वीरगंज । साउथ जोन माध्यमिक विद्यालय, वीरगंज–१३ राधेमाईले विद्यार्थीहरूको सुरक्षा तथा अभिभावकको आर्थिक जोखिम न्यूनीकरणका लागि दुर्घटना तथा स्वास्थ्य बीमा कार्यक्रम लागू गरेको छ । विद्यालयमा अध्ययनरत करिब १८२५ विद्यार्थीलाई लक्षित गर्दै उक्त सुविधा सुरु गरिएको हो ।
विद्यालयले नेको इन्स्योरेन्स लिमिटेडसँगको सहकार्यमा प्रत्येक विद्यार्थीका लागि रु. १ लाख बराबरको दुर्घटना बीमा तथा रु. ३ हजार ५०० बराबरको स्वास्थ्य बीमा सुविधा उपलब्ध गराएको छ । यससँगै प्रत्येक विद्यार्थी रु. १ लाख ३ हजार ५०० बराबरको बीमा सुरक्षाको दायरामा आएका छन् ।
सहायक प्रधानाध्यापक अशोक संग्रौलाका अनुसार चालु शैक्षिक सत्रदेखि लागू गरिएको यो योजना विद्यार्थीलाई सुरक्षित शैक्षिक वातावरण प्रदान गर्ने उद्देश्यले सञ्चालनमा ल्याइएको हो । २४ घण्टा लागू हुने बीमा योजनाले विद्यालयभित्र मात्र नभई घर, बाटो, खेलकुद तथा अन्य दैनिक गतिविधिका क्रममा हुने दुर्घटनालाई समेत समेट्नेछ ।
बीमा सुविधाअन्तर्गत कुनै विद्यार्थी दुर्घटनामा परेमा उपचार खर्चबापत अभिभावकले वार्षिक अधिकतम रु. १ लाखसम्म दाबी गर्न सक्नेछन् । यस्तै विद्यालय आउजाउ गर्ने क्रममा, घरमा खेल्ने वा अन्य गतिविधिका बेला हुने दुर्घटनामा प्रति घटनामा अधिकतम रु. २५ हजारसम्म राहत प्राप्त गर्न सकिने व्यवस्था गरिएको छ ।
स्वास्थ्य बीमा कार्यक्रमअन्तर्गत विद्यार्थी सामान्य बिरामी भएको अवस्थामा चिकित्सकीय परामर्श, ओपीडी टिकट तथा औषधोपचार खर्चबापत वार्षिक अधिकतम रु. ३ हजार ५०० सम्मको सुविधा उपलब्ध हुनेछ ।
विद्यालयका प्रधानाध्यापक सरोज प्रसाद चौधरीले यस योजनाले अभिभावकको आर्थिक भार कम गर्नुका साथै विद्यार्थीलाई थप सुरक्षित र निश्चिन्त वातावरणमा अध्ययन गर्ने अवसर प्रदान गर्ने विश्वास व्यक्त गरे । उनले विद्यार्थी कल्याण र गुणस्तरीय शिक्षाप्रतिको विद्यालयको प्रतिबद्धताको रूपमा यस कार्यक्रमलाई अगाडि बढाइएको बताए ।
विद्यालय प्रशासनले आगामी दिनमा पनि विद्यार्थीमैत्री तथा कल्याणकारी कार्यक्रमहरू विस्तार गर्दै शिक्षासँगै सुरक्षालाई प्राथमिकतामा राख्ने नीति अवलम्बन गर्ने जनाएको छ ।
