वीरगंज । वीरगंज महानगरपालिका–८ पानीटंकीस्थित लिटल बडी प्रि स्कुलमा युकेजी उत्तीर्ण गरी कक्षा १ मा प्रवेश गरेका विद्यार्थीहरूको सम्मानमा भव्य ग्राजुएसन सेरेमोनी सम्पन्न भएको छ ।

विद्यालयका प्रिन्सिपल विजय बलको अध्यक्षता तथा डा. प्रिति यादवको प्रमुख आतिथ्यतामा आयोजित कार्यक्रममा विद्यार्थीहरूको शैक्षिक यात्राको पहिलो महत्वपूर्ण उपलब्धिलाई उत्सवका रूपमा मनाइएको थियो । विशेष पोशाकमा सजिएका नानीबाबुहरूले प्रमाणपत्र ग्रहण गर्दै आफ्नो खुसी व्यक्त गरेका थिए ।

कार्यक्रममा बोल्ने वक्ताहरूले प्रारम्भिक बाल शिक्षाको क्षेत्रमा लिटल बडी प्रि स्कुलले पुर्‍याउँदै आएको योगदानको प्रशंसा गर्दै विद्यालयले गुणस्तरीय शिक्षा, अनुशासित वातावरण तथा बालमैत्री सिकाइ पद्धतिमार्फत वीरगंजमा आफ्नो अलग पहिचान स्थापित गर्न सफल भएको बताएका थिए ।

वक्ताहरूले बालबालिकाको आधारभूत शिक्षालाई मजबुत बनाउन यस्ता विद्यालयहरूको भूमिका महत्वपूर्ण हुने उल्लेख गर्दै आगामी दिनमा पनि विद्यालयले शैक्षिक उत्कृष्टतालाई निरन्तरता दिनुपर्नेमा जोड दिएका थिए ।

विद्यालय परिसरमा आयोजित कार्यक्रममा प्याब्सन वीरगंज महानगरका अध्यक्ष राहुल श्रीवास्तव, सचिव अमित आलोक, कोषाध्यक्ष सुरज पटेल, समाजवादी प्रेस संगठन नेपाल पर्साका अध्यक्ष शम्भु कुमार सुमन, वीरगंज युवा समाजका पूर्वअध्यक्ष कमल चौगाईलगायत शिक्षा, सामाजिक तथा सञ्चार क्षेत्रका व्यक्तित्वहरूको उपस्थिति रहेको थियो ।

कार्यक्रममा विद्यार्थीहरूले विभिन्न सांस्कृतिक प्रस्तुति समेत दिएका थिए । गीत, नृत्य तथा मनोरञ्जनात्मक कार्यक्रमले अभिभावक र अतिथिहरूलाई आकर्षित गरेको थियो । कार्यक्रममा सहभागी अभिभावकहरूले विद्यालयले बालबालिकाको शैक्षिक विकाससँगै आत्मविश्वास र सिर्जनशीलता अभिवृद्धिमा समेत विशेष ध्यान दिएको भन्दै खुसी व्यक्त गरेका थिए ।

वीरगंज । वीरगंज–११ श्रीपुर, नयाँ बस्तीस्थित स्मार्ट जी प्ले स्कुलमा शनिबार अभिभावक भेटघाट कार्यक्रम सम्पन्न भएको छ । विद्यालयले आयोजना गरेको कार्यक्रममा अभिभावक, शिक्षक तथा विद्यालय व्यवस्थापन पक्षबीच बालबालिकाको शैक्षिक तथा व्यवहारिक विकासका विषयमा विस्तृत छलफल गरिएको थियो ।

कार्यक्रमले अभिभावक र शिक्षकबीचको सम्बन्धलाई अझ सुदृढ बनाउनुका साथै बालबालिकाको सिकाइ प्रक्रिया, उपलब्धि र सुधार गर्नुपर्ने पक्षबारे प्रत्यक्ष संवाद गर्ने अवसर प्रदान गरेको सहभागी अभिभावकहरूले बताएका छन् । कार्यक्रममा प्रत्येक बालबालिकाको शैक्षिक प्रगति, कक्षाकोठाभित्रको गतिविधि तथा भविष्यमा अपनाउन सकिने सुधारका उपायहरूबारे जानकारी आदान–प्रदान गरिएको थियो ।

विद्यालयकी प्रिन्सिपल निक्की कुशवाहाले बालबालिकाको समग्र विकासका लागि अभिभावक र शिक्षकबीचको सहकार्य अपरिहार्य रहेको बताइन् । उनले भनिन्, “जब अभिभावक र शिक्षक एकै लक्ष्यका साथ अघि बढ्छन्, तब बालबालिकाले आफ्नो पूर्ण क्षमता विकास गर्न सक्ने वातावरण सिर्जना हुन्छ । विद्यालय र परिवारबीचको समन्वयले नै बालबालिकाको उज्ज्वल भविष्य निर्माणमा महत्वपूर्ण भूमिका खेल्छ ।”

कार्यक्रममा सहभागी अभिभावकहरूले विद्यालयले नियमित रूपमा यस्ता अन्तरक्रियात्मक कार्यक्रम आयोजना गर्दै आएकोमा खुसी व्यक्त गरेका थिए । उनीहरूले विद्यालयले बालबालिकाको शैक्षिक गुणस्तरका साथै नैतिक, सामाजिक तथा व्यवहारिक विकासमा समेत विशेष ध्यान दिएको बताएका थिए ।

सो अवसरमा वातावरण संरक्षण तथा हरियाली प्रवर्द्धन गर्ने उद्देश्यले सहभागी अभिभावकहरूलाई विभिन्न प्रजातिका विरुवा समेत वितरण गरिएको थियो । विद्यालयले शिक्षा मात्र नभई वातावरणीय सचेतना अभिवृद्धिमा समेत योगदान पुर्‍याउने उद्देश्यले विरुवा वितरण कार्यक्रम सञ्चालन गरेको जनाएको छ ।

विद्यालयका अनुसार यस्ता कार्यक्रमले अभिभावक, शिक्षक र विद्यालयबीचको सम्बन्धलाई थप बलियो बनाउने तथा बालबालिकाको सर्वाङ्गीण विकासमा सकारात्मक प्रभाव पार्ने विश्वास लिइएको छ ।