वीरगंज । वीरगंजमा ‘कबाडी कर’को नाममा अवैध रकम असुली भइरहेको आरोप पुनः सतहमा आएको छ। स्थानीयवासी तथा सवारी चालकहरूले अमित ठेक्का पट्टाका कर्मचारीहरूले विभिन्न स्थानमा रंगदारी शैलीमा कर उठाइरहेको गुनासो गरेका छन्।
वीरगंज–२२ जगरनाथपुर चोक लगायतका स्थानमा खटिएका कर्मचारीहरूले आइसिपीबाट निस्किने भारतीय नम्बर प्लेटका मालवाहक सवारीसाधनबाट मनपरी ढंगले रकम असुल्ने गरेको आरोप छ । स्थानीय प्रहरीको मिलेमतोमा यस्तो गतिविधि भइरहेको चालकहरूको दाबी छ।
जगरनाथपुर चोकसहित विभिन्न ढाटहरूमा ‘कबाडी कर’को नाममा खाली गाडीहरूबाट समेत गैरकानुनी रूपमा रकम उठाइँदै आएको बताइएको छ। ठेकेदार कम्पनीले “जडीबुटी, कबाडी तथा जीवजन्तु कर” उठाउने अधिकार पाए पनि सोही नाममा दिनदहाडै रंगदारीजस्तै असुली भइरहेको चालकहरूले बताएका छन्।
स्थानीयका अनुसार वीरगंज महानगरपालिका, जिल्ला प्रशासन कार्यालय पर्सा र जिल्ला प्रहरी कार्यालय पर्सालाई पटक–पटक जानकारी गराउँदा पनि ठोस कारबाही हुन सकेको छैन।
कानुनअनुसार राजमार्गमा स्थानीय तहले ठेक्का लगाई कर असुल्न नपाउने व्यवस्था भए पनि महानगरपालिकासँगको सम्झौताविपरीत कर्मचारीहरूले प्रतिगाडी ४ सयदेखि ७ सय रुपैयाँसम्म असुल गरिरहेका छन् । भारतीय गाडीहरूबाट २८० भारतीय रुपैयाँसम्म लिने गरिएको र त्यसको नेपाली मूल्य करिब ४४८ रुपैयाँ पर्ने चालकहरूले बताएका छन्।
चालकहरूले रकम नदिएमा दुव्र्यवहार, कुटपिट तथा झगडासमेत हुने गरेको गुनासो गरेका छन् । कतिपय अवस्थामा रसिद नदिने तथा माग्दा आनाकानी गर्ने गरिएको उनीहरूको भनाइ छ।
वीरगंज महानगरपालिकाले चालू आर्थिक वर्षका लागि जडीबुटी, कबाडी तथा जीवजन्तु कर सङ्कलनको ठेक्का ५ करोड ४ लाख ६७ हजार ४४६ रुपैयाँमा स्वीकृत गरेको स्रोतले जनाएको छ । उक्त ठेक्का अमित ठेक्कापट्टामार्फत वीरगंज–२१ का वडाध्यक्ष हबीब मियाँ नेटुवाका छोरा रेयाज आलमसँग असार ३० गते सम्झौता गरिएको थियो।
तर सम्झौताअनुसार करको दररेट स्पष्ट उल्लेख गरी सार्वजनिक स्थानमा सूचना बोर्ड राख्नुपर्ने व्यवस्था भए पनि हालसम्म त्यस्तो बोर्ड कतै नराखिएको स्थानीयहरूले बताएका छन्।
वडा प्रहरी कार्यालय श्रीपुर, प्रहरी चौकी सुगौली, अलौ र परवानीपुर क्षेत्रका सुरक्षाकर्मीलाई प्रभावमा पारेर अवैध असुली भइरहेको आरोपसमेत लगाइएको छ।
कुटपिट र दुर्व्यवहारका घटनामा दर्जनौँ उजुरी दर्ता भए पनि सुनुवाइ नभएको चालकहरूको भनाइ छ । लामो दूरी तय गरेर आएका चालकहरू थकित हुने, गाडी छाड्दा सामान चोरी हुने डर र कुटपिटको त्रासका कारण मागिएको रकम तिर्न बाध्य हुने अवस्था रहेको उनीहरूले बताएका छन्।
यसैगरी सवारी करकाे नाम पनि वीरगंजमा अवैध असुली भइरहेकाे स्थानियहरुले वताएका छन् । बालेन नेतृत्वमा सरकार गठनपछि सुधारको अपेक्षा गरेका स्थानीयले वीरगंजमा भइरहेकाे अवैध असुली नराेकिएकाे भन्दै चिन्ता व्यक्त गरेका छन् ।
