वीरगंज । पर्सा क्षेत्र नं. २ काे वीरगंज महानगरपालिका वडा नम्बर–३ मा नेकपा एमालेकाे चुनावी वडा भेला सोमबार सम्पन्न भएको छ । वडा कमिटीका उपाध्यक्ष प्रकाश नेपालको अध्यक्षतामा सम्पन्न भेलामा सहभागीहरूले फागुन २१ गते हुने निर्वाचनमा पार्टीका उम्मेदवारलाई विजयी गराउन एकजुट भएर लाग्ने प्रतिबद्धता जनाएका छन्।

भेलालाई सम्बोधन गर्दै पर्सा निर्वाचन क्षेत्र नम्बर–२ की उम्मेदवार रिमा कुमारी यादवले शिक्षा, स्वास्थ्य, कृषि र पूर्वाधार विकासलाई आफ्नो प्रमुख प्राथमिकता बनाउने बताइन्। “जनताको आधारभूत आवश्यकतामा केन्द्रित कार्यक्रम ल्याउनेछु,” उनले भनिन्, “स्थानीय तहदेखि संघीय तहसम्मको समन्वयमा योजनाबद्ध विकास अघि बढाइनेछ।”

मालपोत चौकमा आयोजित कार्यक्रममा एमालेका केन्द्रीय सदस्य विजय सरावगी, मधेश प्रदेश उपाध्यक्ष एवं समानुपातिक उम्मेदवार बिचारी यादव, जिल्ला सचिव महेश दास, क्षेत्र नम्बर–२ का संयोजक मनोज कुशवाह, वडा अध्यक्ष वैजु सुवर्णकार, नेता खैरुदिन हवारी, महानगर उपाध्यक्ष लियाकत अली, नविदिन हवारी लगायतले मन्तव्य व्यक्त गर्दै पार्टीलाई बलियो बनाउन सबै एकजुट हुनुपर्नेमा जोड दिए।

त्यस्तै, वीरगंज महानगरपालिकाका मेयर राजेशमान सिंहले शुभकामना सन्देश दिँदै लोकतान्त्रिक प्रक्रियामा सक्रिय सहभागिता जनाउन सबैलाई आग्रह गरे । उनले विकासका योजनामा सबै पक्षको सहकार्य आवश्यक रहेको बताए।

भेला सम्पन्नसँगै एमालेले वीरगंज–३ मा चुनावी अभियान थप तीव्र बनाउने जनाएको छ । स्थानीय नेताहरूका अनुसार घरदैलो, भेटघाट तथा जनसंवाद कार्यक्रमलाई निरन्तरता दिँदै मतदातासँग प्रत्यक्ष सम्पर्क बढाउने निर्णय गरिएको छ। कार्यक्रमको सहजीकरण प्रेस चाैतारी पर्साका अध्यक्ष निरन्जन मिश्रले गरेका थिए।

वीरगंज । वीरगंज महानगरपालिका वडा नं. २८ अन्तर्गत बगही टोलमा जनता समाजवादी पार्टी (जसपा) का प्रतिनिधिसभा सदस्य उम्मेदवार अशोक टेमानीले आफ्नो घरदैलो अभियानलाई सशक्त बनाउँदै मतदातासँग प्रत्यक्ष संवाद गरेका छन्।

उम्मेदवार टेमानीले स्थानीय बासिन्दासँग भेटघाट गर्दै उनीहरूको दैनिक जीवनसँग सम्बन्धित समस्या र अपेक्षाबारे विस्तृत जानकारी लिएका थिए। घरदैलोका क्रममा मतदाताले खानेपानी, शिक्षा, स्वास्थ्य तथा कृषि क्षेत्रका समस्या उठाएका थिए।

स्थानीयले शुद्ध खानेपानीको पहुँच कमजोर भएको, धारा र पाइपलाइनको व्यवस्था पर्याप्त नभएको र गर्मी याममा पानीको अभाव गम्भीर हुने गुनासो गरेका थिए। शिक्षा क्षेत्रमा शिक्षक अभाव, कमजोर भौतिक संरचना र आवश्यक शैक्षिक सामग्रीको कमीले बालबालिकाको पढाइ प्रभावित भएको जनाइएको थियो। स्वास्थ्य सेवामा औषधि, उपकरण र दक्ष जनशक्तिको अभावले सामान्य उपचारका लागि समेत टाढा जानुपर्ने अवस्था देखिएको थियो।

किसानहरूले मल र उन्नत बीउको अभाव, सिँचाइको समस्या र उत्पादनको उचित मूल्य नपाउनु जस्ता चुनौतीहरू सामना गरिरहेको बताए। यसरी उठाइएका समस्याप्रति टेमानीले आफू निर्वाचित भएमा खानेपानी, शिक्षा, स्वास्थ्य र कृषि क्षेत्रमा प्राथमिकता दिने प्रतिबद्धता व्यक्त गरे।

घरदैलो कार्यक्रममा स्थानीयवासीको उत्साहजनक सहभागिता देखिएको थियो। बृद्धदेखि युवासम्मको सक्रिय उपस्थिति थियो र विकास, रोजगारी तथा आधारभूत सेवामा सुधारको स्पष्ट अपेक्षा प्रकट भएको थियो।

त्यसै अवसरमा प्रमोद यादव, बिरेंद्र यादव, सुरजलाल मण्डल, पनालाल मण्डल, चोकट साहनी, विनोद यादव, शंकर राम, सुभधर राम, बलदेव राम, धनराज यादव, सुरज महतो, पनालाल यादव, सुनिता देवी, मधु महतो, दिपक महतो, लक्ष्मी कुमार, कलावती देवी, दिनेश महतो र रुपेश पटेललगायत करिब १२५ जनाले जनता समाजवादी पार्टीमा प्रवेश गरेका छन्।

वीरगंज । नेपाली कांग्रेस पर्सा निर्वाचन क्षेत्र नं. २ का उम्मेदवार तथा पूर्वमन्त्री अजय चौरसिया विरुद्ध स्थानीय युवाहरूले गरेको विरोध प्रदर्शनको भिडियो सामाजिक सञ्जालमा भाइरल बनेपछि क्षेत्रको राजनीतिक माहोल फेरि तातेको छ । घटना शुक्रबार भएको बताइए पनि भिडियो सार्वजनिक भएसँगै आइतबारदेखि व्यापक चर्चा सुरु भएको हो।

पर्सागढी नगरपालिका वडा नं. ३ झबराहास्थित इन्दु रिसोर्ट होटलमा कांग्रेसको नगरस्तरीय भेला चलिरहेका बेला ब्यानरसहित पुगेका युवाहरूको समूहले होटल बाहिर नाराबाजी गरेका थिए । उनीहरूले “भ्रष्टाचार बन्द गर”, “जवाफ दे” र “पुराना अनुहार होइन, नयाँ नेतृत्व चाहियो” जस्ता नारा लगाउँदै विगतका कामबारे सार्वजनिक जवाफदेहिताको माग गरेका थिए।

प्रदर्शनका क्रममा केहीबेर अवस्था तनावपूर्ण बनेपछि सुरक्षाकर्मी परिचालन गरिएको थियो । यद्यपि, कुनै अप्रिय घटना नभएको स्थानीय प्रहरीले जनाएको छ।

विरोधमा उत्रिएका युवाहरूले विगतका कार्यकालमा भएका भनिएका अनियमितताबारे निष्पक्ष छानबिन र स्पष्ट सार्वजनिक जवाफको माग गरेका छन् । उता, भेलाभित्र सम्बोधन गर्दै उम्मेदवार चौरसियाले आफूमाथि लागेका आरोपहरू राजनीतिक पूर्वाग्रहबाट प्रेरित भएको दाबी गर्दै अस्वीकार गरेको स्रोतले जनाएको छ।

स्थानीय राजनीतिक वृत्तका अनुसार उक्त घटनाले क्षेत्र नं. २ का मतदातामा राजनीतिक सचेतना र जवाफदेहिताप्रतिको अपेक्षा झल्किएको चर्चा छ । मतदाताहरूले निर्वतमान जनप्रतिनिधिसँग कार्यकालका उपलब्धि, विकासका काम तथा सुशासनका विषयमा प्रश्न उठाउन थालेको विश्लेषण गरिएको छ ।

वीरगंज । पर्साको ठोरी गाउँपालिका वडा नम्बर–५ सुवर्णपुरमा नेपाल कम्युनिस्ट पार्टी (एमाले) परित्याग गर्दै ७ जना स्थानीय नेता तथा कार्यकर्ता नेपाली कांग्रेस मा प्रवेश गरेका छन्। आगामी निर्वाचनलाई लक्षित गर्दै कांग्रेसको संगठन विस्तार र जनसमर्थन बढ्दै गएको संकेतका रूपमा यस घटनालाई हेरिएको छ।

आयोजित कार्यक्रममा पर्सा क्षेत्र नम्बर–४ का कांग्रेस उम्मेदवार रमेश रिजाल ले नवप्रवेशीहरूलाई टीका लगाएर पार्टीमा स्वागत गरेका थिए। उनले पार्टी प्रवेश गर्ने सबैलाई धन्यवाद दिँदै कांग्रेसको नीति, सिद्धान्त र विकासमुखी योजनामा विश्वास गरेर आएको बताए।

उम्मेदवार रिजालले कार्यक्रममा बोल्दै गाउँ–ठाउँको विकासका लागि एकताबद्ध भएर कांग्रेसलाई विजयी गराउने अभियानमा लाग्न आग्रह गरे। जनताको समस्या समाधान र समृद्धि ल्याउने शक्ति कांग्रेस नै भएको उनको भनाइ थियो।

कार्यक्रममा मधेश प्रदेशका वन तथा वातावरण मन्त्री शंकर चौधरी, कांग्रेस मधेश प्रदेशका महामन्त्री बृहस्पती कृष्ण श्रेष्ठ, क्षेत्रीय सभापति श्रीकान्त प्रसाद यादव लगायत स्थानीय अगुवा, पार्टी कार्यकर्ता तथा समर्थकहरूको उल्लेखनीय उपस्थिति रहेको थियो। नेताहरूले स्थानीयस्तरमा कांग्रेसप्रति आकर्षण बढ्दै गएको र परिवर्तनको पक्षमा जनलहर विस्तार भइरहेको बताएका छन्।