वीरगंज । जिल्ला प्रहरी कार्यालय पर्साले विभिन्न मुद्दामा अदालतबाट कैद तथा जरिवाना सजाय तोकिएका एक फरार प्रतिवादीलाई पक्राउ गरेको छ ।
पर्सा जिल्ला अदालतबाट भएका फैसला कार्यान्वयन गर्ने क्रममा जिल्ला प्रहरी कार्यालय पर्साको फैसला कार्यान्वयन विशेष टोलीले सोमबार बिहान ८:५० बजे पर्साको पकाहाँ मैनपुर गाउँपालिका–२ निवासी ३४ वर्षीय राजेश सहनीलाई पक्राउ गरेको हो ।
प्रहरीका अनुसार सहनीलाई वीरगंज महानगरपालिका–११ स्थित फेला पारी नियन्त्रणमा लिइएको थियो । पक्राउ परेका सहनीविरुद्ध बैंकिङ कसुर तथा चेक अनादरसम्बन्धी चार वटा मुद्दामा अदालतबाट कैद र जरिवानाको फैसला भएको थियो ।
उनलाई बैंकिङ कसुर मुद्दामा २ दिन कैद र ३ लाख ६० हजार रुपैयाँ जरिवाना, अर्को बैंकिङ कसुर मुद्दामा १ वर्ष ५ महिना ५ दिन कैद र ५५ हजार रुपैयाँ जरिवाना तथा दुई वटा चेक अनादर मुद्दामा जनही ५ हजार रुपैयाँका दरले जरिवाना तोकिएको प्रहरीले जनाएको छ ।
पक्राउ परेका सहनीलाई आवश्यक कारबाही तथा फैसला कार्यान्वयनका लागि पर्सा जिल्ला अदालतमा उपस्थित गराइएको जिल्ला प्रहरी कार्यालय पर्साका प्रवक्ता प्रहरी नायब उपरिक्षक हरि बहादुर बस्नेतले जानकारी दिए ।
प्रहरीले अदालतबाट सजाय तोकिएर फरार रहेका व्यक्तिहरूको खोजी तथा पक्राउ अभियानलाई निरन्तरता दिइरहेको जनाएको छ ।
