वीरगंज । पर्साको धोबिनी गाउँपालिकामा जनप्रतिनिधिहरूबीचको विवादका कारण आगामी आर्थिक वर्ष २०८३/०८४ को नीति तथा कार्यक्रम अन्योलमा परेको छ । सोमबार नीति तथा कार्यक्रम पारित गर्ने उद्देश्यले गाउँसभाको बैठक बोलाइए पनि अध्यक्ष र उपाध्यक्ष पक्षबीच सहमति नजुट्दा बैठक नै बस्न सकेन ।
गाउँपालिकाका स्रोतका अनुसार गाउँपालिका अध्यक्ष मदन चौहान बहुमतका आधारमा नीति तथा कार्यक्रम पारित गर्ने तयारीमा थिए । तर उपाध्यक्ष मञ्जु देवी कुर्मी पक्षले बहुमत आफ्नो पक्षमा रहेको दाबी गरेपछि विवाद थप चर्किएको हो । उपाध्यक्षका श्रीमान् श्याम पटेलले १८ जना गाउँसभा सदस्यको हस्ताक्षरसहित बहुमत आफूहरूसँग रहेको दाबी गरेका थिए ।
दुवै पक्ष आफ्नो अडानमा कायम रहेपछि बैठकमा विवाद र झडप हुन सक्ने सम्भावना देखिएको थियो । यही कारण गाउँपालिकाका प्रमुख प्रशासकीय अधिकृत कृष्णा खतिवडा कार्यालय नआएपछि गाउँसभा बैठक सञ्चालन हुन नसकेको बताइएको छ । अब बैठक कहिले बस्ने भन्ने विषयमा समेत अन्योल कायम रहेको छ ।
स्थानीय सरकार सञ्चालन ऐनअनुसार असार १० गतेभित्र आगामी आर्थिक वर्षको नीति, कार्यक्रम तथा बजेट पारित गरिसक्नुपर्ने व्यवस्था छ । तर पर्साका अधिकांश स्थानीय तहमा जनप्रतिनिधिहरूबीच सहमति नजुट्दा प्रक्रिया प्रभावित भएको छ ।
हालसम्म पर्साका १४ स्थानीय तहमध्ये कुनै पनि पालिकाले आगामी आर्थिक वर्षको बजेट सार्वजनिक गर्न सकेका छैनन् । यद्यपि जगरनाथपुर, जिराभवानी र कालिकामाई गाउँपालिकाले भने आगामी आर्थिक वर्ष २०८३/०८४ को नीति तथा कार्यक्रम पारित गरिसकेका छन् ।
पर्सामा एक महानगरपालिका, तीन नगरपालिका र १० गाउँपालिका गरी १४ स्थानीय तह रहेका छन् । अधिकांश पालिकामा नीति, कार्यक्रम तथा बजेट निर्माणको प्रक्रिया अझै टुंगो लाग्न नसकेको अवस्था छ ।
