वीरगंज । नेशनल मेडिकल कलेज प्रा.लि., वीरगंज र कृषि अनुसन्धान निर्देशनालय, मधेश प्रदेश, परवानीपुरबीच स्वास्थ्य सेवा सहकार्य सम्बन्धी सम्झौता सम्पन्न भएको छ । सम्झौताले निर्देशनालयमा कार्यरत कर्मचारी, कामदार तथा उनीहरूका परिवारजनलाई गुणस्तरीय र सहज स्वास्थ्य सेवा उपलब्ध गराउने अपेक्षा गरिएको छ ।
सम्झौतापत्रमा नेशनल मेडिकल कलेजका प्रबन्ध निर्देशक शाहनवाज अन्सारी तथा कृषि अनुसन्धान निर्देशनालय, मधेश प्रदेशका निर्देशक एवं वरिष्ठ वैज्ञानिक डा. विश्वेश्वर प्रसाद यादवले हस्ताक्षर गर्नुभएको थियो ।
सम्झौताको मुख्य उद्देश्य कृषि अनुसन्धान निर्देशनालयमा कार्यरत सामाजिक सुरक्षा कोषमा आबद्ध कर्मचारी तथा कामदारलाई प्राथमिकताका आधारमा स्वास्थ्य सेवा उपलब्ध गराउनु रहेको छ । सम्झौताअनुसार सामाजिक सुरक्षा कोषमा आबद्ध कर्मचारीहरूले नेशनल मेडिकल कलेजमा उपचार गराउँदा कोषअन्तर्गत उपलब्ध सम्पूर्ण स्वास्थ्य सेवाहरू प्राथमिकताका साथ प्राप्त गर्नेछन् ।
यस्तै, उपचारका लागि आउने लाभार्थीलाई अस्पतालमा विशेष सामाजिक सुरक्षा कोष काउन्टरमार्फत सेवा प्रदान गरिनेछ । सामाजिक सुरक्षा कोषबाट व्यहोर्न बाँकी रहने सहभुक्तानी रकम निर्धारित अवधिभित्र भुक्तानी गर्न सकिने व्यवस्था समेत गरिएको छ ।
सम्झौताअनुसार सामाजिक सुरक्षा कोषमा आबद्ध नभएका कृषि अनुसन्धान निर्देशनालयका कर्मचारी तथा परिवारजनले नेशनल मेडिकल कलेजमा उपचार गराउँदा प्रयोग्य सामग्रीबाहेकका उपचार सेवामा २० प्रतिशत विशेष छुट प्राप्त गर्नेछन् । साथै अस्पतालको फार्मेसीबाट खरिद गरिने औषधिमा ५ प्रतिशत छुटको व्यवस्था गरिएको छ ।
दुवै संस्थाबीच भएको सहमतिअनुसार वार्षिक स्वास्थ्य परीक्षण, पूर्व–रोजगारी स्वास्थ्य परीक्षण, आवश्यकताअनुसार संस्थामै स्वास्थ्य सेवा उपलब्ध गराउने तथा प्रत्येक त्रैमासिकमा निःशुल्क स्वास्थ्य शिविर सञ्चालन गर्ने कार्यक्रम पनि अघि बढाइनेछ ।
त्यसैगरी, कृषि अनुसन्धान निर्देशनालयले आयोजना गर्ने विभिन्न कार्यक्रमहरूमा नेशनल मेडिकल कलेजलाई मेडिकल पार्टनरका रूपमा सहभागी गराइने तथा आवश्यकताअनुसार संयुक्त कार्यक्रम र अन्य सहकार्य गतिविधि सञ्चालन गर्न सकिने व्यवस्था पनि सम्झौतामा समेटिएको छ ।
सम्झौताले कृषि अनुसन्धान निर्देशनालयका कर्मचारी, कामदार तथा परिवारजनको स्वास्थ्य सेवामा पहुँच विस्तार हुनुका साथै गुणस्तरीय उपचार सेवा प्राप्त गर्न थप सहजता हुने विश्वास लिइएको छ ।
सम्झौता कार्यक्रममा नेशनल मेडिकल कलेजका प्रमुख सूचना अधिकृत ई. प्रदीपकुमार चौधरी लगायत दुवै संस्थाका पदाधिकारीहरूको उपस्थिति रहेको थियो ।
