबीच आज बसेको आजपाको केन्द्रीय समितिको बैठकले आगामी फागुन २१ गते हुने प्रतिनिधिसभा निर्वाचनलाई केन्द्रित गरी छलफल गर्दै विभिन्न जिम्मेवारी तोकेको छ। बैठकले आगामी पुस १९ गते काठमाडौँमा पार्टी निकट आम विद्यार्थी मोर्चाको उपत्यका भेला आयोजना गर्ने निर्णय गरेको जानकारी आजपा सचिवालय सदस्य बालकृष्ण सापकोटाले दिए।

बैठकले विभिन्न प्रदेशमा पार्टी गतिविधि सशक्त बनाउन विशेष जिम्मेवारीसमेत तोकेको छ। सुदूरपश्चिम प्रदेशमा तिलक थापामगर र एलिजा गौतम, लुम्बिनी प्रदेशमा त्रिभुवन साह अमर र विजय यादव, मधेस प्रदेशमा उमेश कुशवाहा, बागमती प्रदेशमा धनकुमारी देवी पण्डित रेग्मी, गण्डकी प्रदेशमा भोजराज त्रिपाठी तथा कोशी प्रदेशमा जुरीलाल मोची र खगेन्द्र भण्डारीलाई जिम्मेवारी तोकिएको छ।

काठमाडौँ । नेपाली कम्युनिष्ट पार्टी (नेकपा) का सहसंयोजक तथा पूर्वप्रधानमन्त्री माधवकुमार नेपालले स्थायित्व, सुशासन र विकासका सवालमा विगतमा देखिएका कमीकमजोरी र समस्याबाट पाठ सिक्दै जनताको जीवनस्तर सुधारतर्फ अग्रसर हुनुपर्नेमा जोड दिनुभएको छ।

नेपाल उद्योग वाणिज्य महासङ्घद्वारा आज आयोजित सर्वपक्षीय संवाद कार्यक्रममा बोल्दै उहाँले प्राकृतिक स्रोत, साधन र विविधताका हिसाबले मुलुक सम्पन्न रहेकाले जनअपेक्षाअनुसार समृद्ध नेपाल निर्माण गर्न संरचनागत क्षेत्रमा भएका त्रुटिहरू सच्याउँदै अघि बढ्नुपर्ने बताउनुभयो।

सहसंयोजक नेपालले मुलुकको स्रोत, साधन र सम्पदाको प्रभावकारी सदुपयोग गर्नुपर्ने उल्लेख गर्दै सत्ताको दुरुपयोग गर्ने र नीतिगत अस्थिरता सिर्जना गर्ने प्रवृत्ति अन्त्य हुनुपर्नेमा जोड दिनुभयो। उहाँले दीर्घकालीन विकासका लागि स्थिर नीति, पारदर्शिता र जिम्मेवार शासन अपरिहार्य रहेको धारणा व्यक्त गर्नुभयो।

प्रधानमन्त्री सुशीला कार्कीको प्रमुख आतिथ्यतामा सम्पन्न उक्त कार्यक्रममा पूर्वप्रधानमन्त्रीहरू, विभिन्न राजनीतिक दलका नेता, उद्योगी, व्यवसायी तथा सरोकारवालाहरूको सहभागिता रहेको थियो।