वीरगंज । वीरगंज महानगरपालिका वडा नं. २१ परवानीपुरमा विद्यालय तथा स्वास्थ्य चौकीका दुई वटा भवन निर्माण कार्यको शिलान्यास गरिएको छ । वडाअध्यक्ष राधाकृष्ण रौनियारको पहलमा ल्याइएको बजेटबाट श्री नेपाल राष्ट्रिय आधारभूत विद्यालय परवानीपुर र परवानीपुर स्वास्थ्य चौकीमा दुई/दुई कोठे भवन निर्माण हुन लागेको हो ।
श्री नेपाल राष्ट्रिय आधारभूत विद्यालय परवानीपुरमा मधेश प्रदेश शिक्षा मन्त्रालयबाट विनियोजित २५ लाख रुपैयाँको लागतमा निर्माण हुने दुई कोठे भवनको शिलान्यास वडाअध्यक्ष रौनियारले गरेका हुन् ।
शिलान्यास कार्यक्रममा विद्यालय व्यवस्थापन समितिका अध्यक्ष हरिहर साह, प्रधानाध्यापक रामेश्वर साह, शिक्षकहरू तथा स्थानीय समाजसेवी भोज महतो, कृष्ण कुशवाहा, गणेश कुशवाहा, हृदयनारायण कुशवाहालगायतको उपस्थिति रहेको थियो । भवन निर्माणको काम ताराचन्द मण्डल नेतृत्वको उपभोक्ता समितिले गरिरहेको जनाइएको छ ।
त्यसैगरी, परवानीपुर स्वास्थ्य चौकीमा पनि दुई कोठे भवन निर्माणका लागि शिलान्यास गरिएको छ । मधेश प्रदेश स्वास्थ्य मन्त्रालयबाट विनियोजित २४ लाख रुपैयाँको लागतमा निर्माण हुन लागेको उक्त भवनको बजेट पनि वडाअध्यक्ष रौनियारकै पहलमा ल्याइएको बताइएको छ ।
स्वास्थ्य चौकी भवन शिलान्यास कार्यक्रममा स्वास्थ्य चौकी प्रमुख रामेश्वर राम, कर्मचारी अर्विन्द रौनियार, आकृति पटेल, जवाहिर महतोलगायतको सहभागिता रहेको स्थानीय समिर आलमले जानकारी दिए ।
कार्यक्रममा बोल्दै वडाअध्यक्ष राधाकृष्ण रौनियारले शिक्षा र स्वास्थ्य क्षेत्रलाई प्राथमिकतामा राखेर विकास निर्माणका काम अघि बढाइएको बताए । उनले स्थानीय नागरिकलाई गुणस्तरीय शिक्षा तथा स्वास्थ्य सेवा उपलब्ध गराउन पूर्वाधार निर्माण आवश्यक रहेको उल्लेख गर्दै आगामी दिनमा पनि वडाको समग्र विकासका लागि निरन्तर पहल गर्ने प्रतिबद्धता व्यक्त गरे ।
