वीरगंज । पर्साको जगरनाथपुर गाउँपालिका वडा नं. ५ स्थित झाखरा चौकमा रामजानकी मन्दिर निर्माण कार्यको बुधबार शिलान्यास गरिएको छ । पूर्वमन्त्री तथा नेपाली कांग्रेसका केन्द्रीय सदस्य रमेश रिजालले एक कार्यक्रमबीच मन्दिरको शिलान्यास गरेका हुन् ।

मधेश प्रदेश सरकारको आर्थिक सहयोगमा जगरनाथपुर गाउँपालिकामार्फत निर्माण हुन लागेको उक्त मन्दिरको लागत २५ लाख रुपैयाँ रहेको छ । धार्मिक तथा सांस्कृतिक महत्वलाई संरक्षण गर्दै स्थानीय समुदायको आस्थाको केन्द्रका रूपमा मन्दिर निर्माण गर्न लागिएको गाउँपालिकाले जनाएको छ ।

उपभोक्ता समितिमार्फत निर्माण गरिने मन्दिरको काम चालु आर्थिक वर्षभित्रै सम्पन्न गर्ने लक्ष्य राखिएको छ । गाउँपालिकाका अनुसार निर्माण कार्य आगामी असार मसान्तभित्र पूरा गर्नुपर्नेछ ।

शिलान्यास कार्यक्रममा बोल्दै प्रमुख अतिथि रिजालले धार्मिक सम्पदाको संरक्षण र विकासले समाजमा सद्भाव तथा सांस्कृतिक पहिचानलाई मजबुत बनाउने बताए । उनले प्रदेश सरकार र स्थानीय तहको सहकार्यमा भइरहेका विकास निर्माणका कामले ग्रामीण क्षेत्रको समग्र विकासमा टेवा पुग्ने विश्वास व्यक्त गरे ।

जगरनाथपुर गाउँपालिका वडा नं. ५ का वडाध्यक्ष बिहारी महतो नुनियाकाे अध्यक्षतामा भएकाे शिलान्यास कार्यक्रममा नेपाली कांग्रेस पर्साका जिल्ला कोषाध्यक्ष प्रेम थापा, क्षेत्रीय कोषाध्यक्ष विनय द्विवेदी, स्थानीय जनप्रतिनिधि, राजनीतिक दलका प्रतिनिधि, समाजसेवी तथा स्थानीयवासीहरूको उल्लेख्य सहभागिता रहेको थियो ।

स्थानीयवासीहरूले लामो समयदेखि मन्दिर निर्माणको माग गर्दै आएका थिए । मन्दिर निर्माण सम्पन्न भएपछि धार्मिक गतिविधि सञ्चालन गर्न सहज हुने तथा क्षेत्रको धार्मिक पर्यटन प्रवर्द्धनमा समेत योगदान पुग्ने अपेक्षा गरिएको छ ।

वीरगंज । पर्सा प्रहरीले ठूलो परिमाणमा लागूऔषध गाँजा बरामद गर्दै दुई जनालाई पक्राउ गरेको छ ।

जिल्ला प्रहरी कार्यालय पर्साले मंगलबार जारी गरेको प्रेस विज्ञप्तिअनुसार विशेष सूचनाको आधारमा वीरगंज महानगरपालिका–२१ स्थित ड्राइपोर्ट–परवानीपुर सडकखण्डमा चेकजाँचका क्रममा १ क्विन्टल ९ किलो गाँजासहित बोलेरो पिकअप र त्यसमा सवार दुई जनालाई नियन्त्रणमा लिइएको हो ।

प्रहरीका अनुसार इलाका प्रहरी कार्यालय पोखरिया र वडा प्रहरी कार्यालय श्रीपुरबाट खटिएको संयुक्त प्रहरी टोलीले पथलैयाबाट वीरगंजतर्फ आउँदै गरेको बा.१९ च ५७३८ नम्बरको बोलेरो पिकअप रोकी खानतलासी गर्दा गाडीको पछाडिको डल्लामा त्रिपालले छोपेर प्लास्टिकमा प्याक गरिएको ८ वटा पोकामा राखिएको १०९ किलोग्राम गाँजा फेला परेको थियो ।

घटनामा संलग्न रहेको आरोपमा सिन्धुपाल्चोक जिल्लाको बाह्रबिसे नगरपालिका–२ निवासी ३० वर्षीय सुभाष थामी (चालक) र ऐ.कै २८ वर्षीय छत्रबहादुर थामीलाई पक्राउ गरिएको प्रहरीले जनाएको छ ।

बरामद गाँजा, बोलेरो पिकअप तथा पक्राउ परेका दुवै जनालाई नियन्त्रणमा लिएर थप अनुसन्धान भइरहेको जिल्ला प्रहरी कार्यालय पर्साका प्रवक्ता प्रहरी नायब उपरिक्षक हरि बहादुर बस्नेतले जानकारी दिए ।

वीरगंज । पर्सा क्षेत्र नम्बर १ का प्रतिनिधिसभा सदस्य हरि पन्तले विनियोजन विधेयक २०८३ अन्तर्गत प्रतिनिधिसभामा भएको छलफलमा सहभागी हुँदै समस्याग्रस्त सहकारीका बचतकर्ताको रकम फिर्ता, राजस्व विवाद समाधान तथा उद्योगमैत्री वातावरण निर्माणका विषयमा सरकारको ध्यानाकर्षण गराएका छन् ।

मंगलबार प्रतिनिधिसभा बैठकमा बोल्दै सांसद पन्तले समस्याग्रस्त सहकारी संस्थामा रकम जम्मा गरेका बचतकर्ताको निक्षेप फिर्ता गर्न सरकारले ल्याएको एकीकृत बचतकर्ता सुरक्षण कोष स्थापना गर्ने नीतिलाई स्वागत योग्य भएकाे बताए । उनले उक्त नीति प्रभावकारी बनाउन समस्याग्रस्त सहकारी रहेको जिल्लाको जिल्ला प्रशासन कार्यालय, सम्बन्धित स्थानीय तह र नेपाल राष्ट्र बैंकका प्रतिनिधि सम्मिलित तीन सदस्यीय अधिकारसम्पन्न समिति गठन गर्न प्रस्ताव गरे ।

उनले यस्तो समितिलाई कर्जा असुली तथा निक्षेप फिर्तासम्बन्धी सम्पूर्ण प्रक्रिया अघि बढाउने अधिकार दिनुपर्ने धारणा राख्दै कर्जा असुली र निक्षेप फिर्ता सँगसँगै अगाडि बढाउन सके बचतकर्ताले छिट्टै आफ्नो रकम फिर्ता पाउने विश्वास व्यक्त गरे ।

सांसद पन्तले उदाहरणका रूपमा पर्सामा विगत केही वर्षदेखि बन्द रहेको सानोपाइला सहकारी संस्थाको विषय उठाउँदै स्थानीय बचतकर्ताले अर्बौं रुपैयाँ फिर्ता नपाएको तथा सहकारीमा धितो राखिएको घरजग्गासमेत फुकुवा गर्न नसकेको अवस्था रहेको बताए । उनले यस विषयमा सरकारको गम्भीर ध्यान जानुपर्ने आवश्यकता औंल्याए ।

अर्थ मन्त्रालयसँग सम्बन्धित विषयमा बोल्दै सांसद पन्तले सरकारको उच्च, फराकिलो र तीव्र आर्थिक वृद्धिदर हासिल गर्ने लक्ष्य सकारात्मक रहेको उल्लेख गरे । उनले स्वेच्छिक कर अनुपालन, प्रविधिमैत्री राजस्व प्रशासन र शीघ्र कर विवाद समाधान प्रणालीलाई प्रभावकारी रूपमा कार्यान्वयन गर्न आग्रह गरे ।

उनले वर्षौंदेखि थाँती रहेका राजस्व विवाद समाधान गर्न सके आर्थिक गतिविधि विस्तारमा टेवा पुग्ने र निजी क्षेत्र उत्साहित हुने बताए । विगतमा कर तथा राजस्वसम्बन्धी विवाद समयमै समाधान नहुँदा धेरै व्यवसायी राजस्व कार्यालय र अर्थ मन्त्रालय धाउँदा–धाउँदै थाकेर उद्योग तथा व्यवसाय छाड्न बाध्य भएको र कतिपय विदेश पलायनसमेत भएको उनले उल्लेख गरे ।

सांसद पन्तले कुनै पनि राजस्व वा करसम्बन्धी विवाद चालु आर्थिक वर्ष समाप्त भएको निश्चित अवधिभित्र समाधान गर्ने व्यवस्था गर्न तथा त्यसो नभए सम्बन्धित कर्मचारीको कार्यसम्पादन मूल्याङ्कनमै प्रश्न उठ्ने नीति अवलम्बन गर्न सरकारलाई सुझाव दिए ।

त्यसैगरी विनियोजन विधेयकको लगानी तथा वित्तीय क्षेत्रसँग सम्बन्धित कानुन पुनरावलोकन र एकद्वार प्रशासनिक प्रणाली लागू गर्ने नीतिको स्वागत गर्दै उनले उद्योग स्थापनाका क्रममा स्थानीय तह र वडाबाट अनावश्यक अवरोध हुने गरेको गुनासो गरे ।

ठूला लगानीका उद्योग स्थापना गर्न खोज्दा कतिपय स्थानमा व्यक्तिगत स्वार्थ वा लेनदेन नमिल्दा आवश्यक सिफारिस नदिने तथा सञ्चालनका क्रममा पनि विभिन्न अवरोध सिर्जना गर्ने प्रवृत्ति रहेको उल्लेख गर्दै सांसद पन्तले त्यस्ता गतिविधि नियन्त्रण गर्न आवश्यक कानुनी संशोधन गर्न सरकारलाई सुझाव दिएका छन् ।