Date
शुक्र, मंसिर ४, २०८३
Fri, November 20, 2026
Home Blog Page 823

प्रहरीकाे भिडियाे खिचेकाे भन्दै मेडिकल कर्मचारीलाई डिएसपीकाे लात्ती

0

वीरगंज । जिल्ला प्रहरी कार्यालय पर्साका प्रहरी नायब उपरिक्षक (डिएसपी) प्रह्लाद कार्कीले मेडिकलका कर्मचारीलाई कुटेका छन् ।

वीरगंज–८, पानीटंकीस्थित प्याथो सर्जिकल हाउसका कर्मचारी अप्रोज महमदलाई डीएसपीले कुटेका हुन् । डिएसपी कार्कीले ‘प्रहरीको भिडियो किन खिचेको ?’ भन्दै बुधवार अहमदलाई कुटेका हुन् ।

भिडियो फुटेजमा प्रहरी कार्कीले लाती र लौराले उनलाई कुटेको देखिन्छ ।

मोवाईलबाट भिडियो खिचेको आरोपमा अप्रोजलाई कार्कीले अमानवीय तरिकाले कुटेको स्वास्थ्यकर्मी करण पटेलले बताए ।‘कुटेपछि उहाँले मोवाईल पनि लिएर जानुभएको छ’ पटेलले भने– ‘मोवाइल फिर्ता दिइएको छैन् ।’

मेडिकलका कर्मचारीले प्रहरीमाथि हातपात भएको भिडियो बनाएको एसपी बेलबहादुर पाण्डेले बताए ।

‘हाम्रो प्रहरीमाथि हातपात भएको भिडियो बनाएको हुनाले कुटपिट गरिएको हो’ एसपी पाण्डेले भने–‘अलि दिन अघिको घटना हो, हाम्रो प्रहरीमाथि हातपात भएको भिडियो उनले बनाएका थिए ।’

डिएसपी कार्कीले कुटपिट गरेको कुरा पाण्डेले स्वीकारे । भने– ‘त्यसबेला प्रहरीलाई हातपात गर्ने चारजना थुनामा छन् ।’ एसपी पाण्डेले पुरानो घटना भने पनि पीडित पक्षले बुधवार बिहान १० बजेको घटना भएको बताएका छन् ।

स्वास्थ्यकर्मी तथा प्याथो सर्जिकल हाउसका सञ्चालक करण पटेलले सो घटना बुधबार बिहानको भएको दाबी गरे । उनले भने– ‘आज बिहान १० बजेको घटना हो, पुरानो घटनासँग कुनै सम्बन्ध छैन् ।’

रोट-याक्ट क्लबद्वारा सुरक्षाकर्मीलाई खाजा वितरण

0

वीरगंज । रोट-याक्ट क्लब अफ वीरगंज मेट्रोपोलीसले अग्रपंक्तिमा खटिएका सुरक्षाकर्मीलाई खाजा र पानी वितरण गरेको छ ।

कोरोना भाइरसको महामारीमा जनताको सुरक्षाका लागि अग्रपंक्तिमा खटिने सुरक्षाकर्मीहरुलाई सम्मानस्वरुप खाजा र पानी वितरण गरिएको क्लबले जनाएको छ ।

वीरगञ्जको घण्टाघर, बसपार्क, माइस्थान, गण्डक, पावरहाउस, रामगढवा लगायतका क्षेत्रमा गएर खाजा र पानी वितरण गरिएको क्लबका सह सचिब दिपु वर्णवालले बताए ।

यसअघि निषेधाज्ञाका कारण प्रभावितहरुलाई राहतसमेत वितरण गरीरहेको क्लबले सुरक्षाकर्मीहरुलाई पनि खाजा र पानी वितरण थालेको जोन १३ का जेटआरआर प्रकाश कर्णले बताए ।

उक्त काममा क्लबका कम्युनिटी सर्भिस डाइरेक्टर निश्चल प्रजापती, क्लबका सदस्य रोहित गुप्ता लगायतले सहयोग गरिरहेका छन् ।

पर्सामा जेठ २० सम्म थपियाे निषेधाज्ञा, खाद्य बस्तुका पसलहरु विहान ८ बजे सम्म मात्र खुल्ने

0

वीरगंज । पर्सामा जारी निषेधाज्ञा फेरी एक सत्ता थप  भएकाे छ ।  जिल्ला कोभिड व्यवस्थापन समिति पर्साको बुधबार बसेकाे बैठककाे निर्णय अनुसार जेठ १३ गते राती १२ बजे सम्म जारी निषेधाज्ञा जेठ २० गते राती १२ बजे सम्मकाे लागि थप गरिएकाे हाे ।

विश्वब्यापी महामारीको रुप लिईरहेको नयाँ भेरियन्ट सहितको कोभिड-१९ संक्रमणको प्रभावकारी नियन्त्रण र रोकथामका लागि जारी गरिएको निषेधाज्ञालाई निरन्तरता दिने बैठककाे निर्णय समेतका आधारमा कोभिड-१९ संकट व्यवस्थापन अध्यादेशको दफा, ४ र स्थानीय प्रशासन ऐन, २०२८ को दफा ६(३) ले दिएको अधिकार प्रयोग गरी पर्साका प्रमुख जिल्ला अधिकारी पिताम्बर घिमिरेले जिल्ला भरी निषेधाज्ञाकाे अवधि थप गरिएकाे जनाएका छन् । 

कोही कसैले जारी निषेधाज्ञाकाे आदेशकाे बर्खिलाप हुने गरी काम कारवाही गरेको पाईएमा प्रचलित कानून बमोजिम कारवाही हुने समेत जानकारी गराईएकाे छ ।

थप गरिएकाे निषेधाज्ञा अवधिमा औषधी उपचार एवं आदेशमा उल्लेख भए बमोजिमका अत्यावश्यक कामका लागि बाहेक घरबाट बाहिर निस्कन र हिँडडुल गर्न पाईने छैन ।

विवाह, ब्रतबन्ध/नामाकरण संस्कार जस्ता कार्यको हकमा बढीमा १० जना सम्मको उपस्थितिमा आफ्नै घर वा आफु बसेको स्थानमा स्वास्थ्य सुरक्षाको मापदण्डको परिपालना गरी गर्न सकिने छ ।

यस्तै खाद्य वस्तु, औषधि र स्वास्थ्य सेवासँग सम्बन्धित पसल र ब्यवसाय बाहेक अन्य सबै पसल, ब्यवसाय हाललाई सञ्चालन गर्न पाइने छैन । दैनिक खाद्य वस्तुका पसलहरु विहान ८:०० बजेसम्म मात्र जनस्वास्थ्य सुरक्षाका मापदण्डको पालन गरी/गराई खोल्न पाईने छ । तर सो समयको अतिरिक्त  तरकारी, फलफूल, पानी, दुघ तथा दुधजन्य पदार्थ लगायतका खाद्यवस्तुको व्यापारसँग सम्बन्धित व्यवसायीले होम डेलिभरी गर्न कुनै बाधा नपर्ने प्रमुख जिल्ला अधिकारीबाट जारी आदेशमा जनाइएकाे छ ।

यस्तै महत्वपूर्ण  विकास निर्माणका आयोजनासँग सम्बन्धित कर्मचारी/जनशक्तिले जिल्ला प्रशासन कार्यालयबाट अनुमति प्राप्त सवारी साधन मात्र प्रयोगमा ल्याउन सकिने छ ।

अत्यावश्यक सेवा र क्षेत्रसँग सम्बन्धित (बैंक तथा वित्तीय संस्था समेतका) कर्मचारी एवं सञ्चारकर्मीहरुले आफ्नो परिचय खुल्ने कागजात साथमा राखी आवत जावत गर्नु पर्ने छ ।

बैंक तथा वित्तीय संस्थाहरुले ATM लगायतका विद्युत्तीय कारोबारमा जोड दिने । कार्यालयमा कूल कर्मचारीको एक चौथाई कर्मचारी मात्र उपस्थित भई अति जरुरी सेवा प्रदान गर्न आदेश गरिएकाे छ ।

वीरगंजका नाका बाहेकका भारतबाट जिल्ला प्रवेश गर्ने अन्य नाकाबाट सीमा वारपार आवागमनमा पूर्ण रुपमा रोक लगाइएको छ ।

पाेखरियामा डिवाईसिद्वारा गर्भवती र सुत्केरी महिलालाई लिटो वितरण

0

वीरगंज । पोखरीया नगरपालीकाकाे वडा न. ७, ८ र १० मा रहेका सुत्केरी, गर्भावती महिला तथा ५ वर्ष मुनीका बालबालिकाहरुको लागि सर्वोत्तम आहार लिटो वितरण गरिएको छ ।

यूकेएड, सेफ द चिल्ड्रन, एकशनएड नेपाल तथा दिव्य यूवा क्लव (डिवाईसि) पर्साको संयूक्त साझेदारीमा पाेखरिया नगरपालिकामा संचालित कोभिड १९ का सहायक प्रभाव उत्थानशील प्रतिकार्य परियोजना अन्तर्गत लिटाे वितरण गरिएकाे हाे । 

कोभिड १९ को सुरक्षाको मध्यनजर गर्दै पोखरीया नगरपालीकाकाे वडा न. ७, ८ र १० का ६२ जना गर्भवती, ८८ जना सुत्केरी महिला र ४ सय जना ५ वर्ष मुनीका बालबालिकाहरुलाई लिटो वितरण गरिएको डिवाईसिका कार्यकारी निर्देशक रामाकान्त पटेलले वताए ।

गर्भवती तथा सुत्केरी महिलाहरुलाई १८ केजीका दरले र बालबालिकाहरुलाई ९ केजीको दरले लिटो वितरण गरिएको उनले जानकारी दिए ।

उनले भने “विश्वलाई नै आक्रान्त पारिरहेको कोरोना भाईरसको महामारिबाट कोहि पनि अछुतो नरहेको बेलामा दैनिक ज्याला तथा मजदुरी गरि जिवीकोपार्जन गर्ने वर्गहरुलाई त झन निकै कठिन अवस्थाको सामना गरिरहनुपरेको छ ।”

आफ्नो दैनिक छाक टार्न नै धौ धौ परिरहेको समयमा पौष्टिक आहार छुटाउन सक्ने त अवस्था नै भएन । यसरी समस्यामा परेका अति विपन्न घरपरिवारका सदस्यहरुको लागि पाेखरिया नगरपालिकामा संचालित कोभिड १९ का सहायक प्रभाव उत्थानशील प्रतिकार्य परियोजना अन्तर्गत लिटाे वितरण गरिएकाे निर्देशक पटेलले वताए ।

उनका अनुसार वितरण गरिएकाे सर्वोत्तम लिटो भटमास, गहुँ, चिनी, भिटामिन, खनिज पदार्थ, पोटासियम क्लोराईड लगायतका पोषण तत्वहरु मिलेर बनेको पोषणयुक्त पिठो हो । यसको सेवनले बालबालिकाहरु तथा गर्भवती तथा सुत्केरी महिलाहरुलाई चाहिने आवश्यक पोषण तत्व प्राप्त हुने भएकाेले वितरण गरिएकाे हाे ।

लिटो वितरण पोखरीया नगरपालीकाको सहकार्यमा गरिएकाे डिवाईसिले जनाएकाे छ ।

केपी ओली एकपटक तिमीले चलाएको देश र मेरो बुबाले चलाएको स्कुल हेर:आदर्श मिश्रा

0

चर्चित युवा  स्ट्यान्ड अफ कमेडियन आदर्श मिश्राका पिता विनोद मिश्राको मंगलबार बिहान निधन भएको छ ।

आदर्शले पिताको मृत्युबारे आफ्नो आधिकारिक युट्युब च्यानलमा एक भिडियो सार्वजनिक गर्दै आफ्नो पिताको मृत्युका लागि नेशनल मेडिकल कलेज र नारायणी सरकारी अस्पताल जिम्मेवार भएको बताएका छन् ।

उनले भनेका छन्–‘मलाई मानिसहरु विनोद मिश्राकै छोरा भनेर चिन्छन् । मेरो बुबाले चलाएको स्कुल अहिले विजोग छ । उहाँले मृगौला फेल भएपनि सफलताका साथ स्कुल चलाउनुभएको थियो । केपी ओली एकपटक तिमीले चलाएको देश र मेरो बुबाले चलाएको स्कुल हेर । तिमी त भेडाहरुलाई पछाडि हुल लगाएर हिडेका छौं । भारतको विरोध गरेर चुनाव जित्यौं । तिमी राम्रो नेता होइन केपी ओली ।’

आदर्श मिश्राका भनाई उनकै शब्दमा यहाँ प्रस्तुत गरिएको छ ।

“बाबा हुनुहुन्नँ अब । मेरो बाबाको अवस्था यस्तो हुनुको पूरै जिम्मेवार म नेशनल मेडिकल कलेज र नारायणी सरकारी अस्पताललाई मान्छु किनभने बाबालाई दुई हप्ता अघि डायलाइसिसमा लैजाँदा एसपीओटु नाइन्टी छ भनेर तपाईंको डायलाइसिस यहाँ हुँदैन भनेर हामीलाई एनएमसीबाट निकालिदिएको हो । चार वर्ष मेरो बाबाले एनएमसीबाट डायलाइसिस गराउनुभएको हो । पर डायलाइसिस ३५ सय उनीहरुले सरकारबाट उठाएको हो । कमाउने बेला तिमीहरुले कमाउने, बिरामीलाई गाह्रो भएको बेला चाहिँ धपाइदिने । त्यहाँ मेसिनहरु, डायलुजरहरु केही पनि राम्रो छैन । एनमएसीको कन्ट्र्याक्ट, डायलाइसिस मेसिनको समग्र कुराहरुको कन्ट्र्याक्ट लिएको छ नेफ्रो प्लसले जुन भारतीय कम्पनी हो । अनि भारतको एउटा नागरिकले जो नेपालमा कार्यरत छ, उसले निर्णय गर्न पाउँदैन के, डायलाइसिस कसको हुन्छ र कसको हुँदैन । को बाँच्छ र को बाँच्दैन त्यो एउटा भारतको नेपालमा कार्यरत मान्छेले गर्न पाउँदैन । भारतको मान्छे आएर यहाँ तलब खाने हो । नेपालको बिरामीलाई हप्काउने होइन । हाम्रो जीवन त्यसको हातमा छैन । नेफ्रो लाइफबाट उनीहरुले कमिसन खाएर एउटा डायलाइसिसमा, एउटा डायलुजरले १२ वटासम्म डायलाइसिस गरेको छ, मेरो बाबाको । ८–९ वटा त कम्तीमा छ । मसँग सबै सूची छ । गत वर्ष नारायणीमा कोभिड वार्ड बनाउँदा नारायणीको डायलाइसिस बिरामीहरुलाई एनएमसी सिफ्ट गरेको थियो । एक महिनाभित्र पाँचजना बिरामीको मृत्यु भएको थियो । डायलुजर मेसिन नफेरेर ।

नेफ्रो प्लसले पैसा बचाउन असाध्यै धाँधली गरिरहेको छ, त्यहाँ । एनएमसी अस्पताललाई गत साता केन्द्रबाट आदेश आएको थियो । तपाईंको २० प्रतिशत बेड कोभिडका बिरामीलाई छुट्याइदिनु भनेर । अनि एनएमसीले म केन्द्रको आदेश मान्दिनँ भन्यो किनभने एनएमसीका संस्थापक बसुरुद्दीन अंसारी हो । र बसुरुद्दीन अंसारी निकै नै शक्तिशाली मान्छे हो । उहाँको गुन्डागिरी अति नै धेरै चल्छ । उहाँलाई केरकार गर्ने कोही पनि छैन । उनी यत्ति शक्तिशाली मान्छे हुन् कि गत वर्ष केपी ओलीको ट्रान्सप्लान्टमा जति पनि खर्च भएको हो, बसुरुद्दीन अंसारीले नीजि रुपमा आफैंले त्यो खर्च व्यवहोरेका हुन् । प्रेस विज्ञप्ति निकालेर यो कुरा घोषणा नै गरिएको हो ।

कलेजमा विद्यार्थीहरुले शुल्क बढायो, केही सुविधा छैन भनेर आन्दोलन गर्दा गुन्डा बोलाएर विद्यार्थीहरुलाई कुट्न लगायो । त्यतिसम्मको घटिया अस्पताल हो, नेशनल मेडिकल कलेज विरगञ्ज ।

एनएमसीको गुन्डागर्दीले गर्दा मेरो बाबा आज हुनुहुन्नँ । यसको सुनुवाई गर्ने कोही पनि छैन । कोही पनि माथि छैन । अनि छानबिन हुन्छ ? हुँदैन के । मलाई थाहा छ के । कोही पनि छैन काठमाडौंबाट आएर अनुसन्धान गर्ने कि एउटा मेडिकल कलेज चलाउनका लागि तँ योग्य छ कि छैनस् । पैसा मात्रै भएर हुन्छ यार ? पैसा मात्रै भएर हुने भए त पैसैको त त्यति कमी थिएन नि मलाई ।

नरायणी अस्पतालले यस्तो बेलामा ‘राइभलरी कार्ड’ खेलिरहेको छ । नारायणी अस्पतालले के गरिरहेको छ भने, यदि एनएमसीले आफ्नो बिरामीको डायलाइसिस आफैं गर्दैन भने, हामी किन गर्ने, एनएमसीको बिरामीलाई । किनभने तपाईंका मेडिकल सुपरिटेन्डेन्ट (मेसु) ले गएर मिडियामा स्वीकार्नु भएको छ कि प्रदेश नम्बर दुईको जति पनि कोभिड संक्रमितको म गर्छु नारायणी अस्पतालमा भनेर । एउटा मेसिन बिग्रिँदा त्यहाँ काम गर्ने नर्स दिदीले फोन गरेर भाइ दुबै मेसिन बिग्रियो भनेर अफवाह फैलाउनेलाई कारवाही हुने कि नहुने ? भाइ सूचना नै निकालिसक्यो । सूचना आएकै छैन । दुबै मेसिन बिग्रियो भाइ ।

डाक्टरले युरिया २६० छ, दिमागमा युरिया पुगिसक्यो उहाँको बुवाको, प्लिज चार घण्टा डायलाइसिस गरिदिनुहोस् भन्दा डाक्टरको अगाडि चार घण्टा नम्बर सेट गर्ने र डाक्टर गइसकेपछि त्यसलाई तीन घण्टा बनाइदिने त्यसलाई । एक घण्टा घटाइदिएर तपाईंले आयु पनि घटाइदिनु भएको हो के दिदी तपाईंले । हजुरलाई छिटो घर पुग्नु थियो होला तर कोही मान्छे घर पुगेनन् क्या । तपाईंको एक घण्टाको हतारले गर्दा कोही मान्छे घर नै पुगेनन्, यसका लागि धेरै धेरै धन्यवाद ।

मान्छेहरुले भनिरहेका छन् अहिले कि आदर्शको बाबा धेरै नै गौरवान्वित महसुस गर्नुहुन्छ भनेर तर म एक छोराको रुपमा पूर्ण रुपमा असफल भएँ । मैले गर्नु पर्ने कुराहरु गर्न सकिनँ । बचाउन सकिन्थ्यो होला, मैले टन्नै गलत निर्णयहरु लिएँ होला । काठमाडौं लिएर जानुपर्ने थियो होला । भरतपुर अस्पतालमा रातभरी डाक्टरलाई ‘सर, १०५ ज्वरो छ सर, बाबालाई होस् छैन सर’ ‘एसपीओटु ठिक छ भाइ, भाइटल्स ठिक छ भाइ’ ‘आइसीयूमा राखिदिनु न सर, आइसीयूमा राखिदिनु न सर’ भन्दाभन्दै बिहानको १० बजे बाबा बित्नुभयो ।

एसपीओटु मात्रै ठिक भएर यदि कोभिडको उपचार हुने भए त अक्सिमिटर लिएर म पनि डाक्टर हुन्थेँ नि सर । किन स्ट्यान्ड अप गरिरहेको हुन्थेँ ?

मान्छेहरुले अहिले के भनिरहेका छन् भने आदर्शको बुवा जहाँ पनि हुनुहन्छ, खुसी हुनुहुन्छ किनभने उहाँ उहाँको छोराको नामले चिनिनुभएको छ । ‘बिनोद मिश्रा, फादर अफ आदर्श मिश्रा ।’ त्यस्तो केही पनि होइन, तपाईंहरुले मेरो बाबा नचिन्नुभएको हो । मेरो बाबा मभन्दा पनि चर्चित हो । म टिभीमा आइसकेँ तर यो ठाउँमा मलाई भन्दा मेरो बाबालाई धेरैले चिन्छन् । अहिले पनि विनोद मिश्राको छोरा भनेर चारैतिर मेरो नाम चल्छ । कुनै पनि पसलमा यो औषधी विनोद सरको घरमा लानुपर्छ भन्यो भने अहिलेसम्म पैसा तिर्नुपरेको छैन । त्यतिसम्मको विश्वासयोग्य, इमानदार व्यक्ति हो उहाँ । पैसाको कुरामा, व्यवस्थापनको कुरामा जे पनि नै कुरामा उहाँ उत्कृष्ट हुनुहुन्थ्यो ।

उहाँ नगोल स्कूलको प्रधानाध्यापक हुनुहुन्थ्यो । यहाँको सबैलाई सोध्नुहोस् कि उहाँ अघिको नगोल स्कूल कस्तो थियो र अहिलेको नगोल स्कूलको भवन, शौचालय कस्तो छ भनेर । केही पनि सुविधा थिएन के । मृगौला फेल भएर त्यतिसम्मको काम गर्न सक्ने मान्छे हो के । केपी ओलीले त छोडिदिए हुन्छ कि कुर्सी । मेरो बाउ गाको हो कि हप्ताको दुई दिन डायलाइसिस । स्कुटरको पछाडि गएर तरपनि मेरो बाउले चलाएको स्कूल हेर र तिमीले चलाएको देश हेर एकचोटी । अनि लाज लाग्दैन भने मलाई भन । काम गर्न दिएनौ भन्छौ, काम गर्न कहाँ मन छ तिमीलाई ? ‘त्यो पर्दैन’ भन्दै बस्ने काम हो तिम्रो । भेडाहरु पछाडि जम्मा गरेको छौ, त्यहि हुल बोकेर जतिबेला पनि भारत विरुद्धमा बोलेर, एक हूल नेपालीहरु पछि लागिहाल्छन्, त्यो सेन्टिमेन्टमा तिमीले चुनाव जित्यौ । मधेसी नेताभन्दा म राम्रो छु भनेर मात्रै प्रमाणित गरेको हो के तिमीले तर तिमी यत्ति पनि राम्रो नेता भने होइनौ ।

त्यसपछि बिहान १० बजे मलाई डाक्टरले बोलाउनुभयो । अनि भन्नुभयो, ‘आदर्श, हामीले जे जे गर्न सक्थ्यौं गर्‍यौं, बाबा अब हुनुहुन्नँ । ’ त्यसपछि मैले तीनवटा शब्द मात्रै भनेँ – ‘ठिक छ, ठिक छ, ठिक छ ।’ त्यसपछि चुप लागेर गएर बसेँ । तीन घण्टासम्म अस्पतालमा मलाई मात्रै थाहा थियो कि बाबा बितिसक्नु भयो भनेर । दिदीलाई थाहा छैन, ममीलाई थाहा छैन । अब झुट बोल्ने क्रम चालू भयो । बानी थियो पहिले नै झुटो थियो । मैले लास्टै ढाँटेको छु घरमा । यसपाली ढाँट्न निकै जरुरी थियो । यसपटक ढाँट्दा समातियो भने चाहिँ धेरै गाह्रो हुन्थ्यो ।

मेरी मम्मीले पहिला नै भित्तामा हात, टाउको हान्नेँ गरिसक्नुभएको थियो । मेरो ममीको डिप्रेसनको अहिलेसम्म पनि औषधी चल्छ । त्यसपछि मैले ममीलाई अब बाबाको रिडिङ स्टेबल आएको छ, मुटुको धड्कन देखाइरहेको छ, अब बिस्तारै ठिक हुनुहुन्छ भन्दै भन्दै ढाँट्दै ढाँट्दै गएँ । अन्तिममा सन्देश, राकेश भन्ने दुईजना साथीहरुले आएर समात्न थाले मलाई । तिनिहरु नभएको भए मैले के गर्थेँ मलाई थाहा छैन । बाबालाई त्यसपछि जीतपुर लिएर आउनुपर्ने भयो । त्यसपछि ममीलाई के भन्ने ? त्यहाँबाट लिएर गएपछि बितिसक्नु भयो भन्ने थाहा पाउनुहुन्छ भनेर त्यसपछि ‘ममी यहाँ भेन्टिलेटर खाली छैन, नारायणी अस्पतालमा भेन्टिलेटरको व्यवस्था भएको छ, हामी त्यहाँ जान्छौं, बाबाको उपचार त्यहाँ हुन्छ’ भन्यौं । बाबाको ‘बडी’ प्याक गरिसकिएको थियो । एम्बुलेन्समा हालिसकेको थियो ।

आफ्नो बुढा गुमाएकी एक महिला मेरी आमालाई ‘तेरो बुढाको नारायणी अस्पतालमा उपचार हुन्छ’ भनेर सिधै श्मशान घाटमा लिएर गएँ । कति पाप छ मेरो टाउकोमा ।

मलाई जीवनमा खासै रिग्रेट छैन । तर केही कुराहरुको एकदमै अफसोस छ ।

पहिलो कुराः मेरो बाबाले बित्नुभन्दा दुई दिन अघि मलाई चिन्नुभएन । ‘आदर्श छोरा, बेटा’ नभनेर को हो यो ?’ भन्नुभयो । अन्तिम याद नै मेरो त्यहि हो । जति ‘पापा, पापा, पापा’ भनेर बोलाए पनि एकचोटी पनि बोल्नु हुन्थेन ।

दोस्रो कुराः नेपालको ठूलो स्ट्यान्डअप कमेडियन मान्दो रैछन मान्छेहरुले मलाई । राम्रै कमेडी गर्छ भन्छन् । तर एउटा पनि शो लाइभ बाबालाई देखाउन सकिएन । लास्टै ठूलो सपना थियो । प्रज्ञा प्रतिष्ठानमा एउटा शो गरेर बाबालाई फ्रन्ट रोमा राखेर एक घण्टा बाबाबारे पर्फम गर्ने । जीवनको यो सबैभन्दा ठूलो असफलता हो ।

एनएमसी, नारायणी मिलेर खाइदिए एउटा मान्छेको जीवन । अब कति जनाको खान्छन् मलाई थाहा छैन । तर लड्ने प्रयास जारी राखौं, जति जीवन बचाउन सकिन्छ, बचाऔँ । मबाट जति हुन्छ, त्यो गर्न तयार छु, मलाई १०–१२ दिनको समय चाहिन्छ होला । काजक्रियाको काम सकाएर, तपाईंहरुको हेल्प पोस्टहरु हेरेर, अक्सिजनको आवश्यकताहरु सबै पूरा गर्ने प्रयास गर्नेछु ।”

संकटको घडीमा बढी शुल्क लिने अस्पताललाई कारवाही गरिने नगर प्रमुख सरावगीको चेतावनी

0
????????????????????????????????????

वीरगन्ज । वीरगन्ज महानगर पालिकाले कोरोना महामारीको संकटमा मनोमानी ढंगले शुल्क नलिन सचेत गराएको छ । महानगरपालिकाका नगर प्रमुख विजय कुमार सरावगीले मंगलबार विज्ञप्ति जारी गर्दै वीरगंजमा रहेका केही निजी अस्पतालले कोरोना संक्रमितको उपचार वापत लिने शुल्कको विषयलाई लिएर विभिन्न संचार माध्यम र समाजिक सञ्जालहरुमा उठाइएको विषय प्रति वीरगंज महानगरपालिकाको गम्भिर ध्यानाकर्षण भएको जनाएको छ ।

समुदायस्तरमा फैलिएको कोभिड संक्रमणका कारण जनजीवन नै संकटमा पुगेको अवस्थामा कोरोना संक्रमितहरुको उपचारका लागि निजी अस्पतालले लिने शुल्कका वारेमा नेपाल सरकारले तोकेको शुल्क भन्दा बढी रकम विरामीसँग असुल गरेको पाइएमा कानुन वमोजिम कार्वाही हुने हुदाँ संकटको घडिमा अप्ठारोमा परेको नागरिकसँग मनोमानी रुपमा रकम नलिन वीरगंज महानगरपालिका निजी अस्पताल संचालकलाई सचेततापूर्वक अग्रह गरेको छ ।

कोभिड नियन्त्रणका लागि एकीकृत रुपमा संघीय सरकारले नै कानुन निर्माण गरी जिल्ला तहमा जिल्ला कोभिड(१९ संकट व्यवस्थापन केन्द्र (म्ऋऋःऋ) मार्फत निर्णय गरिने व्यवस्था अनुसार नै अस्पतालमा विरामीको उपचार र त्यसको व्यवस्थापनका सन्दर्भमा समेत सहायक प्रमुख जिल्ला अधिकारीको संयोजकत्वमा अनुगमन समिति गठन गरिएकोे र हालै विभिन्न संचारमाध्यम र सामाजिक सञ्जालहरुमा उठाइएका विषयमा अनुगमन गरि कानुन विपरित शुल्क उठाईएको पाइएमा त्यस्ता अस्पताललाई कार्वाहीको दायरामा ल्याईने पनि महानगर प्रमुख सरावगीले जानकारी दिनुभयो । कोरोना भाइरसका कारण समुदाय नै अप्ठारोमा परेको स्थितिमा मानवीय सेवाको उच्च भावनाले काम गर्न र संक्रमित विरामीको उपचारमा संवेदनशील भइदिन वीरगंजमा संचालित सम्र्पूण अस्पताल संचालकहरुसँग वीरगंज महानगरपालिकाले अपिल गरेको छ ।

अहिले एकले, अर्कोलाई सहयोगको हात अगाडी बढाउनु पर्ने अवस्था रहेको र वीरगंजमा विभिन्न सामाजिक संघ संस्था र व्यक्तिहरुले समेत कोभिड संक्रमणबाट संक्रमितहरु र अप्ठारोमा परेका परिवारहरुलाई सहयोग गर्न हातेमालो गरि रहेको अवस्थालाई समेत मध्यनगर गर्दै अस्पतालबाट गरिने सेवामा पनि यस्तै भावना प्रकट हुने विश्वास वीरगंज महानगरपालिकाले लिएको महानगर प्रमुख सरावगीले बताउनु भएको छ ।

जनताको नजिकको सरकारका रुपमा रहेको स्थानीय सरकार (वीरगंज महानगरपालिका)ले नागरिक स्तरबाट उठाईएका सकरात्मक र रचनात्मक सुझावलाई सदैव आत्मसाथ गर्नेमा विश्वस्त रहन पनि आग्रह गर्नुभएको छ ।

 

हिन्दु स्वंयसेवक संघद्धारा मानवीय उद्धार कार्यमा थप सेवा

0

वीरगंज। हिन्दु स्वंयसेवक संघ नेपाल पर्साले मानवीय उद्धार कार्यमा थप सेवा कार्यलाई विस्तार गरेको छ । कोरोना महामारीबाट प्रभावितहरुलाई राहत तथा उद्धारको कार्य विगत दुई सतादेखि संचालन गर्दै आएको छ ।  तर मंगलबार देखि आफनो मानवीय सेवा कार्यलाई थप विस्तार गर्दै कोरोना संक्रमित भएका विरामीहरुलाई निशुल्क रुपमा औषधी उपलब्ध गराउँन औषधी बैंकको सेवा संचालनमा ल्याएको छ ।

वीरगन्ज १६ बाईपास ( माँ बैष्णो मन्दिर ) नजिक रहेको हिन्दु स्वंयसेवक संघ कार्यालय (केशवधाम भवन) बाट निशुल्क रुपमा कोरोना संक्रमितहरुको लागि औषधी वितरण कार्य शुरु गरेको जनकपुर सम्भागका कार्यवाहले जानकारी गराउनु भयो ।
औषधी बैंकको उदघाट्न वीरगन्ज महानगरपालिकाका नगर प्रमुख विजय कुमार सरावगीले गर्नुभयो । औषधी बैंकको उदघाट्न गर्दै मेयर सरावगीले संघले महामारी जस्तो गम्भिर परिस्थितीमा पनि आफनो स्वास्थ्यको ख्याल नगरी मानवीय सेवालाई थप निरन्तरता दिएको प्रति अभार प्रकट गरे ।

संघले संचालनमा ल्याएको औषधी बैंकमा कोरोना संक्रमित देखिएका विरामीहरुको लागि फुल प्याकेज औषधी निशुल्क उपलब्ध गराउँने छ । कोरोना संक्रमित भएको रिपोर्ट वा चिकित्सकको सल्लाह अनुसारको विरामीलाई २४ औं घण्टा औषधी उपलब्ध गराउँने संघले जनाएको छ । आवश्यक परे घरमै पुगेर विरामीलाई औषधी उपलब्ध गराउँने छौ, जनकपुर सम्भागका कार्यवाहले भने, कुनैपनि व्यक्तिलाई औषधी उपचार र भोजको अभाव हुन दिदैनौ, हामी जति सक्छौ निशुल्क औषधी र भोजनको व्यवस्था मिलाउँछौ ।

संघले यसअघि पनि वीरगन्जको विभिन्न क्षेत्रमा लकडाउँनबाट प्रभावित व्यक्तिलाई राहत तथा निशुल्क भोजनको व्यवस्था मिलाउँदै आएको छ । नेशनल मेडिकल कलेजको कोरोना अस्पताल नगवाका रहेको विरामीहरुको आफन्त कुरुवाहरुलाई दैनिक विहान र बेलुका निशुल्क भोजन तथा आवासको व्यवस्था मिलाएको छ । यदि तपाईको सम्पर्कमा वा कही कतै कोही कोरोना संक्रमित ब्यक्ति वा परिवार छन जसलाई (औषधि, भोजन, वा अन्य कुनै पनि प्रकारको) सेवाको आवश्यकता छ भने कृपया सम्पर्क नम्बर ९८५५०२०८०८, ९८०२९२०८०८ र ९८४८९०२९५६ मा फोन गरी वा गराइदिन हुन हार्दिक अनुरोध गर्दछौ । हाम्रा अहोरात्र खटीएका स्वयंसेवक क्रमश, सुरज अवस्थी, कृष्ण आर्चाय, कृष्णमोहन सहाय, सनी मुखिया, लक्ष्मण चौधरी, नौनित बराल, नरेश सर्राफ, कृष्ण चौरसिया, मोनु कलवार, रुपेश हाँस्दा, सुभाब जी लगायतले त्यसको ब्यवस्थापनमा सहयोग गर्ने छन ।

नारायणीमा चिकित्सकहरुको जिम्मेवारी हेरफेर पछि खैलाबैला

0

वीरगंज । नारायणी अस्पताल वीरगंजमा चिकित्सकहरुकाे जिम्मेवारी हेरफेर भएपछि गुटगत राजनिति हुन थालेकाे छ ।

अस्पतालका मेडिकल सुपरिटेन्डेन्ट (मेसु) डा‍. संजय ठाकुरकाे सरुवा भएपछि निमित मेडिकल सुपरिटेन्डेन्ट(मेसु) काे जिम्मेवारी पाएका डा. बिरेन्द्र प्रधानले चिकित्सकहरुकाे जिम्मेवारी हेरफेर गरेपछि राजनिति हुन थालेकाे हाे ।

दाेस्राे चरणकाे काेराेना महामारीकाे समयमा अस्पतालकाे मेसु डा. ठाकुरले काेराेना नियन्त्रण र राेकथामकाे लागि प्रभावकारी काम गर्न नसकेपछि स्वास्थ्य तथा जनसंख्या मन्त्रालय उनकाे सरुवा गरि निमिति मेसुकाे जिम्मेवारी डा. प्रधानलाई दिएकाे थियाे ।

त्यपछि नयाँ मेसुकाे जिम्मेवारी पाएका डा. प्रधानले अस्पतालकाे व्यवस्थापन सुधार गर्न र काेराेना संक्रमितकाे उपचारलाई व्यस्थित गर्न विभिन्न चिकित्सकहरुकाे जिम्मेवारी हेरफेर गरेका छन् । साेही क्रमममा मेसु डा. प्रधानले काेभिड संयाेजक डा. सराेज राेशन दासकाे जिम्मेवारी डा. उदयनारायण सिंहलाई दिएका छन् । डा. दासलाई काेभिड फाेकल फर्सनकाे जिम्मेवारी दिइएकाे छ । 

मेसु डा. प्रधानले अस्पताललाई व्यवस्थित गर्न चिकित्सकहरुकाे जिम्मेवारी हेरफेर गरेपछि असन्तुष्ट केही अस्पतालका चिकित्सक र कर्मचारीहरुले गुटगत राजनिति गर्न थालेका छन् । अहिले महामारी र संकटकाे समयमा जुन सुकै जिम्मेवारीमा भएपनि काेराेना भाइरस संक्रमण राेकथाम तथा नियन्त्रणमा सहयाेग गर्नु पर्नेमा उनीहरुले सेनियर र जुनियर चिकित्सकाे बहाना बनाउँदै गुटगत राजनिति गर्न थालेका हुन् ।

जबकी काेभिड संयाेजककाे जिम्मेवारी पाएका डा. सिंहसंग ९ बर्षकाे अनुभव छ । उनी नारायणी अस्पतालका ८ औं तहका स्थायी चिकित्सक हुन् । उनी गत बर्षकाे काेराेना महामारीकाे समयमा नारायण अस्पतालकाे काेभिड संयाेजक भएर प्रभावकारी काम गरेका थिए ।

उनी काेराेना राेकथाम तथा नियन्त्रणमा राम्राे भुमिका निर्वाह गरे वापत प्रधान सेनापती र मुख्यमन्त्रीबाट पुरस्कृत भएकाे चितिक्सक हुन् ।  

तर जिम्मेवारी खाेसिएका डा. दास नारायणी अस्पतालका अस्थायी (दुई बर्षे करार) चिकित्सक हुन् । उनीसंग ६ महिनाकाे मात्र अनुभव रहेकाे छ । उनले नारायणी अस्पतालकाे काेभिड संयाेजककाे जिम्मेवारीमा रहेकाे बेला काेराेना राेकथाम तथा नियन्त्रणमा खासै प्रभावकारी काम देखिएकाे थिएन ।

गत बर्ष भन्दा यस बर्ष काेराेना संक्रमितकाे मृत्यु दर पनि बढी देखिएकाे छ भने नारायणी अस्पतालमा उपचाररत काेराेना संक्रमितकाे निकाे हुने दर एकदम न्युन रहेकाे छ ।

नयाँ मेसुकाे जिम्मेवारी डा. प्रधान पाएपछि बिस्तारै सुधार हुँदै गएकाे छ । अस्पतालले गराएकाे जानकारी अनुसार संक्रमितकाे मृत्यु दर कम हुनुकाे साथै निकाे हुनेकाे संख्या बढ्दै गएकाे छ । असन्तुष्ट केही चिकित्स तथा कर्मचारीहरुले गुटगत राजनिति गर्न थालेपछि अस्पतालकाे काेराेना राेकथाम तथा नियन्त्रणकाे प्रभावकारी कार्यन्वयन प्रभावित हुने देखिएकाे छ ।

वीरगंज महानगरपालिकाका मेयर विजय कुमार सरावगीले मेसुले आफ्नाे अनुकुल जिम्मेवारी हेरफेर गर्नुलाई सकरात्मक रुपमा लिनु पर्ने वताउँछन् । जुन सुकै अस्पताल वा कार्यालय प्रमुखले आफु अनकुल जिम्मेवारी हेरफेर गर्न सक्ने उनले वताए ।

मेयर सरावगीले गत बर्षकाे काेराेना कालमा राम्राे र प्रभावकारी भुमिका निर्वाह गरेका डा. सिंहले फेरी काेभिड संयाेजककाे जिम्मेवारी पाउनुलाई सकरात्म रुपमा लिनु पर्ने प्रतिक्रिया दिए ।

नेपाली कांग्रेस पर्साका सचिव श्याम पटेलले चिकित्सकाे जिम्मेवारी हेरफेर समान्य बात भएकाे वताए । उनले जिम्मेवारी जाे काेहीले पाए पनि अहिलेकाे समयमा काम महत्वपूर्ण भएकाे वताए ।

काेभिड एक्सन टिम (क्याट) का सदस्य समेत रहेका सचिव पटेलले काेभिड संयाेजककाे जिम्मेवारी पाएका डा. सिंहले गत बर्षकाे काेराेनाकालमा गरेकाे कामकाे प्रशंसा गर्दै अहिलेकाे भ्यावह अवस्थामा पुुन: जिम्मेवारी पाउन महत्वपूर्ण भएकाे प्रतिक्रिया दिए ।  

यता पछिल्लो पटक काेर्डिनेटर र निमित्त मेसुको कार्यभार सम्भालेका र हाल जिम्मेवारी खाेसिएका डा. इनामुल हक अख्तियारमा मुद्दा खेपि रहेका चिकित्सक हुन् । उनीमाथी अख्तियारमा बिचाराधिन मुद्दाहरु छन ।

उनले चिकित्सकमाथी हातपात गरेका कारण तत्कालीन प्रजिअ आस्मान तामाङले लिखित मफिनामा गराउँदै एक पल्टको लागि माफी समेत गरेका थिए । निज मेसु हुँदा अस्पतालमा हिनामिना गर्ने केहि कर्मचारीहरु पुन: सक्रिय हुँदै अस्पतालमा अनावश्यक राजनीति गर्ने गरेका कारण अस्पतालका कर्मचारी तथा चिकित्सक चिन्ता जनाएका छन् । सो कर्मचारीहरु मध्ये केहीले राजनिती दलको आडमा काम गरेको बुझिन्छ ।

कमेडियन आदर्श मिश्राका पिता विनोद मिश्राको निधन

0

वीरगंज । 

चर्चित युवा  कमेडियन आदर्श मिश्राका पिता विनोद मिश्राको निधन भएको छ । मंगलबार बिहान चितवनको भरतपुर अस्पतालमा उनको निधन भएको हो । उनलाई आदर्शले सोमबार राती नारायणी अस्पतालबाट उपचारका लागि भरतपुर अस्पताल लगेका थिए ।

नारायणी अस्पतालमा ४ घन्टा डायलसिस गराउनुपर्नेमा ३ घन्टा मात्र गराइएको भन्दै आदर्शकले पितालाई राम्रो अस्पतालमा उपचार गराउने भन्दै भरतपुर अस्पताल लगेका थिए ।

चार बर्षदेखि मिर्गौलाका बिरामी रहेका आदर्शका पिता विनोदको डायलिसस हुँदै आएको थियो । बाराको जितपुरबाट आदर्शकले पितालाई हप्ताको दुई पटक मिर्गौलाको डायलसिस गराउन नारायणी अस्पताल लिएर जाने गरेका थिए ।

उनले, हालै मात्र  एक भिडियो सार्वजनिक गर्दै  डायलसिस गराउनुपर्ने मृगौलाका बिरामीको अवस्था निकै नै नाजुक रहेको बताएका थिए । उनले भिडियोमा नारायणी अस्पतालमा डायलसिस गराउँदै आएका बिरामीको २ वटै मेसिन विग्रिएकाले डायलसिस नहुने जानकारी आफूले प्राप्त गरेको बताएका थिए ।

युवा संघद्वारा वीरगंजका ३ सय २६ परिवारलाई राहत वितरण

0

वीरगंज । राष्ट्रिय युवा संघ नेपाल पर्साले वीरगंजका ३ सय २६ परिवारलाई राहत सामाग्री वितरण गरेको छ ।

कोरोना नियन्त्रण गर्न सरकारले जारी गरेको निषेधाज्ञामा प्रभावित बनेका अति गरिब परिवारको लागि राष्ट्रिय युवा संघ नेपाल पर्साले साेमबार दोश्रो दिन पनि राहत समाग्री बितरण गरेको हाे ।

निषेधाज्ञामा दैनिक ज्यालादारी, मजदुरी गर्ने अति बिपन्न र गरिव परिवारका सदस्य कोइ पनि भौकै नसुतोस भन्ने उदेश्यले जिल्लाभरी राहत बितरण कार्यक्रम शुरु गरएिको संघका पर्सा अध्यक्ष महम्मद निजामले बताए ।

उनले दैनिक ज्यालादारी, मजदुरी गर्ने अति बिपन्न र गरिव परिवारको लागि हेल्प डेस्क संनचाल गरेको बताए । हेल्प डेस्कमा सम्पर्क गरेको व्यत्तिलाई युवा संघको टोलिले घरमै राहत पु¥याउने गरेको अध्यक्ष निजामले बताए ।

संघले सुरु गरेको राहत वितरण कार्यक्रममा सहयोगी दाताहरुको हात जुट्न थालेको उनले वताए ।

आइतबारदेखि सुरु भएको हेल्प डेस्कमा सन्तोष साह (नेबिल बैंक ), मनिष सिंह (एनआई क्यामपस ), छिपहरमाइ गाउँपालिकाका मनोज गुप्ता, साबिन बस्नेत, निसन्त लामीछाने, डा. अनुज यादव, डा. कैशल, आलोक चौरसीया, सन्तेस पटेल, रोशन श्रेष्ट, रोशन गुप्ता, मुकेश सिंह, गोविन्द, वडाध्यक्ष राजकिशोर गुप्ता, अजित मिश्रा लगायतका दाताहरु सहयोग गरेकाे अध्यक्ष निजामले बताए ।

हेल्प डेस्कबाट वीरगन्जका विभिन्न ठाउँमा ३ सय २६ जनालाई राहत दिएको हेल्प डेस्कका संयोजक रवि गुप्ताले जानकारी दिए ।

गुप्ताले प्रति परिवारलाई १० के.जी, चामल २ के.जी आलु, २ के.जी, प्याज १ के.जी दाल, नुन १ प्यकेट, तेल १ प्यकेट राहत बितरण गरिएको वताए ।

राहत बितरण कार्यक्रममा राष्ट्रिय युवा संघका केन्द्रिय सदस्य रवि गुप्ता, चन्दन गुप्ता, नेपाल खेलकुद महासंघका केन्द्रिय सदस्य अकलेश साह, संघका सदस्यहरु राकेश साह, हेमन्त तामाङ, प्रकाश रौनियार, दाउद हवारी, दिलिप रौनियार, कुनान पटेल, मुकेश साह र बिकाश साह लगायतको सक्रिय सहभागिता रहेको छ ।