वीरगन्ज । मेहनतले आत्मविश्वास जगाउँछ र आत्मविश्वासले आत्मबल बढाउँछ भन्ने भनाइलाई गौतम माध्यमिक विद्यालयका दुई विद्यार्थी आरव कुमार सिंह र आयुशी चौरसियाले व्यवहारमै प्रमाणित गरेका छन् ।
माध्यमिक शिक्षा परीक्षा (एसईई) को नतिजा सार्वजनिक हुँदा आरव र आयुशीले ३.९ जीपीए प्राप्त गरेका थिए । कम्प्युटर विषयमा अपेक्षाभन्दा कम ‘ए’ ग्रेड आएपछि उनीहरू निराश बने । आफूले परीक्षामा दिएको उत्तरमा पूर्ण विश्वास भए पनि नतिजाले उनीहरूको मेहनतमाथि प्रश्न उठाएको जस्तो महसुस भयो ।
तर उनीहरूले हार मानेनन् । अभिभावक र विद्यालयको साथ पाएपछि सुरुमा पुनर्गणनाका लागि निवेदन दिए । पुनर्गणनाबाट पनि अपेक्षित परिणाम नआएपछि उनीहरू उत्तरपुस्तिका पुनःपरीक्षणका लागि राष्ट्रिय परीक्षा बोर्ड पुगे ।
उत्तरपुस्तिका तीन जना परीक्षकबाट पुनः जाँच गराइयो । पुनःपरीक्षणपछि औसत अंकका आधारमा कम्प्युटर विषयमा ‘ए प्लस’ आएपछि आरव र आयुशीको जीपीए ४ पुगेको हो । उनीहरू नेपाल टप गर्न सफल भए ।
आफ्नो मेहनत र आत्मविश्वासका कारण उत्कृष्ट नतिजा हासिल गरेका दुवै विद्यार्थीलाई गौतम माविले सम्मानस्वरूप ल्यापटप प्रदान गरेको छ ।
विद्यालयको प्रार्थना समयमा आयोजित कार्यक्रममा प्रधानाध्यापक गणेश क्षेत्री, सहायक प्रधानाध्यापक ललित कर्ण तथा कम्प्युटर शिक्षक टिएन चौधरीले आरव र आयुशीलाई ल्यापटप हस्तान्तरण गरे ।
ल्यापटप हस्तान्तरणपछि विद्यालयकी प्रबन्ध निर्देशक परीक्षा पिया लामाले विद्यार्थीहरूलाई बधाई दिँदै आगामी शैक्षिक यात्राका लागि शुभकामना दिइन् । उनले आरव र आयुशीले देखाएको आत्मविश्वास र आत्मबलबाट आफू अत्यन्तै खुसी भएको बताउँदै उनीहरूको सफलतामा अभिभावक तथा विद्यालयका शिक्षक–शिक्षिकाको महत्वपूर्ण भूमिका रहेको उल्लेख गरिन् ।
विद्यालयका निर्देशक सोनाम लामाले विद्यालय स्थापनादेखि एसएलसी तथा एसईई परीक्षामा विद्यार्थीहरूले हासिल गर्दै आएको सफलताले विद्यालयको संस्थागत उचाइ बढाएको बताए । उनले विद्यार्थीहरूको उपलब्धिले गुणस्तरीय शिक्षामा थप अगाडि बढ्न प्रेरणा मिलेको उल्लेख गरे ।
ल्यापटप ग्रहण गर्दै आरव र आयुशीले सफलता प्राप्त गर्न निरन्तर मेहनत, संघर्ष र अनुशासन आवश्यक रहेको बताए । शिक्षकहरूले पढाएका विषयलाई गहिराइमा अध्ययन गर्ने र नियमित रूपमा मेहनत गर्ने हो भने आफूले चाहेजस्तो नतिजा हासिल गर्न सकिने उनीहरूको भनाइ थियो ।
कहिलेकाहीँ आफूले अपेक्षा गरेजस्तो नतिजा नआए पनि निराश भएर आफूलाई कमजोर बनाउनुको सट्टा आत्मविश्वास र आत्मबल बलियो बनाएर अघि बढ्नुपर्ने उनीहरूले विद्यार्थीहरूलाई सुझाव दिए । पाठ्यपुस्तकको अध्ययनसँगै अतिरिक्त क्रियाकलापलाई पनि सँगसँगै अघि बढाउन उनीहरूले आग्रह गरे ।
विद्यालयका कोअर्डिनेटर सौराज प्रधानले आरव र आयुशीको आत्मविश्वास, आत्मबल र मेहनतको कदर गर्दै उच्च शिक्षाका लागि थप प्रोत्साहन गर्ने उद्देश्यले ल्यापटप प्रदान गरिएको बताए ।
कार्यक्रममा विद्यालयका प्रशासन प्रमुख रमेश शर्मा, इनोभेसन प्रमुख एल्भिन रेञ्जरलगायत शिक्षक तथा विद्यार्थीहरूको उपस्थिति थियो ।
