– हरिशंकर शर्मा/वीरगन्ज, १९ मंसिर ।

जिल्ला कृषि ज्ञान केन्द्र पर्साले उन्नत जातको गहुँको वीउ वितरण गरेको छ । प्रदेश सरकारद्वारा अनुदान प्राप्त ८४ मेट्रिक टन उन्नत जातको गहुँको वीउ पर्साका किसानहरुलाई वितरण गरिएको छ । पर्साका किसानहरुलाई सहुलियत होस् भन्ने उद्देश्यका साथ प्रत्येक वर्ष वितरण गरिँदै आएको उन्नत जातको गहुँको वीउ यस वर्ष पनि पर्साका किसानहरुलाई वितरण गरिएको जिल्ला कृषि ज्ञान केन्द्र पर्साका प्रमुख डा. रामचन्द्र यादवले बताए ।

मकवानपुर जिल्लाको हेटौडा स्थित राष्ट्रिय वीउ विजन कम्पनीबाट १०० मेट्रिक टन गहुँको वीउ लिखित रुपमा किन्ने टेण्डर भएपनि अहिलेसम्म पहिलो पटक ७५ मेट्रिक टन तथा दोश्रो पटक ९ मेट्रिक टन गरि ८४ मेट्रिक टन वीउ किसानहरुलाई विक्री वितरण गरिएकोमा अझैँ केही किसानहरुले गहुँको वीउ नपाएको गुनासो आउन थालोपछि अझै ४० देखि ५० मेट्रिक टन ल्याई किसानहरुलाई वितरण गरिनेछ ।

विगतका दिनहरुमा तत्कालीन जिल्ला कृषि कार्यालय हुँदा कृषकहरुलाई लागि आउने बजेटलाई यस वर्षदेखि कटौती गरि स्थानीय निकायलाई प्रदान गरिएको भएतापनि स्थानीय निकायबाट कृषकहरुको लागि वीउ उपलब्ध गराउने कुनै छाँटघाँट नदेखिएपछि जिल्ला कृषि ज्ञान केन्द्रको पहलमा प्रदेश सरकारको अनुदान मार्फत वीउ वितरण गरिएको छ ।

प्रदेश सरकारको अनुदान मार्फत प्राप्त ८४ मेट्रिक टन गहुँको वीउ वीरगन्ज लगायत स्थानीय तहमा ८ वटा वितरण केन्द्र तोकी किसानहरुलाई वितरण गरिएको छ । वीउ वितरण कार्य अहिलेपनि जारी नै रहेको छ ।

वीरगन्ज महानगरपालिकाको तीन स्थान दुर्गा सिट सेन्टर घण्टाघर, भवनेश्वरनाथ कृषि सहकारी सँस्था लि. प्रसौनीवीर्ता, हरिओम कृषि सहकारी सँस्था लि. हरपतगन्ज, पोखरीया नगरपालिकाको एक स्थान जिल्ला कृषि सहकारी संघ लि. महुवन, महुवन स्थितको न्यू मुस्कान टे«डर्स महुवन, प्रजापति उपभोक्ता सहकारी सँस्था लि. महुवन, सेढवा स्थित जिल्ला कृषि सहकारी संघ लि. महुवन तथा विरुवागुठीको लागि जुनेली बचत तथा ऋण सहकारी सँस्था लि. वागेश्वरी तित्रौनालाई वितरक केन्द्र तोकिएको छ ।

यि ८ वटा वितरण केन्द्रबाट वीरगन्ज महानगरपालिकाको नगवा, लक्ष्मनवा, पिप्रा, छपकैया, श्रीपुर, मुर्ली, श्रीसिया खलवाटोला, रामगढवा, अलौं, विन्दवासिनी, चोर्नी, वगही, लालपर्सा, लिपनीवीर्ता, मनियारी, भवानीपुर, प्रसौनीवीर्ता, बहुअरी, सुगौली, हरपतगन्ज, उदयपुरघुर्मी, कालिकामाई गाउँपालिका, पोखरीया नगरपालिका, पकहामैनपुर, छिपहरमाई गाउँपालिका, धोविनी गाउँपालिका, सखुवा प्रसौनी गाउँपालिका, पटेर्वासुगौली, बहुदरमाई नगरपालिका, जगरनाथपुर गाउँपालिका वडा नं. ६, ठोरी गाउँपालिका, जिराभवानी गाउँपालिका, पर्सागढी नगरपालिका, सखुवाप्रसौनी गाउँपालिकाका कृषकहरुले वीउ प्राप्त गरेका छन् ।

पोखरीया स्थितका वितरक केन्द्रले २० मेट्रिक टन, सेढवा स्थितका वितरक केन्द्रले २० मेट्रिक टन, वागेश्वरी तित्रौना स्थितका वितरक केन्द्रले १० मेट्रिक टन, महुवन स्थितका वितरक केन्द्रले १० मेट्रिक टन तथा वीरगन्ज स्थितका तीन वटा वितरक केन्द्रलाई २४ मेट्रिक टन गरि ८४ मेट्रिक टन वीउ वितरण गरिएको छ भने अझै ४० देखि ५० मेट्रिक टन वीउ ल्याइने बताइएको छ । अनुदान प्राप्त वीउको मूल्य प्रतिकेजी ६५ रुपैया ५० पैसा पर्ने भएपनि सरकारबाट प्राप्त ४० प्रतिशत रकम छुट गरि ४३ रुपैया ५५ पैसा प्रतिकेजी किसानहरुलाई विक्री वितरण गर्ने गरिएको छ ।

राष्ट्रिय वीउ वीजनबाट किनिएको वीउ प्रति केजी ६५ रुपैया ५० पैसा परेतापनि ४० प्रतिशत अनुदान स्वरुपको रकम प्रतिकेजी २६ रुपैया २० पैसा कट्टा गरि ३९ रुपैया ३० पैसा तथा बोरा लोडिङ्ग अनलोडिङ्गमा लागेको खर्च प्रतिकेजी १ रुपैया ४० पैसा एवं वितरक केन्द्रको मुनाफा ७ प्रतिशत प्रतिकेजी २ रुपैया ८५ पैसा गरि जम्मा ४३ रुपैया ५५ पैसा प्रतिकेजी किसानहरुलाई विक्री वितरण गरिएको छ ।

पर्सा जिल्लाभरि २६ हजार हेक्टरमा गहुँ खेती हुने भएकोलेमा १५ देखि २० प्रतिशत किसानले मात्रै वीउ परिवर्तन गर्ने भएकोले पर्सा जिल्लाको लागि ५ देखि ६ सय मेट्रिक टन मात्रै वीउ वितरण चाहिने भएपनि बजेट हुँदा हुँदै राष्ट्रिय वीउ विजन केन्द्रबाट माग जतिको वीउ प्राप्त हुन नसकेकोले प्राप्त वीउलाई विभिन्न स्थानका किसानहरुलाई समान रुपमा वितरण गर्ने गरिएको प्रमुख यादवको भनाई छ ।

यसैगरि वीउ वितरक केन्द्रबाट गैर किसानहरुलाई गहुँको वीउ वितरण नहोस् भन्ने उद्देश्यले जिल्ला कृषि ज्ञान केन्द्रका कर्मचारीहरुको टोलीले अनुगमन समेत गरेको छ । वीरगन्जको लगायत सम्पूर्ण स्थानमा रहेको वितरक केन्द्रमा पुगी टोलीले किसानहरुले बुझाएको कागजातलाई चेकजाँच गरेकोमा कहि कतैबाट दुरुपयोग भएको भेटिएको थिएन ।

वीरगंज, १८ मंसिर ।
अबैध रुपमा भन्सार छली अटो रिक्सामा ल्याउदै गरेको कपडा सहित एक महिला र एक पुरुष पक्राउ परेका छन । पक्राउ पर्नेमा पूर्वी चम्पारण जिल्ला रक्सौल न.पा. १४ बस्ने प्रकाश गुप्ताको छोरी बर्ष ३० को मुस्कान गुप्ता र भारत पुर्वी चम्पारण रक्सौ न.पा. ९ बस्ने जुबेर खानको छोरा बर्ष ३६ को सहबुदिन खान रहेका छन ।

सशस्त्र प्रहरी गुल्मबाट खटेको गाडी मोबाइल डिउटी टोलीले वीरगंज १६, रजतजयन्ती चौकबाट ना २ ह ८५२ नम्बरको अटो रिक्सामा भारत रक्सौलबाट वीरगंज तर्फ ल्याउदै गरेको कपडा सहित दुबै जनालाई पक्राउ गरेको हो । मंगलबार विहान ६ बजेको करिबमा पाईन्टको कपडा १९६ मिटर, बनारसी साडी १६ पिस, उनि कुर्ता सुरुवाल २७ पिस, कडाई कुर्ता सुरुवाल ५६ पिस, उनि लेगिज ४० पिस र टेण्ट कपडा ७ थान सहित दुबै जनालाई पक्राउ गरिएको सशस्त्र प्रहरी गुल्मले जनाएको छ ।

पर्सा, १८ मंसिर ।

पर्साको पोखरीया नगरपालिका वडा ९ बैरियामा पिकअप म्याजिक भ्यानको ठक्करबाट एक मोटरसाईकल चालकको घटना स्थल मै ज्यान गएको छ । पर्साको बैरियाबाट गर्दौल तर्फ जाँदै गरेको न १ त ८०२४ नम्बरको पिकअप भ्यानले ना. १२ प. ५३९७ न. को मोटरसाइकललाई ठक्कर दिँदा एक जना युवकको मृत्यु भएको प्रहरीले जनाएको छ ।

दुर्घटनामा मृत्यु भएका युवक पर्सा पोखरिया नगरपालिका वडा नं.९ बैरिया निवासी अंदाजी २५ बर्षिय रामपुकार विन रहेका छन् । पिकअप भ्यानका चालकको लापरवाहीले युवकको मृत्यु भएको भन्दै स्थानीयवासीले कार्यवाहीको माग गर्दै सडक अवरुद्ध गरेका छन् । घटनास्थलमा प्रहरी पुगिसकेको छ ।

ठक्कर दिने भयान चालक फरार भइसकेका छन भने घटना स्थलमा अहिले पनि तनाव रहेको स्थानिय महबुब आलमले बताउनु भयो । मृतक केही दिन पहिले बैदेशिक रोजगगारबाट आएका  थिए ।