वीरगंज । नेपाल उद्योग वाणिज्य महासंघ अन्तर्गत स्टार्टअप तथा इनोभेसन कमिटी, खल्ती र इजी इट्सले मधेस प्रदेशलाई प्रविधियुक्त बनाउने अभियानको थालनी गरेको छ । बिहीबार वीरगंजबाट यो अभियान थालिएको कमिटी संयोजक अनुप अग्रवालले जानकारी दिए ।
महासंघले औद्योगिक तथा आर्थिक शहर वीरगंजबाट यो अभियान थालेको बताएको छ । वीरगंजकाे वीरगंज पब्लिक कलेजबाट शुरु भएको कार्यक्रम ४५ ओटा शैक्षिक संस्थामा सञ्चालन गरिने आयोजकले बताएको छ ।
प्रविधिको प्रयोगबारे चेतना जगाउन यस्तो अन्तरक्रिया सञ्चालन गरिएको अग्रवालले बताए । उद्यमशीलतामार्फत मधेस प्रदेशलाई प्रविधिसँग जोड्ने र यसको उपयोग बढाउने उद्देश्यले कार्यक्रम आयोजना गरिएको महासंघका प्रदेशका अध्यक्ष गणेश प्रसाद लाठले बताए ।
मधेस विश्व विद्यालयका उपकुलपति प्राध्यापक डा. दीपक शाक्यले प्रविधिको उपयोगमा अवसरसँगै यसका जोखिमप्रति पनि सचेत हुनुपर्नेमा जोड दिए । खल्ती एपका बरुण प्रताप शाह, इजी इट्सका सिम्रन चौरसिया, बीपीसी कलेजका सहायक क्याम्पस प्रमुख अरबिन्द श्रेष्ठ लगायतले आजको युगमा प्रविधिको आवश्यकता अपरिहार्य भएको उल्लेख गरे ।