काठमाडौं । प्रतिनिधिसभाका नवनिर्वाचित सभामुख डोलप्रसाद अर्यालले आगामी दिनमा जेनजी युवाले आन्दोलन गर्न नपर्ने गरी कानुन, नीति र नियम निर्माणमा आफूले विशेष ध्यान दिने बताउनुभएको छ।
सिंहदरबारस्थित सङ्घीय संसद् सचिवालयमा पदभार ग्रहणपछि प्रतिक्रिया दिँदै उहाँले विगतमा धेरै जनाको ज्यान जाने तथा ठूलो भौतिक क्षति हुने गरी भएको जेनजी आन्दोलनपछिको निर्वाचनबाट आफूहरू नेतृत्वमा आएको उल्लेख गर्दै अब त्यस्ता घटना दोहोरिन नदिनेतर्फ केन्द्रित रहने स्पष्ट पार्नुभयो।
सभामुख अर्यालले आन्दोलनका क्रममा ध्वस्त भएका संरचनाहरू पुनर्निर्माणका लागि नयाँ कानुन आवश्यक नपर्ने भए पनि आवश्यक परे छिटो कानुन बनाएर काम अघि बढाउनुपर्नेमा जोड दिनुभयो।
उहाँले संसद्को गरिमा, मर्यादा र प्रभावकारिता कायम राख्दै निष्पक्ष, सन्तुलित र उत्तरदायी ढङ्गले आफ्नो भूमिका निर्वाह गर्ने प्रतिबद्धता व्यक्त गर्नुभयो। साथै सबै राजनीतिक दल तथा सांसदहरूसँग सहकार्य र समन्वय गर्दै संसद्लाई प्रभावकारी, उत्तरदायी र जनमुखी संस्थाका रूपमा स्थापित गर्ने लक्ष्य रहेको बताउनुभयो।
