वीरगंज । “जनताको विश्वास, सुझाव र समर्थन नै हाम्रो अभियानको मुख्य आधार” भन्ने नारासहित नेकपा एमाले पर्सा निर्वाचन क्षेत्र नं. १ का उम्मेदवार प्रदीप यादवले आइतबार पनि घरदैलो तथा जनता दर्शन कार्यक्रमलाई निरन्तरता दिएका छन्।

आइतबार बिहान पूर्वमन्त्रीसमेत रहेका यादवले वीरगंज महानगरपालिका वडा नं. २० हरपतगंजमा घरदैलो कार्यक्रम सम्पन्न गरेका हुन्। कार्यक्रमका क्रममा उनले स्थानीय बासिन्दासँग प्रत्यक्ष भेटघाट गर्दै जनताका समस्या, सुझाव र गुनासाहरू सुने।

उम्मेदवार यादवले आगामी दिनमा विकास निर्माणलाई तीव्रता दिने तथा सुशासन कायम गर्न अझ सशक्त रूपमा आवाज उठाउने प्रतिबद्धता व्यक्त गरे। उनले समावेशी विकास, पारदर्शिता र जनउत्तरदायी ढंगले काम गर्ने अठोट दोहोर्‍याए।

घरदैलो कार्यक्रममा नेकपा एमालेका केन्द्रीय नेताहरू, स्थानीय अगुवा नेता–कार्यकर्ता तथा समर्थकहरूको उल्लेख्य सहभागिता रहेको थियो। यादवले वडा नं. २० का मतदाता तथा सर्वसाधारण नागरिकबाट आफूले अपार माया र समर्थन प्राप्त गरेको दाबी गरेका छन्।

वीरगंज। पर्सा निर्वाचन क्षेत्र नम्बर–४ अन्तर्गत कालिकामाई गाउँपालिकाका वडा नं. १ मुडली र वडा नं. ५ बिरन्चीबार्वामा नेपाली कांग्रेसका प्रतिनिधिसभा सदस्य उम्मेदवार रमेश रिजालले घरदैलो कार्यक्रम सम्पन्न गरेका छन्।

घरदैलोका क्रममा रिजालले स्थानीय मतदातासँग प्रत्यक्ष भेटघाट गर्दै क्षेत्र नम्बर–४ को विकास अझ तीव्र बनाउनुपर्ने आवश्यकता औँल्याए। उनले शिक्षा, स्वास्थ्य, सडक तथा रोजगारीका क्षेत्रमा अझै धेरै काम बाँकी रहेको उल्लेख गर्दै उज्ज्वल भविष्यका लागि नेपाली कांग्रेसलाई विकासको सम्वाहकका रूपमा विश्वास गर्न आग्रह गरे।

रिजालले स्थानीयवासीसँग मत माग्दै लोकतान्त्रिक मूल्य र स्थायित्वका लागि कांग्रेसलाई समर्थन गर्नुपर्ने धारणा राखेका छन्। कार्यक्रममा स्थानीय नागरिकहरूको उल्लेखनीय सहभागिता रहेको थियो।

घरदैलो अभियानलाई निरन्तरता दिँदै रिजालले आगामी दिनमा पनि विभिन्न गाउँ–टोलमा मतदाता भेटघाट गर्ने योजना रहेको बताए। कार्यक्रममा मधेस प्रदेश सरकारका वन तथा वातावरण मन्त्री शंकर चौधरी, कांग्रेस पर्साका सभापति एवं प्रदेश सभा सदस्य जनार्धन सिंह क्षेत्री, कांग्रेस मधेश प्रदेशका महामन्त्री बृहस्पती कृष्ण श्रेष्ठ, पर्सा प्रवक्ता रमेश पाण्डे, जिल्ला सह सचिव नविन सिंह, क्षेत्रीय सभापति श्रीकान्त प्रसाद यादव लगायत स्थानीय नेता तथा कार्यकर्ताको उल्लेखनीय उपस्थिति रहेको थियो।

वीरगंज। पर्सा निर्वाचन क्षेत्र नम्बर–२ अन्तर्गत वीरगंज महानगरपालिका वडा नम्बर–२७ उदयपुर घुर्मीस्थित कुहडी टोलमा राष्ट्रिय स्वतन्त्र पार्टी का प्रतिनिधिसभा सदस्य उम्मेदवार सुशील कुमार कानु ले घरदैलो कार्यक्रमलाई निरन्तरता दिएका छन्।

कार्यक्रममा उम्मेदवार कानुले जेष्ठ नागरिक, युवा र स्थानीयवासीसँग प्रत्यक्ष संवाद गर्दै रास्वपा नेतृत्वमा मात्र क्षेत्रका पिछडिएका वर्ग, शिक्षक तथा आम नागरिकको पहुँच सुधार सम्भव हुने विश्वास व्यक्त गरे। उनले वैदेशिक रोजगारीमा गएका युवालाई स्वदेश फर्काएर स्थायी तथा दिगो रोजगारीको व्यवस्था गर्ने प्राथमिकता रहेको बताए।

कानुले विकास, रोजगारी, शिक्षा र कृषिलाई मुख्य एजेन्डा बनाएर जनताको आवश्यकता र चाहनाअनुसार नीतिगत तथा व्यवहारिक रूपमा काम गर्ने प्रतिबद्धता जनाए। उनले समावेशी विकास, सुशासन र अवसर सिर्जनामा आधारित राजनीतिको पक्षमा रास्वपा दृढतापूर्वक उभिएको उल्लेख गरे।

घरदैलो कार्यक्रममा सहभागी स्थानीय मतदाताहरूले परिवर्तनमुखी एजेन्डा बोकेको राष्ट्रिय स्वतन्त्र पार्टीलाई विजयी गराउन एकजुट भई समर्थन जनाएका थिए।

वीरगंज। पर्सा निर्वाचन क्षेत्र नम्बर–१ अन्तर्गत वीरगंज महानगरपालिका वडा नम्बर १२ र १३ मा नेपाल कम्युनिस्ट पार्टी (एमाले) का प्रतिनिधिसभा सदस्य पदका उम्मेदवार प्रदीप यादव ले घरदैलो तथा जनता दर्शन कार्यक्रम सम्पन्न गरेका छन्।

कार्यक्रममा यादवले स्थानीयसँग प्रत्यक्ष संवाद गर्दै दैनिक जीवनसँग सम्बन्धित समस्या, सुझाव र अपेक्षाहरू सुने। उनले शिक्षा, स्वास्थ्य, सडक, खानेपानी, सामाजिक पूर्वाधार र रोजगारी सिर्जनामा प्राथमिकताका साथ काम गर्ने प्रतिबद्धता व्यक्त गरे।

विगतमा निर्वाचित सांसद र मन्त्रीको रूपमा पर्सा जिल्लामा गरेको विकास कार्यको स्मरण गर्दै यादवले सडक सुधार, खानेपानीको सहज पहुँच, विद्यालय र स्वास्थ्य संस्थाको विकास तथा सामाजिक कल्याण योजनाहरू सफलतापूर्वक कार्यान्वयन भएको बताए। उनले आगामी दिनमा थप दिगो र समावेशी विकास कार्यको आधार तयार भएको दाबी गरे।

साथै उनले एमालेको चुनावी एजेन्डालाई स्पष्ट गर्दै विकास, सुशासन, स्वास्थ्य र शिक्षामा सुधार, स्थानीय रोजगार सिर्जना, आर्थिक समृद्धि र महिला तथा सामाजिक समूहहरूको संरक्षणमा जोड दिए।

“हामी विकास, सुशासन र समृद्धिको यात्रालाई निरन्तरता दिनेछौँ। सबैले सूर्य चिन्हमा मतदान गरेर एमालेलाई समर्थन गर्नुपर्छ,” यादवले भने।

घरदैलो कार्यक्रममा नेकपा (एमाले) का नेता, कार्यकर्ता र स्थानीय युवाहरूको उल्लेखनीय सहभागिता रहेको थियो।