वीरगंज । गौतम स्कूल वीरगंजमा सशस्त्र प्रहरी बलको भूमिका सम्बन्धी सचेतनामूलक कार्यक्रम सम्पन्न भएको छ । सशस्त्र प्रहरी बल नेपाल नं. १३ गण पर्साका गणपति एसपी मोहन क्षेत्रीको प्रमुख आतिथ्यमा सम्पन्न कार्यक्रममा १३० भन्दा बढी विद्यार्थीहरूको सक्रिय सहभागिता रहेको थियो ।
कार्यक्रममार्फत विद्यार्थीहरूलाई समाज तथा सीमावर्ती क्षेत्रमा सशस्त्र प्रहरी बलले निर्वाह गर्ने भूमिका, राजस्व संरक्षण, सीमा सुरक्षा तथा सामाजिक सुरक्षामा नागरिकको सहकार्यबारे महत्वपूर्ण जानकारी प्रदान गरिएको थियो । साथै विद्यार्थीहरूलाई राष्ट्र सुरक्षा तथा सामाजिक उत्तरदायित्वप्रति सचेत बन्न आग्रह गरिएको थियो ।
उक्त कार्यक्रम एलाईड युथ सोसाइटीका अध्यक्ष पीयूष गुप्ता को अध्यक्षतामा तथा दिव्य ज्योतिको नेतृत्वमा सम्पन्न भएको हो । कार्यक्रममा वक्ताहरूले युवापुस्तामा सुरक्षा निकायप्रति सकारात्मक सोच र सहकार्यको भावना विकास गर्न यस्ता कार्यक्रम प्रभावकारी हुने बताएका थिए ।
कार्यक्रममा मानव सेवा आश्रमका संस्थापक सदस्य देवेश गुप्ता, गौतम स्कूलकी प्रिन्सिपल गणेश क्षेत्री, रमेश शर्मा, ललित कर्ण, सौराज प्रधान, सिपेन्द्र गुप्तालगायत विभिन्न व्यक्तित्वहरूको उपस्थिति रहेको थियो ।
आयोजकहरूले समाजमा सुरक्षा, समन्वय तथा जनचेतना अभिवृद्धिका लागि आगामी दिनमा पनि सशस्त्र प्रहरी बलसँग सहकार्यलाई निरन्तरता दिने प्रतिबद्धता व्यक्त गरेका छन् ।
