वीरगंज । पर्सा क्षेत्र नम्बर ४ अन्तर्गत धोबिनी गाउँपालिका वडा नम्बर १ र २ मा पर्ने भिखमपुर पिपरामा बिहीबार नेपाली कांग्रेसले चुनावी घरदैलो कार्यक्रम सम्पन्न गरेको छ।
घरदैलो कार्यक्रमका क्रममा पर्सा–४ का कांग्रेस उम्मेदवार तथा पूर्वमन्त्री रमेश रिजालले घरघरमा पुगेर मतदातासँग प्रत्यक्ष भेटघाट र संवाद गर्नुभयो। भेटघाटका क्रममा स्थानीय मतदाताहरूले गाउँका विभिन्न समस्या, अधुरा तथा अलपत्र परेका विकास योजनाबारे जानकारी गराउँदै उम्मेदवार रिजालको ध्यानाकर्षण गराएका थिए।
स्थानीयको कुरा ध्यानपूर्वक सुन्दै उम्मेदवार रिजालले आफू सधैं जनताको दुःख–सुखमा साथ दिंदै आएको उल्लेख गर्नुभयो। उहाँले स्वास्थ्य, शिक्षा र कृषि क्षेत्रका क्षेत्रमा आफूले अहिलेसम्म गरेका कामबारे जानकारी गराउँदै आगामी कार्यकालमा विगतमा अधुरा रहेका तथा गर्न नसकेका कामहरूलाई पहिलो प्राथमिकतामा राख्ने प्रतिबद्धता व्यक्त गर्नुभयो।
‘म यही माटोको मान्छे हुँ। जनता नै मेरा शक्ति हुन्। जनताको सेवामा म हिजो पनि थिएँ, आज पनि छु र भोलि पनि रहनेछु,’ रिजालले भन्नुभयो।
नेपाली कांग्रेसले युवाको भावना र चाहनालाई सम्मान गर्दै आएको उल्लेख गर्दै उहाँले पार्टीभित्र नेतृत्व पुस्तान्तरण भएको बताउनुभयो। ‘अहिले कांग्रेसको नेतृत्व गगन थापाजस्ता जुझारु युवाको हातमा आएको छ। कांग्रेस पार्टी परिवर्तनको बाटोमा अघि बढेको छ। हामीले कांग्रेस बदल्यौं, अब कांग्रेसले देश बदल्छ,’ उहाँले भन्नुभयो।
घरदैलो कार्यक्रममा मधेस प्रदेश सरकारका वनमन्त्री शंकर चौधरी, नेपाली कांग्रेस पर्साका जिल्ला सहसचिव नवीन सिंह, पर्सा क्षेत्र नम्बर ४ का कांग्रेस क्षेत्रीय सभापति श्रीकान्तप्रसाद यादव, क्षेत्रीय सचिव बलिष्टर अहमद, बुथ सभापति, अगुवा कार्यकर्ता तथा पार्टी समर्थकहरूको उल्लेखनीय सहभागिता रहेको थियो।
