वीरगंज । पर्सा क्षेत्र नं. १ मा जनमत पार्टीका प्रतिनिधिसभा सदस्य उम्मेदवार ओमप्रकाश सर्राफले चुनावी प्रचारप्रसारलाई तीव्र बनाउँदै घरदैलो अभियानलाई निरन्तरता दिएका छन्।

यसैक्रममा वीरगंज महानगरपालिका वडा नं. १६ इनर्वामा आयोजित रात्रीसभा उल्लेख्य जनसहभागितासहित सम्पन्न भएको छ। स्थानीय बासिन्दाको बाक्लो उपस्थितिले चुनावी माहोल थप सक्रिय बनेको देखिएको थियो।

घरदैलो अभियानका क्रममा उम्मेदवार सर्राफले मतदातासँग प्रत्यक्ष भेटघाट गर्दै उनीहरूको धारणा, अपेक्षा र स्थानीय समस्याबारे संवाद गरेका थिए। इनर्वाका बासिन्दाले शिक्षा, स्वास्थ्य, रोजगारी, सडक तथा नाला लगायत आधारभूत पूर्वाधारसँग सम्बन्धित विषय उठाएका थिए। सर्राफले ती मुद्दालाई प्राथमिकताका साथ अघि बढाउने प्रतिबद्धता व्यक्त गर्दै ‘जनताको आवाज संसदसम्म पुर्‍याउने’ अठोट दोहोर्‍याए।

रात्रीसभालाई सम्बोधन गर्दै सर्राफले मधेशका मुद्दा लामो समयदेखि ओझेलमा परेको उल्लेख गर्दै तिनको समाधानका लागि जनमत पार्टी नै विकल्प रहेको बताए। विजयी भएपछि पहिचान, प्रतिनिधित्व, विकास र अधिकारका सवाललाई नीतिगत तहमा उठाउने तथा कार्यान्वयनतर्फ विशेष पहल गर्ने उनले प्रतिबद्धता जनाए। ‘अब नाराभन्दा काम हेर्ने समय आएको छ,’ उनले जोड दिए।

कार्यक्रममा सहभागी युवाहरूले रोजगारी, सीपमूलक तालिम र उद्यमशीलताका अवसरबारे जिज्ञासा राखेका थिए भने महिला सहभागीहरूले शिक्षा, स्वास्थ्य र स्वरोजगार प्रवर्द्धनका विषयमा अपेक्षा व्यक्त गरेका थिए। स्थानीय बुद्धिजीवीहरूले स्पष्ट एजेण्डा र मतदातासँग प्रत्यक्ष संवाद गर्ने शैलीका कारण सर्राफप्रति आकर्षण बढ्दै गएको टिप्पणी गरेका थिए।

जनमत पार्टीको तर्फबाट सञ्चालन भइरहेको घरदैलो र सभासमारोहले पर्सा क्षेत्र नं. १ मा चुनावी सरगर्मी बढाएको छ। इनर्वाबाट सुरु भएको सक्रियता अन्य वडाहरूमा पनि निरन्तर जारी रहने जनाइएको छ। यसैबीच आज वीरगंज महानगरपालिका वडा नं. ५ मा पनि घरदैलो कार्यक्रम सम्पन्न भएको छ।

कार्यक्रममा नेताहरू विद्यालाल प्रसाद, रम्भा मिस्रा, समानुपातिक उम्मेदवार बबिता पुडासैनी, भुपेन्द्र साह, सिए देवराज, डा. मनोज साह, सत्युग साह, सुनिल गुप्ता, दिनानाथ साह, मुकेश यादव, नरेश राम, तुल्सी राम, अलि अकबर मियाँ, सिकेश महतो, निराजन कुशवाहा लगायत सयौंको उपस्थिति रहेको थियो।

वीरगंज । पर्सा जिल्लाको निर्वाचन क्षेत्र नम्बर–३ मा यसपटकको प्रतिनिधिसभा निर्वाचनले पुरानो राजनीतिक धरातललाई चुनौती दिने संकेत देखिएको छ। लामो समयदेखि सक्रिय राजनीतिमा रहेका नेपाली काँग्रेसका उम्मेदवार सुरेन्द्र चौधरी विरुद्ध जनअसन्तुष्टि बढ्दै गएको चर्चा चलिरहँदा परिवर्तनको पक्षमा माहोल बनेको स्थानीय स्तरमा आँकलन गरिएको छ।

फागुन २१ गते हुने निर्वाचनमा नेकपा एमालेका युवा उम्मेदवार रूपेश कुमार पाण्डेप्रति मतदाताको आकर्षण बढ्दो रहेको बताइन्छ। घरदैलो अभियान, टोल–टोल भेटघाट तथा जनसंवाद कार्यक्रममा पाण्डेको सक्रियताले मतदातामाझ सकारात्मक सन्देश प्रवाह गरेको समर्थकहरूको भनाइ छ।

स्थानीय मतदाताहरूले विगतमा पटक–पटक सांसद र मन्त्री हुँदा पनि अपेक्षित क्षेत्रीय विकास हुन नसकेको विषय उठाउँदै नेतृत्वको कार्यशैलीमा परिवर्तन आवश्यक रहेको धारणा व्यक्त गर्ने गरेका छन्। पटेर्वा सुगौलीका एक मतदाताले भने, “भाषणभन्दा काम र परिणाम जनताको प्राथमिकता हो।”

यता रूपेश कुमार पाण्डेले रोजगारी, सुशासन, पारदर्शिता तथा स्थानीय पूर्वाधार विकासलाई आफ्नो मुख्य एजेन्डा बनाउँदै आएका छन्। विभिन्न स्थानमा उनलाई खादा र टीका लगाएर स्वागत गरिएको तथा अग्रिम शुभकामना दिइएको दृश्यहरू पनि देखिएका छन्।

यस क्षेत्रमा नेकपा (एकीकृत समाजवादी) का छोटेलाल यादव र राष्ट्रिय स्वतन्त्र पार्टीका रमाकान्त चौरसिया पनि प्रतिस्पर्धामा छन्। यद्यपि समग्र राजनीतिक समीकरण हेर्दा मुख्य प्रतिस्पर्धा एमाले र काँग्रेसबीच केन्द्रित रहेको विश्लेषण भइरहेको छ।

पर्सा–३ मा यसपटकको निर्वाचन केवल दलगत प्रतिस्पर्धा नभई पुस्तान्तरण, कार्यशैली र विकासका मुद्दासँग जोडिएको रूपमा हेरिएको छ। मतदाताहरूले वाचा भन्दा परिणाम र भाषणभन्दा कामलाई प्राथमिकता दिने संकेत दिएका छन्।

वीरगंज । पर्सा जिल्लाको बहुदरमाई नगरपालिका वडा नं. ४ मा जनता समाजवादी पार्टी (जसपा) प्रति आकर्षण बढ्दै गएको देखिएको छ। पर्सा निर्वाचन क्षेत्र नं. २ अन्तर्गत पर्ने उक्त वडामा विभिन्न दल परित्याग गरी सयौं जना युवा, बुद्धिजीवी तथा स्थानीय अगुवाहरू जसपामा प्रवेश गरेका छन्। सामूहिक रूपमा आयोजित प्रवेश कार्यक्रमले क्षेत्रमा जसपाको चुनावी अभियानलाई नयाँ ऊर्जा दिएको पार्टीले जनाएको छ।

नवप्रवेशीहरूलाई स्वागत गर्न आयोजित कार्यक्रममा पर्सा क्षेत्र नं. २ का प्रतिनिधिसभा सदस्य उम्मेदवार अशोक टेमानी, जसपाकी नेतृ करिमा बेगम, पार्टी नेता सन्तोष तिवारी तथा वडा नं. २५ का वडाध्यक्ष आशुतोष चतुर्वेदी लगायतको उपस्थिति रहेको थियो। नेताहरूले अबिर, टीका र फूलमाला लगाएर नवप्रवेशीहरूलाई पार्टीमा स्वागत गरेका थिए। कार्यक्रममा देखिएको उत्साहले जसपाप्रति स्थानीय तहमा बढ्दो विश्वास झल्काएको सहभागीहरूको भनाइ थियो।

उक्त अवसरमा सोही स्थानमा जसपाको नयाँ पार्टी कार्यालयसमेत सञ्चालनमा ल्याइएको छ। कार्यालयको उद्घाटन प्रमुख अतिथिका रूपमा रहेका उम्मेदवार अशोक टेमानीले गरेका थिए। स्थानीय स्तरमै पार्टी कार्यालय सञ्चालनमा आएपछि संगठन सुदृढीकरण, जनसम्पर्क विस्तार तथा चुनावी गतिविधि सञ्चालनमा सहजता आउने अपेक्षा गरिएको छ।

कार्यक्रममा बोल्दै नवप्रवेशीहरूले जसपालाई विकास र परिवर्तनको आशा बोकेको शक्ति भएको धारणा व्यक्त गरे। विगतमा विभिन्न दलका उम्मेदवारलाई निर्वाचित गराउँदा अपेक्षित विकास हुन नसकेको अनुभव सुनाउँदै उनीहरूले यसपटक जनचासो र आवश्यकता नजिकबाट बुझेका उम्मेदवारलाई साथ दिने बताएका छन्।

उम्मेदवार टेमानीले उपस्थित सबैलाई धन्यवाद दिँदै क्षेत्रको विकास, सुशासन र जनसेवामुखी राजनीति आफ्नो प्राथमिकता रहेको बताए। स्थानीय युवाशक्ति र बुद्धिजीवीहरूको साथले चुनावी अभियान थप मजबुत बन्ने विश्वास उनले व्यक्त गरे।

बहुदरमाई–४ मा भएको यस सामूहिक प्रवेश कार्यक्रमलाई जसपाको चुनावी रणनीतिका दृष्टिले महत्वपूर्ण कदमका रूपमा हेरिएको छ। स्थानीय तहमा पार्टी संरचना मजबुत बनाउँदै मतदातासँग प्रत्यक्ष सम्पर्क विस्तार गर्ने उद्देश्यले यस्ता कार्यक्रमलाई निरन्तरता दिने तयारी पार्टीले जनाएको छ।