वीरगंज । नयाँ आर्थिक वर्ष सुरु भएसँगै पर्सा प्रहरीले नयाँ नेतृत्व पाए पनि त्रिभुवन राजमार्गअन्तर्गत ड्राइपोर्ट–परवानीपुर सडकखण्डमा कवाडी करको नाममा हुँदै आएको अवैध असुली रोकिएको छैन ।

वीरगंज–२२ जगरनाथपुर चोक, रामगढवा, परवानीपुरलगायतका क्षेत्रमा लामो समयदेखि भारतीय नम्बर प्लेटका मालवाहक सवारीसाधनबाट कवाडी करको नाममा रकम असुली हुँदै आएको स्थानीय तथा चालकहरूले बताएका छन् ।

स्थानीयका अनुसार वीरगंज महानगरपालिकाले कवाडी कर असुलीका लागि अमित ठेक्का पट्टालाई ठेक्का दिएको थियो । उक्त ठेक्काको अवधि असार मसान्तमै समाप्त भइसकेको भए पनि नयाँ आर्थिक वर्ष सुरु भइसक्दा समेत ठेकेदार पक्षले कर असुलीलाई निरन्तरता दिइरहेको आरोप छ ।

महानगरपालिकासँगको मौखिक सहमतिका आधारमा असुली जारी राखिएको दाबी गरिए पनि नयाँ आर्थिक वर्षका लागि औपचारिक सम्झौता भइसकेको जानकारी छैन । स्थानीयहरूका अनुसार सम्झौता नै नभएको अवस्थामा पनि विभिन्न स्थानमा ढाँट राखेर सवारीसाधनबाट रकम उठाउने काम भइरहेको छ ।

राजमार्गमा स्थानीय तहले जथाभावी कर तथा शुल्क असुल्न नपाउने व्यवस्था हुँदाहुँदै पनि राजमार्गमै कवाडी करका नाममा रकम उठाइएको भन्दै स्थानीयले प्रश्न उठाएका छन् । महानगरपालिकाले विगतमा गरेको सम्झौताअनुसार पनि पुरानो फलाम, प्लास्टिक, कागज, टायर–ट्युब लगायतका निश्चित कवाडी सामग्रीमा मात्र कर असुल्न पाउने व्यवस्था रहेको बताइएको छ ।

तर उक्त व्यवस्थाविपरीत खाली सवारीसाधन तथा अन्य मालवाहक गाडीबाट समेत रकम असुली भइरहेको चालकहरूको गुनासो छ । उनीहरूका अनुसार कतिपय अवस्थामा रसिद नदिई रकम लिने, रसिदमा उल्लेख भएको रकमभन्दा बढी असुल्ने तथा रकम दिन अस्वीकार गर्दा दुर्व्यवहार गर्ने गरेको आरोप छ ।

जगरनाथपुर चोकमा गण्डक नहरको जग्गामा बनाइएको कर असुली गर्ने छाप्रो यसअघि गण्डक नहर अतिक्रमण हटाउने अभियानअन्तर्गत प्रशासनले डोजर लगाएर हटाएको थियो । तर संरचना हटाइएपछि पुनः त्रिपालको छाप्रो निर्माण गरी असुली सुरु गरिएको स्थानीयको भनाइ छ ।

जगरनाथपुर चोक, रामगढवा र परवानीपुर क्षेत्रमा भारतीय नम्बर प्लेटका मालवाहक सवारीसाधनबाट प्रतिगाडी ४ सयदेखि ७ सय रुपैयाँसम्म असुली भइरहेको आरोप छ । लामो समयदेखि यस विषयमा समाचार सार्वजनिक हुँदै आए पनि अवैध असुली पूर्ण रूपमा रोक्न नसकिएको भन्दै स्थानीयले प्रहरी प्रशासनको भूमिकामाथि प्रश्न उठाएका छन् ।

पर्सा प्रहरी प्रमुखका रूपमा एसपी पवन भट्टराई आएको करिब १० दिन भइसके पनि विगतदेखि हुँदै आएको अवैध असुली रोकिएको छैन । नयाँ प्रहरी नेतृत्व आएपछि अवैध असुली नियन्त्रणमा आउने अपेक्षा गरेका स्थानीय निराश भएका छन् ।

यसैबीच दुई दिनअघि जगरनाथपुर ढाँटबाट प्रहरीले एक जनालाई नियन्त्रणमा लिएर मुद्दा चलाएको छ । वडा प्रहरी कार्यालय श्रीपुरले वीरगंज–२२ का अजयप्रसाद यादवलाई नियन्त्रणमा लिएको हो । यादवमाथि अभद्र व्यवहारसम्बन्धी मुद्दामा अनुसन्धान भइरहेको वडा प्रहरी कार्यालय श्रीपुरका प्रमुख प्रहरी निरीक्षक नवीन थापा मगरले बताए ।

यद्यपि एक जनालाई पक्राउ गरी अभद्र व्यवहार मुद्दा चलाइए पनि जगरनाथपुर क्षेत्रमा कवाडी करका नाममा हुँदै आएको असुली भने नरोकिएको स्थानीयको दाबी छ ।

स्थानीयले राजमार्गमा हुने अवैध असुली तत्काल रोक्न, ठेक्काको वैधानिकता सार्वजनिक गर्न तथा सम्झौताविपरीत रकम असुली भए कारबाही गर्न महानगरपालिका र प्रहरी प्रशासनसँग माग गरेका छन् । स्थानिय प्रहरी प्रशासनकाे मिलाेमताेमा विगत लामाे समयदेखि अवैध असुली हुँदै आएकाे स्थानियहरुकाे आराेप समेत रहेकाे छ ।

काठमाडौं । आम जनता पार्टी (आजपा) का अध्यक्ष तथा पूर्वमन्त्री प्रभु साहले नेपालमा लोकतन्त्रको सवलीकरण नभई ‘सर्वस्वहरण’ भएको दाबी गर्दै वास्तविक लोकतन्त्र स्थापना गर्न अग्रगामी मोर्चा गठन गरिएको बताएका छन् ।

शनिबार काठमाडौंमा आयोजित अग्रगामी मोर्चा घोषणा सभालाई सम्बोधन गर्दै साहले पछिल्लो समय देशलाई संकटतर्फ धकेल्ने प्रयास भइरहेको भन्दै त्यसबाट निकास दिन आफूहरू एकजुट भएको बताए ।

साहले अहंकार, एकाधिकार र सर्वसत्तावादको राजनीतिविरुद्ध सहअस्तित्व, सहकार्य र सर्वस्वीकार्य शासनको पक्षमा आफूहरू रहेको बताए । उनले भने, “उनीहरू अहंकारयुक्त नेपाल चाहन्छन्, तर हामी अहंकारमुक्त नेपाल बनाउन चाहन्छौं । उनीहरू एकांकी र एकाधिकारपूर्ण राजनीति रुचाउँछन्, तर हामी सहअस्तित्वमा आधारित सहकार्य चाहन्छौं ।”

उनले पछिल्लो समय ‘फेक फेस’ मार्फत ‘फेक शासन’ लाद्न खोजिएको आरोप लगाउँदै आफूहरू ‘रियल फेस’ मार्फत वास्तविक शासन र असल शासनको पक्षमा रहेको बताए । उनले वर्तमान राजनीतिक संघर्षलाई विदेशी प्रभावविरुद्ध राष्ट्रिय स्वाधीनताको लडाइँका रूपमा चित्रण गर्दै अग्रगामी मोर्चाले अराजकता र तानाशाहीबाट देशलाई बचाउने दाबी गरे ।

साहले नेपालमा भएका ठूला–ठूला क्रान्ति तथा आन्दोलनहरू पटक–पटक ‘हाइज्याक’ भएको दाबी गर्दै विगतका आन्दोलनको निर्मम समीक्षा गरेर अघि बढ्नुपर्ने आवश्यकता औंल्याए । देश निर्माणको शक्तिको स्रोत जनता भए पनि नक्कली शासकका कारण जनता पटक–पटक ठगिँदै र लुटिँदै आएको उनको भनाइ थियो ।

उनले मोर्चामा आबद्ध सबैलाई पद र पार्टीगत स्वार्थभन्दा माथि उठेर सहअस्तित्व स्वीकार गर्दै देशलाई एकताबद्ध गर्ने राजनीति गर्न आग्रह गरे । टुटफुट र विभाजनको सट्टा एकता तथा ध्रुवीकरण, घृणा र विध्वंसको सट्टा प्रेम, सद्भाव र निर्माणको राजनीति आवश्यक रहेको उनले बताए ।

विगतका गठबन्धनहरू नेतृत्वमा इमानदारिताको कमी, वैचारिक अस्पष्टता, संकीर्णता र व्यक्तिवादी प्रवृत्तिका कारण सफल हुन नसकेको साहले दाबी गरे । अब एकले अर्कालाई प्रयोग गर्ने नभई जोड्ने र सहकार्य गर्ने राजनीतिक संस्कार विकास गर्नुपर्नेमा उनले जोड दिए ।

देशमा जारी संकट अन्त्य गर्न मोर्चा गठन गरिएको बताउँदै साहले सरकार परिवर्तन भए पनि जनताको अवस्था भने परिवर्तन हुन नसकेको टिप्पणी गरे । देशबाट युवाहरू बाहिरिने क्रम नरोकिएको, सेवाका लागि नागरिकले लामो लाइन बस्नुपरेको, व्यापारी तथा व्यवसायी पलायन भइरहेको, किसान निराश रहेको र मूल्यवृद्धि निरन्तर बढिरहेको उनको भनाइ थियो ।

साहले भारतका पूर्वप्रधानमन्त्री अटल बिहारी वाजपेयीको कविता उद्धृत गर्दै आफूहरू पद र सत्ता प्राप्तिका लागि नभई देशको संकट समाधान गर्न एकजुट भएको स्पष्ट पारे । उनले अग्रगामी मोर्चा सरकार बनाउने वा गिराउने, भागबण्डा गर्ने अथवा पद बाँडफाँट गर्ने उद्देश्यले गठन नभएको दाबी गरे ।

“हाम्रो एकता कुनै पद प्राप्तिका लागि होइन, अनि सत्ताको साझेदारीका लागि पनि होइन । यो मोर्चा संकट समाधानका लागि एउटा महासहकार्य हो,” साहले भने ।

उनले अग्रगामी मोर्चाले हिमालको हित, पहाडको प्रगति र मधेशको मान बढाउने दाबी गर्दै आफूहरूको मोर्चा समग्र देशको हित चाहनेहरूको मोर्चा भएको बताए ।

साहले अग्रगामी मोर्चा विगतको राजनीतिक निरन्तरता नभई ‘क्रमभंग’ भएको दाबीसमेत गरे । आफूहरूले लिएको विचार, संकल्प, एजेण्डा र राजनीतिक कार्यशैली नयाँ भएकाले मोर्चा पनि नयाँ स्वरूपको भएको उनको भनाइ थियो ।

उनले समानता र न्यायका लागि आफूहरू संघर्षरत रहेको भन्दै देश र जनतालाई विभेद तथा अन्याय हुन नदिने प्रतिबद्धता व्यक्त गरे ।