Date
मङ्ल, मंसिर १, २०८३
Tue, November 17, 2026
Home Blog Page 647

सुबोध स्मृति पुरस्कार पत्रकार देवकोटालाई दिने निर्णय

0

वीरगंज । प्रतीक दैनिकले सुबोध स्मृति पुरस्कार वीरगंजका पत्रकार गोविन्द देवकोटालाई दिने निर्णय गरेकाे छ ।

पत्रकार स्व. सुबोध सिंहको स्मृतिमा चौध वर्षदेखि फोटो विधामा पत्रकारलाई पुरस्कार दिंदै आएकोमा यस वर्षदेखि फोटोबाहेकका विधाका पत्रकारलाई पुरस्कार दिने निर्णय गरेको र देवकोटालाई पुरस्कृत गर्ने निर्णय भएको प्रतीक प्रकाशन समूहले जनाएको छ ।

समूहका अध्यक्ष बिन्दु शर्माको अध्यक्षतामा बिहीवार बसेको बैठकले सो निर्णय गरेको हो । आगामी भदौ १ गते प्रतीक दैनिकको ३६ औं वार्षिकोत्सवको अवसरमा कार्यक्रमको आयोजना गरी पुरस्कार वितरण गरिनेछ ।

यस वर्षदेखि यो पुरस्कारको राशि बढाएर ५१ हजार रुपैयाँ गरिएको छ । रु १० हजारबाट शुरू गरिएको पुरस्कार गत वर्ष ३५ हजार थियो भने यसपटकदेखि ५१ हजार गरिएको हो ।

यसैगरी, समूहको बैठकले वार्षिकोत्सवमा स्तम्भकार विश्वराज अधिकारी, संवाददाता राधेश्याम पटेल, समूहका कर्मचारी मोहन दास तत्वालाई पनि वार्षिकोत्सवको अवसरमा पुरस्कृत गर्ने निर्णय गरेको छ ।

शाइन रेसुङ्गा र रोट्रयाक्ट डिस्ट्रिक्ट बीच सहकार्य गर्न सम्झौता

0

वीरगंज । शाइन रेसुङ्गा डेभलपमेन्ट बैंक लिमिटेड र रोट्रयाक्ट डिस्ट्रिक्ट ३२९२ नेपाल —भुटान बीच सहकार्य गर्ने सम्झौता भएको छ । शाइन रेसुङ्गा डेभलपमेन्ट बैंक लिमिटेडका डेपुटी सिइओ लोकराज पनेरु, रोटरी डिस्ट्रिक्ट ३२९२ नेपाल—भुटानका डिस्ट्रिक्ट गभर्नर राजेन्द्र प्रसाद ध्वजु र डिस्ट्रिक्ट रोट्रयाक्ट रिप्रिजन्जेटिभ लक्ष्मण खरेलबीच सहकार्य गर्ने सम्झौता भएको हो ।

उक्त सम्झौता पत्रमा युवा नेतृत्व, पेशागत विकास र हरित विकास लगायतका विषयमा समेटिएका छन् । रोट्रयाक्ट डिस्ट्रिक्टको उद्देयय बमोजिम विभिन्न सामाजिक कल्याणका परियोजनाहरूलाई प्रेरणादायी, सशक्त र रुपान्तरण गर्ने सम्बन्धी कार्यहरूका लागि संयुक्त रुपमा सहकार्य गर्ने सहमति भएको जनाइएकाे छ ।

रोट्रयाक्ट डिस्ट्रिक्टले गर्ने वातावरण, हरियाली तथा सरसफाई सम्वन्धि कार्य, फोहोर व्यवस्थापन र युवाहरुले गर्ने हरेक कार्यक्रममा बैंकले वित्तिय तथा अन्य सहयोग गर्नेछ । यहि साउन १६ गते शाइन रेसुङ्गा डेभलपमेन्ट बैंक लिमिटेड र रोट्रयाक्ट नेपालबिच सहकार्य गर्ने गरि सम्झौता पत्रमा हस्ताक्षर भएको थियो ।

फेटाकाे बौद्धिमाई मन्दिरमा तोडफोड गर्ने माथी कारवाहीकाे माग

0

परवानीपुर । नेपाल विश्व हिन्दु महासंघ बाराले फेटा गाउँपालिका वडा नं. ३ स्थित प्रसिद्ध धार्मिक स्थल बौधिमाई मन्दिरमा तोडफोड गर्ने माथी कारवाहीकाे माग गर्दै जिल्ला प्रशासन कार्यालय र गाउँपालिकामा ज्ञापन पत्र बुझाएकाे छ ।

महास‌ंघले बाराका प्रमुख जिल्ला अधिकारी कृष्ण बहादुर कटुवाल र फेटा गाउँपालिका प्रमुख रूस्तम अन्सारीलाई ज्ञापनपत्र बुझाएकाे हाे । संघका कार्यबाहक अध्यक्ष सुरेन्द्र शर्माको नेतृत्वमा गएको टोलीले ज्ञापनपत्र मार्फत अपराधीलाई पक्राउगरी छिटो भन्दा छिटो कानुनको कठघरामा ल्याई कानुन अनुसारको कारवाही प्रक्रिया अगाडि बढाउन आग्रह गरेकाे छ ।

साथै टोलीले घटनाप्रति ठूलो ध्यानाकर्षण भएको जनाउँदै अपराधी उम्किन पाए आफूहरु संघर्षका कार्यक्रमबाट अगाडि बढ्ने जनाएकाे छ । ज्ञापनपत्र बुझ्दै प्रमुख जिल्ला अधिकारी कटुवालले प्रशासन यस घटनाप्रति निकै गम्भीर रहेको र अपराधीलाई कुनैपनि हालतमा कानुनको कठघरामा ल्याई कानुन अनुसारको दण्ड, सजाय दिलाएर नै छाडने प्रतिबद्धता जनाए ।

उनले प्रहरीले यस घटनाको छानबिन तिब्र गतिमा अगाडि बढाएको र अपराधी छिटै कानुनको कठघरामा आउने दाबी गरे । साथै उनले अरु कुनै साम्प्रदायिक घटना हुन नदिन प्रशासन हरेक विषय वस्तुलाई निगरानीमा राखेको बताए ।

यसैगरी ज्ञापनपत्र बुझ्दै फेटा गाउँपालिकाका प्रमुख रुस्तम अन्सारीले यस गाउँपालिकामा जनता आफूलाई दुई तिहाई बहुमतले जिताएर पठाएको हुनाले मेरा लागि जनता नै सर्वपरी भएको हुनाले आफू यो घटनाको दोषीलाई छिटो भन्दा छिटो पक्राउ गरायी कानुन अनुसारको सजाय दिलाएर छाडने प्रतिबद्धता जनाए ।

उनले आफू यो घटनाले निकै दुःखित भएको र यस घटनाले यस समाजमा निकै ठूलो दुर्घटना निम्त्याउन सक्ने हुनाले यस्ता क्रियाकलाप हुन नदिन आफू लागिपरेको बताए । उनले अपराधी जो सुकै भए पनि या कुनै पनि जात, जातिको भए पनि त्यसलाई तुरुन्त पक्राउ गरी बढी भन्दा बढी सजाय दिलाएर नै छाडने प्रतिबद्धता व्यक्त गरे ।

प्रमुख अन्सारीले यो घटनाले समाजमा आपसी सम्बन्ध बिगार्ने काम गरेको, हिन्दू, मुस्लिम बिचको भाइचारालाई विगाड्ने काम गरेकोले आफू अझ कुनै यस्ता मानवीय घटना हुन नदिन दिनरात लागिपरेको बताए । उनले समाजका सबै ब्यक्तिहरुलाई संयमिता अपनाउन आग्रह गरे । 

ज्ञापनपत्र बुझाउन आएका नेपाल विश्व हिन्दु महासंघका पदाधिकारीहरुले मन्दिरको अवलोकन समेत गरेका थिए । अहिले मन्दिरमा तोडफोड गरिएको संरचनालाई मेयर अन्सारीको निर्देशनमा मर्मत गर्ने कार्य भइरहेको र मन्दिरको रेखदेख गर्न, त्यसको व्यवस्थापन गर्नका लागि दुईओटा पककी भवनको निर्माण कार्य भइरहेको समेत प्रमुख अन्सारीले जानकारी दिए ।

मर्मत कार्य देखेर नेपाल विश्व हिन्दु महासंघका टोली खुशी भई मेयर अन्सारीलाई धन्यवाद दिएका थिए ।

सो क्रममा विश्व हिन्दु महासंघका कार्यबाहक अध्यक्ष सुरेन्द्र शर्मा, केंद्रीय महासचिव अभिषेक तिवारी, पर्सा कार्यबाहक अध्यक्ष सन्दिप साह, राजकिशोर दास, डा. अनिल झा, गाउँपालिकाका जनप्रतिनीधि लगायत स्थानियहरुको उपस्थिति रहेको थियो ।

गाउँपालिकाले म्याद थप नगर्ने सखुवा प्रसाैनीका करार कर्मचारीहरु आन्दाेलित

0

वीरगंज । पर्साकाे सखुवा प्रसाैनी गाउँपालिकाका करार कर्मचारीहरु आन्दाेलित भएका छन् । गाउँपालिकाले म्याद थप नगर्ने करार कर्मचारीहरु “पिडित करार कर्मचारी संघर्ष समिति” गठन गरेर आन्दाेलनमा उत्रेका छन् ।

उनीहरु बिद्यिको शासनको पालना गर्दै करार सम्झौता नविकरण गर्न र हाम्रो पदमा नयाँ गरिएको विज्ञापन रद्द गर्न माग गर्दै गाउँपालिका अध्यक्ष जसवन्त यादवसहित विभिन्न निकायलाई ज्ञापन पत्र बुझाएका छन् ।

पिडित करार कर्मचारी संघर्ष समितिले बिहिबार पर्साका प्रमुख जिल्ला अधिकारी उमेश कुमार ढकाल, जिल्ला समन्वय समिति पर्साका प्रमुख निरन्जन सर्राफ र नेपाली कांग्रेसका नेता सुरेन्द्र चाैधरीलाई ज्ञापन पत्र बुझाएका हुन् ।

यस अघि बुधबार नै आफुहरुले गाउँपालिका अध्यक्ष जसवन्त यादवलाई पनि ज्ञापन पत्र बुझाएकाे संघर्ष समितिका संयाेजक अभ्यास राउत कम्करले वताए । 

उनले भने “गाउँपालिकाको २०७९।०३।३१ गते शुक्रबार साझ फेसबुक पेजमा प्रकाशित सुचना अनुसार सेवा करारका कर्मचारीहरुले कार्य सम्पादन मुल्याँकन फाराम भरी २०७९।०४।०१ गते भित्र बुझाउन हतारमा र कानून बिपरित कर्मचारीहरुलाई समय नै नदिइ सूचना गरिए पनि हामी बुझायौ । सो पछि हामीलाई काममा खटाइए पनि करार नविकरण पछि १ गते नै देखी हाजिरी गर्ने भन्दै हामी मध्ये अधिकान्सलाई हाजिरी गर्न दिइएन ।”

उनले २०७९।०४।०६ गते ८० प्रतिशत भन्दा बढी अङ्क प्राप्त गर्ने कर्मचारीहरुको मात्र म्याद थप गर्ने सूचना गरी नियतबस आफुलाई मनपर्ने, नातावाद, भोटदिएका कर्मचारीहरुको मात्र कार्य सम्पादन मुल्याँकनमा (८० प्रतिशत) भन्दा बढी अङ्क दिईएको र हामीले भोट नदिएको शंका गरी र हामीबाट आर्थिक फाइदा हुने नदेखे पछि (८० प्रतिशत) भन्दा कम अङ्क दिई म्याद थप नगर्ने पुर्वाग्रही र अन्यायपूर्ण कार्य भएको वताए ।

शनिबार सम्म संघर्ष समितिले उठाएको माँग पुरा नभए आईतबार देखि चरणबद्ध आन्दोलनमा उत्रिने चेतावनी समेत संघर्ष समितिका संयोजक कम्करले दिए । 

कार्य सम्पादन मुल्याँकनको बहानामा राजनैतिक प्रतिशोध र आफ्ना मान्छे मात्र राखी भ्रष्टाचार गर्ने नियतबस अख्तियारको दुरुपयोग गरी हामी माथि अन्याय भइरहेकाे संघर्ष समितिका सचिव उपेन्द्र पासवानले वताए ।

गाउँपालिकाले गरेकाे कार्य सम्पादन मूल्यांकनमा २४ जना करार कर्मचारीहरुकाे ८० प्रतिशत भन्दा कम नम्बर दिएकाे छ । जसकाे नियम अनुसार म्याद थप हुँदैन ।

यता गाउँपालिकाले नयाँ करारका कर्मचारी भर्नाकाे लागि विभिन्न पद विज्ञापन समेत गरेकाे छ । गाउँपालिकाले कार्यालय सहयोगीमा २ जना, बी वर्गको सवारी चालक ४ जना, जि वर्गको सवारी चालक १ जना, आई टु वर्गको सवारी चालक १ जना, जे वान वर्गको सवारी चालक १ जना, पाँचौ तहको हेल्थ असिस्टेन्ट ३ जना, चौथो तहको ल्याब असिस्टेन्ट २ जना, चौथो तहकै अहेब ४ जना, चौथो तहको अनमी ६ जना, पाँचौ तहका मनोसामाजिक परामर्शकर्ता १ जना र चौथो तहको ना.प्र.स. २ जनाकाे लागि विज्ञापन आह्वान गरेकाे छ ।

 

आम्रपालीकाे “लव के लिए बॉयफ्रैंड चाहिए” काे भ्यु ९२ लाख

0

भोजपुरी फिल्मकी लाेकप्रिय अभिनेत्री आम्रपाली दुबेकाे “लव के लिए बॉयफ्रैंड चाहिए” भिडियाे म्युजिक युवटियुबमा ९१ लाख भन्दा बढीले देखेका छन्  । केही दिन पहिला नै रिलीज भएकाे याे गित हाल पनि युवटियुबमा वायरल भइरहेकाे छ ।

याे गित भोजपुरी फिल्म शुभ विवाहकाे हाे । गितकाे भिडियाेमा प्रमोद प्रेमी यादव र आम्रपाली दुबेकाे बीच रोमान्स देख्न सकिन्छ । दर्शक गितकाे भिडियो धेरैले रुचाएका छन् ।

याे गित भाेजपुरी गायक प्रमोद प्रेमी यादव र प्रियंका सिंहले गाएका छन् । गितकाे बोल श्याम देहातीले लिखेका छन् भने ओम झाले संगीत दिएका छन् । अहिले सम्म  ९१ लाख ८५ हजार भन्दा बढी भ्यु क्रॉस भइसकेकाे छ ।

तलकाे लिंकमा क्लिक गरेर तपाईले पनि गित देख्न सक्नु हुन्छ ।

वीरगंजकाे पानिटंकीस्थितमा म्यानेजमेन्ट कलेज संचालन

0

वीरगंज । वीरगंज महानगरपालिकाकाे वडा नं. ८ पानिटंकीस्थित पर्सा म्यानेजमेन्ट कलेजको शुभाराम्भ भएको छ । फुल ऐसी कक्षा सहितको भौतिक पुर्वधार भएको कलेजको बुधबार एक समाहरोहकाे विच विधिवत रुपमा शुभाराम्भ गरिएको हो ।

वीरगंज कलेज तथा रुकुलहरुमा १५ वर्षभन्दा पुराना शिक्षक तथा प्रधायापकहरुको टिमबाट पठन पाठन गराइने उक्त कलेजका कोडिनेटर प्रकाश यादवले जनकारी दिए । पर्सा जिल्लामा एक मात्र कलेज जहाँ ऐसि कक्षा संचालनमा व्यवस्थापन तथा कानुन तहको पढाइ स‌चालन हुने पर्सा म्यानेजमेन्ट कलेजका कोडिनेटर यादवले वताए ।

कलेजले विद्यार्थीहरुलाई भर्ना आवेदन बुधबारदेखि नै धमाधम लिइरहेको छ । कलेजले पहिलो चरणको छात्रविृतिमा विद्यार्थीहरुले नाम निकालन सफल भएपछि एडमिसन फ्रि गर्ने र ३/३ महिनामा हुने आन्तरीक परिक्षामा उतिर्ण हुने उतकृष्ट छात्र/छात्रालाई छात्रविृति दिने कलेजेका प्रिन्सीपल शुसिल ठाकुरले जनाए ।

दलित, अदिवासी, महिला, खेलाडी, कलाकार तथा पिछडिएका विद्यार्थीलाई विषेश सहुलियत रहेको जनाउँदै विद्यार्थीलाई मोटिभेसन, शैक्षिक भ्रमण, योग तथा स्थस्थ्य क्याम लगायतका अतिरीक्त कृयाकलापमा कुनै सुल्क नलिने पनि ठाकुले जानकारी दिए ।

विहान ६ः२० बजे देखी १०ः४० सम्ममा व्यवस्थापन तथा बेलुका ४ बजे देखी ७ः१५ बजे हुने कानुन तहको पढाई हुने कलेजका व्यवस्थापकले जनाएकाे छ ।

वन मन्त्री यादवद्वारा ३३ केभिको अण्डरग्राउण्ड विद्युत प्रसारण लाईन जडानको अनुमती

0

वीरगंज । वन तथा वातावरण मन्त्री प्रदीप यादवले पर्सा र बारा औद्योगिक करिडोरका उद्योगी व्यवसायीले झण्डै ३ दशकभन्दा लामो समयदेखि भोग्दै आएको विद्युत आपूर्ति आपूर्तिको समस्या समाधान गरेका छन् ।

समय–समयमा विद्युत अवरुद्ध हुने, ट्रीपीङ्ग हुने, भोल्टेज कम हुने, अघोषित रुपमा लोडसेडिंग हुने जस्ता समस्याहरुबाट सास्ती खेपीरहेका उद्योगीहरुले अब राहत पाउने भएका हुन् । मन्त्री यादवले लामो समयदेखि रोकिएको पर्सा राष्ट्रिय निकुञ्ज हुँदै बाराको पिलुवा भएर गढीमाईसम्म ३३ के.भि. क्षमताको अण्डरग्राउण्ड (भूमिगत) विद्युत प्रसारण लाइन जडानका लागि मन्त्रालयबाट अनुमति दिएका छन् ।

नेपाल विद्युत प्राधिकरणद्वारा निर्माणाधिन १३२ केभि विद्युत प्रसारण लाईन अन्तर्गत पर्सा राष्ट्रिय निकुञ्ज क्षेत्रमा प्राधिकरणले मागेको अनुमति बुधवार मन्त्री यादवले स्विकृत गरेका हुन् । मन्त्री प्रदीप यादवले वन मन्त्रालयबाट अनुमति नपाएर रोकिएका सबै निर्माणका कामहरु तिव्र गतिमा अघि बढ्ने प्रतिबद्धता गरेअनुरुप विद्युत प्रसारण लाईन जडानको काम अघि बढ्ने भएको छ ।

यस क्षेत्रका उद्योगी व्यवसायीले लामो समयदेखि उक्त समस्या समाधान गर्न आग्रह गर्दै आएका थिए । तर, कुनैपनि सरकारले उनीहरुको समस्या समाधान गर्न अग्रसरता देखाएका थिएनन् । यद्दपी, मन्त्री नियूक्त भएपश्चात उद्योगीहरुलाई उक्त समस्या समाधान गर्ने प्रतिबद्धता व्यक्त गरेका थिए ।

सोही प्रतिबद्धता अनुसार उहाँले उक्त समास्याको समाधान गरेका हुन् । पर्सा राष्ट्रिय निकुञ्ज हुँदै बाराको पिलुवादेखि पूर्व गढीमाई जाने मोडसम्म करिब ४ हजार ८ सय ३० मीटर लम्बाईको ३३ केभि क्षमताको अण्डरग्राउण्ड विद्युत प्रसारण लाईन निर्माण हुने भएपछि बारा पर्साका उद्योगीहरुको माग पनि पूरा भएको वीरगञ्ज उद्योग वाणिज्य संघका अध्यक्ष डा. सुवोध कुमार गुप्ताले बताए ।

मन्त्री यादवका अनुसार राष्ट्रिय निकुञ्ज तथा वन्यजन्तु संरक्षण विभागबाट पेश भएका सम्पुर्ण शर्तहरुको पालना हुने गरी प्रसारण लाईन जडान हुनेछ । वन तथा वातावरण मन्त्रालयको बुधवार बसेको बैठककै निर्णयअनुसार सो क्षेत्रमा भोगाधिकारको जग्गाभित्र पर्ने गरी माग बमोजिम ३३ के.भि. क्षमताको अण्डर ग्राउण्ड विद्युत प्रसारण लाईन निर्माण गर्न नेपाल विद्युत प्राधिकरणलाई अनुमति दिइएको मन्त्री यादवका उप स्वकिय सचिव निखिल बरनवालले जानकारी दिए ।

समाजवादी प्रेस संगठन पर्साकाे प्रथम अधिवेशन सम्पन्न

0

वीरगंज । समाजवादी प्रेस संगठन नेपाल, पर्साकाे प्रथम जिल्ला अधिवेशन बुधबार सम्पन्न भएकाे छ । वीरगंजस्थित नगर सभा गृहमा सम्पन्न अधिवेशनमा मनाेज पटेलकाे अध्यक्षतामा २१ सदस्यीय जिल्ला कार्य समिति निर्विराेध निर्वाचित भएका छन् ।

संगठनकाे उपाध्यक्षमा शम्भु कुमार सुमन, प्रकृति अधिकारी, सचिवमा अजय कुमार चाैरसिया, सह सचिवमा विनाेद पटेल, काेषाध्यक्ष हरिशंकर शर्मा, सदस्यहरुमा नरेश सर्राफ, संताेष साह, दिपक कुशवाहा, शयाम पासवान, दिपेन्द्र गिरी, रामेश्वर चाैरसिया, श्याम सर्राफ, अनुप यादव, सराेज पटेल लगायतका पनि निर्विराेध निर्वाचित भएका छन् ।

यसैगरी अधिवेशनले प्रदेश प्रतिनिधिमा जिल्ला कार्य समितिका सम्पूर्ण पदाधिकारी पदेन प्रतिनिधि रहेने गरी थपमा संजय साह, नरेश सर्राफ, संताेष साह, आशमहमद मियाँ र दिपक चाैरसियालाई पनि निर्विराेध चयन गरेकाे छ ।

त्यसैगरी अधिवेशनले केन्द्रिय प्रतिनिधिमा अध्यक्ष मनाेज पटेल, उपाध्यक्ष प्रकृति अधिकारी र सचिव अजय कुमार चाैरसियालाई पनि निर्विराेध चयन गरेकाे छ ।

अधिवेशनकाे उद्घाटन पूर्व मन्त्री एवम् नेकपा (एकीकृत समाजवादी) का सचिव नागेन्द्र चाैधरीले गरेका थिए ।

कार्यक्रमका प्रमुख अतिथी समेत रहेका सचिव चाैधरीले पर्सेली पत्रकारहरुकाे क्षमता वृद्धि जरुरी रहेकाे वताए । उनले काठमाडाैंकाे मिडिया हाउसहरु विकास गरे पनि वीरगंजकाे मिडिया हाउसहरु त्यसकाे तुलनामा विकास गर्न नसकेकाेमा दुखेसाे समेत पाेखे ।

सचिव चाैधरीले पत्रकारहरुलाई हुँदै नभएकाे समाचार लेखेर कसैकाे चरित्र हत्या नगर्न पनि आग्रह गरे । उनले तथ्यकाे अधारमा सत्य समाचार लेखन मात्र आग्रह गरे । 

मधेश प्रदेशका उद्याेग, पर्यटन तथा वन मन्त्री शत्रुधन महताेले संचार माध्यम प्रतिकाे विश्वास खस्न नदिने गरी समाचार लेख्न आग्रह गरे । उनले पत्रकारलाई विना तथ्य प्रमाणकाे कसैकाे चरित्र हत्या नगर्ने गरी समाचार लेख्न सुझाए । 

मन्त्री महताे लाेकतन्त्र र समाजवादकाे पक्षमा पत्रकारहरुलाई कलम चलाउन आग्रह गरे । मधेश प्रदेश सरकार जहिले प्रेस स्वतन्त्रताकाे पक्षमा रहेकाे जिकिर समेत गरे ।

समाजवादी प्रेस संगठन नेपाल पर्साका उपाध्यक्ष एवम् नेकपा एकीकृत समाजवादीका प्रचार विभागका सचिव प्रकाश खतिवडाले आफुहरु समाजवादी क्रान्तिकाे यात्रामा रहेकाे वताए । उनले पत्रकारिता जहिले पनि समाज रुपान्त्रणकाे लागि हुनु पर्ने वताए ।

संघठन पर्साका अध्यक्ष मनाेज पटेलकाे अध्यक्षतामा भएकाे कार्यक्रममा नेकपा (एकीकृत समाजवादी)का पाेलिट ब्युराे सदस्य एवम् पर्सा इन्जार्ज रामचन्द्र साह, पाेलिट ब्युराे सदस्य एवम् वीरगंज महानगर इन्चार्ज चिरन्जीवी अचार्य, महासचिव भुपराज खड्का, वीरगंज उद्याेग वाणिज्य संघका अध्यक्ष सुबाेध गुप्ता, वीरगंज पब्लिक कलेजका संचालक डा. दिपक शाक्य, नेकपा एकीकृत समाजवादी पर्साका कार्यवाहक अध्यक्ष गंगा खड्का, वीरगंज महानगर अध्यक्ष मनाेज चाैधरी, समाजवादी प्रेस संगठन मधेश प्रदेशका इन्चार्ज सुबाष साह, मधेश प्रदेशका संयाेजक बृजलाल पासवान, केन्द्रिय सदस्य रमेश सुवेदी, रेविन्द्र कार्की, प्रेस सेन्टरका केन्द्रिय सदस्य निरज पिठाकाेठे मगर लगायतकाे उपस्थिती रहेकाे थियाे ।

संगठन पर्साका उपाध्यक्ष शम्भु कुमार सुमनले स्वागत मन्तव्य राखेकाे कार्यक्रमकाे संचालन सचिव अजय चाैरसियाले गरेका थिए । 

सखुवा प्रसाैनीमा कार्य सम्पादन मूल्यांकन निष्पक्ष नभएकाे गुनासाे

0

वीरगंज । सखुवा प्रसौनी गाउँपालिकाले कार्य सम्पादन मुल्यांकन निष्पक्ष नगरेकाे करारका कर्मचारीहरुले गुनासाे गरेका छन् । गाउँपालिका कार्यालयले आफ्नो आधिकारिक फेसबुक आईडीमा साउन १७ गते सार्वजनिक गरेकाे कार्य सम्पादन मूल्यांकन नतिजा निष्पक्ष नरहेकाे उनीहरुकाे गुनासाे छ ।

कार्य सम्पादन मूल्यांकनमा ८० प्रतिशत भन्दा कम नम्बर आएका कर्मचारीहरु मंगलबार भेला भई गाउँपालिकाले बदनियत बस कम नम्बर दिइ आफुहरुलाई हटाउन खोजिएकाे निस्कर्ष निकालेका छन् । उनीहरुले आफुहरु माथि भएको अन्याय र गलत निर्णय बदर गराउन चरणबद्ध आन्दोलन गर्ने पनि निर्णय गरेका छन् ।

कर्मचारीहरुको भेलाले बारुणयन्त्र सहयोगी अभ्यास राउत कम्कर संयोजक र कार्यालय सहयोगी उपेन्द्र पासवान सचिव रहने गरी २१ सदस्यीय संघर्ष समिति समेत गठन गरेका छन ।

बैठकले सुरुमा साउन १८ गते बुधबार गाउँ कार्यपालिकाकाे कार्यालयमा ज्ञापन पत्र बुझाउने पनि निर्णय गरेकाे नवगठित संघर्ष समितिका सचिव उपेन्द्र पासवानले वताए । 

त्यसपछि जिल्ला प्रसासन कार्यालय, जिल्ला समन्वय समितिकाे कार्यालय, मुख्य राजनैतिक दलहरु, मधेस प्रदेस सरकार र संघीय मामिला तथा सामान्य प्रशासन मन्त्रालय, अख्तियार दुरुपयोग अनुसन्धान आयोगमा समेत निश्पक्ष जाचबुझ गरी न्याय दिलाउन ज्ञापन पत्र बुझाउने योजना रहेको उनले वताए ।

गाउँपालिकाले गरेकाे कार्य सम्पादन मूल्यांकनमा २४ जनालाई ८० प्रतिशत भन्दा कम नम्बर दिएकाे छ । जसकाे नियम अनुसार करार अवधिकाे म्याद थप नहुने भएकाे छ ।

मतदाता नमावली संकलनकाे समय अवधी थप्न माग

0

वीरगंज । पर्साका दलित सम्बद्ध संघसंगठनले मतदाता नामावलीमा यसअघि नाम छुटेकाहरुकाको नाम समावेश गर्नका लागि समय अवधी थप्न आग्रह गरेका छन् । राष्ट्रिय दलित पत्रकार संघ नेपालको सहकार्यमा दलित सरोकार मंच नेपालले मंगलबार वीरगंजमा पत्रकार सम्मेलन गरेर मतदाता नामावली संकलनको मसय अवधी थप्न आग्रह गरेको हो ।

वीरगंजस्थित राष्ट्रिय दलित पत्रकार संघ पर्साको सभाहलमा भएकाे पत्रकार सम्मेलनमा संघका सल्लाहकार एंव दलित अगुवा बृजलाल पासवानले विभन्न कारणले यसअघि मतदाता नामावलीमा नाम समावेश हुन छुटेका दलित समुदायका मानिसहरुको नाम मतदाता नामावलीमा समावेश गर्नुपर्ने बताए । उनले चेतनाको अभावमा दलित समुदायका कतिपय मानिसको मतदाता नामावलीमा नाम समावेश हुन छुटेकाले निर्वाचन कार्यालयले वडा स्तर वा पालिका स्तरमा नै फोटो सहित मतदाता नामावली संकलन गर्नुपर्ने माग गरे ।

यसका साथै नागरीकता विधेयक पारीत भएपछि आगामी दिनमा नागरीकता पाउने नागरीको पनि मतदाता नामावलीमा नाम समावेश हुन आवश्यक रहेको उनले बताए । उनले आगामी मंसिरमा हुने भनिएको निर्वाचनलाई लक्षित गरेर भएपनि आगामी दिनमा नागरिकता पाउने नागरीकहरुलाई पनि मत हाल्नबाट बञ्चित गर्न नहुनेमा जोड दिँदै सरकारलाई यसतर्फ ध्यानाकर्षण गराउन पत्रकार सम्म्लेनको आयोजना गरीएको बताए ।

पत्रकार सम्मेलनमा सहभागी दलित समुदायका अगुवाहरुले यसअघि जिल्लास्थित निर्वाचन कार्यालय र इलाका प्रशासन कार्यालय मार्फत मतदाता नामावली संकलन गरिएपनि एक जना मात्र कर्मचारीको भरमा फारम भर्ने, रुजुु गर्ने र कम्प्युटरमा फोटो खिच्ने काम गर्ने कार्य भएको कारण एक हप्ता सम्म पनि सर्वसाधरण जनताले पालो नपाएको तथा मतदाता नामावलीमा नाम दर्ता गराउन छुटेको गुनासो गरे ।

निर्वाचन कार्यालयमा वडाध्यक्ष,पालिका प्रमुख लगायतका जनप्रतीनीधीहरुले कर्मचारीसँगको मिलोमतोमा आफ्ना मान्छेहरुको नाम दर्ता गराउने काममा बढी केन्द्रित भएकोले दैनिक ज्याला मजदुरी गरेर खाने खासगरी दलित, सिमान्तकृत र विपन्न परिवारका नागरीकको मतदाता नमावलीमा नाम छुटेको आरोप पनि उनीहरुले लगाए ।

राष्ट्रिय दलित पत्रकार संघ पर्साका अध्यक्ष श्याम पासवानको अध्यक्षतामा भएकाे पत्रकार सम्मेलनमा नेपाल पत्रकार महासंघ पर्साका उपाध्यक्ष युवराज खड्का, कोषाध्यक्ष संजिव मिश्रा, समाजवादी प्रेस संगठन नेपालका केन्द्रिय सदस्य रमेश सुवेदी, पर्सा अध्यक्ष मनोज पटेल, संघकी सदस्य एंव वीरगंज महानगरपालिका वडा नम्बर ३ की वडा सदस्य संगिता दास लगायत विभिन्न संचारमाध्यममा आबद्ध पत्रकारहरुको उपस्थिती रहेको थियो । कार्यक्रमको सहजीकरण पत्रकार शम्भु कुमार सुमनले गरेका थिए ।