Date
आइत, मंसिर ६, २०८३
Sun, November 22, 2026
Home Blog Page 994

वीरगंज महानगरकाे वडा नं. २५ श्रीसियामा राहत वितरण

0

वीरगंज । वीरगंज महानगरपालिकाकाे वडा नं. २५ श्रीसियामा आज दाेस्राे चरणकाे राहत वितरण गरिएकाे छ । लकडाउनमा समस्या परेका गरिब,बिपन्न, दैनिक ज्यालादारी गरी खाने परिवारलाई आज राहत वितरण गरिएको वीरगंज महानगर प्रमुखका राजनितिक सल्लाहकार मुकेश द्विवेदीले वताउनु भयाे।

वीरगंज महानगरपालिकाले उपलब्ध गराएको राहत समाग्री वडाध्यक्ष बिसराज राउत कुर्मीको नेतृत्वमा वितरण गरिएको द्विवेदीले जानकारी गराउनु भयाे।

द्विवेदीका अनुसार वडा नं. २५  मा पर्ने श्रीसिया हाल चार वटा टोल मिलेर बनेको छ । चार वटा टोल मध्ये दुई वटा टोलमा पहिला नै राहत वितरण भैसकेको छ भने आज बाकी दुई वटा टोल खाल्वा टोला र द्राईपोर्ट श्रीसियामा राहत वितरण गरिएको हाे । 

वडा नं. २५ श्रीसिया अन्तर्गत खाल्वा टोला र द्राईपोर्ट श्रीसिया गरि कुल ५ सय ५३ जनालाई राहत वितरण गरिएको छ भने श्रीसिया को चारै वटा टोल मिलाएर कुल ९ सय  परिवारलाई राहत वितरण गरिएको  वडाध्यक्ष बिसराज कुर्मीका छोरा सन्जय पटेलले बताउनु भयाे।

पटेलका अनुसार राहत वडा अन्तर्गतका गरिब र श्रमजिवि परिवारलाई मात्र नदिई द्राईपोर्टमा काम गर्ने र बाहिरबाट आएर डेरा गरि विभिन्न कलकरखाना र दोकान गरि बसेकाहरुलाई पनि वितरण गरिएको छ।

यसरी वितरण भएको राहतमा सबैलाई १५ किलो चामल, डेढ किलो दाल, एक लिटर तेल र एक प्याकेट नुन सहितको प्याकेट बनाएर वितरण गरिएको छ ।

काेराेना भाइरस (काेभिड १९) संक्रमण राेकथाम तथा नियन्त्रणकाे लागि भएकाे लकडाउनले निम्त्याएको संकटबाट उत्पन्न परिस्थितिमा कसैको पनि चुलो निभ्न नपाओस उद्देश्यले महानगरले वडाहरुलाई आफ्नो आन्तरिक बजेटबाट हरेक राहत सामग्री उपलब्ध गराएको छ।

पाेखरिया नगरपालिकामा चाैथाे दिन पनि राहत वितरण

0

वीरगंज । पोखरिया नगरपालीकाकाे वडा नम्बर ५ सतवरियामा आज चाैथाे दिन राहत बितरण गरिएको छ । वडा अन्तर्गतका २ सय ५ घरदुरीलाई राहत वितरण गरिएकाे नगर प्रमुख दिपनारायण राैनियारले वताउनु भयाे।

बिश्वभरी महामारीकाे रुपमा फैलिएकाे काेराेना भाइरस (काेभिड १९) संक्रमण राेकथाम तथा नियन्त्रणकाे लागि भएकाे लकडाउनमा समस्यामा परेका अति गरिब तथा विपन्न परिवारलाई राहत वितरण गरिएकाे प्रमुख राैनियारले जानकारी गराउनु भयाे ।

राहतमा अरु वडा जस्तै सतवरियामा पनि चामल २५ किलो, तेल १ किलो, दाल २ किलो, नुन २ किलो, आलु ५ किलो, सोयाबिन ५०० ग्राम , नुहाउने र लुगा धुने साबुन २–२ पिस बितरण गरिएको निमित प्रमुख प्रशासकिय अधिकृत अमित कुमार गिरीले वताउनु भयाे।

नगर प्रमुख रौनियार, उप प्रमुख सलमा खातुन, पर्सा क्षेत्र नम्बर ३ का निलम्बित सांसद हरिनारायण प्रसाद रौनियार, पूर्व सांसद रामेश्व राैनियार, वडाध्यक्ष उमाकान्त साह, विभिन्न राजनितिक दलका प्रतिनिधिकाे उपस्थितीमा राहत वितरण गरिएकाे हाे ।

यस्तै वडा नं. २ मा वाकी रहेकाे दुई ७५ घरदुरीलाई पनि आज राहत वितरण गरिएकाे नगर प्रमुख राैनियारले वताउनु भयाे । सबै वडामा सर्बदलिय समितिले तयार गरेकाे गरिब परिवारकाे तथ्यांक अनुसार नै राहत वितरण भइरहेकाे नगरपालिका कार्यालयले जनाएकाे छ ।

जय गणेश बचतद्वारा महानगरकाे बिपद् काेषमा सहयोग

0

वीरगंज । जय गणेश बचत तथा ऋण सहकारी संस्था लिमिटेड पर्साले कोरोना भाइरस संक्रमण रोकथाम, नियन्त्रण तथा उपचार कोषका लागि रु १५ हजार सहयोग गरेको छ ।

संस्थाका प्रबन्धक रामबाबु चौधरीले वीरगन्ज महानगरपालिकाका नगरप्रमुख विजय कुमार सरावगीलाई चेक हस्तान्तरण गर्नुभएको हो । विश्व भरी फैलिएको कोरोना भाइरसको संक्रमणबाट सुरक्षित रहनका लागि थोरै भएपनि सहयोग पुगोस भन्ने अभिप्रायले उक्त रकम सहयोग गरीएको, कोओपरेटिघ म्यानेजमेन्ट क्लब पर्साका अध्यक्ष जीस्नु बरालले बताउनुभयो ।

सो अवसरमा जिल्ला कृषि सहकारी संघ लिमिटेड पर्साका अध्यक्ष शिव कुमार साह लगायतको उपस्थिती रहेको थियो ।

चेक बुझ्दै मेयर सरावगीले सहयोगको लागि जय गणेश बचत तथा ऋण संहकारी संस्था परिवारलाई धन्यवाद दिनुभएको थियो । साथै आगामी दिनमा पनि यसरी सहयोग प्राप्त भई रहोस भन्ने विश्वास समेत व्यक्त गर्नुभएको छ ।

जय गणेश बचत तथा ऋण सहकारी संथाका संस्थापक अध्यक्ष शम्भु प्रसाद गुप्ताले प्रदेश भरीका सहकारीहरूले आ आफ्नो सम्बन्धित स्थानीय सरकार मार्फत सहयोग गरेर कोरोना रोकथाममा टेवा पु¥याउन अपिल गर्नुभएको छ ।

राष्ट्रिय सहकारी विकास बोर्डका सन्चालक सदस्य समेत रहनुभएका गुप्ताले सहकारीहरुले पनि आफ्नो सामाजिक उत्तरदायित्व बहन गर्दै सहयोग गर्ने अभियानमा जुटेकोमा खुशि व्यक्त गर्नुभएको जिल्ला सहकारी संघ लिमिटेड पर्साका प्रबन्धक रामअनुप यादबले जानकारी दिनुभयो ।

झाैवाका ललन चाैरसियाँले आफ्नाे निजि स्राेतमा बाँडे राहत

0

वीरगंज । पर्साको बिन्दवासनी गाउँपालिका वडा न ३ झौवा गुठिका एक स्थानीय ललन कुमार चौरसियाले आज राहत वितरण गरेका छन् ।

काेराेना भाइरस (काेभिड १९) संक्रमण राेकथाम तथा नियन्त्रणकाे लागि भएकाे लकडाउनमा प्रभावित वडा नम्बर ३ र ४ का १ सय ७५ गरिब परिवारलाई राहत विरतरण गर्नु भएकाे हाे । चाैरसयाले वडा अन्तर्गतका बिपन्न तथा गरिब परिवारलाई आफ्नो नीजि खर्चबाट राहत सामग्री बितरण गरेका हुन् ।

राहतमा १० किलो चामल, आलु एक किलो ,एक प्याकेट नुन र १०० ग्राम स्वाबिन चाैरसियाले बाँडेका छन् ।

बिश्वब्यापी महामारीकाे रुपमा फैलिएको नोबेल कोरानो (कोभिड–१९) भाइरस संक्रमणको रोकथामका लागि सरकारले आवहानमा भएकाे लामो लकडाउनका दौरान गाउँका बिपिन्न तथा गरिब परिवारका मानिसहरुलाई छाक टार्न समस्या भएपछि चाैरसियाले आफ्नो निजि स्राेतमा राहत सामग्री बितरण गरेकाे वताइएकाे छ ।

जगरनाथपुर गाउँपालिका घर घरमा राहत पुर्‍याउदै

0

वीरगंज । पर्साकाे जगरनाथपुर गाउँपालिकाले पनि राहत वितरण सुरु गरेकाे छ । गाउँपालिका अध्यक्ष जालिम मियाँका अनुसार आज वडा नं. १, ३ र ४ मा राहत वितरण भइरहेकाे छ ।

राहतमा चामल २५ किलाे, आलु ३ किलाे, पियाज एक किलाे, स्वाविन ५०० ग्राम, तेल एक लिटर, कपडा धुने साबुन र नुहाउने साबुन २-२ पिस वितरण भइरहेकाे छ ।

गाउँपालिका भरी करिब ५ हजार गरिब परिवारलाई राहत वितरण गर्न लागिएकाे अध्यक्ष मियाँले जानकारी गराउनु भयाे । जस मध्ये वडा नं. ४ जगरनाथपुरमा ४ सय ५० घरदुरीमा राहत वितरण भइसकेकाे वताउनु भयाे । यस्तै वडा नं. ४ विजबनियाँमा ४ सय ५० र वडा नं. १ पिडारीमा ४ सय ५० घरदुरीमा आज राहत विरण भइरहेकाे वताउनु भयाे।

यस्तै वडा नं. २ जानकाकी टाेलाकाे राहत सामग्री समेत गइसकेकाे र भाेली (आइतबार) वितरण गरिने अध्यक्ष मियाँले जानकारी दिनु भयाे ।  गाउँपालिका अन्तर्गतकाे ६ वटा वडा रहेकाे र वाकी वडाहरुमा पनि चाँडै राहत वितरण गरिने गाउँपालिका कार्यालयले जनाएकाे छ ।

बिश्वभरी महामारीकाे रुपमा फैलिएकाे काेराेना भाइरस (काेभिड १९) संक्रमण राेकथाम तथा नियन्त्रणकाे लागि भएकाे लकडाउनमा समस्यामा परेकाे गरिब परिवारलाई राहत वितरण गर्न लागिएकाे प्रमुख प्रशासकिय अधिकृत अमित कुमार गिरीले वताउनु भयाे ।

घर घर मै पुगेर गाउँपालिकाले राहत स्वरुप खाद्यान्न सामग्री पुर्‍याउन लागेकाे प्रशासकिय अधिकृत गरिले वताउनु भयाे ।

राजेशमान सिंहकाे सक्रियतामा क्वारेन्टाइनामा खाना वितरणकाे साथै सेनिटाइजिंग बूथ निर्माण

0

वीरगंज । साहिब दरबार सेवा संस्थान र समर्पण सेवा संस्थाले बीरगंजको क्वारेन्टाइनमा रहेकाहरुलाई निशुल्क रुपमा खाना  खुवाउदै आएकाे छ ।

वीरगंजकाे कलवार धर्मशाला र सिद्धार्थ स्कुलकाे क्वारेन्टाइनमा रहेकाहरुकाे लागि प्रत्येक दिन नि:शुल्क रुपमा खाना वितरण गर्दै आइएकाे साहिब दरबार सेवा संस्थानका अध्यक्ष राजेशमा सिंहले वताउनु भयाे ।

वीरगंजकाे क्लवार धर्मशलाकाे क्वारेन्टाइनमा हिजाे(शुक्रबार) सम्म खाना वितरण गरिएकाे र आज २३ औं दिन पनि सिदार्थ माविकाे क्वारेन्टाइनमा रहेकाे ४३ जनालाई खाना वितरण गरिएकाे अध्यक्ष सिंहले वताउनु भयाे । कलवार धर्मशालाकाे क्वारेन्टाइन आज देखि खाली भइसकेका कारण संस्थाले त्यहाँ खाना नपठाइएकाे हाे ।

राजपाका महासचिव एवम् पर्सा अध्यक्ष समेत रहेका सिंहका अनुसार संस्थाले क्वारेन्टाइनमा रहेकाहरुकाे लागि प्रत्येक दिन विहानकाे खाना वितरण गर्दै आएकाे छ ।

खाना वितरणमा संस्थाका सदस्यहरू जयप्रकाश महतो, राजेश सिंह, निराजन अधिकारी, अफरोज आलम, जियाउलहक लगायतको सहभागीता रहेकाे छ ।

यसका साथै वीरगंज स्थित विभिन्न रिक्सा खारेजहरुमा समेत संस्थाले खाना वितरण गर्दै आएकाे छ । आज (शनिबार) पनि वीरगंजकाे घण्टाघर र नगवा स्थित रिक्सा खारेजहरुमा १ सय १० प्याकेट खाना वितरण गरिएकाे संस्थाले जनाएकाे छ ।

यस्तै संस्थाले काेराेना भाईरस (काेभिड १९) संक्रमणबाट बाच्न वीरगंजकाे ३ ठाउँमा सेनिटाइजिंग बूथ लगाएकाे छ । वीरगंज स्थित जिल्ला प्रशासन कार्यालय, जिल्ला प्रहरी कार्यालय र सशस्त्र प्रहरी कार्यालय चिनिमिलमा सेनिटाइजिंग बूथ संस्थाले जडान गरेकाे हाे ।

यसका साथै वीरगंजको विभिन्न वडामा संस्थाले आफ्नै सकृयतामा सेनिटाइज गर्ने काम पनि गरिरहेकाे छ ।

संकटको घडीमा स्टन्ट र यथार्त

0

महामारीकाे रूपमा फैलिएको कोरोना भाइरस (काेभिड १९) संक्रमणले सिंगो विश्व नै आक्रान्त छ । संसार भरिका देशहरू यो महामारीको प्रकोपबाट जुधिरहेका छन । यो भाइरसको संक्रमणले मानविय क्षतिकाे सूचाङ्कलाई तिब्र गतिमा बढाउदै लागेको छ । प्रविधि र आर्थिक रुपले अति सम्पन्न मुलुकहरु पनि यो संक्रमणको प्रकोपबाट अछुतो रहन नसकेको यथार्त हामी कसैको सामु लुकेको छैन । कोरोना भाइरस संक्रमणलाई नियन्त्रण गर्न विभिन्न विकसित मुलुकहरूले नसकी रहेको अवस्था छ । बिश्वका शक्तिशाली राष्ट्र अमेरिका, इटली, स्पेन, ब्रिटेन, जर्मनी लगायतका मुलुकहरूको अवस्था दैनिय एवम दर्दनाक बनेको छ । साथै छिमेकी मुलुक भारतको अवस्था पनि उनीहरू भन्दा अलिक सामान्य भए पनि पूर्णत फरक छैन । यसरी विश्वभरी फैलिएको काेराेना संक्रमणकाे वैश्विक महामारीबाट हाम्रो मुलुक पनि अछुतो रहन सकेकाे छैन ।

दिन प्रति दिन हाम्रो मुलुकमा पनि संक्रमितको संख्या बढदै गएको छ । जटिलता र जोखिम पनि बढदै गएको छ । यो कोरोना भाइरसको संक्रमण नियन्त्रणका लागि विभिन्न परीक्षण र अनुसन्धान भई रहे पनि हाल एक मात्र उपायको खोज भएको छ । त्यो हो सामाजिक दूरी । त्यसैका तहद संघिय सरकारको निर्देशन र निर्णय अनुसार हामी सबै घर मै लकडाउनमा रहनु पर्ने अवस्था छ । तर यो संक्रमणसंग लडने एक मात्र निर्विकल्प गुरु योजना लकडाउन मात्रै होइन । यो संक्रमणसंग लडन संक्रमणबाट आउने संभावित जोखिम र खतराको बिरुद्ध पूर्ववत तैयारी पनि यस बिरुद्धको लडाईको एउटा कडी हो ।

खास गरी छिमेकी मुलुक भारतको खुला सिमाना संग जोडिएको हाम्रो मुलुक नेपालको तराईको भूभागमा यो काेभिड १९ संक्रमणको जोखिम उच्च देखिएको छ । पछिको घटना क्रम अनुसार वीरगञ्जमा ३ जना र राैतहटमा एक जना कोरोना संक्रमित पाेजेटिभ भेटिए पछि प्रदेश न. २ का पर्सा, बरा र रौतहट लगायतका जिल्लाहरुमा त्रास बढेर गएको यथार्थलाई यहाँको आम जनमानसमा सूचित गरिराख्नु पर्दैन होला । यसरी संक्रमणको प्रभावले सहज रूपले प्रसय पाइरहेको बेला विभिन्न तहको सरकारलाई मात्रै पर्खेर बस्नु हामी सबैको पर निर्भरता र निरिहताको प्रकासठा हुन जान्छ । यद्यपि यो लोकतान्त्रिक व्यवस्थाको जगमा उभिएको मुलुकमा हामी सबै सार्बभौम छौ हामी सबैको अधिकार सम्मान छ र दाइत्व सम्मान छ ।

हैसियत मात्रै फरक छ । कोई यो संकटको बेला अरु माथि निर्भर छ, कोई आत्मनिर्भर मात्रै छ भने कोई कोई थुप्रैलाई आश्रय दिन सक्ने हैसियतमा छन् । यी सबै वस्तुगत अवस्थाका बीच एक अर्काको विगत र वर्तमान दुवैलाई हाल थाती राखी मानव जीवनको जीवन्तताको भबिस्यलाई सुरक्षित गर्न एक जुट ता देखाउनु पर्ने बेला एकले अर्कालाई खुइल्याएको देखेर दिक्क लाग्यो ।

हिजो अस्ति मात्रै नेकपाका वीरगन्ज महानगर कमिटीका अध्यक्ष रहबार अंसारीले आफ्नो स्वामित्वमा रहेको गण्डक हस्पिटललाई कोरोना विशेष अस्पतालको लागि अस्थायी रूपमा नि:शुल्क स्थानिय सरकारलाई दिने घोषणा गरे लगतै देखी टिकाटिप्पणीले वीरगन्जको माहवाल तात्यो, सामाजिक संजाल र बिभिन्न संचार माध्यमहरुमा उनको व्यापक आलोचना देखि लिएर जयजयकार समेत भयो । आलोचना गर्नेहरूले उनको घोषणालाई सस्तो लोकप्रियता कमाउन खोजेको संज्ञा दिनुको साथै रकमी चलखेल हुन सक्ने संका पनि जताए । यद्यपि उनले गरेको घोषणा लगतै वीरगन्ज महानगरपालिकाले वीरगन्ज स्थित अस्पतालहरुलाई लक्षीत गरी काेभिड अस्पतालको लागि इच्छुक अस्पतालहरूलाई आफ्नो आर्थिक डिमान्ड सहित तीन दिन भित्र प्रस्तावना दर्ता गर्न बोल पत्र आहवान गर्यो तर रहबारले आफ्नो घोषणा मोताबिक नि:शुल्क रूपमै दिने गरी आफ्नो अस्पतालबाट प्रस्तावना दर्ता गराए बाहेक अरु कुनै पनि निजी अस्पतालले प्रस्तावना दर्ता गरेनन । अन्त गण्डक हस्पिटलाई काेराेना अस्पताल बनाउन वीरगंज महानगरपालिका र अस्पताल बिच समझाैता पनि भएकाे छ ।

यसबाट के प्रमाणित भयो भन्ने अन्य कुनै निजी अस्पताल काेभिड अस्पतालको लागि दिनै चाहेका थिएनन् भने रहवरले गरेको घोषणा राजनीतिक प्रोपागान्डा र सस्तो लोकप्रियताको लागि होइन । साचो अर्थमा रहवारको घोषणा समाज प्रतिको जिम्मेवारी बोध हो । रहबरले देखाएका अदम्य साहस र उनको उदारता प्रति च्याबसी दिनुको साथै उनको मनोबल उच्च राख्न हामी सबैको नैतिक कर्तब्य बन्छ ।

जे होस महानगरपालिकाले माग गरेको काेभिड अस्पतालको लागि नारायणी अस्पताल बाहेक वीरगञ्जमा छिट्टै अर्को पनि काेभिड बिशेष अस्पताल स्थापना हुने भएकाे छ । यसबाट संभावित जोखिम एवम खतराबाट जोगिन र महामारी विरुद्धको लडाईमा एउटा नयां आयाम थपिएकाे छ । साथै भोजपुरीमा एउटा उखान छ  “चोरवा के मन बसे कोकरी के खेतमे” जस्तै सबै पहल, प्रयास र घोषणालाई स्टन्टको रूपमा देखने यो कुप्रचरबाजी खेल भित्रको गुमनाम पात्रको लागि यो नयाँ पाठ पनि बनेको छ । संचार जगतको अग्र भागमा सधै आफु नै रहनु पर्ने मानसिकताबाट ग्रसित ती पात्रलाई यो संकटको बेला जनताको लागि गर्नु पर्ने थुप्रै कामहरू थाती रहेको हुनाले, बरु जनताका जीवन जीविकासंग जोडिएका अन्य रचनात्मक काम हरुमा ऊर्जा खर्च गरी संचार जगतको अग्रभागमा रहनु नै बेश होला । अब अनावश्यक तनाव लीनुको अर्थ छैन ।

रहयो कुरा अहिलेको परिवेशको भने सिंगो विश्व नै संकटमा छ । यो बेला राजनीतिक प्रोपागान्डा गर्ने अनि सस्तो लोकप्रयताका कमाउने बेला होइन । यो महामारी माथि विजय प्राप्त गरी सके पछि राजनीतिक प्रोपागान्डा र स्वस्थ प्रतिस्पर्धा गर्दै गरौला तर हालको प्रस्थितीको संवेदनशीलतालाई मध्य नजर गर्दै विगतमा जसरी हाम्रो मुलुकमा आएको विभिन्न प्राकृतिक आपदमा एकले अर्कालाई सहयोग गरेको सुखद इतिहासले सु सजित नेपाली समाजमा अझै निखार ल्याउन पहल गर्न जरुरी छ ।

हुने खानेहरुले आफ्ना छर छिमेकमा रहेका दैनिक ज्यालादारी गरी जिउको पार्जन गर्नेहरूको अभावलाई खोतल्दै आवश्यक सहयोग गर्ने र आम राजनीतिक कार्यकर्ताहरुले आफु रहेको स्थानीय तहमा निर्वाचित जनप्रतिनिधिहरुलाई यो संकटको घडीमा यो महामारीसंग लडन इमान्दार प्रयत्नका लागि रचनात्मक सहयोग गर्नु नै अहिलेको मूलभूत आवश्यकता देखिन्छ ।

वृजलाल पासवान
केन्द्रिय सदस्य
प्रेस संगठन नेपाल

पकहा मैनपुरमा दुई पक्ष बिच झडप, ९ जना घाइते

0
गम्भिर घाइते रामाकान्तकाे उपचार हुदै वीरगंज स्थित न्यूराे हस्पिटलममा । तस्बिर : कालिका टाईम्स

वीरगंज । पर्साकाे पकहा मैनपुर गाउँपालिकाकाे वडा नं. २ मधुबनीमा आज दुई पक्ष बिच झडप हुदा ९ जना घाइते भएका छन् ।

पानी निकासकाे बिषयमा स्थानिय दिलिप साह र रामाकान्त साह पक्ष बिच भएकाे झडपमा दुबै पक्ष गरी ९ जना घाइते भएकाे प्रहरीले जनाएकाे छ । घाइते हुनेमा दिलिप पक्षकाे उनी सहित उनका भाउजाे लालमुनी देवी, भाई घनश्यम साह, संजय साह र अशाेक साह गरी ५ जना रहेकाे प्रहरी चाैकी धाेरेका असई लक्ष्मी नारायण सिंहले वताए ।

यस्तै घाइते हुनेमा रामाकान्त पक्षका उनी सहित उनकी श्रीमती मदन देवी, छाेरा माेहन साह र छाेरी अनिता देवी रहेकाे असई सिंहले वताए । दिलिप पक्षका घाइतेहरुकाे उपचारकाे लागि वीरगंज स्थित गण्डक हस्पिटलमा र रामाकान्त पक्षका घाइतेहरुकाे उपचारकाे लागि एल एस न्यूराे हस्पिटलमा पठाएकाे असई सिंहले जानकारी दिए ।

घाइते मध्ये रामाकन्तकाे अवस्था चिन्ताजनक रहेकाे अस्पतालले जनाएकाे छ । अरु घाइतेकाे अवस्था कसैकाे टाउकाे फुटेकाे छ भने कसैकाे समान्य चाेटपटक लागेकाे वताइएकाे छ ।

विवादित माटो पुरिएकाे स्थान र झडप स्थल । तस्बिर : कालिका टाईम्स

स्थानियहरुका अनुसार दिलिप दाईभाईले ३/४ दिन देखी रामाकान्तकाे घर अगाडी सार्बजनिक जग्गामा माेटाे राखेका रहेछन् । त्यही माटाेले गर्दा रामाकान्तकाे घरकाे पानी बग्न समस्या भए पछि उनी दिलिप दाजुभाईहरुसंग पानीकाे निकासकाे लागि माटाे हटाई दिन भन्न जादा दुबै पक्ष बिच विवाद भई झडप भएकाे हाे ।

बहुदरमाई नपामा दुई पक्ष बिच झडप, ७ घाइते र २ पक्राउ

0

वीरगंज । पर्साकाे बहुदरमाई नगरपालिकाकाे वडा नं. ९ बिश्रामपुरमा आज राती २ पक्ष बिच झडप हुदा ७ जना घाइते भएका छन् भने २ जनालाई प्रहरी नियन्त्रणमा लिएकाे छ ।

झडपमा परी फरिया देवी, मजबुन खातुन, समिना खातुन, चन्दन गुप्ता, सुनिल गुप्ता, शुसिला देवी पटेल र बदिया राज भट्ट घाइते भएकाे प्रहरीले जनाएकाे छ । घाइतेहरुकाे उपचार वीरगंज स्थित नेशनल मेडिकल कलेज र गण्डक हस्पिटलमा भइरहेकाे छ ।

झगडिया राजु गुप्ता र नसुरलाह मियाँलाई प्रहरीले नियन्त्रणमा लिएकाे छ ।

स्थानियहरुका अनुसार बिश्रापुर स्थित महजिदमा लुकीछिपी बस्दै आएका अपरिचित व्यक्तिहरुलाई नबस्न भन्दा विवाद भई दुई पक्ष बिच झडप भएकाे हाे ।

अमेरिकी खत : माैनता पाेखरेल

0

 प्रिय मुटु,

             समय सापेक्षता अनुकुल मिलाएर भन्दै छु, तिमी सकुशल हाेलाऊँ भन्ने पुरा बिश्वास छ। नेपालमा भएका मेरा सम्पुर्ण नेपाली परिबारमा पनि मंगल रहोस् भन्ने सन्देश पुर्याइदिनु। बिश्वभर फैलिएको महामारीबाट बच्नु अनि तिमी एउटा सक्षम डाक्टर भएको भुमिका निभाउनु। सम्झनाका ती पुराना स्मृतिहरु मेरो सानो मानसपटलमा ठूलो घर गरेर बसेको छ। तिमीसँग बिताएका मिठा पलहरु ताजा भएर आइदिदाँ तिमी मेरै नजिक भएको आभास हुन्छ।

               आजकालको फेसबुक प्रेम देखि भिन्नै हाम्रो शुद्ध प्रेम, अलग छ। मानव जातीमा भएको असन्तुष्टि देखेर ज्यादै दिक्क लाग्छ तर मैले मेरो २२ बर्षको जीवन जिउनमा पनि सन्तुष्ट मानेको छु, किनकी अब म एउटा शहिद भएर मर्दैछु। कसैलाई जीवनदान दिएर म अलप हुँदैछु। यदि दैबसंयोग मलाई केही आइपर्यो भने पनि तिमी चित्त ब्याकुल नबनाइकन मेरो सम्झनामा आँसु नबगाउनु। मैले मेरो २२ वर्षीय जीवनकालमा कति गल्ती पनि गरे होला, त्यसको प्रायश्चित मनैबाट स्विकार्छु। तर बेजोड शक्ति लगाएर सोच्दा पनि त्यस्तो नराम्रो त कसैलाई पुर्याएको झै लाग्दैन। कतिसँग कुरा र बिचार मिल्दैन्थ्यो होला, त्यो भिन्नै कुरा हो।

               मैले प्रेम भनेको एउटा आमाले आफ्नो बच्चालाई गर्नेझै शुद्ध ठानेकी छु। अनि त्यही प्रगाढ प्रेम हामीबिच मृत्यु पश्चात् पनि रहोस्। मैले जीएको २२ बर्ष मेरा लागि ज्यादै अमुल्य छ र आमाबुबाको चरणकमलमा मैले मेरै पेशा चढाएको छु। सायद उहाँहरु म एउटा शहिद नर्स भएकोमा चित्त दुखाउनु हुन्न होला। अमेरिकमा कोरोना आगोझै बढिरहेको छ र त्यहीँ आगो निभाउन म र मेरा चिकित्सक साथीहरु दमकल बनिरहेका छौ।

                आफै सक्षम युवती भएर, कार हाकेर हिड्ने ठुलो रहर थियो; त्योपनि बिस्तारै पूरा हुँदैथ्यो। अरुको अथाह सपना र योजना तर म सामान्य सपनामा रम्ने योजनाबिहिन मान्छे थिए। तर नर्स पेशामा लागेपछी मेरो जीवनको २ बर्षले नयाँ मोड लियो। मेरा पनि योजना बन्न थाले। हस्पिटलको शैय्यामा बसेका बिरामी देखेर मेरा पनि सपना बुनिए तर आज मेरो अबस्था नाजुक छ। जीवन र मृत्युको दोधारमा उभिएको छु म। त्यहीँ बिच मेरो मुटुले मेरो सपना पूरा गर्ने मेरो मायाको चिनो तिमी याद गरायो। सम्पुर्ण रोदन छोडेर म हर्ष बाध्न लागे।

              मेरा सपना त्यति ठुला छैनन् तर जति छन् निकै गहकिला छन्। मलाई बिश्व भ्रमण गर्ने ठुलो इच्छा थियो; त्यो तिमीले पूरा गर्नु। सबै पूरा गर्नुपर्छ भनेको होइन, सकेसम्म पूरा गर्नु। तिम्रै पेशाले, डाक्टरी पेशाले, जुन सबैभन्दा महान् काम हो। सबै मानवलाई आफ्नो सीपले निरोगी बनाउनु। तिमी बिल्कुलै सुर्ता नगर्नु, म एकदमै खुशी छु।अनि मेरो एउटा अर्को सपना पनि थियो। तिमी ठूलो र सिपालु डाक्टर भएर बिश्व चर्चित हुनु र अन्धकारको मर्ममा रुमल्लिरहेका ती पीडित शिशु र भबिष्यका कर्णधारलाई खुब उत्साहसाथ शिक्षा दिनु। मेरो मरिसकेको आत्मा फेरि एकपल्ट जीवित हुनेछ।

                प्रिय, मेरा हरेक चाहना तिम्रो मनमा छ भने, त्यसलाई पूरा गर्ने जमर्को गर्नु। मैले मेरो सारा जीवनमा तिमीलाई सुम्पेको छु, त्यो जीवनको जतन गर्नु, ख्याल गर्नु। तिम्रो हरेक पाइलामा मैले साथ दिन त पाइन तर म अबश्य बाचा गराउँछु कि तिमीले आफ्नो जीवन चलाउनलाई कोहि खोज्नै पर्छ। दुईवटा पांग्रा नभई रथ पनि चल्दैन। त्यस्तै तिम्रो जीवनमा पनि कोहि चाहिन्छ, अनि मात्र तिमीले मेरो इच्छा पूरा गर्छौ भन्ने बिश्वास गर्द्छु। म अहिले अस्पतालको शैय्या आफै बिरामी झै लडेको छु। तिम्रो लागि मेरो अथाह माया छ। सायद यो पत्र निकै लामो भयो होला।अनि यो पत्र तिम्रो हातमा आइपुग्ने बेलासम्म म मृत्युको शैय्यामा पुगुँला। सायद मैले मेरो जीवन तिमीसँग जीउन पाएकाे भए। माया लेखाईमा त पुर्ण बर्णन गर्न सकिन्न भन्छन् तर धेरै माया र अग्रिम शुभकामना छ प्रिय तिमीलाई ।

                                                                                                                                      – उहीँ तिम्रो धड्कन
                                                                                                                                            अन्जान पात्र।