वीरगंज । बालक अपहरणमा संलग्न एक जनालाई पर्सा प्रहरीले गोली हानी प्रकाउ गरेको छ । अपहरणमा परेको बालकको शकुसल उद्दार समेत प्रहरीले गरेको छ ।
अपहरणमा संलग्न पोखरिया नगरपालिका वडा नं. ६ सेमरबारी निवासी बर्ष २० को राज कुमार दासलाई प्रहरीले नियन्त्रणमा लिएको हो । प्रकाउ परेका दास गोली लागी घाईते भएका छन् । खुट्टाको घुँडा मुनीको भागमा गोली लागी घाईते भएका दासको प्रहरी निगरानीमा नारायणी अस्पताल वीरगंजमा उपचार भइरहेको छ ।
वीरगंज महानगरपालिका २५ सिर्सिया घर भइ हाल काभ्रेको बनेपामा बस्दै आएका अमजद खानका १४ वर्षीय छोरा कात्तिक १० गते बनेपाबाट वीरगन्ज घर आउने क्रममा अपहरणमा परेका थिए ।
अपहरणकारीलाई फिरौति रकम बुझाउन जाँदा प्रहरीले गोली हानी नियन्त्रणमा लिएपछि बालकको उद्दार गरिएको हो । गोली हानेर नियन्त्रणमा लिइएका दासले दिएको बयानका आधारमा अपहरित बालककलाई भारतीय प्रहरीको सहयोगमा सीमावर्ती भारतीय गाउँबाट सकुशल उद्धार गरिएको पर्साका प्रहरी उपरीक्षक सोमेन्द्र सिंह राठौरले वताए ।
अपहरीत बालकका बुवा अमजदले अपहरणकारीले मागेको फिरौती रकम लिएर नेपाल भारतको सीमा क्षेत्रमा पर्ने वीरगन्जको सिर्सिया खल्वाटोलमा बुधबार बिहान पुगेका बेला प्रहरीले अपहरणकारी मध्येका एकजनालाई गोली हानेर नियन्त्रणमा लिएको हो ।
अपहरणा संलग्न अझै दुई जना फरार रहेको जिल्ला प्रहरी कार्यालय पर्साले आज पत्रकार सम्मेलन गरी जानकारी गराएको छ ।
पर्सा प्रहरीले जिप्रकामा पत्रकार सम्मेलन गर्दै उद्धार गरिएका बालकलाई अभिभावकको जिम्मा लगाइएको जानकारी गराएको छ । पक्राउ परेका अपहरणकारी दासको साथबाट नलकटुवा पेस्तोल एक थान, त्यसमा लाग्ने गोली ५ थान, मोबाइल १ थान, ब्लु टुथ एक थान र फिरौती माग्न आउँदा उनले प्रयोग गरेको बी आर २२ जे ०८०३ नम्बरको मोटरसाइकल पनि बरामद भएको प्रहरी उपरीक्षक राठौरले पत्रकार सम्मेलनमा जानकारी गराए ।
