वीरगंज । प्रधानमन्त्री बालेन्द्र शाहलाई मधेश प्रदेशमा शिक्षा सुधारका लागि आम जनता पार्टी मधेश प्रदेशका अध्यक्ष उमेश कुशवाहाले चार बुँदे सुझाव प्रस्तुत गरेका छन्।
कुशवाहाले मधेश प्रदेशमा उच्च शिक्षाको पहुँच विस्तार गर्न बारा, रौतहट, महोत्तरी र सर्लाहीजस्ता जिल्लाहरूमा कम्तीमा एक–एक वटा आङ्गिक कलेज स्थापना गर्न आग्रह गरेका छन् । साथै, मेडिकल कलेजसहित अन्य प्राविधिक शिक्षाका संस्थाहरूको स्थापना र सञ्चालनमा विशेष ध्यान दिनुपर्ने उनको सुझाव छ ।
त्यसैगरी, प्रदेशमा विद्यार्थी सङ्ख्याको अनुपातमा शिक्षक दरबन्दी मिलान गर्न तथा माध्यमिक विद्यालयहरूमा तहगत र विषयगत शिक्षकको व्यवस्था गर्नुपर्ने आवश्यकता उनले औंल्याएका छन् ।
कुशवाहाले मधेश प्रदेशको शैक्षिक गुणस्तर सुधार र अवसरको समान पहुँच सुनिश्चित गर्न यी कदमहरू तत्काल कार्यान्वयन गर्नुपर्नेमा जोड दिएका छन् ।
