Date
मङ्ल, मंसिर १, २०८३
Tue, November 17, 2026
Home Blog Page 686

वीरगञ्ज-२३ मा जसपाको घरदैलो

0

वीरगंज । जनता समाजवादी पार्टी (जसपा) नेपालले वीरगञ्ज महानगरपालिका वडा नम्बर २३ को प्रसाैनी सबैठवा गाउँमा शुक्रबार घरदैलो कार्यक्रम गरेको छ ।

जसपाकाे तर्फबाट वडा अध्यक्ष पदका उम्मेदवार जमुना प्रसाद यादवको नेतृत्वमा गरिएको घरदैलोमा सङ्घीय सांसद् प्रदीप यादव, प्रदेश सांसद एवं पूर्वमन्त्री करिमा बेगम, प्रदेश सांसद जनत अन्सारी, जसपाका नेता मुकेश द्विवेदी, प्रेमबाबु पटेल लगायत सयौँ नेता, युवा, कार्यकर्ता र स्थानीयहरुको सहभागिता रहेको थियो ।

जसपाको तर्फबाट वीरगञ्ज महानगरपालिका मेयर उम्मेदवार राजेशमान सिंहले घरदैलो कार्यक्रमका क्रममा स्थानीयहरुसँग भेटघाट गर्दा उहाँहरुले वैशाख ३० गते हुने स्थानीय तहको निर्वाचनमा छाता छापमा मात्र मतदान गर्ने आग्रह गरे ।

जसपाको नेतृत्वमा वीरगञ्जले विकास गर्न सक्ने र समृद्धि आउने बताउँदै स्थानीयहरुलाई पार्टीका सम्पूर्ण उम्मेदवारलाई अत्याधिक बहुमतका साथ जिताएर पठाउने समेत नेता सिंहको अनुरोध थियो ।

रम्भा मिश्रकाे संकल्प पत्र : वीरगंज बजार २४ सै घण्टा सुचारु

0

वीरगंज । वीरगंज महानगरको उपमेयरका स्वतन्त्र उम्मेदवार रम्भा मिश्राले आफ्नो ‘संकल्प पत्र’ सार्वजनिक गरेकी छिन् । शुक्रबार वीरगंज आयोजित पत्रकार सम्मेलनमा उपमेयरकी उम्मेदवार मिश्राले वीरगंज महानगरपालिकाको विकासको लागि आफ्नो चुनावी ‘संकल्प पत्र’ सार्वजनिक गरेकी हुन् ।

पत्रकार सम्मेलनमा बोल्दै उपमेयरकी उम्मेदवार मिश्राले पुरुष प्रधान देशमा महिलाहरु सधैं उपेक्षामा पर्दै आएको बताइन् । उनले देशमा भएका थुप्रै व्यवस्था परिवर्तनले अवस्थालाई परिवर्तन गर्न नसकेको भन्दै आधा धर्ती आधा आकाश ओगटेका महिलालाई अहिलेपनि समाजले बराबरीको रुपमा स्वीकार्न नसकेको बताइन् ।

घरेलु हिंसा, महिला हिंसा, यौन दुव्र्यवहार, लैंगिक विभेद जस्ता घटनाहरु अहिले पनि दिनहुँ भइरहेको छन्, महिलालाई पुरुष भन्दा कम आँक्ने समाजको पितृसतात्मक दृष्टिकोणलाई परिवर्तन गर्नुपर्ने आवश्यकता मिश्राको भनाइ छ । उनका अनुसार एकजना शिक्षित महिलाले घर परिवारलाई शिक्षित बनाउन सक्छ भने शिक्षित महिला नेतृत्वमा पुगे समाज नै शिक्षित बन्छ भन्ने कुरा प्रमाणित गर्नका लागि राजनीतिक दलभन्दा माथि उठेर स्वतन्त्रबाट वीरगन्ज महानगरपालिकाको उपमेयर पदमा उम्मेदवारी दिएको बताइन् ।

विगत लामो समयदेखि विभिन्न किसिमका सामाजिक संघसंस्थामा आबद्ध भएर समाजको लागि गर्दै आएका काम र गत निर्वाचनमा भोग्नु परेको पराजयले सिकाएको पाठको आधारमा मेरो योगदानको मूल्याङ्कन नगरवासीले गर्नुहुनेछ भन्नेमा आफू पूर्ण विश्वस्त रहेको बताइन् ।

मिश्राले स्वच्छ छवि, स्वच्छ विचार, निःस्वार्थ स्वभाव, इमान्दारिता, निर्भिकता, निष्ठासँगै वित्तीय व्यवस्थापनमा स्नातकोत्तरसम्मको अध्ययन गरेकी महिला उपमेयरमा निर्वाचित हुनुले महिलाहरुको सशक्तिकरण, महिलाका हक अधिकार लगायतको क्षेत्रमा महत्वपूर्ण काम गर्ने विश्वास व्यक्त गरिन् ।

उनले मुलधारका राजनीतिक दलहरुले पनि मधेश प्रदेशकै एक मात्र महानगरपालिकाको मेयर र उपमेयरमा गठबन्धनको नाममा महिलालाई नीति निर्माण तहमा पुग्ने संवैधानिक सुनिश्चिततालाई पनि कुण्ठित पारेको आफूले महसुस गरेको भन्दै यही वैशाख ३० गते हुने स्थानीय तहको निर्वाचनमा आफूलाई उपमेयरमा निर्वाचित गराई महिला अधिकार, स्वभिमान, आत्मसम्मानको रक्षा गर्न सम्पूर्ण नगरबासीमा आग्रह गरिन् ।

मिश्राको घोषणापत्रमा महिला सशक्तिकरण देखि महानगरको भौतिक पुर्वाधार निर्माण, शिक्षा, स्वास्थ्य, युवा तथा बालबालिका, कृषि, सरसफाइ, सामाजिक न्याय, उद्योग पर्यटनका विषयहरु प्राथमिकतामा राखिएको छ । वीरगंज महानरपालिकाको विकासका लागि मेरो संकल्प पत्र नामक उनको चुनावी घोषणापत्रमा महिलाको विषयले पहिलो प्राथमिकता पाएको छ ।

उनले महिला सशतिmकरणका लागि विभिन्न सिपमुलक तालिम तथा प्रशिक्षणहरुको आयोजना गर्ने, हरेक वडाका कम्तिमा ५ सय महिलालाई सिपमुलक तालिम प्रदान गरी आत्मनिर्भर बनाउने, गरिब, दलित एंव अति विपन्न परिवारका छोरीहरुको विवाहका लागि आवश्यक सहयोग गर्ने वाचा गरेकी छन् ।

यस्तै साुमदायिक विद्यालयहरुलाई छात्रा मैत्री बनाउन पहल गर्ने, छात्राहरुलाई आत्मसुरक्षाका लागि तालिम प्रदान गर्ने, हरेक वडामा एमबिबिएस सहितको स्वास्थ्य चौकी र प्रसुती गृहको स्तरोन्न्ती स्थापनाका लागि पहल गर्ने, हरेक वडामा निशुल्क एम्बुलेन्स सुविधाका लागि पहल गर्ने, विपन्न परिवारकी सुत्केरी महिलालाई पोषणका लागि ३ महिनासम्म प्रति महिना ५ हजारको दरले सुत्केरी भत्ता उपलब्ध गराउने बुदा मिश्राको घोषणापत्रमा उल्लेख छ ।

प्रत्येक टोलमा युवाहरुको फिट्नेसका लागि निःशुल्क फिट्नेश क्लबको स्थापना गर्ने, प्रत्येक वडामा निःशुल्क व्यवस्थित सार्वजनिक शौचालय निर्माण गर्ने, सरसफाईमा लागि रहेको शुल्क पुर्ण रुपमा हटाउने, न्यायिक समितिलाई जनमैत्री बनाउन घरदैलोमा नियमित सुनुवाई र छलफल आयोजना गर्ने बुदा पनि घोषणापत्रमा समावेश गरिएको छ ।

करको दायरा घटाउने, वीरगंज बजार २४ सै घण्टा सुचारु राख्ने, किसानका लागि नियमित तालिमको आयोजना गर्ने, सहज विउविजन र मलखादको उपलब्धताका लागि ठाँउ ठाउँमा सुपथ मुल्यको डिपो स्थापनाका लागि पहल गर्ने, नारायणी अस्पताललाई शिक्षण अस्पतालमा स्तरोन्नित गर्न पहल गर्ने, ठाकुरराम बहुमुखी क्याम्पसलाई विश्वविधालयको रुपमा स्तरोन्नती गर्न पहल गर्ने बुदा पनि रम्भा मिश्राको चुनावी घोषणा पत्रमा लेखिएको छ ।

भ्रष्टाचारमा शून्य सहनशीलता अपनाउने राजेशमान र इम्तियाजकाे संयुक्त प्रतिवद्धता

0

वीरगंज । आसन्न स्थानीय तहको निर्वाचनको लागि वीरगञ्ज महानगरपालिकामा ५ दलीय सम्मिलित गठबन्धनले ‘साझा प्रतिबद्धता–पत्र’ सार्वजनिक गरेको छ । ‘जे बोल्छौं, त्यो गर्छौं, त्यति मात्रै बोल्छौं, जति गर्न सक्छौं, ‘सम्भावना’ लाई ‘सम्भव’ बनाउने महाअभियान विकसित वीरगंजका लागि विवेकपूर्ण मतदान’ भन्ने मुल नारासहित गठबन्धनले शुक्रबार वीरगंजमा पत्रकार सम्मेलन गरी घोषणापत्र सार्वजनिक गरेको हो ।

नेपाली काँग्रेस, जनता समाजवादी पार्टी (जसपा), नेकपा माओवादी केन्द्र र नेकपा एकीकृत समाजवादी सम्मिलित गठबन्धनका नेताहरुले संयुक्त रुपमा ‘साझा प्रतिबद्धता’ पत्र सार्वजनिक गरेका हुन् । प्रतिबद्धता–पत्र सार्वजनिक कार्यक्रममा बोल्दै गठबन्धनबाट वीरगंज महानगरपालिकाका मेयरका उम्मेदवार राजेशमान सिंहले देशको अन्य स्थानीय तहको दाँजोमा वीरगंज महानगरपालिकालाई विकासको प्रतिस्पर्धामा अगाडि लैजाँदै एउटा उन्नत नगर बनाउन प्रतिबद्धता जनाए ।

उनले सम्भावनै सम्भावना बोकेको वीरगंज शहर राजनीति परिवर्तन, बलिदानीपूर्ण आन्दोलन र देशको आर्थिक उन्नतिमा अग्रणी भूमिकामा रहेर पनि उपेक्षाको शिकार भएको भन्दै सिंहले गत स्थानीय तहको निर्वाचनमा चुनिएका गलत नेतृत्वका कारण विकासमा मुलुकमै पछाडि परेको वीरगंज महानगरपालिकालाई देशको अन्य स्थानीय तहको दाँजोमा विकासको प्रतिस्पर्धामा अगाडि लग्दै एउटा उन्नत नगर बनाउने अठोट लिएर अगाडि बढेको बताए ।

नेपाली कांग्रेस पर्साका सभापति जनार्दन सिंह क्षेत्रीले पार्टीको केन्द्रीय निर्णय अनुसार गठबन्धनमा आबद्ध सम्पूर्ण पार्टीका जिल्ला स्तरीय नेताहरु एक ढिक्का भएर गठबन्धनका उम्मेदवारलाई जिताउनुपर्ने बताए ।

केन्द्रीय स्तरमा भएको गठबन्धन अनुसार आफ्ना उम्मेदवारलाई जिताउन यसमा आबद्ध सम्पूर्ण दलका जिल्ला स्तरीय नेताहरुको दायित्व र जिम्मेवारी रहेको भन्दै ‘मूल्य र मान्यताको राजनीति गर्नेले राजनीति बेइमानी गर्नु हुँदैन, देशकै आवश्यकताले गठबन्धनमा गएका हौं, हामीले बेइमानी गरेका छैनौं, सबै मिलेर गठबन्धनका उम्मेदवारलाई जिताउन लागि परेको बताए ।

भ्रष्टाचारमा शून्य सहनशीलता अपनाउने गठबन्धनकाे प्रतिवद्धता

गठबन्धनले सार्वजनिक गरेको साझा प्रतिबद्धता पत्रमा जनताको शासन, जनमुखि प्रशासन, पर्यावरण संरक्षण तथा फोहर व्यवस्थापन, ट्राफिक व्यवस्थापन, शिक्षा विज्ञान तथा प्रविधि, स्वास्थ्य, पूर्वाधार विकास तथा पर्यटन, युवा उद्योग एवं रोजगारी, महिला बालबालिका तथा जेष्ठ नागरिक, कृषि तथा पशुपँक्षी, सूचना प्रविधि तथा सञ्चार, खेलकुद, सहिद घाइते तथा अपाङ्ग, साहित्य तथा भाषा सँस्कृत्ति सम्बन्धित विषयहरु समेटिएको छ ।

त्यस्तै जनताको शासन, जनमुखी प्रशासन, सुशासनलाई प्रशासन तथा सेवा प्रवााहको मूलमन्त्र बनाइने, भ्रष्टाचारमा शून्य सहनशीलता अपनाइने, अनावश्यक प्रशासनिक खर्च कटौती गरी, विकास बजेट बढाइने, महानगरको सम्पूर्ण करको पुनरावलोकन गर्दै करको दर घटाइने तथा दायरा बढाइने, पिठिया कर खारेज गरिने, वर्षातको मौका छोपेर हुने गुणस्तरहीन कामलाई नियन्त्रण गर्ने, गरिब तथा विपन्न नागरिकको बिजुली र पानीको न्यून्तम शुल्क महानगरले व्यवहोर्ने महानगर एवं वडाका सेवाहरुलाई अनलाइन सेवा प्रणाली कार्यान्वयनमा ल्याइने तथा विदेशी भई महानगरभित्र व्यवसाय गरि रहेकाहरुको डिजिटल आइडेन्टिफिकेशन कार्ड बनाइने जस्ता उल्लेख गरिएको छ ।

त्यसैगरी फोहरमैला व्यवस्थापन, नाला सफाइ र लामखुट्टे नियन्त्रण गर्न एक महिने ‘सरसफाइ घरदैलो अभियान’ सञ्चालन गर्ने, बु्रमर तथा उपयुक्त प्रविधिको प्रयोगबाट धुलो नियन्त्रण गरिने, फोहर व्यवस्थापनमा सफल विधि कार्यान्वयनमा ल्याइने, घरबाट निस्किने फोहर वर्गीकरण गरी अलगअलग संकलन गर्ने, सरसफाइ शुल्क खारेज गर्ने जस्ता बुंदाहरु साझा प्रतिबद्धता पत्रमा उल्लेख छ । डुबानको र निकासीको समस्यालाई स्थायी रुपमा समाधान गर्न प्राविधिक अध्ययनका आधारमा नाला निर्माण र सुधार गर्ने, ब्रुमर तथा उपयुक्त प्रविधिको प्रयोगबाट धुलो नियन्त्रण गर्ने, नगर क्षेत्रमा नयाँ सार्वजनिक शौचालय निर्माण र जीर्ण शौचालयको मर्मत गरी प्रयोगमा ल्याउने, सहर हरियाली बनाउन वृक्षरोपण, सहरी वन कार्यक्रम र निजी वनलाई प्रोत्साहन गरिने, महानगरबाट नक्सा पास गर्दा १ घर बराबर कम्तीमा २ बिरुवा अनिवार्य रुपमा हुर्काउनैपर्ने नियम लगाउने उल्लेख छ ।

सार्वजनिक जग्गा र पोखरीको संरक्षण गर्नुका साथै सिर्सिया नदीलाई पुरानै अवस्थामा फर्काउने योजना ल्याउने, नदीलाई प्रदूषणमुक्त बनाउन पानी प्रशोधन केन्द्रको स्थापना गर्ने प्रतिबद्धता छ । सहरभरि माकुराको जालो झैं जेलिएका टेलिफोन, ईन्टरनेट तथा टेलिभिजन सेवा प्रदायकहरूका तार र जथाभावी राखिएका होर्डिङ बोर्ड व्यवस्थित, प्लास्टिकको कालो झोलाको प्रयोग न्यूनीकरण गर्दै सबै प्रकारका प्रदूषण नियन्त्रण गर्नुका साथै खुला दिसामुक्त बनाउने भनिएको छ ।

त्यसैगरि ट्राफिक व्यवस्थापन तर्फ नगर ट्राफिक प्रहरीको व्यवस्था गरिने, पार्किङ्गको व्यवस्था गरिने, फुटपाथ व्यवस्थापन गरिने, छाडा चौपाया पूर्ण रुपमा नियन्त्रण गरिने, सवारी चापलाई नियन्त्रण गरिने, ध्वनि प्रदूषणमुक्त वीरगन्जलाई कार्यान्वयनमा ल्याइने प्रतिबद्धता पत्रमा उल्लेख गरिएको छ ।

यसरी नै शिक्षातर्फ सबैका लागि सुलभ शिक्षा’ का लागि विद्यालय भर्ना अभियान चलाइने, सरकारी विद्यालयको भौतिक तथा शैक्षिक गुणस्तर वृद्धि, शिक्षकलाई तालीम र विद्यार्थीलाई नैतिक शिक्षा दिने, बालमैत्री शैक्षिक वातावरण बनाइनुका साथै शिक्षण सिकाइ सामग्री, पुस्तकालय र खेलकुदका सामग्रीको उचित व्यवस्था गर्ने, महानगरका मावि तथा उच्च माविमा प्राविधिक शिक्षामा जोड दिँदै नयाँ पूर्ण प्राविधिक विद्यालय स्थापना गरिने छ ।

सरकारी विद्यालयका बेथिति अन्त्य गर्दै विद्यार्थी संख्याको आधारमा शिक्षक दरबन्दी मिलान गर्ने, गरिब तथा जेहन्दार विद्यार्थीलाई छात्रवृत्ति प्रदान गर्ने, महानगरका वडाहरूको संयुक्त क्लस्टर बनाई गरिब, विपन्न तथा फरक क्षमताका व्यक्तिका लागि लोक सेवा, शिक्षक सेवा र सेना एवं प्रहरी सेवा लगायतको निःशुल्क तयारी कक्षा सञ्चालन गर्ने, महानगरभित्रका पुस्तकालयहरूको स्तरोन्नति र नयाँ पुस्तकालय स्थापना गरी अध्ययनको वातावरण सृजना गर्ने घोषणापत्रमा उल्लेख छ ।

यस्तै महानगरको ग्रामीण वडामा छोरीका लागि कन्या विद्यालय तथा कलेज स्थापना गर्ने, विद्यालयमा स्पोर्टस् तथा आईटी शिक्षकको दरबन्दी कायम गर्ने, निजी विद्यालयको हकमा सरोकारवालाको कार्यदल बनाई अध्ययनका आधारमा समस्या समाधान र सम्भावनालाई प्रोत्साहन दिने साथै वीरगञ्जलाई शैक्षिक हबको रुपमा विकास गरिने घोषणापत्रमा उल्लेख छ ।
यस्तै पूर्वाधार विकास तथा पर्यटनमा व्यवस्थित गोदाम, पार्किङ्ग र अन्य सुविधासहित ट्रान्सपोर्ट नगर स्थापना गरिने, ३२ वटै वडालाई सडक सञ्जालसँग जोड्ने, नयाँ सडक निर्माण गरिने, घण्टाघर चोकमा ओभरब्रिज निर्माण गरिने, महानगरीय पर्यटन सर्किट निर्माण गरिने, पर्यटन बोर्ड गठन गरिने, मधेशी सहिद पार्क र विभिन्न खाली स्थानमा आधुनिक पार्क निर्माण गरिने लगायतका भौतिक पूर्वाधार निर्माण गरिने प्रतिबद्धता पत्रमा उल्लेख गरिएको छ ।

पुजन हाेटलमा भएकाे कार्यक्रममा जपसाका केन्द्रिय सदस्य एवम् प्रतिनिधि सभा सदस्य प्रदिप यादव, संविधान सभा सदस्य एवम् नेकपा एकीकृत समाजवादीका पाेलिट ब्युराे सदस्य रामचन्द्र साह, नेपाली कांग्रेस पर्साका सचिव एवम् वीरगंज महानगरका उप मेयरका उम्मेदवार इम्तियाज आलम, माओवादी केन्द्रका पर्सा जिल्ला इन्चार्ज विजय महताे, जिल्ला अध्यक्ष रामदरश कुशवाहा, जसपा पर्साका अध्यक्ष रामनरेश यादव, नेकपा एकीकृत समाजवादी पर्साका अध्यक्ष बालगाेपाल थापा लगायतकाे उपस्थिती रहेकाे थियाे भने कार्यक्रमकाे संचालन जसपा पर्साका सचिव तबरेज अहमदले गरेका थिए । 

वीरगंज १३ मा कांग्रेसकाे घरदैलाे

0

वीरगंज । वीरगंज महानगरपालिका वडा नम्बर १३ मा पनि नेपाली काँग्रेसले चुनावी घरदैलो र भेटघाट कार्यक्रमलाई तिब्रता दिएको छ । वडा नम्बर १३ मा काँग्रेसका वडा अध्यक्षका उम्मेदवार रुस्तम शेखले बिहीबार नेता कार्यकर्ताहरुको साथमा मुर्ली, राधेमाई, तेजरा टोलेमा हरेक मतदाताको घरमा पुगेर घरदैलो कार्यक्रम गरेका हुन् ।

त्यसक्रममा वडा अध्यक्षका उम्मेदवार शेखले काँग्रेसका उम्मेदवारलाइ मत दिएर जिताउन आग्रह गरे । राजनीति एवम् सामाजीक पेशामा आबद्ध भइ वडा नम्बर १३ का जनताको सुख दुःखमा साथ दिनुका साथै वडाको बिकासका लागि काम गरीरहेका शेखले अब वडा अध्यक्षमा निर्वाचित भएर वडालाई समृद्ध बनाउने बताएका छन् ।

बिहीबारको घरदैलो कार्यक्रममा कांग्रेसका पूर्व जिल्ला सभापति अजय दुवेदी, उप मेयरका उम्मेदवार इम्तियाज आलम,  पुर्व जिल्ला सचिव श्याम पटेल, क्षेत्रिय सभापति अरविन्द गुप्ता,  बुथ सभापति कविर अन्सारी, नेवि संघ पर्साका सभापति बिकाश तिवारी, सचिव समीर मंसूरी, सह सचिव सेराज अंसारी, वडा सदस्यका उम्मेदवार अलाउदिन अंसारी, प्रज्वल साहि, महिला सदस्य निर्मला देवी, दलित महिला सदस्य बिगन देवी धाेवी लगायतकाे सहभागीता रहेको थियो ।

सखुवा प्रसाैनीमा गाेली प्रहार गर्ने युवक पक्राउ

0

वीरगंज । पर्साकाे सखुवा प्रसाैनी गाउँपालिका वडा नं. १ औराहामा भएकाे गाेली प्रहारकाे घटनामा संलग्न एक जनालाई प्रहरीले नियन्त्रणमा लिएकाे छ । स्थानिय मंगलबहादुर भ्लाेनकाे घरमा गाेली चलाएकाे आराेप प्रहरीले सखुवाप्रसौनी गाँउपालिका वडा नं. १ औराहा बस्ने  २७ बर्षिय सल्टु महतोलाई पक्राउ गरेकाे हाे ।

प्रहरीका अनुसार बिहिबार राति ९:२० बजे भ्लोनको घरबाहिर गोली पड्किँदा निजको बाँसको टाटीमा माटोले लिपेको बेरा भएको घरको पश्चिमपट्टिको बेराबाट गोली प्रवेश गरी घरभित्र रहेको चामलको बोराभित्र १ राउण्ड गोली फेला परेको थियाे ।

साेही घटना  सम्बन्धमा अनुसन्धानको क्रममा उक्त घटनामा महतोको संलग्नता रहेको खुल्न आएको हुँदा निजलाई शुक्रबार विहान ०९:३० बजे आफ्नो घर ठेगानाबाट भाग्दै गरेको अवस्थामा नियन्त्रणमा लिइएको जिल्ला प्रहरी कार्यालय पर्साले जनाएकाे छ ।

पक्राउ परेका महताेकाे घर खानतलासी गर्दा निजले घरनजिकै खाली जमिनमा रहेको नालीमा लुकाइछिपाई राखेको १२ बोरको १ नाले घरेलु बन्दुक समेत बरामद भएको जिल्ला प्रहरी कार्यालय पर्साका प्रवक्ता प्रहरी नायब उपरिक्षक ओमप्रकाश खनालले जानकारी दिए ।

महताेमाथी हातहतियार तथा खरखजाना सम्बन्धी कसूरमा अनुसन्धान भइरहेको व्यहोरा प्रवक्ता खनालले वताए ।

उप मेयरकी स्वतन्त्र उम्मेदवार मिश्रद्वारा घरदैलोलाई निरन्तरता

0

वीरगंज । वीरगंज महानगरपालिकाकाे उप मेयरकी स्वतन्त्र उम्मेदवार रम्भा मिश्रले घरदैलो अभियानलाई तीव्रता दिएकी छन् । मिश्रले वैशाख ३० गते हुने स्थानिय तहको निर्वाचनमा  गुलाफ छापमा मतदान गर्न आग्रह गर्दै विभिन्न वडाहरुकाे घर घर पुग्न थालेका हुन् ।

उनले नगरवासिको माया प्रेम सधै पाएकाे वताउँदै चुनावी जस्तो सुकै परिस्थती भए पनि नगरवासी महिला, पुरुष, युवा सबैबाट सहयोग साथ पाउने आशा रहेकाे वताइन ।

बिहिबार वीरगञ्ज महानगरको ग्रामिण २४ र २५ वडा लगायत ईनरवा, नगवामा घरदैलो कार्यक्रममा बोल्दै राजनितीमा महिलाहरुलाई जहिले पनि विभेदमा परीएको देखीन्छ । यसपाली पनि अधिकान्स दलहरु प्रमुख र उप प्रमुख पदमा उम्मेदवारीका लागी टिकट समेत नदिनु महानगरको दुर्भाग्य रहेको बताइन । कुनै महिलालाई समस्या भए समस्या बुझने महिलानै चाहिन्छ भन्दै नगरवासिको चाहना अनुसनर आफु उम्मेदवारी दिएको बताइन ।

विभिन्न ठुला पार्टीहरुको सामना गर्दै विभिन्न चुनौती, वाधा अडचन भए पनि घर घर सबैको माया र आर्शिवादको लागी आएको भन्दै यसपलिको उप मेयरमा गुलाफ छापमा मतदान गर्न आग्रह गरिन ।

पाेखरीया नगरपालिकामा चरम मनाेमानी भयाे : कार्यवाहक मेयर खातुन

0

वीरगंज । पर्साकाे पाेखरीया नगरपालिकाकी कार्यवाहक मेयर सल्मा खातुनले नियम विपरित नगरपालिका संचालन भएकाे वताउँदै आपती जनाएकी छन् । 

वि.सं. २०७४ मा स्थानीय तहमा निर्वाचित जनप्रतिनिधि बैशाख ३० गते हुन लागेकाे निर्वाचनमा उम्मेद्वार हुनका लागि आफ्नाे पदबाट राजीनामा गरि मात्र उम्मेद्वार हुने प्रावधान रहेकाे छ । तर उम्मेद्वार नहुनेकाे हकमा निर्वाचन पश्चात नवनिर्वाचित जनप्रतिनिधिलाई पदभार हस्तान्तरण गरे पश्चात मात्र पदमुक्त हुने व्यवस्था छ ।

चुनाव नलडेकी खातुन पदबाट राजिनामा नदिए आफुलाई वेवास्ता गरिएकाे वताएकी छन् । नगरपालिका कार्यालयमा कानुनी व्यवस्थाकाे धज्जी उडाउदै कार्यहरु भइरहे वताउँदै खातुनले आपत्ती जनाएकी हुन् ।

नगरलाई पूर्ण खाेपयुक्त बनाउन जनप्रतिनिधिकाे महत्वपूर्ण भूमिका रहेपनि आफूलाई कुनै जानकारी नै नदिइ मनाेमानी तवरले नगरपालिका पूर्ण खाेप घाेषित गरिएकाे वताउँदै खातुनले आपत्ति जनाएकी हुन् । अब उपरान्त यस्ताे गैरकानुनी कार्य गरे कदापि सह्य नहुने उनकाे भनाई छ ।

पाेखरियामा जसपा र माओवादी बिच गठबन्धन

0

वीरगंज । पर्साकाे पाेखरिया नगरपालिकामा जनता समाजवादी पार्टी (जसपा)  र नेकपा माओवादी केन्द्र बिच गठबन्धन भएकाे छ । दुबै पार्टीका स्थानिय नेता बिच बिहिबार पाेखरियामा भएकाे छलफलमा बैशाख ३० गते हुने निर्वाचनमा गठबन्धन गर्ने लिखित सहमती भएकाे हाे ।

सहमति अनुसार जसपाका मेयर र उप मेयरका उम्मेदवारलाई माओवादी केन्द्रले सघाउने छन् भने वडाकाे हकमा जसपा बलियाे भएकाे वडामा माओवादी केन्द्र र माओवादी केन्द्र  बलियाे भएकाे वडामा जसपाले सघाउने छन् ।

सहमती पत्रमा माओवादी केन्द्रकाे तर्फबाट प्रदेश कमिटी सदस्य रामबाबु बैठा, नगर अध्यक्ष पानालाल पटेल र जसपाकाे तर्फबाट नगर इन्चार्ज सल्मा खातुन, मेयरका उम्मेदवार राजु साहले हस्ताक्षर गरेका छन् ।

केन्द्रिय निर्देशन र स्थानिय आवश्यकतालाई मध्यनजर गर्दै साटघाट गरिएकाे जसपाका मेयरका उम्मेदवार राजु साहले वताए । सहमती अनुसार नै वडास्तरका उम्मेदवार र नेता, कार्यकर्ताहरुसंग समन्वय गरी आजैकाे मितिदेखी संयुक्त रुपमा चुनाव प्रचार प्रसारमा लाग्ने उनले वताए ।

कांग्रेसका बुथ उपसभापतिसहित दर्जनौंले गरे जसपामा प्रवेश

0

वीरगंज । नेपाली कांग्रेसका दर्जनौं नेता तथा कार्यकर्ताले पार्टी परित्याग गरी जनता समाजवादी पार्टी नेपालमा प्रवेश गरेका छन् ।

जसपाले वीरगञ्ज महानगरपालिका वडा नम्बर १५ लक्षुमनवामा आयोजना गरेको पार्टी प्रवेश एवम् कार्यकर्ता भेटघाट कार्यक्रममा नेपाली कांग्रेसका बुथ उपसभापतिसहित रामवचन पटेलसहित दर्जनौं नेता तथा कार्यकर्ताले जसपा प्रवेश गरेका हुन् ।

नव प्रवेशीहरुलाई मधेश प्रदेशका मुख्यमन्त्री लालबाबु राउत, संघीय सांसद प्रदीप यादव, जसपाबाट वीरगञ्ज महानगरपालिकाको मेयर पदका उम्मेदवार राजेशमान सिंह, जसपाका जिल्ला अध्यक्ष रामनरेश यादव, सचिव तबरेज अहमद, महानगर अध्यक्ष इश्वर यादव, वडा अध्यक्ष पदका उम्मेदवार रमेश यादवलगायतले फुलमाला र गम्छा लगाएर पार्टी प्रवेश गराएका थिए ।

मेयर सरावगीले प्रदेश सरकारसँग कुनै समन्वय नगरेको मुख्यमन्त्री राउतको आरोप

पार्टी प्रवेश कार्यक्रममा बोल्दै मधेश प्रदेशका मुख्यमन्त्री लालाबू राउतले जसपा नेतृत्वमा मधेश प्रदेशले विकासमा फड्को मारेक र जसपाकै नेतृत्वमा वीरगञ्जले पनि विकास गर्ने विश्वास व्यक्त गर्दै पार्टीबाट उठेका सम्पूर्ण उम्मेदवरहरुलाई छाता छापमा मतदान गरेर विजयी बनाउन आग्रह गरे ।
 
महानगरमा यसअघि रहेको नेतृत्वले प्रदेश सरकारसँग कुनै समन्वय नगरेको र सहयोग गर्न चाहेपनि नलिएको आरोप लगाउँदै मुख्यमन्त्री राउतले वीरगञ्जको मेयरमा राजेशमान सिंह जिते सबै पक्षसँग समन्वय गरेर काम गर्ने विश्वास व्यक्त गरे ।

मेयर सरावगीले आरु निकायले गरेकाे कामकाे प्रचारबाजी गरिरहेका छन् : सांसद यादव

त्यसतै संघीय सांसद् प्रदीप यादवले महानगरपालिकाका निवर्तमान मेयर विजयकुमार सरावगीले आफै एउटा पनि विकास निर्माणको काम नगरेको र अन्य दातृ र प्रदेश र संघ सरकारले गरिदिएको कामलाई आफ्नो भनेर प्रचार बाजी गरिरहेको आरोप लगाए ।

‘सरावगीजीले २ सय किलोमिटर सडक बनाएको छु भन्नु हुन्छ तर कहाँ बनाएको छु भन्न सक्नु हुन्छ । वीरगञ्जमा हामीले जता हेर्यौं उता बिग्रेकै सडक छ, खै सरावगीजीले सडक कहाँ बनाउनु भएको छ,’ यादवले कटाक्ष कस्दै भने, ‘अरु निकाय, दातृ संस्था र प्रदेश तथा संघ सरकारले गरेको कामलाई आफ्नो भनेर प्रचारबाजी गर्दै हुनुहुन्छ मेयर सरावगी । आफूले एउटा पनि काम गर्न सक्नु भएको छैन ।

महानगरको मेयर बनेपछि भ्रष्टाचारलाई जरैदेखि अन्त्य गर्छु : राजेशमान सिंह

जसपाबाट वीरगञ्ज महानगरपालिकाको मेयर पदका उम्मेदवार राजेशमान सिंहले आफू निर्वाचित भएर मेयर बनेपछि महानगरमा हुने भ्रष्टचारलाई जरैदेखि अन्त्य गर्ने प्रतिबद्धता व्यक्त गरे । सिंहले महानगरलाई पूर्ण रुपले डिजीटलाइज गरेर नगद कारोबारलाई अन्त्य गर्ने र बिचौलियाले सेवाग्राहीलाई ठग्ने कार्यलाई पनि पूर्ण रुपले खत्ताम पार्ने बताए ।

उनले नेतृत्वमा पुगेपछि यसअघि भएका सम्पूर्ण गलत कामको फाइल खोलेर हरेक दोषीलाई कारवाही गर्न विभिन्न निकायमा सिफारिस समेत गर्ने बताए ।

कार्यक्रममा उपस्थित स्थानीयहरुले यसअघिको महानगरको नेतृत्वले पाँच वर्षसम्म जनतालाई ठगेको र मुर्ख बनाएको बताउँदै आसन्न निर्वाचनमा छाता छापमा मात्रै मतदान गर्ने बताएका थिए । स्थानीयहरुले “छाता छाप जिन्दावाद”, “जसपा जिन्दवादी”, “छाता छापमा मतदान गरौँ” जस्ता नारा पनि लगाएका थिए ।

गठबन्धनले दियो घरदैलोलाई निरन्तरता

0

वीरगंज । जनता समाजवादी पार्टी (जसपा) नेपाल र नेपाली कांग्रेसको गठबन्धनले वीरगञ्जमा घरदैलो कार्यक्रमलाई निरन्तरता दिएको छ । गठबन्धनबाट वीरगञ्जको मेयरमा जसपाबाट राजेशमान सिंह र कांग्रेसबाट उपमेयरमा इम्तियाज आलम उम्मेदवार छन् ।

सिंह र आलमले आइतबार वीरगञ्ज महानगरपालिका वडा नम्बर २६ को सुगौलीमा घरदैलो गरेका छन् । घरदैलोकाे क्रममा स्थानीयहरुसँग भेटघाट गर्दै सिंह र आलमले मेयरमा छाता छाप र उपमेयरमा रुख छापमा मतदान गर्न आग्रह गरे । स्थानीयहरुले पनि सिंह र आलमलाई विजयको शुभकामना दिँदै मेयरमा छाता छाप र उपमेयरमा रुख छापमा मतदान गर्ने प्रतिबद्धता व्यक्त गरे ।

मेयरका उम्मेदवार सिंहले वीरगञ्जको विकास, राष्ट्रियता, लोकतन्त्र र संविधानको रक्षाका लागि गठबन्धन अपरिहार्य रहेको बताउँदै गठबन्धनका मेयर र उपमेयर दुवैले विजय हासिल गर्ने विश्वास व्यक्त गरे ।

सिंहले आफ्नो एक मात्र लक्ष्य नगरको विकास र जनताको सेवा रहेको बताए । जनताको चाहना र नगरको आवश्यकता अनुसार गठबन्धनले विकासलाई अगाडि बढाउने उनले बताए । ‘महानगर समृद्ध बन्नुपर्छ भन्ने सबै नगरबासीको चाहना छ, तर विगतमा नगरको नेतृत्वमा पुगेकाले गर्न सकेनन्’, सिंहले भने, ‘जनअपेक्षा एकातिर थियो, नेतृत्वले अर्कातिर काम गर्यो । म नेतृत्वमा आएँ भने सबैको रायसुझाव लिएर एकीकृत विकासमा लाग्छु ।’

उनले पदमा नरहेपनि जनताको सेवामा आफूले निरन्तर काम गरेको बताउँदै भने ‘पदमा कुनै बेला भइएला, कुनै बेला नभइएला तर म सधै वीरगञ्जबासीसँग छु, हरेक सुखदुःखमा साथमा हुनेछु’, उनले भने, ‘विगतदेखि मैले गर्दै आएको कामलाई अझ फराकिलो रुपमा निरन्तरता दिन्छु ।’

उनले वीरगञ्जमा सडक, खानेपानी, शिक्षा, स्वास्थ्य लगायतमा अझै पछि परेको जनाउँदै त्यसका लागि आफ सधै लाग्ने जनाए ।

त्यस्तै, उपमेयरका उम्मेदवार इम्तियाज आलमलेआफू विजयी भएमा गठबन्धनका नेता, कार्याकर्ता तथा आकांक्षीहरुसँग सुुझाव, सल्लाह र सहकार्य गरी नगरको विकासमा लाग्ने बताए । उनले कांग्रेस र जसपाका कार्यकर्ताहरुलाई समेत इमान्दार भएर चुुनावी अभियानमा लाग्न आग्रह गरे । घरदैलोमा देखिएको उत्साहले आफूहरुको जित सुनिश्चित भइसकेको उनको भनाई थियो ।

घरदैलो कार्यक्रममा जसपाका जिल्ला अध्यक्ष रामनरेश यादव, सचिव तबरेज अहमद, नेपाली कांग्रेसका नेता रामरूप कुर्मी,  प्रकाश उपाध्याय, श्याम पोखरेल, जसपाका नेता मुकेश द्विवेदी, प्रेमबाबु पटेल, जसपाबाट वडा नम्बर २६ का वडा अध्यक्ष उम्मेदवार ग्यासुदीन मियाँलगायत नेपाली कांग्रेस र जसपाका स्थानीय नेता, कार्यकर्ता र स्थानीयहरुको सहभागिता रहेको थियो ।