वीरगंज । हनुमान जयन्ती का अवसरमा शनिबार वीरगञ्जमा भव्य शोभायात्रा शान्तिपूर्ण रूपमा सम्पन्न भएको छ। श्रीरामभक्त हनुमान भगवानको जन्मोत्सवको उपलक्ष्यमा निकालिएको शोभायात्रामा हजारौँ भक्तजनहरूको उत्साहजनक सहभागिता देखिएको थियो।
वीरगञ्जको घण्टाघरबाट सुरु भएको शोभायात्रामा महानगरका अधिकांश वडाबाट हिन्दु धर्मप्रति आस्था राख्ने सर्वसाधारण स्वतःस्फूर्त रूपमा सहभागी भएका थिए। शोभायात्राले शहरका विभिन्न भागको परिक्रमा गरेको थियो।
भगवा झण्डा, तरबार, त्रिशूल, डिजे तथा भगवान हनुमानको झाँकीसहितको शोभायात्रामा सहभागीहरूले “जय श्रीराम” को नारासहित भक्ति प्रकट गरेका थिए। शनिबार दिउँसोदेखि साँझसम्म वीरगञ्ज शहर जय श्रीरामको नाराले गुन्जयमान बनेको थियो।
शोभायात्राका क्रममा घण्टाघरदेखि अलखियामठसम्मको मुख्य सडक क्षेत्रमा सहभागीहरूको ठूलो भीड लागेको थियो। कुनै अप्रिय घटना हुन नदिन नेपाल प्रहरी र सशस्त्र प्रहरीले नगर क्षेत्रमा व्यापक सुरक्षा व्यवस्था मिलाएका थिए।
यात्रामा सहभागी भक्तजनहरूका लागि विश्व हिन्दु परिषद, बजरंग दल लगायतका संघसंस्थाले विभिन्न स्थानमा सरबत र खानेपानी वितरण गरेका थिए।
कार्यक्रममा पर्सा क्षेत्र नम्बर १ का सांसद हरि पन्त, क्षेत्र नम्बर २ का सांसद सुशील कुमार कानु तथा वीरगंज महानगरपालिकाका मेयर राजेशमान सिंह सहित हजारौँ भक्तजनहरूको सहभागिता रहेको थियो।
गर्मीलाई ध्यानमा राख्दै यात्राका विभिन्न स्थानमा चिसो पानी, जुस, सरबत तथा बिस्कुटको व्यवस्था गरिएको थियो। स्थानीयका अनुसार गत वर्षको तुलनामा यस वर्षको शोभायात्रा अझ भव्य, व्यवस्थित र उत्साहपूर्ण रूपमा सम्पन्न भएको हो।
