वीरगंज । चाडपर्वको मौसममा उपभोक्ताको स्वास्थ्यमा खेलबाड गर्दै अखाद्य मिठाई र विषाक्त फलफूल विक्री गर्ने व्यवसायीमाथि कारबाही गरिएको छ ।
वाणिज्य, आपूर्ति तथा उपभोक्ता संरक्षण कार्यालय वीरगंजकाे नेतृत्वमा गरिएको अनुगमनमा दुई मिठाई पसल र दुई थोक फलफूल सप्लायर्सले उपभोक्ताको स्वास्थ्यमाथि खेलवाड गर्दै आएको पाइएपछि उनीहरूमाथि कारबाही गरिएको हो ।
वीरगंज महानगरपालिका – १६ नगवा क्षेत्रमा रहेको जय हिमाल मिष्ठान भण्डार र वीरगंज ६ मिना बजारस्थित गणेश मिष्ठान भण्डारमा गरिएको अनुगमनमा फोहोर वातावरणमा राखिएका तथा बासी रसगुल्ला, पेडा, र बर्फी फेला परेको अनुगमन टोलीले जानकारी दिएको छ । जय हिमाल मिष्ठानमा म्याद सकिएको हाइड्रो पाउडरको प्रयोग भएको र भान्छा अत्यधिक फोहोर अवस्थामा भेटिएको अनुगमन टोलीले जनाएको छ । पसल दर्ता पनि नगरेर सञ्चालनमा रहेको पाइएको छ ।
जय हिमाल मिष्ठान भण्डारका सञ्चालक जुमादिन मियाँलाई ५० हजार रुपैयाँ जरिवाना गरिएको छ भने अखाद्य मिठाई तत्कालै नष्ट गरिएको छ । यस्तै, गणेश मिष्ठान भण्डारमा पनि खान अयोग्य लड्डु बिक्रीको लागि राखिएको पाइएपछि सञ्चालक जितेन्द्र कलवारलाई २० हजार रुपैयाँ जरिवाना गरिएको छ ।
अनुगमन टोलीले मिना बजारका कृष्ण फ्रुट सप्लायर्स र ओम फ्रुट सप्लायर्समा केरा पकाउन विषाक्त रसायन र फिटकीरी प्रयोग गरिएको पाएको छ । दुवै पसल बिना दर्ता सञ्चालनमा रहेको र सञ्चालकहरूलाई जनही ५० हजार रुपैयाँ जरिवाना गरिएको छ । विषाक्त फलफूल तत्कालै नष्ट गराइएको अनुगमन टोलीका प्रमुख सुनिल चौरसियाले जानकारी दिए ।
नेपालको उपभोक्ता संरक्षण ऐन २०७५ का अनुसार, अखाद्य वा म्याद सकिएका वस्तु विक्री गर्नेहरूलाई एक वर्षसम्म कैद र ३ लाख रुपैयाँसम्म जरिवानाको व्यवस्था छ । उपभोक्तालाई हानि पुर्याउने व्यापारीहरूले थप क्षतिपूर्ति दिनुपर्ने कानुनी प्रावधान पनि ऐनमा उल्लेख गरिएको छ ।
यसअघि आइतबार पनि अनुगमन गर्दै बजार अनुगमन समितिले अखाद्य लड्डु बनाएर मिठाई पसलहरूमा बिक्री गर्ने वीरगञ्जका दुई वटा लड्डु उद्योग सिल गरेको थियो भने त्यस्ता लड्डु बिक्री गर्ने क्षीर सागर मिठाई पसललाई २० हजार रुपैयाँ जरिवाना गरेको थियो ।