वीरगंज । वीरगंज महानगरपालिकाकाे वडा नम्बर १७ अलौंमा आयोजना गरिएको अलौं प्रिमियम लिग क्रिकेट प्रतियोगिताको उपाधि अलौं किंगसले जितेको छ ।
बुधबार सम्पन्न फाइनल खेलमा अलौं किंगसले अलौं बलास्टर्सलाई पराजित गर्दै उपाधिमाथि कब्जा जमाएको हो । विजेता टोलीलाई कार्यक्रमका प्रमुख अतिथि तथा वीरगंज महानगरपालिकाका पूर्व मेयर विजय कुमार सरावगीले नगद ११ हजार रुपैयाँसहित ट्रफी प्रदान गरेका थिए ।
पुरस्कार वितरण कार्यक्रममा बोल्दै पूर्व मेयर सरावगीले खेलकुदले अनुशासन सिकाउनुका साथै राष्ट्रको नाम अन्तर्राष्ट्रिय स्तरसम्म चिनाउन महत्वपूर्ण भूमिका खेल्ने बताए । उनले खेलले मानिसको शारीरिक, मानसिक तथा सामाजिक विकासमा महत्वपूर्ण योगदान पुर्याउने उल्लेख गर्दै शरीरलाई स्वस्थ र तन्दुरुस्त बनाउनुका साथै आत्मविश्वास, सहकार्य र नेतृत्व क्षमता विकास गर्न मद्दत गर्ने बताए ।
कार्यक्रममा वडा अध्यक्ष सञ्जीव बहादुर क्षेत्री, रास्वपाका नेता सुधिर पटेल सहित स्थानीय भद्रभलादमी, जनप्रतिनिधि तथा विभिन्न संघसंस्थाका प्रतिनिधिहरुको उपस्थिति रहेको थियो ।
