वीरगंज । लामो समयदेखि प्रमुख प्रशासकीय अधिकृतविहीन हुँदा आर्थिक कारोबार प्रभावित बनेको वीरगंज महानगरपालिकामा कर्मचारीहरूको रोकिएको तलब भुक्तानी प्रक्रिया सुरु भएको छ । प्रमुख प्रशासकीय अधिकृतका रूपमा बसन्तबहादुर बोहरा जेठ २१ गते हाजिर भएपछि महानगरको आर्थिक प्रशासन सक्रिय बनेको हो ।
बोहरा हाजिर भएको केही दिनमै वीरगंज महानगरपालिकाका नगरप्रमुख राजेशमान सिंह निलम्बनमा परेपछि उपप्रमुख इम्तियाज आलमले निमित्त नगरप्रमुखको जिम्मेवारी सम्हाल्दै कर्मचारीहरूको तलब निकासा प्रक्रिया अघि बढाउन निर्देशन दिएका थिए ।
महानगरपालिकाको आर्थिक प्रशासन महाशाखाका अनुसार पहिलो चरणमा ४६७ जना कर्मचारीलाई ५ करोड ५५ लाख ५० हजार रुपैयाँभन्दा बढी रकम तलबस्वरूप भुक्तानी गरिएको छ ।
लेखा अधिकृत रुपनारायण राउतका अनुसार ५९ जना निजामती कर्मचारी, १४२ जना स्थायी सेवा कर्मचारी र १३३ जना सरसफाइ कर्मचारीलाई तीन महिनाको तलब निकासा गरिएको छ । त्यसैगरी १२० जना करार सेवाका कर्मचारी तथा १३ जना करारका सवारी चालकलाई चार महिनाको तलब भुक्तानी गरिएको उनले जानकारी दिए ।
राउतका अनुसार अझै बाँकी रहेका ६८४ जना कर्मचारीको खातामा पनि आज–भोलिभित्र तलब रकम जम्मा गरिने तयारी भइरहेको छ । पाँच महिनादेखि तलब नपाएका कर्मचारीलाई चार महिनाको तथा चार महिनादेखि तलब रोकिएकाहरूलाई तीन महिनाको तलब उपलब्ध गराइने उनले बताए ।
महानगरपालिकामा कार्यरत स्थायी कर्मचारीहरूको चार महिनादेखि तथा करार कर्मचारीहरूको पाँच महिनादेखि तलब रोकिएको थियो । पहिलो चरणमा स्थायी कर्मचारीलाई तीन महिनाको र करार कर्मचारीलाई चार महिनाको तलब भुक्तानी गरिएको हो ।
महानगरपालिकाले मासिक रूपमा १ हजार १५१ जना कर्मचारीलाई तलबबापत करिब ३ करोड ७६ लाख रुपैयाँ खर्च गर्दै आएको छ ।
यता महानगर क्षेत्रको सरसफाइ तथा फोहर व्यवस्थापनको जिम्मेवारी पाएको निजी साझेदार एनके इन्टरनेशनल प्रा.लि. को समेत पाँच महिनादेखिको भुक्तानी बाँकी रहेको स्रोतले जनाएको छ । महानगरपालिकाले तत्काल सम्पूर्ण रकम भुक्तानी गर्न नसक्ने अवस्था रहेकाले दुईदेखि तीन महिनाको बक्यौता रकम तत्काल निकासा गर्न कार्यवाहक नगरप्रमुख आलमले निर्देशन दिएका छन् ।
प्रमुख प्रशासकीय अधिकृतको आगमनसँगै रोकिएका आर्थिक गतिविधि पुनः सञ्चालनमा आउन थालेपछि महानगरका कर्मचारी तथा सेवा प्रदायक संस्थाहरूमा राहतको अपेक्षा बढेको छ ।
