वीरगंज । पर्सामा श्रीमतीकाे हत्या आराेपमा श्रीमान पक्राउ परेका छन् । वीरगंज महानगरपालिकाकाे वडा नम्बर २३ ईटियाही टोलमा २३ बर्षकी प्रतिमा कुमारी यादवलाई घाँटी दबाई हत्या गरेकाे आराेपमा निजकै श्रीमान २६ बर्षिय दिनेश प्रसाद यादवलाई प्रहरीले पक्राउ गरेकाे हाे ।
शुक्रबार अन्दाजी ०४:०० बजे प्रतिमालाई निजकै श्रीमानले घाँटी दबाई कर्तव्य गरी हत्या गरेको घटनाको सम्बन्धमा वडा प्रहरी कार्यालय श्रीपुरमा सूचना प्राप्त भए पश्चात पुगेकाे प्रहरी टाेलीले श्रीमान दिनेशलाई नियन्त्रणमा लिएकाे जिल्ला प्रहरी कार्यालय पर्साका प्रवक्ता प्रहरी नायब उपरिक्षक प्रल्हाद कार्कीले वताए ।
वडा प्रहरी कार्यालय श्रीपुर र जिल्ला प्रहरी कार्यालय पर्साबाट खटी गएको प्रहरी टाेलिले लाश जाँच प्रकृति मुचुल्का गरी मृतकको शव पोस्टमार्टमको लागि नारायणी अस्पताल वीरगंजमा पठाएको प्रवक्ता कार्कीले जानकारी दिए ।
उक्त घटनामा संलग्न आरोपित मृतकका श्रीमान दिनेशलाई नियन्त्रणमा लिई ज्यान सम्बन्धी कसूर (कर्तव्य ज्यान) मुद्दामा अनुसन्धान भई रहेको कार्कीले जानकारी गराए ।
प्रारम्भिक अनुसन्धानको क्रममा यादवले आफ्नी श्रीमतीको चरित्रमाथि शंका गर्ने गरेको र सोही विषयलाई लिएर दुवै जनाबीच विवादसमेत हुँदै आएको भन्ने खुलेको प्रहरीले जनाएकाे छ । शुक्रबार बिहान पनि त्यही विषयलाई लिएर श्रीमान् -श्रीमतीबीच विवाद हुँदा साे क्रममा प्रतिमाकाे मृत्यु भएकाे वताइएकाे छ ।
गत वर्षको बैशाखमा पर्साको पकाहा मैनपुर गाँउपालिका वडा नम्बर १ धोरे निवासी प्रतिमाको दिनेशसँग मागी विवाह भएको थियो । मृतक प्रतिमाको पाँच महिनाको गर्भ रहेको केटी पक्षले बताएका छन् ।