वीरगंज । पर्सा क्षेत्र नं. ४ अन्तर्गत कालिकामाई गाउँपालिकाकाे हरिहरपुर, बिरञ्चीबर्वा र कट्टीबलुवामा जनता समाजवादी पार्टी (जसपा) नेपालका उम्मेदवार डा. कृपासिन्धु चौधरीको घरदैलो कार्यक्रम सम्पन्न भएको छ।

उम्मेदवार चौधरीले घरदैलोका क्रममा मतदातासँग प्रत्यक्ष संवाद गर्दै गाउँका समस्या सुनेका थिए । उनले मतदातालाई आफ्नो चुनाव चिन्ह छातामा मतदान गर्न आग्रह गर्दै विजयी भए जनताको समस्या संसदसम्म पुर्याउने प्रतिबद्धता जनाए ।

डा. चौधरीले आफू शिक्षित र अनुभवी उम्मेदवार भएको दाबी गर्दै, ठाकुर राम क्याम्पस प्रमुख र राष्ट्रिय आयोजना आयोग सदस्य रहँदा गरेको कामसमेत उल्लेख गरे । उनले निर्वाचित भए सधैं जनताको बीचमै रहने विश्वास पनि व्यक्त गरे ।

घरदैलोका क्रममा स्थानियहरूले उम्मेदवार चौधरीलाई फूलको माला लगाएर स्वागत समेत गरेका थिए । उम्मेदवार चाैधरी र जसपा नेपालका नेताहरुले जनमत आफुहरुकाे पक्षमा रहेकाेले आफुहरु नै चुनाव जित्ने दाबी गरेका छन् ।

कार्यक्रममा मधेश प्रदेशका पूर्व उर्जा, सिचाइ तथा खानेपानी मन्त्री एवं प्रदेश सभा सदस्य सिंगासन सा. कलवार, जसपा नेपालका नेता दिनेश कलवार, जयनारायण कुर्मी लगायत स्थानीय नेता र कार्यकर्ताको उल्लेखनीय सहभागिता रहेको थियो।

वीरगंज । पर्सा निर्वाचन क्षेत्र नम्बर–३ अन्तर्गत सखुवा प्रसौनी गाउँपालिका वडा नम्बर–२ जमुनीयामा नेपाल कम्युनिष्ट पार्टी (एमाले)ले चुनावी अभियानलाई तीव्र बनाउँदै अगुवा नेता तथा सक्रिय कार्यकर्तासँग भेटघाट तथा छलफल कार्यक्रम सम्पन्न गरेको छ। एमालेका नेता एवं सखुवा प्रसाैनी गाउँपालिकाका पूर्व अध्यक्ष प्रदीप जयसवालको सक्रियता भेला सम्पन्न भएकाे हाे ।

कार्यक्रममा स्थानीय तहका अगुवा नेता, युवा कार्यकर्ता तथा पार्टी समर्थकहरूको उल्लेखनीय सहभागिता रहेको थियो। छलफलका क्रममा संगठन सुदृढीकरण, घरदैलो अभियानको प्रभावकारिता, मतदाता सम्पर्क विस्तार तथा विकासका एजेण्डालाई जनस्तरसम्म पुर्‍याउने विषयमा विस्तृत रणनीति तय गरिएको सहभागीहरूले बताएका छन् ।

वक्ताहरूले पर्सा–३ को समग्र विकासका लागि कृषि आधुनिकीकरण, सडक तथा पूर्वाधार विस्तार, शिक्षा–स्वास्थ्य सेवाको गुणस्तर अभिवृद्धि र युवालाई रोजगारीसँग जोड्ने दीर्घकालीन योजनामा प्राथमिकता दिनुपर्ने धारणा राखे। उनीहरूले स्थायित्व, सुशासन र समृद्धिका लागि एमाले नै भरपर्दो शक्ति भएको दाबी गरे।

छलफलमा पर्सा–३ का युवा उम्मेदवार रूपेश पाण्डेको भूमिकाबारे पनि सकारात्मक चर्चा भएको बताइएको छ । विगत केही वर्षदेखि बस्ती–बस्ती पुगेर जनताका समस्या बुझ्दै आएका पाण्डेप्रति स्थानीय तहमा विश्वास र अपेक्षा बढ्दो रहेको नेताहरूले उल्लेख गरे । “ग्रासरूट तहमा निरन्तर सक्रियता देखाएका कारण रूपेश पाण्डे फागुन २१ काे निर्वाचनमा जिताउन सक्रिय भुमिका खेल्ने निर्णय समेत भएकाे छ ।”

नेता जयसवालले संगठनलाई एकताबद्ध र अनुशासित बनाउँदै निर्वाचनमा प्रभावकारी परिणाम ल्याउने गरी अभियानलाई अझ सशक्त बनाइने बताए। उनले प्रत्येक टोल र बस्तीमा पुगेर एमालेको नीति, कार्यक्रम र विकास दृष्टिकोण स्पष्ट रूपमा प्रस्तुत गर्न कार्यकर्तालाई निर्देशन दिएका थिए।

राजनीतिक प्रतिस्पर्धा तीव्र बन्दै गएको पर्सा–३ मा जमुनीयामा सम्पन्न उक्त कार्यक्रमलाई स्थानीय स्तरमा एमालेको पक्षमा माहोल निर्माण गर्ने महत्वपूर्ण कडीका रूपमा हेरिएको छ। पार्टीका नेताहरूका अनुसार आगामी दिनमा घरदैलो, टोलसभा, युवासँग अन्तरक्रिया तथा जनसम्पर्क कार्यक्रमलाई थप तीव्र बनाइनेछ।

वीरगंज । पर्सा निर्वाचन क्षेत्र नं. २ अन्तर्गत प्रतिनिधिसभा सदस्य उम्मेदवार अशोक कुमार टेमानीले आफ्नो चुनावी अभियानलाई तीव्रता दिएका छन्। जनता समाजवादी पार्टी, नेपाल (जसपा)का तर्फबाट उम्मेदवारी दिएका टेमानीले सोमबार वीरगंज महानगरपालिका वडा नम्बर १ मा घरदैलो तथा अगुवा कार्यकर्ता भेला कार्यक्रम सम्पन्न गरेका हुन्।

घरदैलोका क्रममा उम्मेदवार टेमानीले ज्येष्ठ नागरिक, महिला, युवा तथा व्यवसायीहरूसँग प्रत्यक्ष भेटघाट गर्दै जनजीवनसँग जोडिएका समस्याबारे संवाद गरे। अगुवा भेलामा स्थानीय बुद्धिजीवी, समाजसेवी, व्यवसायी तथा विभिन्न टोल विकास समितिका प्रतिनिधिहरूको उल्लेखनीय सहभागिता रहेको थियो। कार्यक्रममा टेमानीले आफू केवल मत माग्न नभई समस्या सुन्न र समाधानका लागि स्पष्ट प्रतिबद्धता गर्न आएको बताएका थिए।

भेटघाटका क्रममा स्थानीय बासिन्दाले विशेषगरी खानेपानीको चरम समस्या उठाए। नियमित र स्वच्छ पानीको अभाव, चापाकल तथा धारामा पानी नआउने र कमजोर गुणस्तरका कारण स्वास्थ्य जोखिम बढेको गुनासो गरिएको थियो। यस विषयमा टेमानीले दीर्घकालीन खानेपानी आयोजना सञ्चालनका लागि संघीय स्तरबाट पहल गर्ने प्रतिबद्धता व्यक्त गरे।

त्यसैगरी शिक्षा क्षेत्रको अवस्था सन्तोषजनक नभएको स्थानीय अभिभावकहरूको भनाइ थियो। सामुदायिक विद्यालयहरूमा भौतिक पूर्वाधार, शिक्षक दरबन्दी तथा गुणस्तरीय शिक्षाको अभाव रहेको गुनासो सुनिएपछि टेमानीले विद्यालय स्तरोन्नति, प्राविधिक शिक्षा विस्तार र युवालाई रोजगारीमुखी सीप प्रदान गर्ने योजना अघि सार्ने बताए।

स्वास्थ्य सेवाको पहुँच र गुणस्तरसमेत अर्को प्रमुख मुद्दाका रूपमा उठ्यो। सामान्य बिरामी पर्दा टाढा जानुपर्ने बाध्यता, औषधि अभाव र स्वास्थ्यकर्मीको कमीबारे स्थानीयले ध्यानाकर्षण गराए। टेमानीले वडास्तरमै प्राथमिक स्वास्थ्य सेवा प्रभावकारी बनाउने तथा सरसफाइ अभियान सुदृढ गर्ने आश्वासन दिए।

वर्षायाममा हुने बाढी तथा पानी जम्ने समस्या पनि वडा नम्बर १ का बासिन्दाको चिन्ताको विषय बनेको छ। कमजोर नाला प्रणाली र ढल निकासको अभावका कारण सामान्य वर्षामै सडक तथा घरहरूमा पानी पस्ने अवस्था रहेको स्थानीयको भनाइ छ। यसप्रति टेमानीले वैज्ञानिक ढंगले ढल निकास प्रणाली निर्माण तथा सडक पूर्वाधार सुदृढीकरणका लागि विशेष योजना ल्याउने प्रतिबद्धता जनाए।

अगुवा भेलालाई सम्बोधन गर्दै टेमानीले विकास नारामा सीमित नभई व्यवहारमा देखिनुपर्ने बताए। “जनताको घरदैलोमा पुगेर सुनेका समस्याहरू नै मेरो एजेन्डा हुन्,” उनले भने, “खानेपानी, शिक्षा, स्वास्थ्य, सरसफाइ र ढल निकासका विषयमा संघीय संसद्मा बलियो आवाज उठाउनेछु।” उनले पारदर्शी, जवाफदेही र जनमुखी राजनीति आफ्नो प्राथमिकता रहेको पनि उल्लेख गरे।