वीरगंज । सशस्त्र प्रहरीले पर्साको वीरगंज महानगरपालिका–३१ स्थित मिलनचोक क्षेत्रबाट अवैध रूपमा कटान गरिएको अन्दाजी ४५ क्युबिक फिट सालको गोलिया काठ तथा पाँच थान साइकल बरामद गरेको छ ।
सशस्त्र प्रहरी बल, नेपाल सुरक्षा बेस बेल्वाबाट खटिएको गाडी मोबाइल टोली तथा सब-डिभिजन वन कार्यालय सबैयाबाट खटिएको संयुक्त टोलीले आइतबार फुटबल ग्राउण्ड क्षेत्रबाट उक्त काठ बरामद गरेको हो ।
प्रहरीका अनुसार जंगलबाट अवैध रूपमा कटान गरी साइकलमा लोड गरेर ल्याउँदै गरेको अवस्थामा टोलीले काठ फेला पारेको थियो । संयुक्त टोलीलाई देख्नासाथ काठ ओसारपसारमा संलग्न व्यक्तिहरू काठ र साइकल छाडेर फरार भएका थिए ।
बरामद गरिएको अन्दाजी ४५ क्युबिक फिट सालको गोलिया काठ तथा पाँच थान साइकल आवश्यक अनुसन्धान तथा कानुनी कारबाहीका लागि सब-डिभिजन वन कार्यालय सबैयामा बुझाइएको सशस्त्र प्रहरी बल, नेपाल नं. १३ गण मुख्यालय पर्साका सूचना अधिकारी सशस्त्र प्रहरी नायब उपरीक्षक मोहनराज निरौलाले जानकारी दिएका छन् ।
घटनामा संलग्न व्यक्तिहरूको खोजी कार्य जारी रहेको जनाइएको छ।
