वीरगंज । मधेस प्रदेश सरकारले आगामी आर्थिक वर्ष २०८३/८४ का लागि ४१ अर्ब १३ करोड ८६ लाख रुपैयाँको बजेट सार्वजनिक गरेको छ । प्रदेशका अर्थमन्त्री युवराज भट्टराईले साेमबार प्रदेशसभा बैठकमा कृषि नवप्रवर्तन, उद्यमशीलता प्रवर्द्धन, शिक्षा र स्वास्थ्य क्षेत्रलाई प्राथमिकतामा राख्दै बजेट प्रस्तुत गर्नुभएको हो ।
प्रस्तुत बजेटअनुसार चालुतर्फ १४ अर्ब ६६ करोड ३२ लाख २९ हजार रुपैयाँ र पुँजीगततर्फ २६ अर्ब ४७ करोड ५३ लाख ७१ हजार रुपैयाँ विनियोजन गरिएको छ ।
बजेटका लागि आन्तरिक राजस्वबाट ११ अर्ब २२ करोड ७५ लाख, राजस्व बाँडफाँटबाट १२ अर्ब ८३ करोड, वित्तीय समानीकरण अनुदानबाट ९ अर्ब ४९ करोड ५९ लाख तथा गत आर्थिक वर्षको नगद मौज्दातबाट ६ अर्ब ८ करोड ५२ लाख रुपैयाँ जुटाइने अनुमान गरिएको छ ।
प्रदेश सरकारले सुशासन प्रवर्द्धनका लागि ‘हेलो सीएम एप’ तथा ‘हेलो मुख्यमन्त्री टोल–फ्री नम्बर’ सञ्चालन गर्ने घोषणा गरेको छ । यस्तै, १८ देखि ३५ वर्ष उमेर समूहका युवालाई लक्षित गरी ‘सय दिने रोजगारी ग्यारेन्टी कार्यक्रम’ समेत सञ्चालन गरिने भएको छ ।
महिला सशक्तीकरण तथा शिक्षामा जोड दिँदै यसअघि सञ्चालनमा रहेको ‘मुख्यमन्त्री बेटी पढाऊ, बेटी बचाऊ’ कार्यक्रमलाई परिमार्जन गरी ‘शिक्षित छोरी, सुरक्षित मधेस, उद्यमशील नारी समृद्ध प्रदेश’ कार्यक्रम लागू गरिने अर्थमन्त्री भट्टराईले जानकारी दिनुभयो ।
आगामी आर्थिक वर्षमा एक करोड रुपैयाँभन्दा कम लागतका योजनामा बजेट विनियोजन नगरिने, नयाँ सवारीसाधन खरिद नगर्ने तथा अनुत्पादक खर्च कटौती गरेर पुँजी निर्माणमा केन्द्रित हुने नीति सरकारले लिएको छ ।
त्यसैगरी प्रदेश सरकारअन्तर्गत कार्यरत कर्मचारीहरूको तलबमा १० प्रतिशत वृद्धि गर्ने घोषणा पनि बजेटमार्फत गरिएको छ । प्रदेश सरकारले उत्पादन, रोजगारी, सुशासन र पूर्वाधार विकासलाई केन्द्रमा राखेर बजेट ल्याएको जनाएको छ ।
