वीरगंज । पर्साको छिपहरमाई गाउँपालिका वडा नं. १ भलुवहियामा प्रहरीले पक्राउ गरेको गिट्टी जिल्लामा ल्याउन नसके पछि गाउँमा निर्माण भईरहेको धर्मशालामा खसालिएको छ ।
जिल्ला प्रहरी कार्यालय पर्साको टोलीले सोमबार राती ७ बजे भलुवहियामा राखिएको ३ टेलर गट्टी पक्राउ गरेको थियो । भारतमा तस्करीको लागि राखिएको गिट्टी जिल्लाको टोलीले पक्राउ गर्दै वीरगंज पुर्याइदिन गाउँका अगुवाहरुलाई आग्रह गरेको थियो ।
गाउँलेहरु घर निर्माणको लागि राखिएको एउटा आधी टेलर गिट्टी पनि प्रहरी लेखेको भन्दै आफुहरु पुर्याउन नसक्ने वताएका थिए । पछि प्रहरीले पक्राउ गरिएको गिट्टी गाउँका अगुवाहरुको जिम्मा लगाएर मंगलबार विहान लग्ने भनि फर्केको थियो ।
मंगलबार विहान प्रहरी नपुगे पछि गाउँलेहरु भेला बसी प्रहरीले पक्राउ गरेको गिट्टी गाउँमा निर्माणा भईरहेको धर्मशाला निर्माणमा लगाउन निर्णय गरी त्यही लगि खसालेको हाम्रा सम्वाददाताले जनाएका छन् ।
यसका साथै गाउँमा भारत तस्करीको लागि राखिएको अझै ३ टेलर गिट्टी पनि गाउँलेहरु त्यही खसाल्न लगाएका छन् । प्रहरी कै मिलोमतोमा गिट्टी तस्करी भइरहेको गुनासो बढे पछि जिल्लाको टोलीले तस्करीको लागि राखिएको गिट्टी सुचनाको आधारमा पक्राउ गर्न भलुवहिया पुगेको थियो ।
प्रहरी मै दुई गुट भएका कारण एउटा गुटले तस्करी लाईन खोलेको र एउटा गुटले पक्राउ गरेको प्रहरी स्रोतको भनाई छ । पोखरियामा नै गिट्टी तस्करहरु गिट्टी जम्मा गरी प्रहरीलाई मिलाई भारत तर्फ तस्करी गराउदै आएका छन् ।
