वीरगंज । वीरगंजस्थित गौतम माध्यमिक विद्यालयले मधेश प्रदेश क्रिकेट संघद्वारा आयोजित ‘सहिद कप मधेश महिला क्रिकेट लिग २०८३’ का विजेता खेलाडीहरूलाई सम्मान गरेको छ । विद्यालयले एक कार्यक्रमका बिच खेलाडीहरूलाई सम्मानपत्र तथा खादा ओढाएर सम्मान गरेको हो ।
विद्यालयकी म्यानेजिङ डाइरेक्टर परीक्षा प्रिया लामाको अध्यक्षतामा सम्पन्न कार्यक्रममा पर्सा क्रिकेट संघका अध्यक्ष मनीष सिंह प्रमुख अतिथिका रूपमा सहभागी भएका थिए । कार्यक्रममा विद्यालयका डाइरेक्टर सोनम लामा, प्रिन्सिपल गणेश क्षेत्री, रमेश शर्मा, ललित कर्ण, सौराज प्रधान, सिपेन्द्र गुप्ता लगायतको उपस्थिति रहेको थियो ।
कार्यक्रमलाई सम्बोधन गर्दै पर्सा क्रिकेट संघका अध्यक्ष सिंहले महिला क्रिकेटको विकासका लागि यस्ता सम्मान तथा प्रोत्साहनमूलक कार्यक्रम आवश्यक रहेको बताए । उनले खेलाडीहरूको मेहनत, अनुशासन र समर्पणकै कारण मधेश प्रदेशमा महिला क्रिकेटले नयाँ उचाइ हासिल गरिरहेको उल्लेख गरे ।
उनले आगामी दिनमा पनि खेलाडीहरूले निरन्तर मेहनत गर्दै राष्ट्रिय तथा अन्तर्राष्ट्रिय स्तरमा प्रदेशको नाम उज्ज्वल बनाउनुपर्ने धारणा व्यक्त गरे । साथै विद्यालयले खेलकुद क्षेत्रलाई प्राथमिकता दिँदै खेलाडीहरूको मनोबल बढाउने कार्य गरेको भन्दै प्रशंसा समेत गरे ।
विद्यालयकी म्यानेजिङ डाइरेक्टर परीक्षा प्रिया लामाले खेलकुदले विद्यार्थीहरूको व्यक्तित्व विकासमा महत्वपूर्ण भूमिका खेल्ने बताइन् । उनले अध्ययनसँगै खेलकुदलाई विद्यालयले विशेष प्राथमिकतामा राख्दै आएको उल्लेख गर्दै उत्कृष्ट प्रदर्शन गर्ने खेलाडीहरूलाई सदैव प्रोत्साहन गरिने बताइन् ।
खेलाडीहरूको उत्कृष्ट प्रदर्शन, समर्पण तथा खेलभावनाको कदर गर्दै प्रोत्साहन गर्ने उद्देश्यले सम्मान कार्यक्रम आयोजना गरिएको विद्यालयले जनाएको छ ।
